MARKUS 5
5
Yesus dat arke aotewerisimef
(Mat. 8:28-34; Luk. 8:26-39)
1Barewen. Yesusam, amamkawi owam, e poman ajiremfesen. E capinmi, Gerasa samat capinmi arawen. 2Yesusam asowkuefen. Asowkuef masirin, jipic cowok Yesuspu akan aakenawomefen. Ar awerem asan ewenawefen. Datam e ipic jak aman aemapawirien. 3E ipic masirin, e awerem asan aemapawirien. Owam e ipic rantai manam bajikapom emporfes opoken. 4Bap ara, ow, bar arke, e ipic banam, bweyam, rantai manam ajikapoma aefesen. E nat, e ipic e rantai apwikima aeefen. E bwey aemapoma aefes besiam ajakama aeefen. E ipic faknakut aememefen. Inimas ow e ipic bwemkumimosom asan opoken. 5Bap ara, jokam, iramam, e ipic e awerem asanam, e sikon asanam, jen ajiawirien. Aram foro ek e adam arma asesakama ajiawirien.
6E ipicam aenawef ara, aram Yesus dawon opok inim aporefen. Ar masirin, Yesuspu je akukuenawomef, wunam abipu jine onok aneyotapefen. 7Aram atakam awutnakut afakaytawefen. “Yesus! Or e opnakut Allah atiw ara. Or ucim pok emcenem? Dor Allah bipu janim or aanimamin. Oram do bajurusum arapok.” Inim aeefen. 8Bap ara, Yesus, jirmec, e ipic jak aman dat, ajirimefen. “Dat! Or e ipic jak aman ewfisey.” Inim aeefen. Inimas e ipic e atakam aotawefen.
9E Yesus masirin, jonow atowporefen. “Or ucim juwasam?” Inim aeefen. E ipic araw, “Da dat arke awapom ara. Inimas dojuwasam, ‘Arke.’ ” Inim aeefen. 10E datam janim Yesus fak aanimefen. “Or dar wun capinmi baysos jirmec bajirim arapok.” Inim aeefen.
11Barewen. O cesa arke e sikon fop pok memen apakayemfesen. 12E datam janim Yesus aanimfesen. “Dar e o cesa jak aman bafiwaptotor jirmec ajirimcarowey.” Inim aefesen. 13Yesus masirin, “Bare, inima.” Inim aeefen. Bare, e dat takasam e ipic jak aman awarimisfesen. Ar masirin, e o dam aman awarimfiwtotorfesen. E o, aram dua ribunew ajiwar arawen. Aram takas e emtow inim sikon fop akukusayneyfesen. Aram bwi akan aakpua inim aetotorfesen. Aram bwi damir aaffesen.
14E o cesa manmok batiw owam omar ajisosfesen. Aram eras e kota aemapfes owam, e kampung aemapfes owam, atakam aotawfesen. E ow masirin, eras bapor asayosfesen. 15Aram Yesuspu ameromfesen. Yesuspu ameromfes masirin, ar e dat arke jak aman awarimwisfes ipic aorfesen. E ipic pakaian epcomam, bi binip akat apcomam, aemapefen. E ow inimas aporfes, aram omar aefesen. 16E ipic aemefas aporfes ow, eras atemen e ameromfes ow atamfesen. Aram e ow aemfesas atemen atamfesen. 17Bare, e owam e Yesus e acapinmi bakan bajios janim fak aanimfesen.
18Yesusam ci basawu aememefen. Ci basawu aememef, e dat e jak aman awarimwisfes ipic, e Yesus bamuw janim fak aanimefen. 19E Yesus nat, “Oram bamuw arapok. E nat, oram cema. E Tuhan e awutnakut or aemtamanas, atakam e ow mamotawey. E Tuhan saw akat or aoworporanasam atakam e ow mamotawey.” Inim aeefen. 20Bare, e ipicam erasan ewjisosef, wunam e kota Dekapolis jamam e samatin samatin takas ajisosefen. Ar e Yesus e awutnakut aemtamefas, atakam e ow aotawefen. E atakam jen ajifes owam junum awut aefesen.
Yairus aporesam, asan pwicak aemapawiri cowocam, atakam
(Mat. 9:18-26; Luk. 8:40-56)
21Barewen. Yesus e poman aoapirefen. Poman aoapiref masirin, ow arkenakut aramat ipic fumi e jopir aamwiciremfesen. 22Sembahyang cem kepala ipic juwas Yairusam aenawefen. Ar e Yesus bi aporef, aram aramat ipic bipu bi fop aneyjiapefen. 23Aram janim fak Yesus aanimefen. “Dopores damir bafken. E nat, oram dey! Oram ban e dopores dam ton batatiwey. Ar damir bafasin. Inimas aram ajaworsitcema.” Inim aeefen.
24Bare, Yesusam, e ipicam, akac ajarfesen. Ow arkenakutam Yesus fa asoromfesen. Aram Yesus dam akakajumamtawfesen.
25E ow arke aman, cowoc cowok cen es tahun dua belas ajiwar batayu opok aememefen. 26Dokter arkeam obat e cowoc emporfes opoken. E cowocam e apok takas e dokter arke abwitamkurumefen. E nat, ar asan akat bemap opokuten. E ajurusemefas kayimin kayimin akayimefen. 27-28Bap ara, e cowocam e Yesus aemawirias, atakam jen ajiefen. Aram bi binip aceceremefen. “Dor e Yesus baju ban akurumtewcey, dam akat aememcimin.” Inim bi binip aceceremefen. Inimas ara, ar ow arke aman, Yesus fa ajamsoromef, wunam e abaju ban akurumtewefen. 29E abaju ban akurumtewef masirin, e es asarimtayuefen. Aram dam akat aememef aporefen. 30Bare, Yesus, ow dam ajaworomtewef fakas e adam afisef asarimporefen. Ar masirin, e ow arke aman, bin afiriefen. Aram, “A dobaju ban ca kurumtewman?” Inim aeefen.
31E amamkawi owam atakam e aramat ipic aotawfesen. “E ow arkenakut e odam akakajumamenes. Or masirin, ‘A dobaju ban ca kurumtewman?’ inim aemem, ucimaram?” Inim aefesen.
32Yesus asamanam e ow arke ajiomefen. Aram e abaju akurumtewef cowoc manmok apepemporefen. 33E cowocam e dam akat aememef aporefen. Inimas aram omar aeefen. Aram dam tetete ajiemef, wunam Yesus bipu bi fop aneyjiapefen. Aram e aemefas takas atakamnak aotawefen. 34Yesusam atakam e cowoc aotawefen. “Dopores akatenem. Or asicimamenem. Inimas dam akat aememamem. Bare, asan akat e ocem jisosey. E or ajurusumawirinas tajisoscow.” Inim aeefen.
35Yesus atakam cowocemtawmepaw, e sembahyang cem kepala ipic juwas Yairus acem ow, e Yairuspu ameromfesen. “Opores, bare damir emcaafor. Oram e Guru bojurusum arapok.” Inim aefesen.
36Yesusam e atawfes atakam jen baji opok cimin aememefen. Aram atakam e sembahyang cem kepala ipic aotawefen. “Oram omar arapok. Allah basicim cowoka.” Inim aeefen. 37Yesusam wun ow a mamjar acuw aatefen. Ar Petrusam, Yakobusam, Yohanesam, e ow cowok a mamjar akat arawen. 38Bare, ar e sembahyang cem kepala ipic e cem ajaremfesen. Ajaremfes masirin, Yesus e jisuwan awutam, e bwec awutam, aporefen. 39Aramat ipicam e cem afiwemefen. Cem afiwemef masirin, aram jonow e ow atowporefen. “A jisuwan aemamokom ucimaram? Car ucim bwecam? E jiwi damir opok. Ar isi pwitamesor.” Inim aeefen.
40E owam Yesus uc aomocfesen. Aramat ipic nat, e ow cem aman awarimisimefen. Ar e jiwi aricipicam, arosowocam, e aramat ipic akac aemfes owam, inim ow cowok atewefen. Ar masirin, a jiwi aemamesef kamar afiwfesen. 41Aram e jiwi ban acapimomef, wunam atakam e jiwi aotawefen. “Talita kum.” Inim aeefen. E atakam, daratakam juw buwumtew, “Ata. Dor atakam or aotawmin. Basitey,” inim ara. 42Bare, e cowoc jiwi asarimsitef, wunam ajarefen. E aporfes owam junum awutnakut aefesen. Bare, e cowoc jiwiam umur tahun dua belas ajiwar arawen. 43Yesusam jirmec fak e ow ajirimefen. “Car e apormokomas, atakam kawey ow botaw arapok.” Inim aeefen. Aram e ow, amos, e cowoc jiwi batetam atakam atawefen.
Đang chọn:
MARKUS 5: LAICNS
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
LAI 1985
