MARKUS 2
2
Yesus japow ipic ajaworomtewef
(Mat. 9:1-8; Luk. 5:17-26)
1Asep jofay ara, Yesus kota Kapernaum aofasiefen. Ow arkeam, “Yesus cem awap,” inim atakam jen ajifesen. 2Ow arkenakutam ajarewsiemfesen. Inimas e cem aman, asan opok cowok arawen. E cesen e jimasappu, aram asan opok cowok arawen. Aramat ipic nat, e cem aman, Allah atakam acacapiomefen. 3Ow empat ajiwaram, japow ipic, erasan atowotnawfesen. 4E nat, erasan ow arkenakut aememfesen. Inimas ar e japow ipic Yesuspu bwemtowomiw asan opoken. Aram inimas aporfes, wunam e cem op aaptometfesen. Aram e Yesus kus sotop aemamesef onew jof afimapomfesen. Ar masirin, e japow ipic tepen epcom, e cenes atewnemfesen. 5Yesusam e ow a basicimnak aporefen. Ar masirin, atakam e japow ipic aotawefen. “Ata. Dor e odosa akokoromosomtamamin.” Inim aeefen.
6Wun Allah Jirmec mamememtam owam erasan aemapfesen. Aram bi binip aceceremtotorfesen. 7“Awamec ipic e atawmar atakam ucimaram? Ar Allah awcawor arawen. Inimas ar pwicak atakam awut atawma. E dosa bakokoromosomtam ipic, bare Allah arop araman.” Inim aefesen. 8Yesusam e ow e bi binip aceceremfesas asarimporefen. Ar masirin, “Car e bi binip aceceremamokomas ucimaram? 9Dor e ton atakam e japow ipic botaw, ucim atakamaramnew? ‘Dor e odosa akokoromosomtamamin,’ inim atakam aranew? Wunam, ‘Basitey. E otepen batewey. Oram bajarey.’ Inim atakam aranew? 10Bare, e Asmat Anakat Ajaworemef Ipic, awames capinmi ow dosa bakokoromosomtam fakas aomomamar araman. Dor eras car aporomtamamin.” Inim aeefen. Ar masirin, atakam e japow ipic aotawefen. 11“Basitey! E otepen batewey! Oram cema!” Inim aeefen.
12Bare, e japow ipic asitefen. Aram e atepen asarimtewef, wunam ajisosefen. E ow takas eras aporfesen. Aram junum awut aefesen. Aram Allah asicimfesen. “Dar inimas basam bat opokut.” Inim aefesen.
Yesus, Lewi, a mamkawi jirmec ajirimef
(Mat. 9:9-13; Luk. 5:27-32)
13Barewen. Yesus e jopir aoneyefen. E ow arkeam aramat ipicpu aenawomfesen. Aramat ipic masirin, atakam e ow amememtamefen. 14Aram ajaref ara, ar jipic juwas Lewi bi aporefen. E Lewi, Alfeus atiw arawen. E Lewi e pemerintah uang batawanimtam cem aman aemapefen. Yesusam atakam e aramat ipic aotawefen. “Mamkawican.” Inim aeefen. Bare, Lewi asitef, wunam ar Yesus ajamkawiefen.
15Yesusam e Lewi cem amos aemenefen. Pemerintah uang batawanimtam ow arkeam, dosa ow arkeam, aenawfesen. Ar e Yesusam, e amamkawi owam, amos akac aemenfesen. Bare, e pemerintah uang batawanimtam ow arkeam, dosa ow arkeam, e Yesus ajamkawifesen. 16Wun Allah Jirmec mamememtam ow, Yesus e dosa owam, e pemerintah uang batawanimtam owam, amos akac aemenfes aporfesen. Ar masirin, jonow e Yesus mamkawi ow atowporfesen. “E Yesus e pemerintah uang batawanimtam owam, e dosa owam, amosam bwiam akac aanmes ucimaram?” Inim aefesen. (Bare, e jonow atowporfes Allah Jirmec mamememtam ow, aram Parisi ow arawen.)
17Yesusam e jonow atowporfesas jen ajiefen. Ar masirin, “Dam akat ow dokter janim manim opok aemcemes. E nat, dam pwicak ow dokter janim aanimcemes. Dor tarowat ow bayte bapenaw opok. Do nat, fasi ow bayte aapenawof.” Inim aeefen.
Amos pok bamase
(Mat. 9:14-17; Luk. 5:33-39)
18Barewen. Jofay ara, e Yohanes mamkawi owam, e Parisi mamkawi owam, amos pok amasefesen. Wun owam Yesus ameromfes, wunam jonow atowporfesen. “E Yohanes mamkawi owam, e Parisi mamkawi owam, amos pok amasemes. E omamkawi ow nat, amos pok aanmes. E ucim inimaram?” Inim aefesen.
19E Yesusam atakam aotawefen. “E ay petew ipic, e ajowow cowkon aemapmesnew, e ajowow amos pok bamase open? Bare, e ay petew ipic e ajowow cowkon aemapmesnew, e owam amos pok aanmes. 20Asep jofay nat, ow e ay petew ipic e ow wasec aemtewcemes. E jofay ara, e ajowow amos pok amasecemes.”
21“Ow, ay picin, tarey baju ton bakakamimapomporji opok. Ar ay picin, tarey baju ton akakamimapomces, wunam e baju bwi acicikimces, bare e ay picin, e tarey baju akekemtawcema. E kay masirin, jirow aojirowcema. 22Owam, ay anggur bwi, tarey picin bwi ese bowapomporji opok. Ow ay anggur bwi, tarey picin bwi ese aowapomces, e ay anggur bwi e picin ateremomiscema. E bwiam aokoyameskurumcema. E nat, ow, ay anggur bwi, ay picin bwi ese aowapomcemes.” Yesus inim aeefen.
Yesusam, Parisi owam, Ses Ban Jo, atakam aamtawfes
(Mat. 12:1-8; Luk. 6:1-5)
23Barewen. Ses Ban Jo ara, Yesusam, amamkawi owam, gandum kebun ajarfesen. E amamkawi ow ajarfes ara, aram e pok akan eke ametemkokomtawfesen. 24E Parisi ow masirin, atakam Yesus aotawfesen. “Jakaperey. E ow aemamesas, e Allah Jirmec aopowmes. Ar ucim inimaram?” Inim aefesen.
25E Yesus masirin, “Car e Daud aemefas, baca bwem opoknew? Aramat ipicam, amamkawi owam, amos pok opok cowok aememfesen. Aram amosto awut arawen. 26Inimas ara, e Daud, Allah cem afiwefen. Afiwef masirin, aram e Allah bipu atatitamfes amos aemenefen. Wunam ar e wun amos, e amamkawi ow, sey aseyetamefen. E nat, mami ow e amos memen, karow arawen. E Allah atakam mamtaw tugas ow cowok, e amos a memen arawen. Bare e jofayam, Abiyatar, Allah atakam mamtaw tugas ipic awut, tugas aemawirien.”
27“Allah, asmat ow, Ses Ban Jo bi binip bacomomawar jirmec ajirimef ara, er e asmat ow asan akat bomas ara. E nat, ar e asmat ow e Ses Ban Jo jirmec desen ji bwe pwicaken. 28Inimas ara, e Asmat Anakat Ajaworemef Ipic, e Ses Ban Jo aramat ipic aememama.” Inim aeefen.
Đang chọn:
MARKUS 2: LAICNS
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
LAI 1985
