Máfìù 27
27
O ló Zízɛ̀ ká Pálɛ̀ píé
(Máà 15.1; Lúù 23.1-2; Zɔ̃̀ɔ̃́ 18.28-32)
1Lɛ̀ làapíé e kɛɛ, sálà‐ɓò‐Wálà‐mɔ̀‐mìà kpànazɛ̀ séĩ́, ɛ̃́ɛ̃́ Zúù‐mìà dìè‐dìè vɔ̀ o wéé o kíe nì wéè mɔ̀ Zízɛ̀ gbĩ mɔ̀, kɛ ó à zɛ. 2O Zízɛ̀ yèlè, o ló à ká, wa nɔ Pálɛ̀ lɛ́ e mia wũ‐là‐mì káa lɛ̀ɛ.
Zúdà ga‐zì
(Àpɔ́sɔ̀lɔ̀ 1.18-19)
3Lɛ̀ Zúdà lɛ́ e Zízɛ̀ lé góa, e à gɛ̃̀ gbaa kélɛ̀ mɛ̀ĩ́‐sà aà káá Zízɛ̀ wĩĩ́a, e e kɛ‐wɔ̃̀ mɛ́ vɔ̀ɔ, e ló pɛlèe púlú gbá vũ̀ yààkaa ká e mɛ̀ĩ́ sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ mia dìè‐dìè vɔ̀ɔ píé, 4áà gèè, “Maà wɔ̃́ yɔɔ kɛ mi lɛ́ wɔ̃́ tóò wá à mɔ̀ɔ lé ma góa mɔ́ɔ̀ wɔ̃̀ mɔ̀, tó wáà kɛ̀ vɔ̀ ó à zɛ.”
Wa gèe, “Wɔ̃́ ɓà gèea kpàà lɛ ko mɔ̀ mɛɛ ká? I dìè ɓà wɔ̃́ lɛ.”
5Zúdà e pɛlèea wɛ̃̀ĩ sálà‐ɓò‐Wálà‐lɛ̀ɛ‐kàa wì, áà là ló ɓò. E ló gbaa, e e dìè dũ.
6Sálà‐ɓò‐Wálà‐mɔ̀‐mìà kpànazɛ̀ɛ o pɛlèea wɔ́ɔ́, wáà gèè kélɛ̀, “Léà sɔ̃̀ɔ̃́ lɛ́ e kéa. Ye wá ko mɔ̀ kɛ kó káá Wálà‐kà wì pɛlèe bà.” 7Lɛ̀ e kɛ kília, o séĩ́ o wéé à mɔ̀ gbaa kɛ ó gbɔɔ‐dɔ‐mì là lɛ̀ lɔ́, kɛɛ é kɛ lɔ̀ɔ̀‐mìà bĩ̀ĩ̀pìà ká. 8Pɛ́ è kɛ̀ lɛ́ o tĩã́ lɛ̀ e kília sípìà Tã́ã̀ Léà Zɛ̀ɛ, ye lɛ́ ɓɛ.
9Zí e kéa wɔ̃́ lɛ́ dɔ̀‐Wálà‐lé‐là‐mì Zɛlèmáyà a gèea, e kɛá wánà zɛ̀. Wɔ̃́ a gèea, gɛ̃̀ e ké. “O pɛlèe púlú gbá vũ̀ yààka lɛ́ Éézɛ̀lɛ̀‐mìà o wéé à mɔ̀ kɛ ó à lɔ́ à káa sí, 10o gbɔɔ‐dɔ‐mì là lɛ̀ lɔ́ à ká, lɛ̀ zí ko Dàa‐mì e m líé sí à káa lɛ́ ɓe.”
Pálɛ̀ e wɛ̃́ĩ́‐lɔ̀ɔ kɛ Zízɛ̀ kɛ̀lɛ̀
(Máà 15.2-5; Lúù 23.3-5; Zɔ̃̀ɔ̃́ 18.33-38)
11Zízɛ̀ e dɔ mia wũ‐là‐mì wɛlɛ mɔ̀. Mí e kília áà wɛ̃́ĩ́‐lɔ̀ɔ kɛ̀ kélɛ̀, “Ƃi lɛ́ i Zúù‐mìà líé‐sí‐mì káa?”
Zízɛ̀ a gèe à lɛ̀ɛ, “Zí ɓa gèe à káa lɛ.” 12Kɛɛ lɛ̀ lɛ́ sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ mia dìè‐dìè vɔ̀ɔ wa gèe kélɛ̀ aà wɔ̃́ yɔɔ kɛɛ, Zízɛ̀ lɛ̀ɛ́ gbaa wɔ̃́ gbɛɛ gèe.
13Lɛ̀ e kɛ kília, Pálɛ̀ a gèe à lɛ̀ɛ, “Wɔ̃́ yɔɔ sùu lɛ́ waà kpɔ́ i wĩĩ́a, ìí à wɔ̃̀ ma?”
14Kɛɛ Zízɛ̀ lɛ̀ɛ́ gbaa wéé doó ɓo e sɔ̃́ɔ̃́ píé. Lɛ̀ e kɛ kília, mia wũ‐là‐mìa lé kpó‐kpó e pa gbaa.
Wa gèe Zízɛ̀ é ga
(Máà 15.6-15; Lúù 23.13-25; Zɔ̃̀ɔ̃́ 18.39—19.16)
15Dìè‐mia‐là Kpílì lúó nɔ́ɔ fé káa, mia wũ‐là‐mì lɛ́ɛ̀ mia lɛ́ o kɛ bĩ́‐kɛ̀ìa, doó‐mì lɛ́ míáa ò nàà à káa, ɓo bĩ́‐kɛ̀ì. 16Lúó e kília káa, bĩ́‐kɛ̀ì‐mì lɛ́ mia séĩ́ ò dɔɔ e kɛ yí, wáà sì Zízɛ̀ Bàlábà. 17Wɔ̃́ e kília mɔ́ɔ̀ wɔ̃̀ mɔ̀ɔ, lɛ̀ mia séĩ́ o pá o kíe mɔ̀ɔ, Pálɛ̀ a gèe o lɛ̀ɛ kélɛ̀, “Mía ye kpɛɛ̀ lɛ́ kà nàà ḿ à ɓo bĩ́‐kɛ̀ì ka lɛ̀ɛ? Zízɛ̀ Bàlábà lɛ, ɛ̃́ɛ̃́ Zízɛ̀ lɛ́ ò si Kɛ́lɛ̀ìa lɛ yee?” 18Pálɛ̀ a gèe kíli, ɓii wɔ̃́ lɛ́ wa mɔ́ɔ̀ Zízɛ̀ nɔ ɓo à lɛ̀ɛ, láà dɔ. Ye lɛ́ e tɔ́ dàa‐gbe lɛ.
19Lɛ̀ lɛ́ Pálɛ̀ e kɛ yàá mɛ̀ĩ́‐sà ɓo‐pìàa, à na e wè‐vɔ dɔ à píé weeá kélɛ̀, “Yékɛ̀ í i kɔ̀ dà gɔ̃ lɛ́ lɛ̀ɛ́ gbaa wɔ̃́ gbɛɛ kɛ yía mɔ́ɔ̀ wɔ̃̀ bà. Ƃii pɛ̃́ yi bà zàáa, m wàa kpó‐kpó ɓèlè à mɔ́ɔ̀ wɔ̃̀ mɔ̀.”
20Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ mia dìè‐dìè vɔ̀ɔ o míáa kɛ, kɛ ó gèe ó Bàlábà ɓo bĩ́‐kɛ̀ì o lɛ̀ɛ, ó Zízɛ̀ zɛ. 21Kɛɛ mia wũ‐là‐mìa a gèe o lɛ̀ɛ kélɛ̀, “Mia pèèlɛ o kéa, dé kà nàà ḿ à ɓo bĩ́‐kɛ̀ì ka lɛ̀ɛ?”
Wa gèe, “Bàlábà.”
22Pálɛ̀ a gèe o lɛ̀ɛ kélɛ̀, “Yé aà kɛ kília, mɛ́ m̀ lo à kɛɛ̀ Zízɛ̀ lɛ́ ò si Kɛ́lɛ̀ìa ká mɔṹ?”
O séĩ́ wa gèe weeá kélɛ̀, “À pá nélè ká kɔ́lɔ́sì mɔ̀.”
23Kɛɛ Pálɛ̀ a gèe kélɛ̀, “Mɛɛ wɛ̃́ĩ̀? Mɛɛ wɔ̃̀ yɔɔ lɛ́ a kɛ?”
O bɛ̀i, o gbɛ́ɛ́ zeĩ́ gágà, wáà gèè, “À pá nélè ká kɔ́lɔ́sì mɔ̀.”
24Lɛ̀ Pálɛ̀ a gɛ̃̀ gbaa kélɛ̀ lɛ̀ɛ́ bɛ̀i wɔ̃́ gbɛɛ kɛɛ̀ wɔ̃́ɔ yí, ɛ̃́ɛ̃́ é tùòá mɔ̀ɔ gèlè lɛ́ɛ̀ lo kã́ã̀a, e yíí dò sí, e e kɔ̀ pɛ́lɛ́ à ká míáa nyìɛ mɔ̀, áà gèè kélɛ̀, “Gɔ̃́ e kéa léà wɔ̃̀ wá m wĩĩ́. Ka dìè kà wɔ̃́ lɛ.”
25Lɛ̀ e kɛ kília, mia séĩ́ wa gèe kélɛ̀, “À léà‐wɔ̃̀ è kɛ kò kò nɔ́ɔ̀ nì ko wĩĩ́.”
26Lɛ̀ e kɛ gbaa kília, Pálɛ̀ e Bàlábà ɓo bĩ́‐kɛ̀ì o lɛ̀ɛ. Pálɛ̀ a kɛ gbaa, wáà Zízɛ̀ mɛ̀ píé gbàtò ká. Yé e kɛ kília, e Zízɛ̀ nɔ gbaa mia lɛ̀ɛ ó à pá nélè ká kɔ́lɔ́sì mɔ̀.
Sóyà vɔ̀ɔ o yéí sí Zízɛ̀ mɔ̀
(Máà 15.16-20; Zɔ̃̀ɔ̃́ 19.2-3)
27Yé e kɛ kília, Pálɛ̀ là sóyà vɔ̀ɔ o ló Zízɛ̀ ká sɛ́lɛ́ líé‐sí‐mì yà‐pìà, ɛ̃́ɛ̃́ sóyà vɔ̀ɔ séĩ́ o pá o kíe mɔ̀ Zízɛ̀ sɔ́nɔ́ píé. 28O là sɔ sɔ̀nɔ́ à mɔ̀, o gbàà‐wíì zóló sùu dò dà à mɔ̀. 29O ɓɛ̀lɛ̀‐kálá gɛ́nɛ́ zɛ̀ kpɛ́nɛ́ e kíe ká, wa wàà à wũ mɔ̀. O yílí dɔ̀ kɛ à kɔ̀ yiè kɛ̀lɛ̀. O káá o kpuò là à wɛlɛ mɔ̀, wáà yéí sì à mɔ̀ weeá kélɛ̀, “Zúù‐mìà líé‐sí‐mì, i yìì píé é kɛ gbèĩ.” 30O o lélií suo à là, o yílía kṹ à kɛ̀lɛ̀, wa mɛ̀ e wĩĩ́ à ká. 31Lɛ̀ o nyɛ yéí sì à mɔ̀ mɔ̀ɔ, o gbàà‐wíìa ɓo à mɔ̀, o à dìè‐tĩ́ là sɔ́ɔ sí, wa dà à mɔ̀. Wa gbɛ̃̀ pɛlɛí, wáà lò à páà nélè ká kɔ́lɔ́sì mɔ̀.
O Zízɛ̀ pá nélè ká kɔ́lɔ́sì mɔ̀
(Máà 15.21-32; Lúù 23.26-43; Zɔ̃̀ɔ̃́ 19.17-27)
32Lɛ̀ o kɛ lópìàa, o ɓɔ gɔ̃ lɛ́ è go Sàlĩ́ĩ̀, lɛ́ ò si Sáímɔ̀ɔ là. O gɔ̃́ e kília kṹ gana ká é Zízɛ̀ là kɔ́lɔ́sì vũ. 33O ɓɔ lɛ̀ lɛ́ ò si Gɔ̀gɔ́tàa mɔ̀. Gɔ̀gɔ́tà yí lɛ́ e kélɛ̀ kpò‐kòlò‐wɛ́lɛ́ pà. 34O wã́ã́ĩ̀ lɛ́ wa bòo pɛ nyɔ́ɔ̀ɔ dò káa nɔ Zízɛ̀ lɛ̀ɛ á mi. Kɛɛ lɛ̀ lɛ́ e à dã́a, lɛ̀ɛ́ gbaa zṹ á mi.
35O à pá kɔ́lɔ́sì mɔ̀ nélè ká. Lɛ̀ e kɛ kília, o Zízɛ̀ mɔ̀‐sɔ̀ yí gìnì o kíe mɔ̀, gɔ̃‐pɛ̀ gɔ̃ɔ̀ kolo là. 36Lɛ̀ o nyɛ à kɛ̀ kíli mɔ̀ɔ, o yà gbaa tã́ã̀ yi, wáà o nyìɛ kɛ̀ à mɔ̀. 37Wɔ̃́ wa mɔ́ɔ̀ à zɛ ɓoa, bɛ̃̀ɛ̃ɛ̃̀ e kɛá à wũ là kélɛ̀, “Zízɛ̀ lɛ́ e Zúù‐mìà Líé‐sí‐mì káa, lɛ́ e kéa.” 38Yé e kɛ kília, o kã̀ã‐mìà pèèlɛ pá nélè ká kɔ́lɔ́sì mɔ̀ à sɔ́nɔ́. Wa doó‐mì dɔ Zízɛ̀ kɔ̀ yiè yí. Mi yé e tóa bɛ̃̀ɛ̃, wa dɔ à kɔ̀ gbiè yí.
39Mia yé o kɛ diepìàa, o o bè yɛ́ Zízɛ̀ ká, ɛ̃́ɛ̃́ o o wũ‐kèlè zṹũ̀ zɛ, 40wáà gèè Zízɛ̀ lɛ̀ɛ, “Ƃí i kɛ lópìà sálà‐ɓò‐Wálà‐lɛ̀ɛ‐kà wíì tã́ã̀, ɓá dɔ lɛ̀‐kpɛ̀iì yààka píéa, ì i dìè la mɔṹ wɛ̀. È kɛ̀á i Wálà Gbe káa, gbɛ̃̀ tã́ã̀ í gó kɔ́lɔ́sìa mɔ̀.”
41Zi nɔ́ doóa káa, sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà wà mia dìè‐dìè vɔ̀ɔ o kɛ yéí sípìà Zízɛ̀ mɔ̀, wáà gèè, 42“E kɛ mia gbɛɛ lapìà, kɛɛ lɛ̀ɛ́ bɛ̀i e dìè laà. Ḿ gɔ̃̀, lɛ Éézɛ̀lɛ̀‐mìà Líé‐sí‐mì ká? È gbɛ̃̀ tã́ã̀ gbaa, é gó kɔ́lɔ́sìa mɔ̀ mɔṹ wɛ̀. Yé aà kɛ kília, kóò lo à mɔ́ɔ̀ wɔ̃̀ gɛ̃̀ɛ̃̀ wánà ká. 43À zò dɔɔ̀ lɛ Wálà mɔ̀, áà gèè, Wálà Gbe lɛ́ e m káa. Yé lɛ kília, kɔ̀à yà kɔ́á gɛ̃̀ é kɛ̀á Wálà láà nàà é à la dɛɛ káa ká.”
44Kã̀ã‐mìà lɛ́ o wà ye nì o pá kɔ́lɔ́sì mɔ̀ɔ, o o wè sí Zízɛ̀ mɔ̀ zi nɔ́ doóa ká.
Zízɛ̀ ga‐zì
(Máà 15.33-41; Lúù 23.44-49; Zɔ̃̀ɔ̃́ 19.28-30)
45Lɛ̀ nyɛ́nɛ́‐dɔ̀‐mia‐tùluù‐zèí lùò e ɓɔɔ, bĩ́ e dà sɛ́lɛ́ e kília yí lɛ̀ɛ tɛ̃̀ɛ̃́ɛ mɔ̀, é tóá kíli é ɓɔá nyɛ́nɛ́‐tɛ̃́‐nyɛ̀nɛ̀ mɔ̀. 46Lɛ̀ nyɛ́nɛ́ e kɛ tɛ̃́pìàa, Zízɛ̀ e gbɛ́ɛ́ dóo gágà, áà gèè, “Élà, élà, lámà sàbákálènì?” Wéé e kília, yí lɛ́ e tɔ́, “M̀ Wálà, m̀ Wálà, mɛ́ e kɛ lɛ́ i kã́ m mɔ̀ ɓe?”
47Míá o kɛ dɔ̀á yia dò wa ma, wáà gèè kélɛ̀, “Gɔ̃́ e kéa lɛ Ìláyà súo kɛpìà.” 48O doó‐mì e ló bàlá nɔ́ zá le, e pɛ vɔ́ɛ́‐vɔ̀ɛ̀ dò sí, a wàà yɔ yíí kpɔ̀nɔɔ̀ɔ zɛ̀ dò bà, a dɔ yílí lé, áà nɔ̀ Zízɛ̀ lɛ̀ɛ á pɔ̀nɔ́.
49Kɛɛ mia dò bɛ̃̀ɛ̃ wa gèe kélɛ̀, “Ì dɔ, kɔ̀àa yɛ́lɛ́ kɛ yí, é kɛ̀á Ìláyà lɛ́ɛ̀ lo nuù kɛ á laa, kɔ́á gɛ̃̀.”
50Zízɛ̀ e gbɛ́ɛ́ dóo gágà zeĩ́, ɛ̃́ɛ̃́ e e wúú líé‐nyɛ‐mɔ̀ káá gbaa.
51Yé e kɛ kília, sɔ lɛ́ à dũũ̀ e kɛá sálà‐ɓò‐Wálà‐lɛ̀ɛ‐kàa wìa, e pɛ́ɛ́ gbaa. À pɛ̃́ɛ̃́ e kɛ pèèlɛ. E gbɛ̃̀ pɛ́ɛ́ ká lɛ̀í, áà nùá tã́ã̀. Tã́ã̀ e vĩ́ ɓo, gɛ̀lɛ̀ e kã́ e kíe mɔ̀, 52ɓɔ́à e wí píé píé, ɛ̃́ɛ̃́ Wálà là mia nì lɛ́ waà gaa, o búnùzɛ̀ o wɛ̀lɛ̀ ga kɛ̀lɛ̀ o gbĩ‐kpàla ká. 53O gó ɓɔ́à píé píé. Ɛ́ɛ̃́ lɛ̀ lɛ́ Zízɛ̀ wɛ̀lɛɛ̀ e kɛá ga kɛ̀lɛ̀ɛ, o ló Wálà là Sɛ́lɛ́ɛ yí. Mia búnùzɛ̀ o o gɛ̃̀ à lɛ̀ mɔ̀.
54Lɛ̀ lɛ́ sóyà vɔ̀ líé‐sí‐mì wà mia lɛ́ o kɛ à píé, wáà o nyìɛ kɛ̀ Zízɛ̀ mɔ̀ɔ, o tã́ã̀ vĩ́ ɓopìà, wà pɛ séĩ́ lɛ́ e kɛ kɛpìàa gɛ̃̀ɛ, túó e nu o là, wáà gèè, “Gɔ̃́ e kéa, lɛ dóo Wálà Gbe kpó‐kpó ká.”
55Loà búnùzɛ̀ o kɛ yí kíli. O kɛ dɔ̀á gbèkèni, wáà lɛ̀ gɛ̃̀: Loà o kília, o kɛ tópìà Zízɛ̀ píé, wáà gò Gálàlíì, ɛ̃́ɛ̃́ wáà gbũ̀ Zízɛ̀ mɔ̀. 56Melé, lɛ́ è go Mádɛ̀lɛ̀‐pɛlɛíaò, ɛ̃́ɛ̃́ Melé, lɛ́ e kɛ Zĩ́ĩ̀ wà Zósɛ̀ o lèe káa, e bɛ̀i, Zɛ́bɛ́dìì gbe nì lòóò, o kɛ o bà.
Zízɛ̀ bĩ̀ĩ̀‐kɔ̀
(Máà 15.42-47; Lúù 23.50-56; Zɔ̃̀ɔ̃́ 19.38-42)
57Lɛ̀ nyɛ́ŋɛ̀ĩpíé e kɛɛ, gɔ̃ kpànazɛ̀ dò lɛ́ è go Alèmàtíàa, e ɓɔ yí. O kɛ à sípìà Zósɛ̀. À bɛ̃̀ɛ̃, e kɛ tò‐Zízɛ̀‐píé‐mì ká nɔ́ kíli. 58E ló Pálɛ̀ píé, e Zízɛ̀ bílí pɛ̃́ à mɔ̀. Lɛ̀ e kɛ kília, Pálɛ̀ a gèe ó Zízɛ̀ bílí nɔ Zósɛ̀ lɛ̀ɛ. 59Zósɛ̀ a sí, e sɔ púlú ɓɔɔ̀ɔ zɛ̀ kpɛ́nɛ́ à ká. 60A wɔɔ bũ lɛ́ wa fòo gɛ̀lɛ̀ yí nɔ́ e dɛɛ káa yí. Bṹ e kília e kɛ Zósɛ̀ dìè bĩ̀ĩ̀pìà ká. E gɛ̀lɛ̀ gbùò dò gìni‐gíní, a tɛ̃́ bṹ e kília lé, e là ló ɓo. 61Melé lɛ́ è go Mádɛ̀lɛ̀‐pɛlɛía, wà Melé yéa bɛ̃̀ɛ̃ e kɛ yàá yi, o wɛlɛ vɔɔ̀ e kɛá ɓɔ́à e kília mɔ̀.
O o nyìɛ kɛ ɓɔ́à mɔ̀
62Lɛ̀ yé e kpɛ̀ia, e kɛ lɛ̀‐kpɛ̀iì lɛ́ e gbɛ̃̀ Kpílì Pɛ̀‐kɛ‐lùò píéa ká. Lúó e kília káa, sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Fálásíì‐mìà wà Pálɛ̀ nì o pá o kíe mɔ̀. 63Wa gèe Pálɛ̀ lɛ̀ɛ kélɛ̀, “Ko dàa‐mì, ko zò lɛ́ɛ̀ vùò kélɛ̀ lɛ̀ lɛ́ nɛ̀‐kɛ‐gɔ̃̀ɔ e kɛ tĩã́ ɓea, a gèe kélɛ̀, yé lúó yààkaa aà diea, lɛ́ɛ̀ lo wɛ̀lɛ̀ ga kɛ̀lɛ̀. 64À mɔ́ɔ̀ wɔ̃̀ mɔ̀ɔ, lɛ sɛ̀ í mia kɛ ó o nyìɛ kɛ ɓɔ́à e kília mɔ̀ e yiè ká, é tóá kíli à lɛ̀‐kpɛ̀iì yààka lùò é ɓɔ, yékɛ̀ là tòà‐píé‐mìà ó ló, ó à kã̀ã ɓo, wáà gèè míáa lɛ̀ɛ, aà wɛ̀lɛ̀ ga kɛ̀lɛ̀. Yé kɔaà tó waà à kɛ kília, nɛ̀ tò‐ko‐mɔ̀ zɛ̀ɛ lɛ́ɛ̀ lo diè à bèĩzɛ̀ɛ là.”
65Pálɛ̀ a gèe o lɛ̀ɛ, “Kà sóyà sí, ká ló, ká ka nyìɛ kɛ bṹ e kília mɔ̀ e yiè ká.”
66Lɛ̀ e kɛ kília, o ló, o bṹ e kília lé taa e yiè ká, wa dɔ̀á kɛ à mɔ̀. O sóyà vɔ̀ tó yi, kɛ ó o nyìɛ kɛ à mɔ̀.
Đang chọn:
Máfìù 27: MNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Mann New Testament © Bible Society in Liberia, 1978.
