Máfìù 20
20
Mia lɛ́ o yɛɓo kɛ nyɛ́nɛ̀ĩ̀a
1“Wálà lɛ́ e lɛ̀ía zì tò‐mia‐là lɛ kélɛ̀ ɓɛ̀lɛ̀‐wɛ́lɛ́ lɛ́ ò ɓɛɛ yíí mia nyɛ́nɛ̀ĩ̀ dàa‐mì lɛ́ ɓe. E sòló e ló mia naà kɛ ó yɛɓo kɛ à lɛ̀ɛ e píé nyɛ́nɛ̀ĩ̀. 2E wéé à mɔ̀ kɛ é o fɔ́nɔ́ nɔ lɛ̀ zí o nɔ kpáá à ká lúó doó wɛ̃́ĩ̀a lɛ́ ɓe. O kɛ pɛlèe púlú gbá doó nɔpìà o lɛ̀ɛ lúó doó mɔ̀. E o vɔ ó ló yɛɓo kɛɛ̀ là nyɛ́nɛ̀ĩ̀a mɔ̀. 3E ló zeĩ́ nyɛ́nɛ́‐nɛ̀ɛ̀ mɛ́‐kpálàa zɛ̀ ká lɔ́ɔ́ kpánàa mɔ̀. E ló, e gɔ̃à lɛ́ òó gbaa kɛ wɔ̃́ dò fé kɛpìàa gɛ̃̀ɛ̃̀ dɔ̀á yi. 4Lɛ̀ e kɛ kília, a gèe o lɛ̀ɛ, ‘Ka bɛ̃̀ɛ̃, kà lo ká yɛɓo kɛ m píé nyɛ́nɛ̀ĩ̀. Yé kaà kɛ kília, ḿm̀ lo ka fɔ́nɔ́ nɔɔ̀ ka fɔ́nɔ́‐nɔ zì ká.’ Lɛ̀ e kɛ kília, o ló. 5Lɛ̀ zeĩ́ nyɛ́nɛ́ e dɔ mia tùluùa, ɛ̃́ɛ̃́ nyɛ́nɛ́‐tɛ̃́‐nyɛ̀nɛ̀ káa, e ló zeĩ́, e wɔ̃́ nɔ́ doóa kɛ. 6Lɛ̀ zeĩ́ e ɓɔ nyɛ́nɛ́ dɔ̀‐lɛ́ɛ́‐là lùò mɔ̀ɔ, e ló zeĩ́ lɔ́ɔ́ kpánà, e gɔ̃à dò gɛ̃̀ zeĩ́ tĩã́ dɔ̀á yi. A gèe o lɛ̀ɛ, ‘Mɛ́ e kɛ lɛ́ kaà túó pɛ́nɛɛ dɔ̀á lɛ̀ɛ mɔ̀, lɛ́ ka wá yɛɓo lé ɓɛ?’ 7Wa gèe à lɛ̀ɛ kélɛ̀, ‘Ko dɔɔ̀ lɛ lɛ̀ɛ mɔ̀, ɓii mi gbɛɛ lɛ̀ɛ́ ko yɛ nɛ́ɛ mɔ́ɔ̀ wɔ̃̀ mɔ̀.’ Gɔ̃́ɛɛ a gèe o lɛ̀ɛ, ‘Ka bɛ̃̀ɛ̃, kà lo ká yɛɓo kɛ m píé nyɛ́nɛ̀ĩ̀.’
8“Lɛ̀ nyɛ́ŋɛ̀ĩpíé e kɛɛ, nyɛ́nɛ̀ĩ̀a dàa‐mì e à gèe mi lɛ́ e nyɛ́nɛ̀ĩ̀a kpɔ́ à kɔ̀ làa lɛ̀ɛ, ‘Ì yɛɓo‐kɛ‐mìàa súo kɛ, í o fɔ́nɔ́ nɔ. Ì gbɛ̃̀ mia lɛ́ o nu zízàáa là, ɓá léĩ́ tó mia lɛ́ o nu líéa là.’ 9Mia lɛ́ o gbɛ̃̀ yɛɓo kɛɛ̀ ká nyɛ́nɛ́ dɔ̀‐lɛ́ɛ́‐là lùò káa, o pɛlèe púlú gbá nɔ o lɛ̀ɛ doó doó. 10Lɛ̀ e ɓɔ mia lɛ́ o ló bèĩzɛ̀ɛ o fɔ́nɔ́ nɔ‐lùò mɔ̀ɔ, wa gɛ̃̀ ɓɔ̀ɔ kélɛ̀ o fɔ́nɔ́ lɛ́ɛ̀ lo diè mia zízàá zɛ̀ɛ là. Kɛɛ o o bɛ̃̀ɛ̃ o gba nɔ́ pɛlèe púlú gbá doó doó ká nɔ́ kíli. 11O pɛlèea kṹ, wáà wéé dɔ̀ o dàa‐mì ká. 12Wa gèe kélɛ̀, ‘Gɔ̃à lɛ́ o nu zízàá zɛ̀ɛ, o yɛɓo kɛ nɔ́ áwà doó mɔ̀. Ƃaa à kɛ kò ye nì kɔaà bɛ̀i. Kɛɛ ko yee, kɔaà tó nɔ́ pɛ́nɛɛ dɔ̀á nyɛ́nɛ́ gáàa wì sóló tótó, kɔ́áà yɛɓoa kɛ̀.’ 13Gɔ̃́ɔ a gèe o doó‐mì lɛ̀ɛ, ‘M ɓɛ́ɛ, ma wá i fùlupìà. Ḿ gɔ̃̀, i wéé à mɔ̀ í yɛɓo kɛ pɛlèe púlú gbú doó wɛ̃́ĩ̀? 14Ì pɛ lɛ́ lɛ ɓà pɛ káa sí, í ɓà ló ɓo. Ḿm̀ nàà ḿ gɔ̃ lɛ́ eató zízàáa fɔ́nɔ́ nɔ zi nɔ́ doó m i fɔ́nɔ́ nɔ à káa ká. 15Ḿ gɔ̃̀, lɛ m mɔ̀ ḿ wɔ̃́ kɛ m̀ pɛ ká lɛ̀ zí m̀ nàà ḿ kɛáa lɛ́ ɓe? Ɛ́ɛ̃́ wɔ̃́ lɛ́ɛ̀ i wàa m zò kɛ̀ sɛ̀ wɛ̃́ĩ̀?’
16“À mɔ́ɔ̀ wɔ̃̀ mɔ̀ɔ, mia lɛ́ o zízàáa, óò lo kɛɛ̀ líé, tó líé‐mìà bɛ̃̀ɛ̃ wáà kɛ̀ zízàá‐mìà ká.”
Zízɛ̀ e e ga‐wɔ̃̀ gèe zeĩ́
(Máà 10.32-34; Lúù 18.31-34)
17Lɛ̀ Zízɛ̀ e kɛ lópìà Zùlúsàlɛ̀ɛ, e là tòà‐píé‐mìà vũ̀ doó wɛ́lɛ́ pèèlɛɛ súo kɛ o doó lɛ̀ píá, áà lò mɛ́ĩ́ ɓòá sí o lɛ̀ɛ lɛ̀ lɛ́ o kɛ lópìàa ká. A gèe kélɛ̀, 18“Ɛ̀ɛ̀, kɔa lópìà gbaa Zùlúsàlɛ̀. Óò lo Mi Gbe nɔɔ̀ sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà lɛ̀ɛ. Óò lo mɛ̀ĩ́‐sà káà à wĩĩ́, tó wáà gèè ó à zɛ. 19Tó o à nɔ gbaa sɛ́lɛ́ gbɛɛ yí‐mìà lɛ̀ɛ. O lɛ́ ò lo yéí síì à mɔ̀, e bɛ̀i, óò lo à mɛ̀ɛ̀ gbàtò ká, tó o à pá nélè ká kɔ́lɔ́sì mɔ̀ɔ. Yé aà kɛ kília, lɛ́ɛ̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”
Pɛ lɛ́ lééa a pɛ̃́ɛ
(Máà 10.35-45)
20Lɛ̀ e kɛ kília, lee lɛ́ e kɛ Zɛ́bɛ́dìì gbe nì lèe káa, e nu Zízɛ̀ píé là nɔ́ɔ̀ ká. E e wũ gbɛ̃̀, áà pɛ dò pɛ̃̀ à mɔ̀.
21Zízɛ̀ a gèe à lɛ̀ɛ, “Mɛ́ ɓà nàà à ká?”
A gèe Zízɛ̀ lɛ̀ɛ kélɛ̀, “Ì à gèe kélɛ̀ m̀ nɔ́ɔ̀ pèèlɛ o kéa, óò lo yàà i kɔ̀ yiè wà i kɔ̀ gbiè yí, yé ɓaà tó mia làa ká.”
22Kɛɛ Zízɛ̀ a là nìɛ̀ kélɛ̀, “Pɛ kpó‐kpó lɛ́ kà pɛ̃ɛ, kàá dɔ bɛ̃̀ɛ̃. Káà bɛ̀i à mɔ̀ ká yíí mi kɔ̀ɛ̀ lɛ́ m nupìà yíí miì à yía yí?”
Wa gèe à lɛ̀ɛ, “Kóò bɛ̀i à mɔ̀ kó à kɛ kíli.”
23Zízɛ̀ a gèe o lɛ̀ɛ, “Káà lo yíí miì m̀ kɔ̀ɛ̀a yí wánà kpó‐kpó ká. Kɛɛ yíkɛ̀ gáàa gbɛɛ wá m kɛ̀lɛ̀, kɛɛ ḿ mi lɛ́ è lo yàà m kɔ̀ yiè, ɛ̃́ɛ̃́ m kɔ̀ gbiè yía zɔ̃̀ɔ̃̀, ɓii m Dàa lɛ́ è lo lɛ̀ e kília nɔɔ̀ mia lɛ́ aà à pɛ̀ kɛ o wɛ̃́ĩ̀a, o lɛ̀ɛ.”
24Lɛ̀ tòà‐píé‐mìà vũ̀ doó o tóa wa maa, wɔ̃́ e o wàa lèe‐gé vɔ̀ pèèlɛɛ o píé. 25Kɛɛ Zízɛ̀ e o séĩ́ o súo kɛ e píé, ɛ̃́ɛ̃́ áà gèè o lɛ̀ɛ, “Káà yí dɔ mia lɛ́ o sɛ́lɛ́ líé‐sí‐mìà káa, wà yíkɛ̀ gáàa lɛ mia là gágà. Ɛ́ɛ̃́ mia kpànazɛ̀ bɛ̃̀ɛ̃, óò wɔ̃́ lɛ́ míáa ò lo à kɛɛ̀ɛ, zɔ̃̀ɔ̃̀ o lɛ̀ɛ teele. 26Kɛɛ zí e kéa ye wá à ká ka ká. Yé ka doó‐mì aà naa é kɛ mi kpànazɛ̀ ká ka làa, lɛ à mɔ̀ é kɛ míá ka tóa kà yɛɓo‐kɛ‐mì ká. 27Ɛ́ɛ̃́ yé ka doó‐mì aà naa é kɛ mia yé o tóa o líé‐sí‐mì káa, lɛ à mɔ̀ é kɛ kà lùò ká. 28Lɛ à mɔ̀ é kɛ lɛ̀ Mi Gbe lɛ́ ɓe. Lɛ̀ɛ́ gbaa nu zèe kɛɛ mi é yɛɓo kɛ à mɔ̀. Kɛɛ e nu é yɛɓo kɛ mi mɔ̀, ɛ̃́ɛ̃́ é e zì kɛ̀ɓe nɔ, kɛ é mia búnùzɛ̀ ɓo wɔ̃́ yɔɔ yí.”
Zízɛ̀ e gɔ̃à nyìɛ káàa zɛ̀ pèèlɛ la
(Máà 10.46-52; Lúù 18.35-43)
29Lɛ̀ o kɛ gópìà Zɛ́lékòa, mia kù gbùò zɛ̀ o tó Zízɛ̀ píé. 30Gɔ̃à nyìɛ káàa zɛ̀ pèèlɛ lɛ́ o kɛ yàá zi sɛ̃́ĩ́a, wa ma kélɛ̀ Zízɛ̀ lɛ diepìà. O gbɛ̃̀ gbaa, wáà mɔ́ɔ̀ gbɛ́ɛ́ ɓò kélɛ̀, “Dèɓé Gbe, ì ko yéĩ̀ kṹ.”
31Mia kùa o yà o wúú mɔ̀, wáà gèè o lɛ̀ɛ ó o lɛ̀à ga. Kɛɛ o kɛ gbɛ́ɛ́pìà nɔ́ tĩã́ gágà weeá kélɛ̀, “Ko Dàa‐mì, Dèɓé Gbe, ì ko yéĩ̀ kṹ.”
32Zízɛ̀ e tèá, áà o súo kɛ̀, áà gèè, “Mɛ́ kà nàà ḿ kɛ ka lɛ̀ɛ?”
33Wa gèe à lɛ̀ɛ, “Ko Dàa‐mì, kóò nàà í ko nyìɛ fóló.”
34O yéĩ́ e Zízɛ̀ kɛ, e bĩ́ o nyìɛ mɔ̀. Yé e kɛ nɔ́ kília, o nyìɛ e fóló gbaa, wáà tò Zízɛ̀ píé.
Đang chọn:
Máfìù 20: MNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Mann New Testament © Bible Society in Liberia, 1978.
