Máfìù 14

Zɔ̃̀ɔ̃́ mia bàtáì‐kɛ‐mì ga‐zì

(Máà 6.14-29; Lúù 9.7-9)

1Lúó e kília káa, Hɛ́lɔ̀ lɛ́ e kɛ sɛ́lɛ́ líé‐sí‐mì káa, e Zízɛ̀ wɔ̃̀ ma. 2A gèe là yɛɓo‐kɛ‐mìà lɛ̀ɛ kélɛ̀, “Zɔ̃̀ɔ̃́ mia bàtáì‐kɛ‐mì lɛ. Aà wɛ̀lɛ̀ ga kɛ̀lɛ̀. Pɛ́ à kɛ̀ lɛ́ yíkɛ̀ gáàa sùua lɛ à yí, áà yɛɓo kɛ̀ à káa lɛ́ ɓɛ.”

3Ƃii Hɛ́lɔ̀ nɔ́ doó e kília, e Zɔ̃̀ɔ̃́ kṹ, a yèlè, ɛ̃́ɛ̃́ a dùò bĩ́‐kɛ̀ì. E à kɛ kíli Hɛ̀lódìà wɛ̃́ĩ̀. Hɛ̀lódìà e kɛ Hɛ́lɔ̀ lèe‐gé Félè na ká. 4Zɔ̃̀ɔ̃́ a gèe Hɛ́lɔ̀ lɛ̀ɛ, “Ye wá sɛ̀ kɛ í kɛ à píé.” 5Hɛ́lɔ̀ a naa é Zɔ̃̀ɔ̃́ zɛ, kɛɛ e kɛ túópìà míáa lɛ̀ɛ, ɓii o kɛ Zɔ̃̀ɔ̃́ sípìà dɔ̀‐Wálà‐lé‐là‐mìa mɔ́ɔ̀ wɔ̃̀ mɔ̀.

6Lɛ̀ lɛ́ Hɛ́lɔ̀ ye‐lùò mɔ́ɔ̀ kpílì‐kɛ‐lùò e ɓɔɔ, Hɛ̀lódìà lú e tã́ kɛ Hɛ́lɔ̀ nì wɛlɛ mɔ̀. Nɛ́fúa tã́ kɛ‐kɔ̀ e Hɛ́lɔ̀ zò kṹ. 7A mɔ́ɔ̀ e wè dɔ nɛ́fúa lɛ̀ɛ, áà e náá kpɔ̀ weeá kélɛ̀, “Ḿm̀ lo pɛ nɔ́ɔ fé lɛ́ ì lo à pɛ̃́ɛ̃̀ɛ, nɔɔ̀ i lɛ̀ɛ.”

8Lee‐nɛ̀fúa a gèe kélɛ̀, “Ì Zɔ̃̀ɔ̃́ mia bàtáì‐kɛ‐mì wũ‐kèlè nɔ m lɛ̀ɛ kpɔ̀á wélà yí lɛ̀ e kéa mɔ̀.” A gèe kíli, ɓii à lòóò a gèe à lɛ̀ɛ á kɛ kília mɔ́ɔ̀ wɔ̃̀ mɔ̀.

9Hɛ́lɔ̀ zò e kɛ yéĩ̀zɛ̀, kɛɛ à kɛ̀ é e náá kpɔ́ lɔ̀ɔ̀‐mìàa nyìɛ mɔ̀ɔ, a mɔ́ɔ̀ à gèe ɓo ó wɔ̃́ lɛ́ nɛ́fúa a gèea kɛ. 10Lɛ̀ e kɛ kília, e mia vɔ. O ló o Zɔ̃̀ɔ̃́ wũ‐kèlè kã́ à là bĩ́‐kɛ̀ì. 11O nu à wũ‐kèlè ká wélà yí, wa nɔ nɛ́fúa lɛ̀ɛ. Nɛ́fúa e ló à ká e lèe píé. 12Zɔ̃̀ɔ̃́ là tòà‐píé‐mìà o nu, wa bílí sí, o ló à ká, wa bĩ̀ĩ̀. Lɛ̀ e kɛ kília, o ló, wa gèe Zízɛ̀ lɛ̀ɛ.

Zízɛ̀ e ɓèlè‐pɛ̀ nɔ mia wáá sɔ́ɔ́li lɛ̀ɛ

(Máà 6.30-44; Lúù 9.10-17; Zɔ̃̀ɔ̃́ 6.1-14)

13Lɛ̀ Zízɛ̀ e Zɔ̃̀ɔ̃́ zɛ‐wɔ̃̀ maa, e yà gɔɔ yí, e gó lɛ̀ e kília mɔ̀, e ló lɛ̀ lɛ́ à dɔɔ̀ e kɛá dĩĩa mɔ̀ e doó lɛ̀ píà. Kɛɛ lɛ̀ lɛ́ míáa o à wɔ̃̀ maa, o gó o pà píé, wáà tò à píé o gã̀ là. 14Lɛ̀ lɛ́ Zízɛ̀ e gó gɔ́ɔ́ɔ yí, lɛ́ e mia gbààlà gbùò zɛ̀ gɛ̃̀ɛ, o yéĩ́ e à kɛ nyɔ́ɔ̀ɔ, ɛ̃́ɛ̃́ e wà mia kɔ̃́ṹ‐kɔ̃̀ũ̀ lɛ́ o nu o káa la.

15Lɛ̀ lɛ́ nyɛ́ŋɛ̀ĩpíé e kɛɛ, là tòà‐píé‐mìà o nu à píé, wáà gèè à lɛ̀ɛ, “Lɛ̀ e kéa lɛ lɛ̀ púlú gbùò ɓɔ̀ɔ ká. Ɛ́ɛ̃́ nyɛ́nɛ́ lɛ lópìà. Ì míáa vɔ kɛ ó ló pɛ́lɛ kélé kéléa yí píé, kɛ ó léɓèlè lɔ́ o dìè lɛ̀ɛ.”

16Zízɛ̀ a gèe kélɛ̀, “Ye wá o mɔ̀ kɛ ó ló. Ka dìè‐tĩ́ kà pɛ nɔ o lɛ̀ɛ ó ɓèlè.”

17Wa gèe à lɛ̀ɛ. “Pɛ́ nɔ́ e ko kɛ̀lɛ̀ zèea lɛ́ e belè‐kpo sɔ́ɔ́li wà kpã̀ã́ pèèlɛ káa.”

18Zízɛ̀ a gèe, “Kà nu o ká m píé zèe.” 19Lɛ̀ e kɛ kília, Zízɛ̀ a gèe míáa lɛ̀ɛ ó yà tã́ã̀ sùu là. E belè‐kpo sɔ́ɔ́li wà kpã̀ã́ pèèlɛɛ sí gbaa, e lɛ̀ gɛ̃̀ lɛ̀í, áà Wálà zúo ɓò. E belè‐kpoa kpú yɛ́ kélé kélé, a sí, a nɔ là tòà‐píé‐mìàa lɛ̀ɛ, o bɛ̃̀ɛ̃, o à nɔ gbaa míáa lɛ̀ɛ. 20Mia séĩ́‐séĩ́ wa ɓèlè, o zò e dà. Lɛ̀ e kɛ kília, o léɓèlè yé o kɔ̃́ à mɔ̀ɔ wɔ́ɔ́, e ɓɛ̀lɛ̀‐kolo‐kɔ̃̀ɛ̃̀ pa píé. À kɔ̃̀ɛ̃̀ e kília e kɛ vũ̀ doó wɛ́lɛ́ pèèlɛ. 21Gɔ̃à lɛ́ o pɛ́ɛ ɓèlèa, yé òó loà wà nɔ́ɔ̀ɓé o dà o bàa, o lóníìa zɛ̀ lɛ́ɛ̀ bɛ̀i kɛɛ̀ lèĩ wáá sɔ́ɔ́li.

Zízɛ̀ e táá yíí là

(Máà 6.45-52; Zɔ̃̀ɔ̃́ 6.15-21)

22Lɛ̀ e kɛ kília, Zízɛ̀ a kɛ là tòà‐píé‐mìà o yà gɔɔ yí, ó ló líé yíía mɛ̀ĩ́, lɛ̀ e kɛ à gèepìà mia gbààlà gbùò zɛ̀ɛ lɛ̀ɛ ó ló o pàa ká. 23Lɛ̀ e míáa vɔ o pà píéa, e ló tɔ̃̀ũ̀ dò wĩĩ́ e doó ká sɛ̀nɛ ɓopìà. Lɛ̀ nyɛ́ŋɛ̀ĩpíé e kɛɛ, e kɛ yí e doó ká. 24Lɛ̀ e kɛ kília, kɛɛ gɔ́ɔ́ɔ aà ló yíía zèí gbèkèni. Yíía e kɛ gɔ́ɔ́ɔ zàŋazáŋápìà, ɓii fã̀ã̀ wũ e kɛ o píé zàáa mɔ́ɔ̀ wɔ̃̀ mɔ̀. 25Lɛ̀ tɔ̀ɔ̀ bèĩzɛ̀ e dɔ é wééa, Zízɛ̀ e kɛ táápìà yíía là, áà lò o píé. 26Kɛɛ lɛ̀ là tòà‐píé‐mìàa wa gɛ̃̀ áà tàà yíía làa, o paà e kɛá túó ká. Wa gèe kélɛ̀, “Mi gɛ̀ɛ̀ lɛ.” O gbɛ́ɛ́ túó ká.

27Zízɛ̀ e wɔ̃́ gèe o lɛ̀ɛ nɔ́ zá le weeá kélɛ̀, “Kà ka zò yà ka gé. Ma Zízɛ̀ lɛ. Yékɛ̀ ká túó.”

28Lɛ̀ e kɛ kília, Pílɛ̀ e wéé weeá kélɛ̀, “M Dàa‐mì, é kɛ̀á ɓi lɛɛ, ì à gèe ḿ táá yíía là ḿ nu i píé.”

29Zízɛ̀ a gèe à lɛ̀ɛ, “Nu.” Lɛ̀ e kɛ kília, Pílɛ̀ e gó gbaa gɔ́ɔ́ɔ yí, áà tàà yíía là, áà lò Zízɛ̀ píé. 30Lɛ̀ lɛ́ e fã̀ã̀a míní sí kélɛ̀ lɛ nupìàa, túó e à kɛ. E gbɛ̃̀ gbaa, áà lò yíía wì nyàà le. E gbɛ́ɛ́ weeá kélɛ̀, “M Dàa‐mì, m la wɛ̀.”

31Zízɛ̀ e e kɔ̀ sí tíè‐tíèe, e wí à mɔ̀, áà gèè kélɛ̀, “I zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo. Mɛ́ e kɛ lɛ́ zò pèèlɛ e kɛ i gé?”

32O pèèlɛɛ o yà gbaa gɔ́ɔ́ɔ yí. Lɛ̀ e kɛ kília, fã̀ã̀a wũ e ga gbaa. 33Tòà‐píé‐mìà lɛ́ o kɛ gɔ́ɔ́ɔ yía, o gbini gbaa Zízɛ̀ lɛ̀ɛ, wáà gèè, “I Wálà Gbe ká wánà kpó‐kpó ká.”

Zízɛ̀ e yáá‐mìà la Gɛ̀nɛ́sɛ̀lɛ̀

(Máà 6.53-56)

34Lɛ̀ o yíía kã́a, o ɓɔ sɛ́lɛ́ lɛ́ ò si Gɛ̀nɛ́sɛ̀lɛ̀ɛ yí. 35Míá o kɛ yía, o Zízɛ̀ dɔ. Lɛ̀ e kɛ kília, o nɛ́ vɔ mia kɔ̃́ṹ‐kɔ̃̀ũ̀ lɛ́ o kɛ sɛ́lɛ́ e kília kɔ̀ pɔ̃́ũ̀ tɛ̃̀ɛ̃́ɛ mɔ̀ɔ lɛ̀ɛ. O nu o ká Zízɛ̀ píé, 36wáà kpé kã̀ Zízɛ̀ lɛ̀ɛ é à tó yáá‐mìàa ó pá yee ɓo à mɔ̀‐sɔ̀ léĩ́ mɔ̀. Mia lɛ́ o pá à mɔ̀ɔ, o séĩ́ o la.

Đang chọn:

Máfìù 14: MNT

Tô màu

Chia sẻ

So sánh

Sao chép