مزگینیا مەتتای 21

عیسا ب رێزگرتن دچیتە د ئورشەلیمێ ڤە

(مەرقۆس 11‏:1‏-11؛ لوقا 19‏:28‏-40؛ یوحەننا 12‏:12‏-19)

1دەمێ نێزیكی ئورشەلیمێ بووین و هاتینە گوندێ بێت‌فاجی ل نك چیایێ زەیتوونان، عیسای دوو شاگردێن خۆ هنارتن 2و گۆتە وان: «هەڕنە ڤی گوندێ بەرامبەری هەوە، ئێكسەر دێ ماكەرەكا گرێدای ل گەل جانەكەرەكی بینن، وان ڤەكەن و بۆ من بینن. 3ئەگەر ئێكی تشتەك گۆتە هەوە، بێژنێ: ‹خودانی پێدڤی یا پێ هەی.› ئەو دێ ئێكسەر هنێریت.» 4و ڤێ وەسا روی دا، داكو ئەو تشتێ ل سەر زارێ پێغەمبەری هاتیە گۆتن، ب ج‍‌ھ بهێت:

5‹بێژنە سییۆنا كچ#21‏:5 سییۆنا كچ: ئانكو خەلكێ ئورشەلیمێ. ل فەرهەنگۆكێ بنێڕە سییۆن.،

ئها ئەڤە پاشایێ تە یێ دهێتە نك تە،

یێ دلنەرم و سیارە ل كەری،

ل جانەكەرێ تێژكێ ماكەرێ.›#21‏:5 زەكەریا 9‏:9

6ئەڤجا شاگرد چوون و ئەو كر ئەوا عیسای فەرمان پێ دای. 7ماكەر و جانەكەر ئینان و جلكێن خۆ دانانە سەر و عیسا لێ سیار بوو. 8بەهرا پتر ژ جەماوەرێ خڕڤەبووی رێك ب جلكێن خۆ رائێخست و هندەكێن دی چەقێن داران بڕین و رێك پێ رائێخست. 9جەماوەرێ بەری عیسای دچوو و یێ ل پشت وی دهات، گازی دكر و دگۆت:

«هۆساننا#21‏:9 د زمانێ عیبرانی دا ب رامانا ‹مە رزگار بكە› دهێت. بۆ كوڕێ داوودی!

‹یێ بەرەكەتدارە ئەوێ ب ناڤێ خودانی دهێت!›#21‏:9 زەبوور 118‏:25‏-26

هۆساننا ل بلنداهیان!»

10دەمێ عیسا ب ژۆر كەفتیە ئورشەلیمێ، هەمی باژێڕ تێكهەژیا و خەلكی دگۆت: «ئەڤە كیە؟!» 11خڕڤەبوویان بەرسڤ دا: «ئەڤە عیسا پێغەمبەرە، ژ ناسیرەیا دەڤەرا جەلیلێیە.»

عیسا پەرستگەهێ ژ بازرگانیێ پاقژ دكەت

(مەرقۆس 11‏:15‏-19؛ لوقا 19‏:45‏-48؛ یوحەننا 2‏:13‏-22)

12ئەڤجا عیسا چوو د حەوشا پەرستگەهێ دا و هەمیێن كڕین و فرۆتن دكر دەرئێخستن. وی مێزێن پارەگوهۆڕان و تەختكێن كووترفرۆشان وەرگێڕان 13و گۆتە وان: «یا هاتیە نڤیسین:

‹مالا من ب مالا نڤێژێ دێ هێتە نیاسین›#21‏:13 ئیشایا 56‏:7،

لێ هەوە یا كریە ‹كونجا رێگران›#21‏:13 یەرمیا 7‏:11!»

14ل پەرستگەهێ هندەكێن كۆرە و لەنگ هاتنە نك و وی ئەو ساخ كرن. 15دەمێ سەرۆكێن كاهنان و مامۆستایێن دەستووری ئەو حێبەتیێن وی كرین، دیتین و گو‍‌ھ ل گازیكرنا زاڕۆكان د حەوشا پەرستگەهێ دا بووی دەمێ دگۆتن: «هۆساننا ژ بۆ كوڕێ داوودی!»، گەلەك پێ نەخۆش بوون. 16ئینا گۆتنێ: «تە گو‍‌ھ لێ هەیە ئەوێن هەنێ چ دبێژن؟» عیسای گۆتێ: «بەلێ! ما هەوە ئەڤ تشتە نەخواندیە: ‹تە ل سەر زارێ زاڕۆكان و ساڤایان پەسن#21‏:16 پەسن: مەدح و سەنا بۆ خۆ ئامادە كرن›؟#21‏:16 زەبوور 8‏:2» 17پاشی هێلان و چوو ژ دەرڤەی باژێڕی بۆ گوندێ بێت‌عەنیا و ب شەڤ ما ل وێرێ.

عیسا نفرینان ل دارهژیرێ دكەت

(مەرقۆس 11‏:12‏-14، 20‏-24)

18سپێدەیا رۆژا پاشتر، دەمێ ئەو دزڤڕی باژێڕی، یێ برسی بوو. 19دارهژیرەك ل رەخێ رێكێ دیت و قەستا وێ كر، لێ وی چ پێڤە نەدیت ژبلی بەلگان ب تنێ. وی گۆتە دارێ: «ئێدی تۆ هەتا هەتایێ بەرهەمی نەدەی.» ئێكسەر دارهژیر هشك بوو. 20دەمێ شاگردان ئەو دیتی، گوهشین و گۆتن: «چەوا ئێكسەر دارهژیر هشك بوو؟» 21عیسای بەرسڤا وان دا: «راستیێ دبێژمە هەوە: ئەگەر هەوە باوەری هەبیت و د بێگۆمان بن، نە ب تنێ وەكو من ل دارهژیرێ كری هوین دێ كەن، لێ ئەگەر هوین بێژنە ڤی چیای ژی: ‹رابە و خۆ بهاڤێژە د دەریایێ دا،› دێ ئەڤ چەندە ب ج‍‌ھ هێت. 22هەر تشتێ هوین د نڤێژێ دا ب باوەری داخواز بكەن، دێ ب دەست ڤە ئینن.»

پرسیاركرن دەربارەی دەستهەلاتا عیسای

(مەرقۆس 11‏:27‏-33؛ لوقا 20‏:1‏-8)

23دەمێ گەهشتیە پەرستگەهێ و دەست ب فێركرنێ كری، سەرۆكێن كاهنان و ریهسپیێن مللەتی هاتنە نك و پرسیار ژێ كرن: «تۆ ب چ دەستهەلات ڤان كاران دكەی؟ و كێ ئەڤ دەستهەلاتە دایە تە؟» 24عیسای بەرسڤا وان دا و گۆت: «ئەز ژی دێ پرسیارەكێ ژ هەوە كەم، ئەگەر هەوە بەرسڤا من دا، ئەز ژی دێ بێژمە هەوە ب چ دەستهەلات ئەز ڤان كاران دكەم. 25تافیركرنا یوحەننای ژ كیرێ بوو؟ ژ ئەسمانی یان ژ مرۆڤان؟» وان د ناڤبەرا خۆ دا گۆت: «ئەگەر ئەم بێژین: ‹ژ ئەسمانی بوو،› دێ بێژیتە مە: ‹ئەڤجا بۆچی هەوە باوەر ژێ نەكر؟› 26لێ ئەگەر ئەم بێژین: ‹ژ مرۆڤان بوو،› ئەم ژ خەلكی دترسین، چنكو ئەو هەمی یوحەننای ب پێغەمبەر ددانن.» 27ئەڤجا وان بەرسڤا عیسای دا: «ئەم نزانین.» وی گۆتە وان: «ئەز ژی نابێژمە هەوە ب چ دەستهەلات ڤان كاران دكەم.»

نموونەیا دوو كوڕان

28«هوین چ دبێژن؟ مرۆڤەكی دوو كوڕ هەبوون، ئەو چوو نك یێ ئێكێ و گۆتێ: ‹كوڕێ من، ئەڤرۆ هەڕە ناڤ رەزی كار بكە.› 29وی بەرسڤ دا: ‹ئەز ناچم،› لێ پاشی پەشیمان بوو و چوو. 30پاشی زەڵام چوو نك كوڕێ خۆ یێ دی و ئەوا گۆتیە كوڕێ خۆ یێ ئێكێ گۆتە وی ژی. بەرسڤ دا: ‹سەر چاڤان باب!› لێ ئەو نەچوو. 31كێ ژ هەردوویان ب حەزا بابێ خۆ كر؟» ئەوان بەرسڤ دا: «یێ ئێكێ.» عیسای گۆتە وان: «راستیێ دبێژمە هەوە: باجگر و لەشفرۆش بەری هەوە دچنە د پاشایەتیا خودێ دا. 32یوحەننا هات و رێیا راستداریێ نیشا هەوە دا، هەوە باوەر ژێ نەكر، لێ باجگر و لەشفرۆشان باوەر ژێ كر. خۆ پشتی هەوە ئەڤ تشتە دیتی ژی، هوین پەشیمان نەبوون كو باوەر ژێ بكەن.»

نموونەیا رەزڤانان

(مەرقۆس 12‏:1‏-12؛ لوقا 20‏:9‏-19)

33«گو‍‌ھ بدەنە نموونەیەكا دی: خودان ملكەكی رەزەك دانا و پەرژان كر و ئویسلەیەك#21‏:33 ئویسلە: ئاڵاڤێ گڤاشتنا تریە د كەڤری دا دهێتە كۆلان و چێكرن. د ناڤ دا كۆلا و بورجەكا نوبەداریێ د ناڤ دا ئاڤا كر، پاشی رەز ب كرێ داڤ رەزڤانان و چوو وەڵاتەكێ دی. 34دەمێ گەهشتنا فێقی نێزیك بووی، وی بەنیێن خۆ هنارتنە نك رەزڤانان، داكو بەرهەمێ رەزی بۆ وی بینن. 35رەزڤانان بەنیێن وی گرتن، ئێك ژ وان قوتا و ئێكێ دی كوشت و ئێكێ دی بەرباران كر. 36پاشی خودانێ مالێ ژ جارا پێشیێ پتر بەنی هنارتن و رەزڤانان وە ل وان ژی كر، هەروەكو ل یێن پێشیێ كری. 37ل دویماهیێ كوڕێ خۆ هنارت. وی د دلێ خۆ دا دگۆت: ‹دێ رێزێ ل كوڕێ من گرن.› 38لێ دەمێ رەزڤانان كوڕێ وی دیتی، گۆتە ئێكودوو: ‹ئەڤە میراتگرە! وەرن ئەم وی بكوژین و میراتێ وی بدەست خۆ ڤە بینین.› 39ئینا وان ئەو گرت و ژ ناڤ رەزی دەرئێخست و كوشت. 40دەمێ خودانێ رەزی دهێت، دێ چ ل وان رەزڤانان كەت؟» 41وان بەرسڤا عیسای دا: «ئەو دێ وان خرابكاران ب توندی ژ ناڤ بەت، پاشی دێ رەزی دەتەڤ هندەك رەزڤانێن دی، یێن كو دێ بەرهەمێ رەزی د دەمێ چنینێ دا دەنە وی.» 42عیسای گۆتە وان: «ئەرێ ما هەوە د نڤیساران دا نەخواندیە:

‹ئەو بەرێ هۆستایان رەتكری،

یێ بوویە بەرێ بنیاتی.

ئەڤە ژ لایێ خودانی ڤە چێبوویە

و ئەو ل بەر چاڤێن مە تشتەكێ حنێرە!›#21‏:42 زەبوور 118‏:22‏-23

43ژ بەر هندێ ئەز دبێژمە هەوە: پاشایەتیا خودێ دێ ژ هەوە هێتە ستاندن و دێ بۆ مللەتەكی هێتە دان كو بەرهەمێ وێ بدەت. 44هەر كەسێ بكەڤیتە سەر ڤی بەری، دێ پرتكیت و هەر كەسێ بەر بكەڤیتە سەر، دێ وی هەڕشینیت.»

45دەمێ سەرۆكێن كاهنان و فەریسیان گو‍‌ھ ل نموونەیێن وی بووی، وان زانی ئەو بەحسێ وانە. 46هەر چەندە وان بزاڤ دكر وی دەستەسەر كەن، لێ ئەو ژ خەلكی ترسیان، چنكو وان ئەو ب پێغەمبەر ددانا.

Đang chọn:

مزگینیا مەتتای 21: BHD

Tô màu

Chia sẻ

So sánh

Sao chép