مزگینیا مەتتای 15

تیتالێن باب و كالان

(مەرقۆس 7‏:1‏-13)

1ل وی دەمی، هندەك فەریسی و مامۆستایێن دەستووری ژ ئورشەلیمێ هاتنە نك عیسای و گۆتن: 2«بۆچی شاگردێن تە سەرپێچیا تیتالێن باب و كالان دكەن؟ ئەو بەری خوارنێ دەستێن خۆ ناشوون.» 3عیسای بەرسڤ دا و گۆتە وان: «ئەرێ بۆچی هوین ژ بەر تیتالێن خۆ سەرپێچیا فەرمانا خودێ دكەن؟ 4خودێ یێ گۆتی: ‹رێزێ ل دایك و بابێن خۆ بگرە› #15‏:4 دەركەفتن 20‏:12؛ گۆتارا مووسای 5‏:16 و ‹هەر كەسێ ئاخفتنێن كرێت بێژیتە بابێ خۆ یان دایكا خۆ، دڤێت بهێتە كوشتن.›#15‏:4 دەركەفتن 21‏:17؛ پەرستن و پیرۆزی 20‏:9 5لێ هوین دبێژن: هەر كەسێ بێژیتە بابێ خۆ یان دایكا خۆ: ‹ئەو مفایێ هەوە ژ من ددیت، وەكو پێشكێشی من دا خودێ،› 6ئێدی ل سەر وی نەما ئەو رێزێ ل دایك و بابێن خۆ بگریت. هوین هۆسا پەیڤا خودێ بۆ پاراستنا تیتالێن خۆ ژ كار دئێخن. 7هەی مرۆڤێن دووڕوی! ئیشایا یێ راست بوو دەمێ پەیاما خودێ دەربارەی هەوە راگەهاندی، دەمێ گۆتی:

8‹ئەڤ مللەتە ب دەڤی رێزێ ل من دگریت،

لێ دلێ وی گەلەك یێ ژ من دویرە.

9ئەو ژ قەستا من دپەرێسن،

چنكو ئەو راسپاردەیێن مرۆڤان، هەروەكو فەرمانێن من بن، نیشا خەلكی ددەن.›#15‏:9 ئیشایا 29‏:13»

چیە مرۆڤی دهەڕمینیت؟

(مەرقۆس 7‏:14‏-23)

10پاشی گازی خەلكی كر و گۆتێ: «گو‍‌ھ بدەن و تێبگەهن: 11ئەوێ مرۆڤی دهەڕمینیت، نە ئەوە یێ دچیتە د دەڤی دا، لێ ئەوێ ژ دەڤی دەردكەڤیت.» 12هنگی شاگردان خۆ نێزیكی وی كر و گۆتنێ: «تۆ دزانی دەمێ فەریسیان گو‍‌ھ ل ڤێ ئاخفتنێ بووی، دلگران بوون؟» 13وی بەرسڤ دا: «هەر شینكاتیەكا بابێ من یێ ئەسمانی نەچاندبیت، دێ هێتە هەلكێشان. 14وان بهێلن، ئەو د كۆرەنە رێبەراتیا كۆرەیان دكەن. ئەگەر ئێكێ كۆرە كۆرەیەكی بڕێڤە ببەت، هەردوو دێ كەڤنە د چاڵەكێ دا.» 15پەترۆسی گۆتێ: «بۆ مە ڤێ نموونەیێ روهن بكە.» 16عیسای گۆت: «ئەرێ هوین ژی هێشتا تێنەگەهشتینە؟ 17ما هوین نزانن هەر چ تشتێ دچیتە د دەڤی دا، دچیتە د زكی ژی دا، پاشی دەردكەڤیتە ژ دەرڤە؟ 18لێ ئەوێ ژ دەڤی دەردكەڤیت، ئەو ژ دلی دەردكەڤیت و ئەوە مرۆڤی دهەڕمینیت. 19چنكو ژ دلی ئەڤە دەردكەڤن: هزرێن خراب، كوشتن، دەهمەنپیسی، بێنامویسی، دزی، شاهدەییا ب درەو و بوهتان. 20ئەڤەنە ئەوێن مرۆڤی دهەڕمینن. لێ خوارنا زادی ب دەستێن نەشویشتی مرۆڤی ناهەڕمینیت.»

باوەریا ژنكەكا كەنعانی

(مەرقۆس 7‏:24‏-30)

21عیسای ئەو دەڤەر هێلا و چوو دەوروبەرێن سور و سایدا. 22وەسا چێبوو ژنەكا كەنعانی كو خەلكا وان دەڤەران بوو، هاتە نك و ب هەواركی ڤە گۆت: «خودان، كوڕێ داوودی، دلۆڤانیێ ب من ببە! ئەجنەیەكی كچا من یا هنگافتی و گەلەك ئەشكەنجە ددەت.» 23لێ وی ب چ پەیڤان بەرسڤ نەدا، ئەڤجا شاگردێن وی نێزیك بوون و داخواز ژێ كر: «ڤێ ژ مە دویر بئێخە، چنكو یا ب دویڤ مە ڤە دكەتە هەوار.» 24لێ وی بەرسڤ دا: «ئەز ب تنێ بۆ وان پەزێن بەرزە یێن مالا ئیسرائیلێ یێ هاتیمە هنارتن.» 25لێ ئەو ژنك هاتە نك و سوجدە بۆ بر و گۆتێ: «خودان، هاریكاریا من بكە.» 26وی بەرسڤ دا: «نە دروستە نانێ زاڕۆكان ببەن و بهاڤێژنە بەر كویچكان!» 27وێ بەرسڤ دا: «دروستە خودان، لێ كویچك ژی وان پرتان دخۆن یێن ژ مێزا خودانێ وان دكەڤن.» 28ئێدی عیسای بەرسڤا وێ دا: «خانم، باوەریا تە یا ب هێزە! داخوازا تە ب ج‍‌ھ هات.» ئینا د وێ گاڤێ دا كچا وێ ساخ بوو.

عیسا گەلەك مرۆڤان ساخ دكەت

29عیسای ئەو دەڤەر هێلا و بەرەڤ كنارێ دەریاكا جەلیل ڤە چوو و ب سەر چیای كەفت و ل وێرێ روینشتە خوار. 30ئینا جەماوەرەكێ مەزن هاتە نك و گەلەك مرۆڤێن لەنگ و كۆرە و سەقەت و لال و گەلەك نەساخێن دی ل گەل خۆ ئینان و ل بەر پێیێن وی دانان، ئەوی ژی ساخ كرن. 31ژ بەر ڤێ چەندێ جەماوەر حێبەتی بوو، دەمێ وان دیتی لال یێ دئاخڤن و پەككەفتی یێ ساخ دبن و لەنگ یێ بڕێڤە دچن و كۆرە یێ دبینن. ئینا وان خودایێ ئیسرائیلێ مەزن كر.

عیسا چوار هزاران تێر دكەت

(مەرقۆس 8‏:1‏-10)

32عیسای گازی شاگردێن خۆ كر و گۆت: «دلێ من یێ ب جەماوەری ڤە، چنكو ئەڤە سێ رۆژە ئەو ل گەل من و وان چ نینە بخۆن. من نەڤێت ئەز وان برسی ڤەڕەڤینم، نەكو د رێكێ دا ژ برسا دا بكەڤن!» 33شاگردان گۆتێ: «مە ژ كیڤە ل ڤی چۆلی هند نان هەیە، ڤی جەماوەری هەمیێ تێر بكەت؟» 34عیسای گۆتە وان: «هەوە چەند نان هەنە؟» وان گۆت: «حەفت نان و چەند ماسیێن بچویك.» 35عیسای فەرمان ل جەماوەری كر، كو ل سەر ئەردی رویننە خوار. 36پاشی هەر حەفت نان و ماسی هەلگرتن و سوپاسیا خودێ كر و كەر كرن و دانە شاگردێن خۆ و شاگردان ژی دا جەماوەری. 37ئینا هەمیان خوار و تێر بوون و حەفت سەڤیكێن تژی ژ پرتێن بەرمایكان راكرن. 38و ئەوێن خوارین، ژبلی ژنان و زاڕۆكان، چوار هزار زەڵام بوون. 39پاشی عیسای جەماوەر ڤەڕەڤاند و ل بەلەمێ سیار بوو و چوو دەڤەرا مەگەدانێ.

Đang chọn:

مزگینیا مەتتای 15: BHD

Tô màu

Chia sẻ

So sánh

Sao chép