मत्ती 18
18
सब्बीं ते बड्डा कुण
(मरकुस 9:33-37; लूका 9:46-48)
1तिस इ वगत चेले यीशुये ले आईने पुछणे लगे, “स्वर्गा रे राज्जा च सब्बीं ते महान कुण आ?” 2फेरी तिने इक बच्चे जो अप्पूँ ले सद्दया कने तिस्सो तिन्हारे सामणे खड़ा कित्या, 3कने बोल्या “हऊँ तुहांजो सच्च बोलां भई जे तुहें बदली ने बच्चयां साई नम्र नीं ओ, तां परमेशरा तुहां पर राज करने जो सैहमत नीं हूणा। 4इस खातर अप्पूँजो सै जे कोई इस बच्चे साई नम्र बणां, सैई स्वर्गा रे राज्जा च सब्बीं ते बड्डा हूणा।” 5कने सै जे कोई मेरे नौआं ते इक येढ़े बच्चे जो ग्रहण कराँ सै मिन्जो ग्रहण कराँ।
पाप करने रे इम्तेहान
(मरकुस 9:42-48; लूका 17:1,2)
6“सै जे कोई माह पर विश्वास करने औल़यां चते इक्की जो बी पाप करने पर मजबूर करो तां परमेशरा तिस्सो इसते बी बौहत भयानक सजा देणी। जे कोई इक घराटा रा बाट्ट तिसरे गल़े ने बन्हीने समुद्रा च सट्टि दो तां तिसरे खातर ये बौहत सजा हुई सक्कां इ, पर इसते बी भयानक सजा परमेशरा देणी। 7ये किसी रे खातर कितना भयानक हूणा सै जे दुज्यां रे खातर पाप करने री वजह बणां। गल़त करने खातर परख जरूरी, पर ये परख करने औल़े माहणुये रे खातर कितना भयानक हूणा। 8इस खातर पाप करने रिया हरेक वजह जो दूर करा! इसजो पूरे तरिके ने अस्वीकार करा तियां जे भई तुहें इक पैर बड्डया रांये सै जे तुहांरा पाप करने री वजह बणां। जे तुहें स्वर्गा जो जांये, भले इ तुहांले सिर्फ इक हात्थ हो, सै बधिया। पर तुहांले दो पैर हो कने तुहें नरका च जाओ, तां सै बुरा। 9पाप करने रिया हरेक वजह जो दूर करा! इसजो पूरे तरिके ने अस्वीकार करा। काणा हुईने तेरा स्वर्गा जो जाणा बौहत अच्छा, बजाये इसरे भई तेरियां दो आक्खीं हुन्दे हुये तिज्जो नरका रिया तिसा अग्गी च पाया जाओ सै जे कदीं मनी बुझणी।”
गवाच्छी रिया भेड्डा री उदाहरण-कथा
(लूका 15:3-7)
10इस खातर देक्खा, तुहें मेरे इन्हां मासूम चेलयां चते किसी जो बी घटिया नीं समझयां; हऊँ तुहांजो दस्सां भई तिन्हारी हिफाज़त करने औल़े स्वर्गदूतां री पहुँच स्वर्गा च मेरे पिता ले सदा बणीरी रैईं। 11काँह्भई माहणुये रा पुत्र यनि हऊँ गवाच्छी रयां जो बचाणे आईरा। 12दस्स तू क्या सोच्चां? जे किसी ले सौ भेड्डां ओ, कने तिन्हां चते इक भटकी जाओ, तां क्या तिस दुज्जियां नड़िनुये भेड्डां जो सुरक्षित जगह पर छड्डिने, तिसा गवाच्छी रिया इक्की भेड्डा जो टोलणे नीं जाणा? 13“कने येढ़ा ओ भई तिस्सो मिली जो, तां हऊँ तुहांजो सच्च बोलां, भई सै तिन्हां नड़िनुये भेड्डां रे खातर सै जे गवाच्छी रियां नीं थी, इतणी खुशी नीं मनाणी, जितणी जे तिस इसा भेड्डा रे मिलणे पर मनाणी। 14इयां इ स्वर्गा च विराजमान तुहांरा पिता क्या नीं चाहन्दा भई मेरे इन्हां मासूम चेलयां चते कोई इक बी नीं भटको।
ताहली जे कोई तेरा बुरा करो
15“जे माह पर विश्वास करने औल़ा तेरने कोई बुरा बर्ताव करो, तां तू जा तिसने कल्हे ने गल्ल बात कर कने तिस्सो तिसरा दोष दस्स; जे सै तेरी सुणी लो तां समझी लै तू तिस्सो वापिस परमेशरा ले ली आया। 16पर जे सै तेरी नीं सुणो, तां इक या दो माहणु अपणिया सौगी जो लेईजा, काँह्भई मूसा रिया व्यवस्था रे मुतावक ‘हर शकैता रियां तिन्न गवाहियां हुई जाओ।’ 17जे सै तिन्हांरी बी नीं सुणो, तां कलीसिया च दस्सी दो, कने जे सै कलीसिया री बी नीं मन्नो, तां फेरी तू तिसने इयां बर्ताव कर तियां जे सै कोई पापी ओ या कर बसूलणे औल़ा ओ।
रोकणा कने मौका देणा
18“हऊँ तुहांजो सच्च बोलां, जो किछ तुहें धरतिया पर लोकां जो करने री अनुमति नीं देंगे तिस्सो करने री परमेशरा बी अनुमति नीं देणी, कने जो किछ तुहें धरतिया पर लोकां जो करने री अनुमति देंगे तिस्सो परमेशरा बी करने री अनुमति देणी। 19हऊँ तिज्जो ये बी दस्सां भई इसा धरतिया पर जे तुहां चते कोई दो जणे इक मन हुईने किसी विवादा रे समाधाना रे बारे च मेरे पिता ते मंगगे सै जे स्वर्गा चा, तां तिस तुहांरी सहायता जरूर करनी। 20काँह्भई तित्थी जे दो या तिन्न जणे मेरे नौआं पर परमेशरा ते सहायता खातर प्राथना करने जो कट्ठे हुआं ये, तित्थी हऊँ तिन्हारी सहायता करने खातर तिन्हारे बिच मौजूद आ।”
बेदर्द सेवका रा उदाहरण
21फेरी पतरस यीशुये ले गया कने बोल्या, “प्रभु, जे तुज़ पर विश्वास करने औल़ा अपराध करदा रौ, तां हऊँ कितणी बार तिस्सो माफ करूँ? जे सै सात्त बार अपराध करो तां बी?” 22यीशुये बोल्या, “न सिर्फ सात्त बार पर हऊँ तिज्जो दस्सां भई तिज्जो माफ करना नीं बन्द करना चाहिन्दा#18:22 माफ करना नीं बन्द करना चाहिन्दा सात्त बार रा सत्तर गुणा।” 23“हऊँ तुहांजो ये बोलां, स्वर्गा रे राज्जा री तुलना तिस राजे ने कित्ती जाई सक्कां इ तिने जे अपणे दास्सां ने हिसाब-कताब चुकता करने री सोच्ची थी। 24ताहली जे तिने हिसाब लेणा शुरु कित्या तां तिसरे सामणे इक येढ़े माहणुये जो लन्दया गया तिस पर जे इतणा जादा#18:24 इतणा जादा यनि दस हजार सोने रे सिक्कयां रे तोड़े कर्जा था। 25तिसजो जे सै कदीं चुकाई नीं सकदा था, तां तिने राजे बोल्या, ‘ये कने इसरी घरा औल़ी, कने इसरे बाल-बच्चे कने जो किछ इसरा सै सब किछ बेच्चीने, इसरा कर्जा चुकाई दित्या जाओ।’ 26फेरी तिसरा दास तिसरे पैरा च पैईने गिड़गिड़ाणे लगया, ‘मालका थोड़ी जेई तसल्ली रखा, माह तेरा इक-इक पैसा भरी देणा।’ 27इस पर मालका जो तिस दास्सा पर दया आईगी, तिने तिसरा कर्जा माफ करीने सै छडित्या।
28“फेरी ताहली जे सै दास बाहर निकल़या, तां तिस्सो तिसरा इक साथी दास मिलया सै तिसरे सौ दिनाराँ#18:28 सौ दिनाराँ (सै जे सौ दिनां री मजदूरी थी) रा कर्जदार था; तिने सै गल़े ते पकड़या कने तिसरा गल़ा दबान्दे हुये बोल्या, ‘जितना कर्ज तू मेरा देणा सै मिन्जो वापस कर।’ 29इस पर तिसरा साथी दास तिसरे पैराँ पर पैईया कने विनती करने लगया, ‘तसल्ली रख, माह तेरा इक-इक पैसा देई देणा।’ 30पर सै नीं मन्नया, इतणा इ नीं तिने तिस बगत तक सै जेल्ला च भेजित्या तदुआं तक जे सै तिसरा कर्ज बापस नीं करी देन्दा। 31तिसरे साथी दोस्त इसा सारिया घटना जो देखीने बड़े दुखी हुये, कने सै जे किछ हुया था तिसरा सारा हाल अपणे मालका जो जाईने दस्सीत्या। 32फेरी तिसरे मालके तिस्सो सद्दया कने बोल्या, ‘अरे नीच दास, मैं तेरा सै सारा कर्ज माफ करित्या, काँह्भई तैं माहते दया री भिख मंगी थी। 33क्या तिज्जो बी अपणे साथी दास्सा पर दया नीं दसणी चाहिन्दी थी तियां जे मैं तू पर दया किति कने कर्जा माफ कित्या?’ 34कने तिसरे मालके गुस्से च आईने तिस्सो सजा देणे औल़े रे हत्था च सौंपीत्या, भई तदुआं तक जे सै सारा कर्जा बापस नीं करी दो, तदुआं तक तिन्हांरे हत्थां च रौ।
35“इस तरिके ने जे तुहां चते हर इक मांह पर विश्वास करने औल़े जो मना ते माफ नीं करगा, तां मेरे पिता सै जे स्वर्गा चा, तुहांजो बी तेढ़ा इ बर्ताव करना।”
Đang chọn:
मत्ती 18: KFSNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
This work is licensed under Creative Commons Attribution-ShareAlike 4.0 License.
