मत्ती 3
3
यूहन्ना बपतिस्मो देनेबालो यीशुएरे लेई लोकन तियार केरते।
(मरक. 1:1-8;लूक. 3:1-18;यूह. 1:6-8,15-34)
1तैन दिहाड़न मां यूहन्ना नंव्वेरो मैन्हु, ज़ै लोकन बपतिस्मो देतो थियो, यहूदिया इलाकेरे सुनसान ठैरी मां अव। तै लोकन ज़ैना तैस कां एइते थिये, तैन ई प्रचार केरतो थियो, 2“अपने पापन करां मन फिराथ, किजोकि सुर्गेरू राज़ नेड़े एवरूए!” 3ई तैए ज़ेसेरे बारे मां यशायाह नेबे एन ज़ोवरू थियूं,
“कोई सुनसान ठैरी मां लोकन, ज़ैना तैस कां गातन, तैन उच्ची आवाज़ी सेइं ज़ोलो कि ‘तुसन कां प्रभु एजनेबालो आए,
एल्हेरेलेइ तैसेरी बत तियार केरा ते कने तैसेरेलेइ सड़कां सिद्धी केरा।’ (यानी, प्रभुएरे लेई तुस अपने दिल साफ केरा)”
4यूहन्ना आम लिगड़ां लातो थियो ज़ैना लिगड़ां ऊँटेरे बालन सेइं बनोरां थियां। तै अपनि कमरी पुड़ चमड़ेरू मज़ बंधतो थियो। ते तै टिट्टां त कने जंगलेरू माछ़ी खातो थियो। 5तैखन यरूशलेम नगरेरे बड़े लोक ते यहूदिया इलाकेरे बड़े लोक ते यरदन दरियारे आसे-पासेरे इलाकन मरां लोक यूहन्नारी गल्लां शुन्नेरे लेई तैस कां एइते थिये। 6ते तैनेईं अपने पाप मेनतां यूहन्ना करां यरदन दरियाए मां बपतिस्मो नियो।
7पन ज़ैखन तैनी हेरू कि बड़े फरीसी ते सदूकी लोक बपतिस्मो नेनेरे लेई तैस कां एजने लेवरेन, त तैनी तैन सेइं ज़ोवं, “तुस ज़ेहरीले सप्पेरे ज़ेरे बुरे आथ! तुसन केनि ज़ोवं कि, एजने बाले परमेशरेरे कोपे करां नश्शा? 8सज़ाही करां बच़नेरे लेई तैना कम्मां केरा, ज़ैन सेइं पतो लग्गे तुसेईं सच़्च़े पापन करां मन फिरावरोए। 9ते अपने-अपने दिले मां एन न सोचा कि, ‘अब्राहम इश्शो बाजी आए।’ (परमेशर तुश्शे पाप सिर्फ एल्हेरेलेइ माफ़ न केरेलो कि तुस अब्राहमेरी औलाद आथ), किजोकि अवं तुसन सेइं ज़ोताईं कि परमेशर इन घोड़न मरां भी अब्राहमेरे लेई औलाद पैदा केरि सकते! 10ते हुन्ना त बुट्टां केरे ज़ीलन पुड़ परमेशरेरो मैक्कु रखोरोए, एल्हेरेलेइ ज़ै कोई तैस बुट्टेरो ज़ेरो भोते, ज़ै रोड़ो फल न दे, तै कटनोए ते अग्गी मां छ़डनोए। 11अवं त तुसन पैनी सेइं बपतिस्मो देताईं किजोकि तुसेईं मन फिरावरोए, पन मसीह ज़ै मेरे बाद एजनेबालोए, तै मीं करां भी महाने। अवं त तैसेरो गुलाम भोनेरे काबल भी नईं कि तैसेरे बूट छ़ुई। तै तुसन पवित्र आत्माई सेइं ते अग्गी सेइं बपतिस्मो देलो (ज़ैना मन फिरान, तैन्न)। 12तैसेरू छज्ज तैसेरे हथ्थे मांए ते तै खलाड़ रोड़ेच़ारे साफ केरेलो#3:12 मतलब, कि परमेशर सारे लोकन न्याय केरनेरे लेई त कने ज़ेन्च़रे अक किसान गेहुं करां झ़ाझ़ अलग केरते, तेन्च़रे बुरे लोकन करां धर्मी लोकन अलग केरनेरे लेई तियारे।, तै गेहुं अपने कोठारे मां रखेलो, पन झ़ाझ़ी तैस अग्गी मां फुकेलो ज़ै कधे न हिश्शे। (एल्हेरेलेइ पापन करां मन फिराथ नईं त परमेशर तुसन सज़ा देलो)”
यीशु ज़ैन परमेशरेरू मट्ठू आए, यूहन्ना तैस बपतिस्मो देते।
(मरक. 1:9-11;लूक. 3:21-22;यूह. 1:31-34)
13तैस मौके यीशु गलील इलाके मरां यरदन दरियारे बन्ने पुड़ यूहन्ना कां अव, ताके तैस करां बपतिस्मो ने। 14पन यूहन्ना, यीशु जो इन ज़ोइतां रोकने लगो, “मीं तीं करां बपतिस्मो नीयोरो लोड़ते, फिरी किजो तू मीं करां बपतिस्मो नेने एवरोस?” 15पन यीशुए तैस ई जुवाब दित्तो, “हुनी तू एन्च़रे भोने दे, किजोकि#3:15 मूल भाषाई मां: ज़रूरी आए कि अस सारी धार्मिकता एन्च़रे सेइं पूरी केरम एन्च़रे केरतां अस तैन केरतम ज़ैन परमेशर चाते।” तैखन यूहन्ना तैसेरी गल मन्नी। 16ते यीशु ज़ैखन बपतिस्मो नेइतां पैनी मरां बेइर अव, त तैस मौके हेरा अम्बर खुल्ली जेवं। ते तैनी पवित्र आत्मा कबूतरेरी शक्ली मां एप्पू पुड़ एइती लाई। 17ते तैखन हेरा अम्बरे मरां ऐह आवाज़ आई (त यीशुएरे बारे मां ज़ोवं) “एन मेरू ट्लारू मट्ठू, अवं एस पुड़ बड़ो खुश आईं।”
Đang chọn:
मत्ती 3: BHDNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
