मत्ती 16
16
फरीसी ते किछ सदूकी लोक यीशु करां अम्बरेरे निशान मगतन
(मरक. 8:11-13;लूक. 12:54-56)
1किछ फरीसी ते किछ सदूकी लोक यीशु कां आए, ते तैस अज़मानेरे लेई तैस सेइं ज़ोवं, “असन कोई अम्बरेरो निशान हिरा।” 2तैनी तैन जुवाब दित्तो, “ज़ैखन ड्लोझ़ भोतीए त तुस ज़ोतथ कि मौसम रोड़ोए किजोकि अम्बर लाले। 3ते झ़ेझ़ां ज़ोतथ कि अज़ आँधी एजनीए किजोकि अम्बर लाले ते बिदलारे, तुस अम्बर हेरतां अंदाज़ो लेइतां ज़ोतथ, पन ज़मानेरो निशान न पिशैनी सकतथ! 4इस ज़मानेरे बुरे ते बदमाशी केरनेबाले लोक निशान मगतन, पन तैन योना नेबेरे अलावा होरो कोई निशान न दित्तो गालो।” यीशु तैन शैरतां च़लो जेव।
फरीसी ते सदूकी लोकां केरे शिक्षारू खमीर
(मरक. 8:14-21)
5ते यीशुएरे चेले समुन्दरे पार पुज़ी जे, पन तैनेईं रोट्टी साथी नेनी बिसरोरी थी। 6यीशुए तैन सेइं ज़ोवं, “खबरदार फरीसी ते कने सदूकी लोकां केरे खमीरे करां हुशार रेइयथ।” 7तैना एप्पू मांमेइं गलबात केरने लग्गे, “असेईं रोट्टी नईं आनोरी, एल्हेरेलेइ तै एरू ज़ोने लेवरोए।” 8एन ज़ैनतां, यीशुए ज़ोवं, “हे घट विश्वैसव, तुस एप्पू मांमेइं किजो सोची राओरेथ, कि असन कां रोट्टी नईं? 9कुन तुसन याद नईं? ज़ताली मीं 5000 मैन्हु केरे लेई पंच़ रोट्टी ट्लोड़तां दित्तोरी थी, त तुसेईं बादे मां बच़्च़ोरी रोट्टी केरे केत्रे टोकरे भेरतां सल्लोरे थिये? 10ते तैन 4000 मैन्हु केरे लेई सत रोट्टी ते टुक्डां केरि केत्री टोकरी सल्लोरी थी? 11तुस की न समझ़थ, कि मीं तुसन रोट्टी केरे लेई न थियूं ज़ोवरू? पन फरीसी ते कने सदूकी लोकां केरे खमीरे करां हुशार रेइयथ।” 12तैखन तैन केरि समझ़ी मां अव, कि तैनी रोट्टी केरे लेई नईं, बल्के फरीसी ते कने सदूकी लोकां केरे खमीर यानी शिक्षाई करां हुशार रानेरे लेई ज़ोवरू थियूं।
पतरस यीशुए मसीह कबूल केरते
(मरक. 8:27-30;लूक. 9:18-21)
13ज़ैखन यीशु कैसरिया फिलिप्पी इलाके मां अव, त तैनी अपने चेलन पुछ़ू: “मैन्हेरू मट्ठू कौने, लोक एस बारे मां कुन ज़ोतन?” 14चेलेईं ज़ोवं, “किछ ज़ोतन यूहन्ना बपतिस्मो देनेबालोए, किछ ज़ोतन एलिय्याह, ते किछ ज़ोतन यिर्मयाह नबी ते किछ ज़ोतन नेबन मरां कोई अक आए।” 15यीशुए तैन पुछ़ू, “पन तुस मेरे बारे मां कुन सोचतथ कि अवं कौन आईं?” 16शमौन पतरसे जुवाब दित्तो, “तू ज़ींते परमेशरेरू मट्ठू मसीह आस।” 17यीशुए ज़ोवं, “हे शमौन योनारे मट्ठां तू धन आस, किजोकि ऐह गल मासे या खूने नईं बल्के मेरे सुर्गेरे बाजे तीं पुड़ बांदी कियोरीए। 18ते अवं तीं सेइं ज़ोताईं, तू पतरस आस ते अवं इस पक्के घोड़े पुड़ अपनि कलीसिया बनेइलो ते पातालेरां दारां तैस पुड़ अस्सर न केरि बटेलां। 19अवं अपने सुर्गेरे राज़्ज़ेरी चैबी तीं देइलो, ते ज़ैन किछ तू ज़मीनी पुड़ बन्धेलो तैन सुर्गे मां बेंधोलू, ते ज़ैन किछ तू ज़मीनी पुड़ खोल्लेलो तैन सब किछ सुर्गे मां खुल्लेलू।” 20तैखन यीशुए चेलन जो ज़ोवं, ऐह गल केन्ची सेइं न ज़ोइयथ कि अवं मसीह आई।
अपने मौतरे बारे मां यीशु भविष्यिवाणी केरते
(मरक. 8:31-33;लूक. 9:22)
21एसेरे बाद यीशुए अपने चेलन ज़ोने लगो कि, “तैसेरू यरूशलेम नगरे मां गानू ज़रूरीए ताके यहूदी लोकां केरे बुज़ुर्गन, प्रधान याजकन ते शास्त्री लोकां केरे हथेइं तै बड़ो दुख झ़ैल्ले, ते मारो गाए ते तै ट्लेइयोवं दिहाड़े फिरी ज़ींतो भोल्हो।” 22पतरस तैस अलग नेइतां झ़िड़कने लगो, “हे प्रभु, परमेशर न केरे, तीं सेइं एरू कधे न भोल्हु।” 23यीशुए मुड़तां पतरसे सेइं ज़ोवं, “हे शैतान, मीं करां दूर भो, तू मीं करां पाप करानेरी कोशिश कराने लगोरोस। किजोकि तू ज़ेन्च़रे परमेशर सोचते तेन्च़रे नईं बल्के ज़ेन्च़रे मैन्हु सोचन तेन्च़रे सोचतस।”
यीशुए पत्ती च़लनेरो मतलब
(मरक. 8:34;9:1;लूक. 9:23-27)
24तैखन यीशुए अपने चेलन सेइं ज़ोवं, “अगर कोई मीं पत्ती एजनो चाते त तै अपने आपेरो इन्कार केरे, ते अपनु क्रूस छ़ुइतां मीं पत्ती च़ले।” 25“किजोकि ज़ै कोई अपनि जान बच़ानी चालो, त तै तैस गुवालो, ते ज़ै अपनि जान मेरे लेई गुवालो, त तै तैस हासिल केरेलो। 26अगर कोई सारी दुनिया हासिल केरे, ते अपने हमेशारे ज़िन्दगी गुवाए, त तैस कुन फैइदो भोल्हो? या मैन्हु हमेशारे ज़िन्दगरे बदले कुन देलो? 27किजोकि ज़ैखन मैन्हेरू मट्ठू अपने बाजेरी महिमाई मां अपने स्वर्गदूतन सेइं साथी एज्जेलू, तैखन तै हर केन्ची तैन केरे कियोरे कम्मां केरो फल देलो। 28अवं तुसन सेइं सच़ ज़ोताईं कि ज़ैना इड़ी खड़े आन, ज़ांतगर मैन्हेरे मट्ठे अपने राज़्ज़े मां एइते न लाएले, तांतगर न मरेले।”
Đang chọn:
मत्ती 16: BHDNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
