Markus 8
8
Si Yesus méé kanen a sé epat ngariwu tou
(Mat. 15:32-39)
1An tutuw itu awéané' ka'i tou keli sé mali'usai am bitu wo séra ra'io wana kakanen. Wo towan i Yesus sé murit-Na wo kumua, 2“En até-Ku mendam ing kaupusan a sé tou keli anio', ampa'paan séra teluo ngando mengii-ngiit Yaku wo séra ra'io ka'i wana kakanen. 3Sa séra maarem wo iru'du'-Ku maréng am balé éra, séra mapusing oka an lalan, ampa'paan awéan ka'i sé imai an tayang owo.”
4Wo isowat é murit-Na, “Guru, en tampa anio' lulu in tou. Tumambisa kita ro'na méé kanen ai séra akar imawesu?”
5Wuéien i Yesus ai séra, “Pira réén eng kakeli i roti sé pinaali miow?”
Isowat éra, “Pitu.”
6Wo iru'du'-Na sé tou keli itu lumukut an tana'. Kekawus in itu indon-Na sé pitu roti itu wo kumua i makapulu'sama' a si Amang Kasuruan, te'bi-te'biin-Na e roti itu wo iwéé-Na a sé murit-Na en yéké, wo yéké éra e roti itu a sé tou keli. 7Awéan ka'i piraan sera' teké' ai séra, wo kekawus i Yesus kumua i makapulu'sama', iru'du'-Na sé murit-Na e méké in itu a sé tou keli itu. 8Wo séra kuman akar i mawesu. Makakanai, umungen éra e roti sé ilumébé, eng kakelina pitu ngawakul.
9Eng kakeli éra wona' epat ngariwu tou. Wo iru'du' i Yesus séra im baya maréng. 10Wo Sia panter sumaké an londéi mewali-wali wo sé murit-Na e mangé an sangkum in Dalmanuta.
Sé tou Farisi mangilek tuus
(Mat. 16:1-4)
11 #
Mat. 12:38-39; Luk. 11:16, 29 Kekawus in itu, imayo sé tou Farisi a si Yesus wo séra tumo'tolo meindo-indoan roma' ang karapi-Na e mangepé' Sia, pangileken éra esa tuus si an sorga owo. 12Kelinga in itu, en até-Na matapé wo kumua, “Kéitu réén sé tou intarépé' anio' mangilek tuus? En ulitna icua-Ku mangé ai camu, sé tou anio' ra'ica kawisa wéan-Ku tuus.” 13Kekawus in itu, itela'u i Yesus séra. Wo Sia ka'i sumaké an londéi e maangé an lewet in lour itu.
En andumoro' i ragi é tou Farisi wo ragi i Herodes
(Mat. 16:5-12)
14Sé murit i Yesus lumupa imaali i roti. En ai séra wayaoka in esa roti si an londéi. 15#Luk. 12:1 Wo ita'néi i Yesus ai séra, “Matéi-téiro wo maténga-téngamo andumoro' i ragi é tou Farisi wo ragi i Herodes.”
16An tutuw éra luminga en aicua-Na itu, séra memaa-maar i esa wo sé walina sapaoka séra ra'ica wana roti.
17Taan kinailekan i Yesus sapa em pemaa-maaren éra, anaé icua-Na, “Kéitu réén kamu memaa-maar andumoro' in da'- ica wana roti? Ra'ipé' réén kailekan wo kaangéan iow? Kamu wutu-wutul keté até. 18#Yer. 5:21; Yeh. 12:2; Mrk. 4:12 Kamu awéan weren, ra'ica réén sinéré miow wo kamu awéan lunteng, ra'ica réén pinalinga miow? Ra'- io réén kata'néian iow ka'i pakasa sé niéma'-Ku? 19An tutuw-Ku in tume'bi' sé lima roti eng kinan é lima ngariwu tou itu, pira réén wantang tiruw e roti sé tine'bi-te'bi' niumung iow?” Isowat éra, “Sangapulu' rua wantang.” 20Wuéien i Yesus sumawel, “An tutuw-Ku in tume'bi' sé pitu roti aiwéé eng kanen é epat ngariwu tou itu, pira réén wantang tiruw e roti sé tine'bi-te'bi' niumung iow?” Isowat éra, “Pitu wantang.” 21Wo icua-Na ai séra, “Ra'ipé' réén kailekan iow?”
Si Yesus sumama' si esa tou wola am Betsaida
22Kekawus in itu, si Yesus wo sé murit-Na icateka'o an doong Betsaida. Wo paalinai é tou si esa tou wola a si Yesus wo séra mekiupus ai Sia, wosama' isuun-Na si tou itu. 23Timboian i Yesus eng kama i tou wola itu, wo iwali-Na sia ang kesot in doong. Wo ruraan-Na em beren i tou itu wo iweta'-Na eng kama-Na am beren i tou itu, wo wuéien-Na ai sia, “Awéano en sinérému?”
24Si tou itu suméré an dior wo kumua, “Sérénku sé tou tanuoka tuu-tuura ing kayu, taan séra pasérénku mawaya-waya'.”
25Iweta' ka'i sumawel i Yesus eng kama-Na am beren i tou itu wo sia uli-ulit maséréo wo imasama'o, akar kaséréanna waya loor. 26Wo iru'du' i Yesus si tou itu maréng am baléna wo kumua, “Tioo ko maréng sumawel an doong itu.”
Em pangakun i Petrus sapaoka si Yesus ituo si Mesias
(Mat. 16:13-20; Luk. 9:18-21)
27Kekawus in itu, si Yesus wo sé murit-Na mangé an doo-roong an sangkum ing Kaisarea Filipi. An uner in lalan, Sia mamuéi a sé murit-Na, “Em pakua é tou, si séi réén Aku?”
28 #
Mrk. 6:14-15; Luk. 9:7-9 Isowat éra ai Sia, “Awéan sé makua, si Yohanes Mabaptis, sé walina makua si nabi Elia, sé walina ka'i makua esaan asé nabi.”
29 #
Yoh. 6:68-69 Wo wuéien-Na ai séra, “Taan sa iciit icamu si séi réén Aku?”
Isowat i Petrus, “Si Guruo si Mesias!”
30Wo pinéro keli i Yesus séra wosama' ra'ica toro ipakua-kua éra a si séike' mangé andumoro' Sia.
Si Yesus kumua ing kumataré andumoro' im papaté-Na wo tambisa eng kumiit Sia
(Mat. 16:21-28; Luk. 9:22-27)
31An tutuw itu, tumo'tolo si Yesus sumusui ai séra sapaoka si Toyaang i Tou musti muléng ing keli kawenduan wo icélong oka é matu-matu'a é tou Yahudi, kikiiten é imam wo sé makailek wutul in Torat, wo Sia patén oka taan asi endo katelu Sia tumou sumawel. 32Pakasa en anio' aicua-Na in da'ica ipaene-enep. Taan wésoon i Petrus si Yesus an tembir wo Sia romaanna repet.
33Wo si Yesus suméléng wo téintengen-Na sé murit-Na, wo romaan-Na repet si Petrus, “Tumayango ko éi sétang! Em pawerotenmu ra'ica sapa em paweroten i Amang Kasuruan, taan sapa em paweroten é tou.”
34 #
Mat. 10:38; Luk. 14:27 Wo towan i Yesus sé tou keli wo sé murit-Na, icua-Na ai séra, “Sa awéan tou e masalé' kumiit Yaku, sia musti sumangkal in owakna, muléng in salipna wo kumiit Yaku. 35#Mat. 10:39; Luk. 17:33; Yoh. 12:25 Ampa'paan si séike' e masalé' lumowir ing katouanna, sia katalaan oka ing katouanna. Taan si séi si katalaan ing katouanna ampa'paan Yaku wo in Abar Kaaruien, kéréanna oka eng katouan akar ing kauré-uré. 36Sapa en torona si esa tou makéré pakasa sé ang kayo'baan, taan sia katalaan ing katouan akar ing kauré-uré? 37Ampa'paan, ra'ica wana e ro'na iwééna tanu isawel e makéré ing katouan akar ing kauré-uré.
38Ampa'paan si séike' mangé e malawi' ampa'paan Yaku wo in sususuien-Ku an dior é tou sé ra'ica le'tek wo keli kamesé-meséaan anio', si Toyaang i Tou ka'i malawi' oka mangaku si tou itu an tutuw-Na maai ang kawasa wangko' i Amang-Na, mewali-wali wo sé malaékat le'nas.”
Đang chọn:
Markus 8: TNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
En Taar Weru a nunuwu' é Tontemboan @ LAI 2018
