Markus 4
4
En andéan andumoro' si esa tou menganguma si mawuras in lulumbo
(Mat. 13:1-23; Luk. 8:4-15)
1 #
Mrk. 3:9-10; Luk. 5:1-3 Asi makasa si Yesus tumo'tol ka'i masusui an tembir in lour Galilea wo kelian en tou mai mali'us ai Sia. Ampa'paan in itu, Sia sumaké an londéi si ang karoro'an i makasuwa' an tembir in lour wo Sia lumukut am bitu. Wo sé tou keli an tembir in lour. 2Si Yesus masusui ai séra imaké ing keli andéan. Em ipasusui-Na tana'i:
3“Lingano mai sumama-sama'! Awéan si esa tou menganguma mangé muras in lulumbo. 4Ang karoro'anna imawuras, awéan en lulumbo irumongkor an tembir in lalan. Wo mai ro'keten é burung sé lulumbo itu akar imaka'pu. 5Awéan ka'i sé rumongkor an tana' wawatuan, en tana'na wayake' im pira. En lulumbo an tana' itu rior tumou, ampa'paan en tana'na waya im pira. 6Taan an tutuw mantango mai si yéndo, en tinanem itu maweles wo mapera ampa'paan ra'ica maa'mut sama'. 7Wo sé lulumbo walina ka'i rumongkor an uner in dukut tutunéan. En dukut tutunéan ka'i menéé-néé wo sumaput in tinanem itu akar ime'del wo ra'- ica imua' 8Taan awéan en lulumbo walina sé irumongkor an tana' kemel. En tinanem itu tumou sowor wo mua'. Em bua'na awéan sé telu ngapulu' lumepet, awéan si enem ngapulu' lumepet, wo awéan ka'i sé sangaatus lumepet.” 9Icua ka'i i Yesus, “Si séi e makalunteng, aweso taré sia lumingao sumama-sama'.”
10An tutuw i Yesus oka in esa, sé makii-kiit Sia wo sé sangapulu' rua murit-Na mamuéi ai Sia eng kaangéan in andéan itu. 11Wo isowat-Na, “Sé sususuien icaenep andumoro' ing Kakolanoan i Amang Kasuruan aicua-Kuo ai camu. Taan a sé tou walina ipakua-Ku maké in andéan, 12#Yes. 6:9-10 wosama' sé aipatic ang Kitap Le'nas mamuali,
‘Mandé sinéré éra taan
ra'ica kailekan éra sapa en sinéré.
Mandé ka'i lininga éra taan
ra'ica kinailekan éra sapa en lininga.
Ampa'paano séra taniitu,
séra ra'ica mape'dis wo ra'ica makéré ing kaampungan.’ ”
13Kekawus in itu, icua i Yesus ai séra, “Ra'ica réén kaangéan iow en andéan itu? Sa taniitu, tambisa réén eng kaangéan iow en andéan walina? 14Eng kaangéana tana'i: si tou menganguma si mawuras in lulumbo itu, ayandé sé tou mengakua in Taar i Amang Kasuruan. 15En lulumbo irumongkor an tembir in lalan ayandé sé tou iluminga in Taar-Na, wo en Taar si aicua ai séra itu maike' niindo i kikiiten é sétang. 16En lulumbo si rumongkor an tana' wawatuan ayandé sé tou iluminga in Taar itu wo makala'us tumerima ang karapi in arui en até, 17taan en Taar itu ra'ica maa'mut sama' wo ra'ica itumang uré an até éra. Sa séra tenan ing kasusaan kuma'pa in okoi ampa'paan maéman in Taar itu, séra makala'us tumela'u si Amang Kasuruan. 18En lulumbo si rumongkor an uner in dukut tutunéan ayandé sé tou iluminga in Taar itu, 19taan séra maindé-indé'ke' andumoro' ing katouan éra ang kayo'baan wo asaloke' maéré-éré ing kasiyaan wo masalé-salé'pé' ka'i ing kalébéan walina. Pakasa en itu méma' iséra ra'ica iméé rékén asi Taar itu, akar en Taar itu ra'ica imua' an untep in até éra. 20Wo en lulumbo sé irumongkor an tana' kemel ayandé sé tou iluminga wo tumerima in Taar itu wo mua'. Awéan sé imua' telu ngapulu' lumepet, awéan sé enem ngapulu' lumepet, wo awéan ka'i sé sangaatus lumepet.”
En andéan andumoro' in sosoloan
(Luk. 8:16-18)
21 #
Mat. 5:15; Luk. 11:33 Kekawus in itu icua ka'i i Yesus ai séra, “Si séi e méngkét in sosoloan wo iweta'na an darem im bantang kuma'pa an darem im patekelan? Tantu musti iweta'na am patuliran in sosoloan. 22#Mat. 10:26; Luk. 12:2 Ampa'paan ra'ica wana mandé esake' si ipakaenep wo ra'ica ipapaturu' oka sa. Wo ra'ica wana sé ipakaenep wo ra'ica kakailekan oka. 23Anaé, si séi si makalunteng, lumingao mai sumama-sama'!”
24 #
Mat. 7:2; Luk. 6:38 Wo icua ka'i i Yesus, “Wéanio' rékén sumama-sama' sapa sé pinalingao miow! Sa kamu wutu-wutul masalé' makailek, émaan oka i Amang Kasuruan kamu lébé makailek, wo awesan-Napé' ka'i wosama' kamu lébé makailek. Anaé em pengaukur sé pengaukur iow a sé tou walina siitu oka ka'i en yukur ai camu. 25#Mat. 13:12, 25:29; Luk. 19:26 Ampa'paan si séi e masalé' makailek sapa sé aicua-Ku, émaan oka i Amang Kasuruan sia lébé makailek. Taan si séi si ra'ica kiim makailek sé aicua-Ku, sapa sé kinailekannao émaan oka i Amang Kasuruan ra'- io kata'néianna waya.”
En andéan andumoro' in lulumbo si tumou
26Icua ka'i i Yesus, “Andumoro' ing Kakolanoan i Amang Kasuruan, tanu in andéan anio': Awéan si esa tou menganguma mawuras in lulumbo an tana'. 27An tutuw im bengi sia tumekel wo mando mai sia mapolo, wo en lulumbo itu suméé wo tumou. Sapa e imamuali an tinanem itu, ra'ica kailekan i tou itu. 28Ampa'paan en tana' in esa eng kumesot im buéna. Kataré itouna mai en sééna, kumiitai rondorana wo kumiitai itu wua'na si matu-watu. 29#Yl. 3:13 Sa em bua'na mawowoso si tou menganguma itu makala'us mangé mupu' ampa'paan an orasnao in upuun.”
En andéan andumoro' im batuna si tumeki-tekic
(Mat. 13:31-32, 34; Luk. 13:18-19)
30Icua ka'i i Yesus ai séra, “Yandé-Ku in sapa eng Kakolanoan i Amang Kasuruan wo maké in andéan sapa ipeputé Ku en itu? 31Eng Kakolanoan i Amang Kasuruan ayandé tanu im batuna si tumeki-tekic aiwuras an tana'.#4:31 Si tinanem tanu si anio', a nunuwu' é Yunani ‘sinapeos'. Em batuna tekic keli, wo sa tumou mengaangé in telu meter eng karangka'. Si watuna anio' si tumeki-tekic asé pakasa im batuna si ang kayo'baan. 32Taan sa em batuna itu aiwuraso an tana' sia tumou wo mawangker wo mangkerai am baya-waya asé lalaina in tinanem sé pengaséndéén. Sé panga-panganana ka'i mawangker akar ro'na rumunan é burung.”
33Keli en andéan tanu siitu, em pinaké i Yesus e mengakua in Taar ai séra, iciit ing kailekan éra. 34Sia mengapaké in andéan sa mengasusui a sé tou keli. Taan a sé murit-Na, icua-Na waya eng kaangéan in andéan itu.
Si Yesus menteng in deges repet
(Mat. 8:23-27; Luk. 8:22-25)
35Asi endo itu matawio im bengi, icua i Yesus a sé murit-Na, “Mayoo kita lumewet angé in lour.” 36Kumawus in itu tela'u éra sé tou keli itu wo sumaké an londéi pakalukutan i Yesus. Si Yesus wo sé murit-Na lumondéio mangé, wo sé londé-londéi walina mekiito mangé wo iséra. 37Ra'ica uré mai en deges repet. Awéan ka'i sempa' mai menempa-nempa' in londéi akar kinauntepan in dano wo metine-tinepo woo. 38An tutuw itu si Yesus kinakili'an an londéi am paulunan an diit im palukutan an somoi. Wo polon é murit-Na Sia wo kumua, “Guru, tioo iwaya kami maté.”
39Si Yesus mapolo wo peréntan-Na en deges itu wo kumua asi lour itu, “Menes! Mentengo!” Wo en deges menteng wo en sempa' an lour itu wutu-wutul malener.
40Kumawus in itu, icua i Yesus a sé murit-Na, “Kéitu réén kamu maindé'? Kéitu réén kamu ra'ica mapercaya?”
41Séra maindé'o keli wo mengkuanan, “Si séi réén si Tou anio', akar en deges wo en sempa' kumiit im perénta-Na?”
Đang chọn:
Markus 4: TNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
En Taar Weru a nunuwu' é Tontemboan @ LAI 2018
