Marcos 11
11
Jerusalénman Jesús chayashqan
Mateo 21.1-11; Lucas 19.28-40; Juan 12.12-19
1Jerusalénman Jesús aywarmi Olivos jirkancho Betfagé y Betania markakunaman chayarqan. Tsaypitami ishkay discïpulunkunata kachar 2kayno nirqan: <<Taqay markaman aywapäkuy. Chayashpaykimi pipis manaraq muntakushqan manta bürru wataraykaqta taripäkunkipaq. Tsay bürruta paskarir apapäkamuy. 3Tsaycho pipis <¿imanirtaq bürruta paskarkaykanki?> nishuptikiqa: <Señor Jesúsmi munaykan. Rätulatami kutiratsimushaq> nipäkunki>>.
4Tsawraqa discïpulunkuna aywar taripäkurqan wayi punkucho manta bürru wataraykaqta. Tsay wayiqa näni kuchunchömi karqan. Paskarkaykaptinmi 5tsaycho kaykaq runakuna tapurqan kayno nir: <<¿Imapaqtaq bürruta paskarkaykanki?>>
6Tsayno niptinmi Jesús yachatsishqannöla nipäkurqan. Tsawraqa <<apapäkuy ari>> nipäkurqan.
7Bürruta chayaykatsir punchunkunata karunaparkuptinmi Jesús muntakurqan. 8Muntashqa aywaptinmi tsaytsika runakuna punchunkunata jakunkunata näniman mashtar Jesústa kushishqa chaskikärirqan. Wakinnami palmakunapa rämankunata pakirir pakirir näniman mashtapäkurqan. 9Tsawraqa puntanta aywaqkuna y qepanta aywaqkunapis kushikushpan kayno nipäkurqan: <<¡Hosana!#11.9 Israel runakuna Hosana nirqan Tayta Diosta alabarmi. ¡Tayta Diospa jutincho shamuq runa alabashqa kaykulätsun! 10¡Paymi unay ayluntsi Davidno mandamaqnintsi rey kananpaq aywaykämun! ¡Jana patsachöpis alabashqa kaykulätsun!>>
11Jerusalénman yaykurnami Jesús aywarqan templu patiuman. Tsaycho rikapakurirmi tardina kaptin chunka ishkay discïpulunkunawan Betania markaman kutirqan.
Hïgus yörata Jesús tsakitsishqan
Mateo 21.18-19
12Tsaypita jukaqnin junaqnami Betaniapita Jerusalénman kutiykashqancho Jesús mikanarqan. 13Tsaymi hïgus yörata raprayuqtana karupita rikaykur wayuyninta ashiq aywarqan. Ashirpis wayunanpaq tiempun manaraq kaptinmi rapralanta tarirqan. 14Tsaymi kayno nirqan: <<¡Kananpitaqa manami imaypis wayunkipaqnatsu!>>
Tsayno nishqantami discïpulunkuna mayapäkurqan.
Templucho rantikuqkunata Jesús qarqushqan
Mateo 21.12-17; Lucas 19.45-48; Juan 2.13-22
15Tsaypita Jerusalénman chayashpanmi templu patiuman yaykuykur rantikuqkunata y rantipakuqkunatapis Jesús qarqurqan. Tsaynölami qellay rantikuqkunapa mësankunatapis#11.15 Jesús kawanan witsanmi Roma runakunapa qellayninta Israel runakuna manijaq imatapis rantipakunanpaq. Tayta Diospaq ofrendata apananpaqmi itsanqa templuman apananpaq kaq qellaytaraq rantiq. y paluma rantikuqkunapa cajonninkunatapis jitar usharqan. 16Tsaynöpis runakunata micharqan templu patiupa imatapis mana pasatsinanpaq. 17Nirkurnami kayno nirqan: <<¿Manaku kayno qelqaraykan: <Wayïqa kanqa maytsay nación runakuna manakamänanpaqmi>?#Isa. 56.7. Tsayno niykaptinpis qamkunaqa suwakunapa machayninmanmi tikratsipäkushqanki>>.#Jer. 7.11.
18Tsayno nishqanta mayarmi mandaq cürakuna y ley yachatsiqkuna wilanakurqan Jesústa imanöpapis wanutsipäkunanpaq. Itsanqa Jesús yachatsishqanta runakuna kushishqa chaskikuptinmi paykunata mantsakur prësu mana tsaritsirqantsu. 19Patsa tsakaptinnami Jerusalénpita yarqur Jesús aywakurqan.
Hïgus yörata tsakishqatana tarishqan
Mateo 21.20-22
20Tutanninnami Jerusalénman discïpulunkunawan Jesús kutir rikapäkurqan hïgus yöra pasaypa tsakishqana kaykaqta. 21Jesús nishqanta yarparkurmi Pedro kayno nirqan: << <Manami wayunkinatsu> nishqayki hïgus yörata rikäriy, rabí. Pasaypa tsakishqanami kaykan>>.
22Tsawraqa Jesús kayno nirqan: <<Tayta Diosman yärakäriy. 23Rasunpami kayno nï: Pipis lapan shonqunwan Tayta Diosman yärakur y nishqanno kananpaq kashqanta criyirqa taqay jirkata <kaypita lamarman ayway> niptinpis aywanqami.#Mat. 17.20; 1Cor. 13.2. 24Tayta Diosta manakurqa chaskinaykipaq kashqanta criyipäkunki. Tsayno criyirqa manakushqaykita chaskipäkunkimi.
25<<Tsaynöpis Tayta Diosta manakushqayki höra rabyatsishuqnikita manaraq perdonashqa karqa jukla perdonanki. Tsayno perdonaptikiqa qamkunatapis jana patsacho kaykaq Taytayki perdonashunkimi.#Mat. 6.14-15. 26[Runa mayikita mana perdonaptikiqa qamkunatapis jutsa rurashqaykita manami perdonashunkipaqtsu]>>.
Jesústa cürakuna tapushqan
Mateo 21.23-27; Lucas 20.1-8
27Tsaypitami discïpulunkunawan Jesús chayarqan Jerusalénman. Templu patiucho Jesús puriykaptinmi mandaq cürakuna, ley yachatsiqkuna y Israel mayor runakunapis 28tapupäkurqan kayno nir: <<Qamqa ¿pipa munayninwantaq rantikuqkunata qarqushqanki? ¿Pitaq nishushqanki tsayno qarqunaykipaq?>>
29Tsawraqa Jesús kayno nirqan: <<Qamkunatapis mä tapushayki. Tapushqäta nimaptikiqa noqapis wilashaykimi pipa munayninwan qarqushqätapis. 30¿Pitaq Juanta kachamushqa bautizananpaq? ¿Tayta Diosku o runakunalaku? Mä nipäkamay>>.
31Tsayno tapuptinmi kikinpura kayno parlapäkurqan: <<Tayta Dios kachamushqanta niptintsiqa: <¿Imanirtaq mana chaskikärishqankitsu?> nimäshunmi. 32Tsaynöpis manami nishwantsu runakuna kachamushqanta>>.
Tsayno nipäkurqan runakunata mantsakushpanmi. Juan profëta kashqanta lapan runakunami yarpapäkurqan.
33Tsawraqa Jesústa kayno nipäkurqan: <<Manami musyapäkütsu pï kachamushqantapis>>.
Tsayno niptinmi Jesús kayno nirqan: <<Noqapis manami wilashaykitsu pipa munayninwan rantikuqkunata qarqushqätapis>>.
Đang chọn:
Marcos 11: qvmB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2003, Wycliffe Bible Translators, Inc. All rights reserved.
