Oyinyima 37
37
Ịtọpa Ijosẹẹhụ ọnịrị adẹnyara anị.
1Ijekọvụ vị ana rị ra ịnị ẹtẹ Ikanaani ịzị ada anị vịdị ra. 2Ịtọpa ezi Ijekọvụ ị yaa vaa jị ahụụ ngụ aanị nị. Ijosẹẹhụ vị ọpa ozweyi. Ọ sị gụ ịrayị ẹwụrịhịmba. Ọnị beri adẹnyara anị ana vi ezi Ibiriha ọnịrị ezi Iziripa ese Ijekọvụ e dudu si eyi pè ịsụpa ada ẹnịnị nị.
Ijosẹẹhụ vi ene vee cheeche yị ada ẹnịnị ka ezi Ibiriha ọnịrị ezi Iziripa aa mẹ̀ ebira odivi. 3Ijosẹẹhụ ọ vị ozi oni Ijekọvụ sì ịrẹyị anị hu ịnị avaba ezi ọnị ọ ma nị. Iruvo ọ vị ka Isirẹrị o si bo dị ọ va ma Ijosẹẹhụ. Di Ijekọvụ jị awuru ọnyị ụvọ ọgọdọ dị ọ sị yị Ijosẹẹhụ nị; ẹngụ awuru ọnọọ aā jị yị ozi ene e sì ịrẹyị anị ịnị ụmẹ ọnọọ nị. 4Ịjị ẹnẹbẹnị Ijosẹẹhụ si re ka ọnị ada ẹnịnị sì ịrẹyị anị hu nị, dị ẹnị re nyima dị ẹ yaa kụ́ ayị Ijosẹẹhụ nị. Ẹnịnị ẹ yị kụkụ sị ẹngwọọrọ pè e kà ịrẹyị.
5Ẹkụhị ọnya Ijosẹẹhụ ộ ra ụra ọnya. Ọ mẹ̀ kà a yị ẹnẹbẹnị anị nịnị, dị ọ rẹ mẹ ka ẹ hyakụ kụkụ kụ́ ayị anịị hu avọọ nị. 6Ijosẹẹhụ ộ kà a yị wa ka: Ẹẹ wụ́ ụra ọnị ọnị ra ajịnị? 7Ọ kà ọnị ộ ra ụra ka ẹnị yà ịnị aarẹ aa mẹ ihwiti. Ẹnị mẹ̀ sị ihwiti sụ́ hi ẹtẹ, dị ihwiti anị vana kwẹẹtẹ jẹẹ nị. Di ihwiti ẹnịnị wara kara aanị, di e nyima ịrẹsụ yọ nị. 8Dị ẹnẹbẹnị anị nịnị ka: Ịzẹyịza óō ka ọnị vaa vị ohinọyị ẹnịnị nị? Ẹ ka a vị ọnị a vaa vị ọdọvịdị ẹnịnị aanị nị? Ụra ọnị ọ maanị ra dị ọ kà a yị wa aanị, dị ẹ dà ụvọ tụ́ ịnị ụvọ dị ẹ yaa kụ́ ayị anịị hu avọọ nị.
9Ịhị ọsa Ijosẹẹhụ ọ rẹ ra ụra ọsa, dị ọ rẹ kà a yị ẹnẹbẹnị anị nịnị nị. Dị ọ ka: Ẹẹ yẹ ka ọnị ọ rẹ ra ụra ọsa. Ọ kà ọnị ô re ka ọyị, ụhwẹ ne beri Ụzọmị ẹwụrọnya aa ká ịrẹsụụ hi yị ọnị. 10Ịjị ọ maanị kà a yị ada anị ọnịrị ẹnẹbẹnị anị nịnị, dị ada anị hị́ ọ dị aa tụ́ ọ ohuvọ nị. Dị ada anị ka, “Ẹngụ ụra ịsị aa ra aanị kẹ? U Vi óō ro ka ọnịrị ọnyị anị ne beri ẹnẹbẹnị anị vaa vẹ dị ẹnị aa tanaa tụra ẹtẹẹ yọ nị.” 11#Ụkọ 7.9Ẹnẹbẹnị Ijosẹẹhụ kuku ee pè e kụ̀ ụhị, ama dị ada anị sị ịrẹyị ọnọọ tụ́ ịnị ayị, di ee ro o nị.
 ná Ijosẹẹhụ ọrịhị na ngụ Ijipiti
12Ụmẹ ọnya ẹnẹbẹnị Ijosẹẹhụ ẹ raà kụ́ atẹmẹ ọnịrị ẹvụ ada ẹnịnị aa naa rị ọgụrị Ịsẹkẹmị. 13Di Isirẹrị va hị́ Ijosẹẹhụ dị ọ ka: Ộ yẹ ka ẹnẹbẹnị anị ẹ ra à kụ́ ịsụpa aa naa rị Ịsẹkẹmị. Ọ kà ọ̀ vẹ dị ọnị ọ̀ tụ́ ọ ne tụ̀ wa. Di Ijosẹẹhụ ka ooho nị. 14Dị ada anị ka, “Ò ve ne hee ẹnẹbẹnị anị, ẹ̀ẹ dahi beri ịsụpa ẹnẹ ẹ kụ́ na. Ọ kà ọ̀ọ sị wa re dị ọ̀ va kà a yị ọnị.” Dị ada anị vavọọ tụ́ ọ hụrẹ ini ozi Ihebirọnị, di Ijosẹẹhụ na dị ọ na ngụ Ịsẹkẹmị nị.
15O mè tụ́ Ịsẹkẹmị, ọnọrụ ọnya aanị ô re e ọ maa ngụ ịnị avịị zị. Dị ọnọrụ ọnọọ va họ̀ ọ dị ọ ka, “Si ee sì?” 16Di Ijosẹẹhụ ka, “Ẹnẹbẹnị anị nịnị ọnị ee sì nọ. Dị ọ ka aarịhịnị ịzị ẹ yà aa kụ́ ịsụpa ẹnịnị rị kẹ?” 17Dị ọnọrụ ọnọọ ka, “Ẹ sị hụụ ịzẹnị ộ. Ọnị ộ wụ́ ka ệ kà a ka ẹnị aa nọ Idotani.” Ịzẹyịza di Ijosẹẹhụ sì ẹnẹbẹnị anị nịnị na, di o ne tù wa Idotani nị. 18Dị ẹnẹbẹnị anị nịnị re e ka aa vẹ ẹ́nẹẹnẹ nị. Ijosẹẹhụ ộ yị gụrị wa, dị ẹ wụsẹ gẹ eyi ka ẹnị aa wụ̀ ọ nị. 19Dị ẹ hị́ ẹngụ dị ẹ ka, “Ọta amị anaā ra ụra avọọ aa vẹ avọọ nọ. 20Ẹ ka à ẹnị ẹ wụ̀ ọ di ẹnị e ne e ngụ ọnya ini ọ̀ha ene hi ịzẹnị aanị. Dị ẹnị ẹ kà a ka uye odivi ọ̀ wụ̀ ọ rị nị. Ịjọnọọọ ẹnị ve e re ụra anị ọ̀ọ mẹmẹ kụkụ vaa sẹ.” 21Ịjị Irubẹnị maanị wụ́, dị aa vụrị ka ọnị ọ̀ dọ Ijosẹẹhụ hụrẹ wa ụvọ nị. Dị ọ ka, “Asị ẹnị wụ̀ ọza nịnị o!” 22Ẹ yị nyayịnẹ wụ̀ ọza o! È ne e ngụ ọ̀ha ọnọnị ana yà ịnị ụnọmị ịzẹnị aanị. Ama asị ẹ sị ụvọ kanyị ọ. Iruvo oni Irubẹnị vavọọ sị ka ọ vị ka ee sì ka ọnị ọ̀ dọ Ijosẹẹhụ hụrẹ wa ụvọ, dị ọ̀ sị ọ varẹma na yị ada ẹnịnị.
23Ịzẹyịza Ijosẹẹhụ mè ve si tù ẹnẹbẹnị anị nịnị, dị ẹ za a dị ẹ ngwa a awuru anị ọnyị ụvọ ọgọdọ ọnọọ oni o chire, 24dị ẹ sị ọ di e ne e ngụ ọhà ọnọọ nị. Ịkangga ọnọọ vị osusu, ọ yị nyị enyi. 25Di e ne hi ẹtẹ dị ẹ yaa rị ịsa nị. Ẹ mẹ̀ kana eyi, di e re anusoze ana vi Anisimẹrị ka ệ kụ́ ịnyaakụmị hụrẹ Igiriyadi aa vẹ nị. Ệ kụ́ ụsụ ọchị ozoza irenyi-irenyi ana katarihi ana a sịị mẹ̀ ịsa anaā dagụ ozoza dị a rẹ sịị mẹ ahọ̀nọ tụra ịnyaakụmị ẹnịnị. Ẹnịnị vị ana aa nọ Ijipiti. 26Di Ijuda kà a yị anda ẹnịnị dị ọ ka, “Ẹnị ẹẹ wụ ọyịnyara ẹnịnị ọnọnị dị ẹnị ẹ yị zẹẹ ka à yẹ nị. Sị ẹ vị ọgụ ẹnị ẹnị vaa rị ịnị anị? 27A vẹ vị ya ná a yị Anisimẹrị ẹnẹnị. Asị ị sị ụvọ kanyị ọ agụvị ka ọyịnyara ayị ọ vị nị. Anya ẹngụ ayị ọ vị nị.” Dị ẹnịnị dọ ooho nị. 28#Ụkọ 7.9Ịjị osohu Animidiya ẹnẹẹ aa parahu, dị ẹnẹbẹnị Ijosẹẹhụ nịnị na sị Ijosẹẹhụ hụụnị ọ̀ha dị ẹ ná ẹ yị Anisimẹrị ẹnẹẹ nị. Ẹkẹhị ụkọrọ ẹkụhị oohu ẹ ná a nị. Dị aza ẹnẹẹ sị Ijosẹẹhụ dị ẹ yaa nọ Ijipiti nị.
29Ịjị Irubẹnị ọnị varẹma nọ ịnị ịkangga ọnọọ ka oni ò ne hee Ijosẹẹhụ, o yi kuku re e ịzọọ. Dị ọza awuru anị, dị ọ na a. 30Dị ọ varẹma ne tù ọhụva anị nịnị dị ọ ka, “Oni o yi re ozi ọnọọ ộ! Ọnị maa zị ọ aanị.” 31Dị ẹ za ẹvụ ọnya dị ẹ wụ̀ ọ. Ịjị ẹ sị ọ wụ dị ẹ sị awuru Ijosẹẹhụ, di e ne e ngụ ịnị ịdẹ ọnọọ nị. 32Dị ẹ sị awuru ọnyị ụvọ ọgọdọ ọnọọ tụ́ hi ada ẹnịnị dị ẹ ka, “Ịnị avị ẹnị maanị ne tù ọ nọ, o re e di a re àa vị awuru ozi aanị yọ à vị ka ẹ yị vị ọnị.” 33Ịjị ada ẹnịnị re e dị ọ ka, “Oogwoo! Awuru ozi anị yọ! Ộ yẹ ka vi uye ịnị avị ọ sị ọ wụ. Uye ịnị avị ẹ sị Ijosẹẹhụ gara chẹkẹchẹkẹ.” 34Di Ijekọvụ za awuru anị dị ọ na a, dị ọ chire ịta orere, di o jị òrèrè Ijosẹẹhụ mẹ ẹkụhị ọrụrụ-ọrụrụ nị. 35Avaba ezi anọrụ anị ọnịrị ezi anẹẹ anị ệ sị vụrị ka ẹnị è ji ọ ùnè, ama ọ yị zẹẹ ka oni ò kú irenu. Ọ kà, “Aanị ọnị maa jị òrèrè ozi anị pooro di ọnị ò ne tù o ini eku nị.” Avọọ ada Ijosẹẹhụ mè jị òrèrè anị nị.
36Ụmẹ oni maanị ee sụ ùnè aanị, Animidiya ẹ sị Ijosẹẹhụ na yị Ipotihwa ịnị ẹtẹ Ijipiti. Ipotihwa vị ọnya ini ohi ọnị ohinọyị ka oo pe ọnịị mẹ̀ ụkọrọ. Ọnị ọ vị ọga isoja ene ee sere irehi ohinọyị nị. Animidiya ẹ rẹ vị Anisimẹrị nị (re Ọdọvịdị nịnị 8.22, 24).
Đang chọn:
Oyinyima 37: EBTP
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Ebira First Bible © Bible Society of Nigeria, 2014.