Ọda 13

Asị a hẹkẹ ori ọnyọọnyị

1Àa nyị Ọnịsẹ, a vị ọza anaā kà etore ana kwẹẹtẹ ịnị ẹngụ awụ nịnị di o wo oto ịvọpa a vị apọtẹrẹwa ohyozirenu. 2Ịrẹyị ọnị ọ kà ọ̀ọ sị sẹ, dị ọ kụkụ ee tụra wụ na hẹkẹ ori nịnị ọnị wẹ yị vịdị hẹkẹ da. 3Asị ụ dọ ịrẹyị anị tụ ịzọọ agụvị ka Ẹnẹyịmavara vị ana aa sị zama wụ re ka ọnị ọ yẹ wàa sị avaba ayị wụ sì ịrẹyị anị. 4Saasa Ẹnẹyịmavara Ohomorihi awụ, di we hí angwa anị. Wụ́ chire e, dị ụ wa sị ụvọ za avaba ọda anị, dị ụ wa hẹkẹ ẹ, dị ụ wa jẹẹ gere-gere pe e. 5Wụ̀ ọnịsẹ ọnọọ ana ka wa mẹ akamawụ hi Ẹnẹyịmavara Ohomorihi ana dọ wụ ha hụrị Ijipiti ịzị a ya za wụ nịnị ọrịhị. Ẹngụ ọza ọnọọ vị ọza ọhịmị ana a sị vụrị ka ọnị ọ mẹ wụ nịnị nyeeyi hụụnị ẹhẹ ana vọrọ ọnị Ẹnẹyịmavara kà wa ra. Wụ̀ ọ agụvị wa kụ udivi hụrẹ ẹtẹ. 6Ọ daka vị ọnyara awụ, ọ vị ozi ewu ọnọrụ a vị ọnẹẹ, ọ vị ose ewu ọnị u sì ịrẹyị a vị ọta awụ òo were-were aa tụ wụ ụka ka wa hẹkẹ ori nịnị ọnị ẹwụrị ohiku awụ nịnị ẹ yị hẹkẹ da nị, 7ọ vị ori aza ọnị ẹwụrị ra va hura, a vị ori aza ana ra aha onoze. 8Asị ụ zẹ ka o vene wụ. Asị ụ sị ụtọ pe ịrẹyị ẹnịnị vụrụ-vụrụ. Asị ụ vayị ẹnịnị, asị ụ sị wa tẹ̀. 9Wụ̀ wa! Vị ọnịpaapa ene vịdị ee ne wa ịrẹta, dị aza ana vọ ẹnẹ ẹ rẹ kụ ịrẹta hi wa. 10Sị ịrẹta-ịrẹta wụ̀ wa agụvị ka ẹnị e si ka ẹnị kụ wụ nịnị nyeeyi hụụ ịdị Ẹnẹyịmavara Ohomorihi awụ nịnị ana kụ wụ nịnị hụrẹ Ijipiti ịzị ụ vị ọrịhị nịnị. 11Ịjọnọọ avaba Anisirẹrị vaa wụ́ ịsa ana mẹ̀; dị angwa vee hi wa, dị ẹ yị nyị ọza ana nyayịnẹ mẹ ẹngụ ebira odivi ọnọọ. 12Wàa na sị ra ịnị ẹkụra ọnị Ẹnẹyịmavara Ohomorihi awụ nịnị sị yị wụ nịnị, ụ vaa wụ́ 13ka aza kẹnẹ ẹnyị ịnị awụ nịnị ẹ raà kụ aza nyeeyi na hẹkẹ ori nịnị ẹnị wẹ yị mā hẹkẹ vịdị vẹ. 14Wàa vavọọ hụ́ uhuhu, sì iruvo anị ẹtẹẹtẹrẹ; Àa vị ịzẹyịza ẹ mẹ̀ ebira odivi ọnọọ nị, 15wụ̀ avaba aza ana ra ịnị ẹkụra ọnọọ ẹnịrị avaba ịsụpa ẹnịnị. Vu avaba ẹkụra ọnọọ ẹtẹ saka-saka. 16Kụ́ avaba ogu anẹkụra ọnọọ gụ ịnị orere, dị a rị ẹkụra ọnọọ ịra anka ịsa ịsọvọ yị Ẹnẹyịmavara Ohomorihi awụ nịnị. A vavọọ na eburu tịtẹ pooro, asị e tenyi ọ da. 17Asị a nyị ọza ana sị̀ hụụnị ogu ene chi hi aanị, agụvị Ẹnẹyịmavara ọ vaa hụụnị ọyịkụ anị, dị ọ vayị awụ nịnị. Ọ vaa vayị awụ nịnị, dị ọ mẹ ka wa rụrụ hu avọọ anka ọ mẹ hị́ eku yị ohiku awụ nịnị, 18ẹ̀ẹ saasa avaba ọda Ẹnẹyịmavara ọnị ọnị sị yị wa ajịnị, dị ẹnịnị sị ụvọ za a nị.

Đang chọn:

Ọda 13: EBTP

Tô màu

Sao chép

So sánh

Chia sẻ

Bạn muốn lưu những tô màu trên tất cả các thiết bị của mình? Đăng ký hoặc đăng nhập

Tìm hiểu thêm về IWE ỌNỊNỊ

Ọda 13

Những câu Kinh Thánh phổ biến từ
Ọda 13

Nghe Ọda 13

Kinh Thánh:

Ebira

Bản dịch: IWE ỌNỊNỊ - EBTP

Ọda 13

Ọda 13

Những câu Kinh Thánh phổ biến từ Ọda 13

Nghe Ọda 13

Kinh Thánh:

Ebira

Bản dịch: IWE ỌNỊNỊ - EBTP

Ọda 13

Những câu Kinh Thánh phổ biến từ
Ọda 13