လံာ်လူၤကၣ် တၢ်ကတိၤဆှၢနုာ်
တၢ်ကတိၤဆှၢနုာ်
စီၤလူၤကၣ်အတၢ်သးခုအကစီၣ်ပာ်ဖျါထီၣ်ယ့ၣ်ၡူးဒ်အမ့ၢ် အံၣ်စရ့လးအပှၤအုၣ်က့ၤခီၣ်က့ၤတၢ်အကစၢ်တဂၤ, လၢအဘၣ်တၢ်စံးပာ်တ့ၢ်လၢအဂ့ၢ်ဒီးဒ်ပှၤဟီၣ်ခိၣ်ဖိခဲလၢာ် အပှၤအုၣ်က့ၤခီၣ်က့ၤတၢ်အကစၢ်တဂၤအသိးန့ၣ်လီၤ. စီၤလူၤကၣ်ကွဲးဖျါဝဲဒၣ်လၢယ့ၣ်ၡူးဘၣ်တၢ်ကိးအီၤလၢ ကစၢ်ယွၤအသးဒ်သိးအကစံၣ်တဲၤတဲလီၤတၢ်သးခုအကစီၣ် ဆူပှၤဖှီၣ်ဖိယာ်ဖိတဖၣ်အအိၣ်, ဒီးလံာ်တၢ်သးခုအကစီၣ် တဘ့ၣ်အံၤအိၣ်လၢပှဲၤဒီးတၢ်သူၣ်အိၣ်သးအိၣ်ဘၣ်ပှၤသ့ၣ် တဖၣ်လၢအလိၣ်ဘၣ်တၢ်အါမံၤအါကလုာ်န့ၣ်လီၤ. တၢ်ပာ်ဖျါလီၤဆီဘၣ်ဃးတၢ်သးခုအိၣ်ဖျါထီၣ်စ့ၢ်ကီးလၢ လံာ်လူၤကၣ်အပူၤ, လီၤဆီဒၣ်တၢ်ဖဲအဆၢဒိၣ်အခီၣ်ထံးတဖၣ် လၢအဘိးဘၣ်သ့ၣ်ညါဘၣ်ဃးယ့ၣ်ၡူးအတၢ်ဟဲတဘျီကဒီး လၢအကတၢၢ်ဖဲယ့ၣ်ၡူးက့ၤထီၣ်ဆူမူခိၣ်န့ၣ်လီၤ. တၢ်တဲဘၣ်ဃးခရံာ်ဖိအတၢ်စူၢ်တၢ်နာ် အတၢ်ဒိၣ်ထီၣ်ဒီးရၤလီၤအသးဖဲယ့ၣ်ၡူးအတၢ်က့ၤထီၣ်ဝံၤ အလီၢ်ခံန့ၣ်, ဘၣ်တၢ်တဲအီၤလၢပှၤကွဲးလံာ်တဂၤဃီဖဲ လံာ်မၤတၢ်အပူၤန့ၣ်လီၤ.
တၢ်နီၤဖး ၂ ဒီး ၆ (ကွၢ်တၢ်ဂ့ၢ်အတကွီၣ်လၢအပိာ်ထီၣ်အခံ) အိၣ်ဒီးတၢ်ဂ့ၢ်တၢ်ကျိၤအါခါလၢအဘၣ်တၢ်ထံၣ်န့ၢ်အီၤထဲလၢ လံာ်တၢ်သးခုအကစီၣ်တဘ့ၣ်အံၤအပူၤဒ်တၢ်တဲတဖၣ်လၢ အဘၣ်ဃးဒီးမူခိၣ်ကလူးတဖၣ်အတၢ်သးဝံၣ်, ဒီးပှၤကွၢ်သိတဖၣ်အတၢ်လဲၤအိၣ်သကိးဖဲယ့ၣ်ၡူးအိၣ်ဖျဲၣ်ထီၣ် အဆၢကတီၢ်, ယ့ၣ်ၡူးလၢတၢ်လုၢ်ဟံၣ်အပူၤဒ်ပိာ်ခွါဖိသၣ် တဂၤ, ဒီးတၢ်ကတိၤဒိတဖၣ်ဘၣ်ဃးပှၤၡၤမရံဖိလၢအဂ့ၤ တဂၤဒီးဖိခွါလၢအဟါမၢ်တဂၤန့ၣ်လီၤ. တၢ်ဂ့ၢ်ဘၣ်ဃးတၢ်ထုကဖၣ်, သးစီဆှံ, ပိာ်မုၣ်တဖၣ်အမူအဒါ, လၢယ့ၣ်ၡူးအတၢ်ဖံးတၢ်မၤအပူၤဒီး ကစၢ်ယွၤအတၢ်ပျၢ်တၢ်ဒဲးဘးတဖၣ်, ဘၣ်တၢ်ပာ်ဖျါလီၤဆီအီၤဒိၣ်ဒိၣ် မုၢ်မုၢ်လၢလံာ်တၢ်သးခုအကစီၣ်ဒီဘ့ၣ်အံၤအပူၤန့ၣ်လီၤ.
လံာ်အတကွီၣ်
တၢ်ကတိၤလၢညါ ၁:၁-၄
ပှၤဘျၢတၢ်စီၤယိၤဟၣ်ဒီးယ့ၣ်ၡူးအတၢ်အိၣ်ဖျဲၣ်ထီၣ်ဒီးအကတီၢ်ဖဲအဝဲသ့ၣ်မ့ၢ်ဒံးဖိသၣ်ဆံး ၁:၅-၂:၅၂
ပှၤဘျၢတၢ်စီၤယိၤဟၣ်အတၢ်ဖံးတၢ်မၤ ၃:၁-၂၀
ယ့ၣ်ၡူးအတၢ်ဒိးဘျၢထံဒီးအတၢ်ဒိးတၢ်လ့ပစီ ၃:၂၁-၄:၁၃
ယ့ၣ်ၡူးအတၢ်ဖံးတၢ်မၤလၢကမျၢၢ်အကျါဖဲကီၢ်ကၤလံၤလါ ၄:၁၄-၉:၅၀
လၢကၤလံၤလါဆူယရူၤၡလ့ၣ် ၉:၅၁-၁၉:၂၇
နွံလၢခံကတၢၢ်တနွံလၢဝ့ၢ်ယရူၤၡလ့ၣ်အပူၤ ဒီးဖဲတၢ်လီၢ်တၢ်ကျဲလၢအဘူးဒီးဝ့ၢ်ယရူၤၡလ့ၣ် ၁၉:၂၈-၂၃:၅၆
ကစၢ်ခရံာ်အတၢ်ဂဲၤဆၢထၢၣ်သမူထီၣ်က့ၤ, အတၢ်လီၣ်ဖျါထီၣ်အသးတဖၣ်, ဒီးအတၢ်က့ၤထီၣ်ဆူမူခိၣ် ၂၄:၁-၅၃
Đang chọn:
လံာ်လူၤကၣ် တၢ်ကတိၤဆှၢနုာ်: KSWC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Sgaw Karen Common Bible © Bible Society of Myanmar, 1992.