Mateo 22
22
Matsɛ bi ɔ yokpeemi he abɛ
(Luka 14.15-24)
1Nɛ Yesu wo e nya nɔ nɛ e kɛ mɛ tu munyu ekohu ngɛ abɛhi a mi ke: 2“Hiɔwe matsɛ yemi ɔ ngɛ kaa matsɛ ko nɛ ngmɛ yo kpeemi okplɔɔ ha e bi. 3Nɛ e tsɔ e tsɔli ke a ya tsɛ nihi nɛ a kpee ɔ kɛ ba yo kpeemi ɔ he; se a mi bami. 4E kpale tsɔ tsɔli kpahi nɛ e ke: ‘Nyɛ ya de nihi nɛ a kpee ɔ ke: oʼɛ, i gbe ye niyeni ɔmɛ a nya; a gbe ye na amɛ kɛ ye lohwe lɛlɛɛ ɔmɛ, nɛ a gbe nɔ́ tsuaa nɔ́ nya; nyɛɛ ba yo kpeemi ɔ he!’ 5Se mɛɛ lɛɛ a bui po, nɛ a ngɔ a blɔhi, nɔ kake ho e ngmɔ mi ya, nɛ nɔ kpa hu ho e guɛyemi ya. 6Nɛ nihi nɛ piɛ ɔ nu e tsɔli ɔmɛ nɛ a wa mɛ yi mi, nɛ a gbe mɛ. 7Se benɛ matsɛ ɔ nu ɔ, e mi mi fu, nɛ e tsɔ e aslaafohi, nɛ a ya gbe kikɛmɛ a awiyeli nɛ ɔmɛ, nɛ a sã a ma a. 8Kɛkɛ nɛ e de e tsɔli ɔmɛ ke: ‘A to yo kpeemi ɔ he ni gbe nyɛ mohu, se nihi nɛ a kpee ɔ, a sɛ́.’ 9Lɔ ɔ he je ɔ, nyɛɛ ya magbɛ ɔmɛ a nɔ, nɛ nihi abɔ nɛ nyɛ maa na a, nyɛɛ kpee mɛ kɛ ba yo kpeemi ɔ he. 10Lɔ ɔ he ɔ tsɔli ɔmɛ je kpo kɛ ya blɔ ɔmɛ a nɔ, nɛ a ya bua nihi tsuo nɛ a na amɛ a nya, nimli yayamihi kɛ nimli kpakpahi, nɛ yo kpeemi he ɔ hyi tɔ kɛ nimli.
11“Se benɛ matsɛ ɔ ba ni ɔmɛ a hyɛmi ɔ, e ba na nɔ ko ngɛ lejɛ ɔ nɛ wui yo kpeemi tade; 12nɛ e de lɛ ke: ‘Huɛ, kɛ pee kɛɛ nɛ o ba hiɛ ɔ nɛ ɔ nɛ o wui yo kpeemi tade ɔ?’ Nɛ e nya ma. 13Kɛkɛ nɛ matsɛ ɔ de e tsɔli ɔmɛ ke: ‘Nyɛɛ fi e nine kɛ e nane nɛ nyɛ wo lɛ ya sake ngɔ fɔ blɔ se diblii ɔ mi! Lejɛ ɔ ya fomi kɛ lungu nya kpemi ngɛ.’ 14Ejakaa a tsɛ nihi fuu mohu, se nihi bɔɔ ahla.”
Oniatsumi he sane
(Marko 12.13-17; Luka 20.20-26)
15Kɛkɛ nɛ Farisifo ɔmɛ ho nɛ a ya da, bɔ nɛ a maa pee nɛ a wo e nya tso kpɛ. 16Nɛ a tsɔ a kaseli ɔmɛ kɛ Herodebi ɔmɛ kɛ ba e ngɔ ba de lɛ ke: “Tsɔɔlɔ, wa le kaa anɔkualetsɛ ji mo, nɛ o tsɔɔ Mawu blɔ ɔ ngɛ anɔkuale mi, nɛ o hlɛ́ nimli a mi; ejakaa o hyɛ we nimli a hɛ mi; 17lɔ ɔ he ɔ de wɔ bɔ nɛ o susuu. Anɛ e da kaa a tsuɔ onia haa Kaisare, aloo e dɛ?” 18Se Yesu kpa a yi mi tomi yaya a si, nɛ e ke: “Osatotsɛmɛ, mɛni he je nyɛ ngɛ mi dae? 19Nyɛɛ kɛ onia tsumi sika a nɛ tsɔɔ mi!” Nɛ a kɛ denario (cedi) tsɔɔ lɛ. 20Nɛ e de mɛ ke: “Mɛnɔ foni ji nɛ ɔ kɛ nɔ nɛ a ngmɛ ngɛ nɔ nɛ ɔ?” 21A de lɛ ke: “Kaisare nɔ ʼi.” Nɛ e de mɛ ke: “Lɛɛ, ynyɛɛ ngɔ Kaisare nihi ngɔ ha Kaisare, nɛ Mawu ni ɔmɛ nyɛ ngɔ ha Mawu!” 22Nɛ benɛ a nu enɛ ɔ ɔ, a nya kpɛ a he, nɛ a si lɛ nɛ a je.
Ni gbogboehi a sitemi he sane
(Marko 12.18-27; Luka 20.27-40)
23Jamɛ a ligbi ɔ nɔ nɔuu ɔ, Sadukifohi nɛ deɔ ke ni gbogboehi a si temi ko be ɔ hu ba e ngɔ ba bi lɛ ke: 24“Tsɔɔlɔ, Mose de ke: ‘Ke nɔ ko gbo nɛ e be bimɛ ɔ, e nyɛmi nɛ ngɔ e yo ɔ, konɛ e wo nina ngɔ ha e nyɛmi ɔ.’ 25Jeha nɛ ɔ, nyɛmimɛ kpaago hi wa kpɛti, nɛ bi nɔkɔtɔma a ngɔ yo, nɛ e gbo, nɛ akɛnɛ e si we bimɛ nge e se ɔ, e si e yo ɔ ha e senɔ ɔ. 26Ja nɔuu e tsa nɔ kɛ gu nɔ nɛ ji enyɔ ɔ kɛ nɔ nɛ ji etɛ ɔ nɔ kɛ ya su nɔ nɛ ji kpaago ɔ nɔ. 27Se mɛ tsuo a se ɔ yo ɔ hu ba gbo. 28Lɛɛ ni gbogboehi a sitemi ɔ mi ɔ, ni kpaago ɔmɛ a kpɛti mɛnɔ yo e maa pee, ejakaa mɛ tsuo a kɛ lɛ hi si?”
29Se Yesu he nɔ nɛ e de mɛ ke: “Nyɛ ngɛ tɔe, ejakaa nyɛ li ngmami ɔmɛ aloo Mawu he wami ɔ, 30ejakaa ni gbogboehi a si temi ɔ mi ɔ a ngɔɛ yo, nɛ a kɛ yi ha we gba hulɔ; se mohu a ngɛ kaa Mawu bɔfohi ngɛ hiɔwe. 31Se ngɛ ni gbogboehi a si temi ɔ he ɔ, nyɛ kane we nɔ nɛ Mawu de nyɛ ke: 32‘Imi lɛɛ, Abraham Mawu kɛ Isak Mawu kɛ Yakob Mawu ji mi’ ɔ? Mawu ɔ pi ni gbogboehi a Mawu, se mohu hɛkali a Mawu ʼi.” 33Nɛ benɛ asafo ɔmɛ nu enɛ ɔ ɔ, a he nya si mɛ ngɛ e tsɔɔmi ɔ he.
Kita ngua a
(Marko 12.28-34; Luka 10.25-28)
34Se benɛ Farisifo ɔmɛ nu kaa e ku Sadukifo ɔmɛ a nya a, a ba bua a he nya ngɛ he kake; 35nɛ a ti nɔ kake nɛ ji mlaa tsɔɔlɔ ɔ da lɛ nɛ e bi lɛ ke: 36“Tsɔɔlɔ, te nɔ nɛ ji mlaa a mi kita ngua a nɛɛ? 37Nɛ Yesu de lɛ ke: “Suɔ Nyɔmtsɛ o Mawu ɔ, kɛ o tsui tsuo kɛ o klaa tsuo kɛ o juɛmi tsuo? 38Kita amɛ a mi kekleekle nɔ kɛ ngua ji nɛ ɔ nɛ. 39Nɛ nɔ nɛ nyɛɛ se ɔ ngɛ kaa kɔlɔ ɔ ke: ‘Suɔ o nyɛmi nɔmlɔ kaa bɔ nɛ o suɔ mo nitsɛ o he.’ 40Kita enyɔ nɛ ɔmɛ Mlaa a kɛ gbali ɔmɛ tsuo kpla.”
David bi ɔ he sane
(Marko 12.35-37; Luka 20.41-44)
41Nɛ benɛ Farisifo ɔmɛ a nya ba bua a, Yesu bi mɛ ke: 42“Kɛ nyɛ susuu ngɛ Kristo ɔ he kɛɛ? Mɛnɔ bi ji lɛ?” A de lɛ ke “David bi ʼi.” 43E bi mɛ ke “Mɛni he je mɔ nɛ David, ngɛ mumi ɔ nya a, tsɛɛ lɛ ‘Nyɔmtsɛ’ nɛ e deɔ ke:
44‘Nyɔmtsɛ ɔ de ye nyɔmtsɛ ɔ ke:
Hii ye hiɛ ɔ nɔ
Kɛ maa su be nɛ ma ngɔ o henyɛli ɔmɛ
Ngɔ wo o nane si’ ɔ’?
45“Jeha nɛ ɔ ke David tsɛ lɛ ‘Nyɔmtsɛ’ ɔ, kɛ peɔ kɛɛ nɛ e pa peɔ e bi mɔ?” 46Nɛ nɔ ko nyɛ we lɛ heto ko nɛ e ha, nɛ jeha nɛ ɔ hu kɛ je jamɛ a ligbi ɔ nɔ ɔ, nɔ ko kɛ́ lɛ nɔ́ ko bimi hu.
Đang chọn:
Mateo 22: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
