Mateo 18
18
Mɛnɔ ji nɔmlɔ ngua pe kulaa
(Marko 9.33-37; Luka 9.46-48)
1Jamɛ a ngmlɛfia a mi nɔuu ɔ, kaseli ɔmɛ na Yesu ngɔ nɛ a ba bi lɛ ke: “Mɛnɔ ji nɔmlɔ ngua pe kulaa ngɛ hiɔwe matsɛ yemi ɔ mi?” 2Lɔ ɔ he ɔ Yesu tsɛ jokuɛ nyafii ko kɛ ba e ngɔ, nɛ e kɛ lɛ da a kpɛti, 3nɛ e ke: “Niinɛ, i ngɛ nyɛ dee ke: Ke nyɛ tsakee we nɛ nyɛ plɛ kaa jokuɛ tsɔwi ɔ, nyɛ be hiɔwe matsɛ yemi ɔ mi sɛe kulaa. 4Lɔ ɔ he je ɔ, nɔ tsuaa nɔ nɛ baa e he si kaa jokuɛ nɛ ɔ, lɛ ji nɔmlɔ ngua pe kulaa ngɛ hiɔwe matsɛ yemi ɔ mi. 5Nɛ nɔ tsuaa nɔ nɛ ngɔɔ jokuɛ nyafii kake kaa nɔ nɛ ɔ ngɛ ye biɛ mi ɔ, e ngɔɔ mi.”
Nanekpatami he kɔkɔbɔmi
(Marko 9.42-48; Luka 17.1-2)
6“Se nɔ nɛ kpataa tsɔwi nɛ ɔmɛ a ti nɔ kake nɛ heɔ ye nɔ yeɔ ɔ nane ɔ, afani nɛ a kɛ teji wɛ muɔ e kuɛ nɛ a ngɔ lɛ wo wo mi. 7Musu tloo je ɔ ngɛ nane kpatami sanehi a he! Ejakaa nane kpatami sane ɔmɛ maa bɛ kɛ̃ mohu; se musu tloo nɔmlɔ nɛ nane kpatami ɔ guu e nɔ kɛ baa a!
8“Ke o nine loo o nane ngɛ o nane kpatae ɔ, poo ngɛ o he nɛ o sake ngɔ fɔ he; afani nɛ o kɛ nine popoe loo nane popoe sɛ wami mi pe nɛ o ngɛ nine enyɔ loo nane enyɔ nɛ a ma sake mo ngɔ fɔ neneene la a mi. 9Nɛ ke o hɛngmɛ ngɛ o nane kpatae ɔ, hia nɛ o sake ngɔ fɔ he; afani nɛ o kɛ hɛngmɛ kake sɛ wami mi pe nɛ o ngɛ hɛngmɛ enyɔ nɛ a ma sake mo ngɔ fɔ gehena la a mi.”
To nɛ laa a he abɛ ɔ
(Luka 15.3-7)
10“Nyɛɛ hyɛ saminyɛ konɛ nyɛ ko gbe ni tsɔwi nɛ ɔmɛ a ti nɔ kake he guɛ; ejakaa i ngɛ nyɛ dee ke, a bɔfohi nɛ ngɛ hiɔwe ɔ hyɛɛ Tsaatsɛ nɛ ngɛ hiɔwe ɔ hɛ mi daa.” [ 11Se Nɔmlɔ Bi ɔ ba nɔ nɛ laa a yi wami hemi.]
12“Kɛ nyɛ susuu kɛɛ, ke nɔ ko ngɛ to lafa nɛ a kpɛti kake laa blɔ ɔ, anɛ e be nyingmi nɛɛ kɛ nɛɛ ɔ sie ngɛ yoku ɔmɛ a nɔ nɛ e ya nɛ e ya hla nɔ nɛ laa blɔ ɔ lo? 13Se ke e ba mi kaa e na lɛ ɔ, niinɛ, i ngɛ nyɛ dee ke, e bua jɔɔ e he ngɛ lɔ ɔ he pe nyingmi nɛɛ kɛ nɛɛ ɔ nɛ laa we blɔ ɔ. 14Ja nɔuu nɛ nyɛ tsɛ nɛ ngɛ hiɔwe ɔ sume kaa tsɔwi nɛ ɔmɛ a kpɛti kake laa.”
Nyɛmi nɛ peɔ yayami
15“Ke o nyɛmi ko tɔ o nɔ ɔ, yaa nɛ o ya tsɔɔ lɛ e tɔmi ɔ, o kɛ lɛ ni enyɔ kɛkɛ. Ke e bu mo tue ɔ, nyɛmi pee nyɛmi. 16Se ke e bui mo tue ɔ, ngɔɔ nɔ kake loo ni enyɔ ngɔ piɛ o he, konɛ odaseyeli enyɔ loo etɛ a munyu nya a, sane tsuaa sane nya nɛ ma si. 17Se ke mɛ hu e bui mɛ tue ɔ, ya de asafo ɔ; nɛ ke e tue gbo ngɛ asafo ɔ hu nɔ ɔ, buu lɛ kaa wɔ jalɔ kɛ onia tsulɔ.”
Fimi kɛ pɛnemi
18“Niinɛ, i ngɛ nyɛ dee ke: Nɔ tsuaa nɔ nɛ nyɛ maa fi ngɛ zugba a nɔ ɔ, a maa fi ngɛ hiɔwe; nɛ nɔ tsuaa nɔ nyɛ maa pɛne ngɛ zugba a nɔ ɔ, a maa pɛne ngɛ hiɔwe.
19“Jeha nɛ ɔ hu, i ngɛ nyɛ dee ke, ke nyɛ kpɛti ni enyɔ so ngɛ zugba nɛ ɔ nɔ ngɛ sane tsuaa sane nɛ a biɔ ɔ he ɔ, Tsaatsɛ nɛ ngɛ hiɔwe ɔ maa pee ha mɛ. 20Ejakaa he nɛ ni enyɔ loo ni etɛ bua a he nyɛ ngɛ, ngɛ ye biɛ mi ɔ, i ngɛ a kpɛti ngɛ lejɛ ɔ.”
Sɔmɔlɔ nɛ kɛ nɔ́ ki ɔ he abɛ
21Kɛkɛ nɛ Petro ba Yesu ngɔ nɛ e ba bi lɛ ke: “Mawetsɛ, si enyɛmɛ ye nyɛmi nɛ tɔ ye nɔ nɛ ma kɛ pa lɛ? Kɛ ya su si kpaago lo?” 22Yesu de lɛ ke: “I de we mo ke kɛ ya su si kpaago; se mohu si kpaago totoe nyingmi kpaago? 23Lɔ ɔ he ɔ hiɔwe matsɛ yemi ɔ ngɛ kaa matsɛ ko nɛ hlaa kaa e kɛ e sɔmɔli ba bu akɔɔtaa. 24Nɛ benɛ e bɔni bumi ɔ, akɛ nɔ ko nɛ hɛɛ lɛ hiɔ cedi akpe nyɔngma ba e ngɔ. 25Se akɛnɛ e nɛ nɔ́ ko nɛ e kɛ maa wo lɛ ɔ, e nyɔmtsɛ ɔ fa ke a jua lɛ kɛ e yo kɛ e bimɛ kɛ nihi tsuo kulaa nɛ e ngɛ ɔ, nɛ a kɛ wo hiɔ ɔ. 26Kɛkɛ nɛ sɔmɔlɔ ɔ kpla si nɛ e kpa lɛ pɛɛ ke: ‘Nyɔmtsɛ, moo to o tsui si ha mi, nɛ ma wo mo hiɔ ɔ tsuo!’ 27Nɛ sɔmɔlɔ nɛ ɔ nyɔmtsɛ ɔ muklii mi sa lɛ nɛ e ngmɛɛ e he, nɛ e kɛ hiɔ ɔ ke lɛ.
28“Se benɛ jamɛ a sɔmɔlɔ ɔ je kpo ɔ, e ya na e huɛmɛ sɔmɔli ɔmɛ a ti nɔ kake nɛ hɛɛ lɛ hiɔ cedi lafa; nɛ e nu lɛ́ nɛ e mia e kuɔ si, nɛ e ke: ‘Wo mi hiɔ nɛ o hɛɛ mi ɔ!’ 29Kɛkɛ nɛ e huɛ sɔmɔlɔ ɔ kpla si kpa lɛ pɛɛ ke: ‘To o tsui si ha mi, nɛ ma wo mo hiɔ ɔ tsuo kulaa.’ 30Se lɛɛ e kplɛɛ we; se mohu e ya wo lɛ tsu mi kɛ yaa su be nɛ e maa wo lɛ hiɔ ɔ. 31Se benɛ e huɛmɛ sɔmɔli ɔmɛ na nɔ́ nɛ a pee ɔ, e dɔ mɛ wawɛɛ nɛ a ba sɛɛ nɔ́ nɛ a pee ɔ tsuo ngɔ ha a nyɔmtsɛ ɔ. 32Kɛkɛ nɛ e nyɔmtsɛ ɔ ha a ya tsɛ lɛ kɛ ba nɛ e de lɛ ke: ‘Sɔmɔlɔ yayami! Akɛnɛ o kpa mi pɛɛ he je ɔ i ngɔ kikɛmɛ a hiɔ nɛ ɔ tsuo ngɔ ke mo; 33anɛ jinɛ mo hu pi o blɔ nya ji kaa o naa o huɛ sɔmɔlɔ ɔ mɔbɔ, bɔ nɛ imi hu i na mo mɔbɔ ɔ lo?’ 34Nɛ e nyɔmtsɛ ɔ muklii mi fu, nɛ e kɛ lɛ ha nɛ a pii lɛ kɛ maa su be nɛ e maa wo lɛ hiɔ ɔ tsuo kulaa. 35Ja nɔuu Tsaatsɛ nɛ ngɛ hiɔwe ɔ hu ma ngɔ pee nyɛ, ke nyɛ ti nɔ tsuaa nɔ ngɔɛ e nyɛmi nɔ tɔmi ngɔ ki lɛ kɛ ji e tsui mi ɔ.”
Đang chọn:
Mateo 18: DAN77
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Dangme New Testament © United Bible Societies, 1977.
