Mat 14

Gyɔɔn Bati Kũũ Yɛlɛ

(Mak 6:14-29; Luk 9:7-9)

1A saŋ na poɔ, a Hɛrɔde naŋ da e a Galili naa da woŋ la a Yeezu yɛlɛ; 2a da yeli ko o tontonema, “A Gyɔɔn Bati la a ŋa, ba eɛɛ la ka o leɛ-iri yi a kũũ poɔ, lɛnso ka o toɔ̃ tonɔ a toŋkpeɛne ama.” 3A Hɛrɔde da eɛɛ la ka ba nyɔge a Gyɔɔn leŋ eŋ nempagdie poɔ a o yɔɔ Filipi pɔge Hɛrɔdeya yɛlɛ zuiŋ, 4bonso, Gyɔɔn da maŋ yele korɔ o la, “A ba tu sori ka fo de a fo yɔɔ pɔge.” 5Aneazaa ka Hɛrɔde da boɔrɔ la ka o ko a Gyɔɔn, kyɛ o da zoro la a noba dabeɛ̃, bonso, ba da sage ka a Gyɔɔn waa la Ŋmen-yelmanna. 6Kyɛ a Hɛrɔde dɔgebo bebiri tigri naŋ da wa ta, a Hɛrɔdeya pɔgeyaa da yi wa seɛɛ la a noba niŋesogɔŋ, ka Hɛrɔde poɔ da pɛle 7yaga zaa, ka o da eŋ noɔre, a pɔ ka bonna zaa a pɔgsarlee naŋ na sɔre, o na ko o la. 8Ka a pɔgsarlee ma Hɛrɔdeya yeli ka o te yeli ko a Hɛrɔde, “Ŋmaa a Gyɔɔn Bati zu eŋ laa poɔ ko ma.” 9A naa poɔ da sããɛ la yaga, kyɛ a poɔbo o naŋ da pɔ ane a saama vi zuiŋ, o da tere la noɔre ka ba e a lɛ. 10O da toŋɛɛ la ka ba te ŋmaa a Gyɔɔn zu a nempagdie poɔ a wa ne. 11Ba da de la a zu eŋ laa poɔ a wa ko a pɔgsarlee, ka o de te ko o ma. 12A Gyɔɔn potuuribo da wa de la a o eŋɛ te ũũ, kyɛ gaa te ko Yeezu a duoro.

Yeezu Naŋ Ko Noba Turi Anuu Bondirii Ka Ba Di

(Mak 6:30-44; Luk 9:10-17; Gyn 6:1-14)

13A Yeezu naŋ da wa woŋ a Gyɔɔn kũũ yɛlɛ, O da yi la be kpɛ gbori gaa zie kaŋ a te bebe O yoŋ. Kyɛ a nembeɛoŋ naŋ da wa woŋ O yɛlɛ, ba da yi la a tenne poore a kyɛŋ beɛre gaa O zie. 14O naŋ da wa ta a mane noɔre, O da nyɛ la nembeɛoŋ ka ba nembaaloŋ kpɛ O yaga, ka O da saŋ a ba baalba. 15Zie naŋ da wa maa, a O potuuribo da wa la O zie a wa yeli, “A zie ŋa e la dalempoɔ kyɛ ka saŋ meŋ faa, bare a noba ka ba gaa a tenne poore a te da bondirii.” 16Ka a Yeezu leɛ yeli ko ba, “A ba fere ka ba gaa; yɛ bɔ bonkaŋ ko ba ka ba di.” 17Ka ba yeli ko O, “Te ba taa bonzaa kyɛ, ka boroboro anuu ane zoma ayi mine yoŋ naane.” 18Ka a Yeezu yeli, “Yɛ de a wa ko ma.” 19Lɛ la ka a Yeezu pãã da e ka a noba zeŋ a moɔ zu. O naŋ wa de a boroboro anuu ane a zombilii ayi, O da gbole kaa la sazu, a maale a boroboro, kyɛ nyɔge ŋmaa, a de ko a potuuribo, ka a potuuribo meŋ de poŋ ko a noba. 20A noba zaa da di tegɛɛ la, kyɛ ka a potuuribo da wuo a boŋkpaa paale pɛre pie ne ayi. 21A noba zaa naŋ da di a bondirii da ta la dɔbɔ turi anuu, kyɛ ka ba da ba sɔre a pɔgeba ane a bibiiri poɔ.

Yeezu Naŋ Kyɛŋ Koɔ̃ Zu

(Mak 6:45; Gyn 6:15-21)

22Tɔntɔbaalɛ, a Yeezu da eɛɛ la ka O potuuribo kpɛ a gbori a de weɛ ŋmaa a mane gaa a konkoori na kaŋ kyɛ ka O da bare a noba. 23O naŋ da wa bare a nembeɛoŋ baare, O da te do la taŋ kaŋ zu O yoŋ ka O te puori. Zie naŋ da wa maa O da be la a be O yoŋ. 24Kyɛ a saŋ ŋa poɔ, kɔmmie da iri ŋmɛ la a gbori ka o kpɛ a mane gaa tɔɔre zaa, bonso, a saseɛ da tuoro ba la. 25Zie naŋ wa nyaa bagu-pipi, a Yeezu da kyɛnɛ la a koɔ̃ zu a waana ba zie. 26Kyɛ a potuuribo naŋ da wa nyɛ O ka O kyɛnɛ a koɔ̃ zu, dabeɛ̃ da kpɛ ba la yaga, ka ba yele, “Nenseɛ la!” Ka ba da ŋmeɛrɛ dabeɛ̃ kpɛlle. 27A daadaalɛ, ka Yeezu yeli yɛlɛ ko ba, a yeli, “Yɛ nyɔge yɛmenne, maa la; yɛ ta zoro dabeɛ̃!”

28Ka Piita yeli sɔge O, “Daana ka fõõ wa la, ko ma noɔre ka N yi kyɛŋ a koɔ̃ zu a wa fo zie.” 29Ka a Yeezu yeli ko o, “Wa.” Ka a Piita yi a gbori poɔ a kyɛnɛ a koɔ̃ zu gɛrɛ a Yeezu zie. 30Kyɛ a Piita naŋ da wa nyɛ a sasekpeɛŋaa naŋ fuuro, dabeɛ̃ da kpɛ o la ka o da piili linne a koɔ̃ poɔ. Lɛ la ka o da ŋmɛ kpɛlle a yeli, “Daana, faa ma!” 31Ka Yeezu talle te nyɔge o nu wieouŋ lɛ kyɛ yeli ko o, “Fõõ yelde-fẽẽ soba, bonso, ka fo bonnɔ?”

32Ba naŋ wa te kpɛ a gbori la, ka a saseɛ da ŋmaa. 33A banaŋ naŋ da be a gbori poɔ da puori O la kyɛ yele, “Yelmeŋɛ zaa, fo waa la a Naaŋmen Bie.”

Yeezu Naŋ Saŋ Baalba Gyɛnesarɛ Teŋɛ Poɔ

(Mak 6:53-56)

34Ba naŋ da ŋmaa a mane do, ba da wa la Gyɛnesarɛ teŋɛ. 35A teŋɛ noba naŋ da wa baŋ ka Yeezu la, ba da toŋ yeli la ba noba zaa a paaloŋ poɔ ka ba taa a ba baalba zaa wa ne a Yeezu zie, 36a wa sɔre O ka ka ba na deɛ seene O kparoo nɔzoɔrɔ yoŋ. A baalba na zaa naŋ da seene a O kparoo da nyɛ la sammo.

Đang chọn:

Mat 14: DNTTP

Tô màu

Chia sẻ

So sánh

Sao chép