Luc 15
15
Dipibil din wáŋkèe bɔti
(Kpèè Maat 18.10-14)
1 Bifɔtiliibi nì binikpitib#15.1 binikpitib : Juuda yab bin kaa nìn nóó Juuda yab marabee, bi nìn yíì-bi yii binikpitib ní. bin kɔ kíǹee nìn sútìń ki pìl̄ Yeesu kí pīlifì tin u sòoǹee. 2An yāntì Fariisab nì bimaradakaliibi bíi gbùkum̄, yii: «Kijapaai nee fòol̄ binikpitib, u nì bi jīǹ tijin.» 3Ní Yeesu dū tibɔti nee ki ŋmāntiǹ yii: 4«Ni-kansikin ubɔ yaa cáá ipii dilaataal, ní ubɔ yaa wáŋkèe, waa dù ubɔ kpá dilaataalee kí yóoń kupikpaapɔɔun kí cùú nyàabìń un wáŋkèe áli kí tin kánní-uaaa? 5U yaa kánní-uee, niinee an mɔ́ɔkíǹ-u ní ú dū-u kí bùkun̄ní. 6U nín bāań mmɔŋkee, ní ú yíiń u-bɔɔbi nì u-kɔŋkɔnnaatɔb kí bí-bi yii: <Fàal̀ kí tūtum̀maan-mi, kun puee m fātìi ká m-piiu un nìn wáŋkèe.> 7Ibaamɔn ní m tùkù-ni, míǹ mbaantiim ní unibaanti un fá u-kpitiiyee puee, dipɔɔpiŋkpaandi bí yilpu ki jítiǹ deedeedambi ubɔ kpá dilaataal bin an kaa ti bàlifī bí kpántí bi-bimbimee.»
Animbil ŋin wáŋkì, bi fātìi kée bɔti
8«Àá unimpu ubɔ di yaa cáá jitɔmbi#15.8 jitɔmbi: An sá animbil ní ki sá jitɔmbi, ní binimpoobi tūuntí saalaa saalaa ki lēentí, ní biba mun cáa cútí bi-yikpiti. saalaa bin sá-u tipijatee ní ubɔ yaa wáŋkì, waa tùutī fitila kudiin kí ŋàtī kí nyàab̀ tiŋan áli kí tin ká u-nimbiliŋ. 9U yaa kée ní ú yíiń u-bɔɔbi nì u-kɔŋkɔnnaatɔb kí bí-bi yii: <Fàal̀ kí tūtum̀maan-mi, kun puee m-nimbiliŋ ŋin nìn wáŋkèe, m fātìi ká-ŋi.> 10Ibaamɔn ní m tùkù-ni, míǹ mbaantiim Unimbɔti mun nì u-tuuŋyi bí dipɔɔpiŋkpaandin un fá u-kpitiiyee pu.»
Kibiki kin wáŋkì ki fātìi gítìńee bɔti
11Ní Yeesu fātìi tí bí-bi yii: «Ukpil ubɔ di bí ní ki cáá jipɔmbi bili. 12Ní uwaalee bí u-baa yii: <M-baa, tīī-mi m-fakal kɔŋkɔnnee.> Ní u-baa lafun tīī bi-liitil, báà ŋma nì u-wanti. 13Iwiŋkaaŋkaa boonee, ní uwaalee dū u-jandi din bi tīī-uee ki nyáfì ní ki fōō animbil, ní ki yíkìi búntì ndandati kitiŋ kiban, ní ki bí niin ki jīǹ u-nimbiliŋ pùsi pusi. 14U jíń u-nimbiliŋ ki dóòyee, ní ŋkùm miba nyáń kitiŋ gbanti poon ki pɔ̄ɔ̄ tikpil. Niinee disool kíǹ ki cáá-u. 15Ní u cūtì ki nyàab̄ kitiŋ gbanti niliu ubɔ cee ditundi ní úǹ dū-u ki tɔ́ kusaau digbeetikpaal#15.15 Dūú ŋmàntī nì Maar 5.11.. 16U bàà nìn là kí nīn jīǹ igbeeti jinti, ní báà ubɔ kaa tìì-u. 17Niinee ní u kíĺ ki bíi dàkafī tin poon ní u kɔ́ee, ní ki bí yii: <M-baa tɔntɔnliibi tikpil bí mmɔŋki ki bíntí tijin pu, ní man dāa bí doo ki kúù ŋkùm nee. 18M làá yīkì kí fàtī m-baa cee. M yaa bàn̄ee, ḿ bí-u yii: 'M-baa, m yīntiǹ Unimbɔti ki yīntiǹ si mun, 19 maa ti máaǹ á yíiń-mi a-biki. Dū-mi kí ŋá kii a-tɔntɔnliu ubɔee.'> 20U dākafì míǹ ki dóòyee ní ki yíkì ki kíliń nsan ki nín dòoń u-baa cee.
«U-baa ká u páaǹnée, ní an cúú-u falaa, ní u sáǹ ki túŋkì-u ní ki ŋá-u aatúuù. 21Ní u bí u-baa yii: <M yīntiǹ Unimbɔti ki yīntiǹ si mun, maa ti máaǹ á yíiń-mi a-biki.> 22Ama ní u-baa bí u-tɔntɔnliibi yii: <Cáaḿmaan dibɔkutil din ŋān̄ tikpilee malaa malaa kí pèem̄maan-u, kí cáań kibɔmbiki kí fúuń u-ŋambiki, kí cáań anaataka kí táká-u, 23kí cúúmaan dinajapɔmbil din cáá ŋkpamee kí kpɔ̀ tí jī kí fàal̀. 24Kun puee m-biki nee ŋman nìn kpíì ní ki fātìi fīkitì, kì nìn wáŋkì ní m fātìi ká-kì.> Ní bi kíĺ ki bíi jīǹ jiŋaal.
25«Ŋyuntee u-jipɔŋkpiliu dáá bíń kusaau. U kùnní ki tóobiń mmɔŋkee, ki gbìl̀ agbiil nì diŋool tùm̀ mmɔŋki. 26Ní u yíiń bitɔntɔnliibi ubɔ ki bālifì-u yii: <Ba ŋá mmɔŋki doo ní?> 27Ní utɔntɔnlee kíí-u yii: <A-naal di fātìi gítìń, ní a-baa kūū dinajapɔmbil din cáá ŋkpamee, kun puee u fātìi ká-u nì alaafiya.> 28Niinee, ujipɔŋkpilee fōō diŋuul ní ki yíì kaa là kí kɔ́ kudiin. Ní u-baa nyánní ki sɔ̄kɔl̀-u ú kóoń. 29Ní u fātìi bí u-baa yii: <M-baa, kpèè abin kupaau sèé, m nín kā ki tūǹ ditundi ki tìì-see. Maa yíì a-tundi diba yii maa làá tɔ̄ kí tīī-si, ama a mun kaa tīī-mi dalba kiŋɔbiki yii man nì m-bɔɔbi ń jī jiŋaal. 30Ama a-jipɔɔn nee fātìi bāańee, úǹ un yōoǹ a-gaajawanti u nì nnimpulaakpaamu jíńee, úǹ ní a cúú unajapɔɔn un cáá ŋkpamee ki kūū ki fōō-u!> 31Ní u-baa bí-u yii: <M-biki, sii pée bí m-cee doo ní baabadal, tin kɔkɔ m cááyee, sii di yì. 32Ama an máaǹ tí jī jiŋaal kí fàal̀, kun puee a-naal un ŋman nìn kpíìyee fātìi fīkitì, u nìn wáŋkì ní m fātìi ká-u.>»
Đang chọn:
Luc 15: BASSARDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
BIBLE EN N'TCHAM (Bassar) © Alliance Biblique du Togo, 2013.
