Jean 13
13
Yeesu fíntì u-boonnooliibi taaŋi
1Kutaa ń wúntí Dilákatil jiŋaaliuee, Yeesu nìn nyí yii ŋyunti ŋun u làá yīkì kitiŋ nee pu kí gítí u-Baa ceeyee bāań. U nìn néeń u-yab bin bí duulinyan dooyee, ki gíti néeń-bi ki lákatì áli ki tin kátì-ku. 2Ŋyunti ŋun u nì u-boonnooliibi kā ki jīǹ tijoojinee, mimmee Sitaan pée lūkutì Juudasi Isikaariyɔti, Siimɔn jipɔɔn ú dū Yeesu kí nyāfiǹ u-nannanliibi dee. 3Yeesu mun nìn pée nyí yii u nyánní Unimbɔti cee ní ki làá fàtīí gítí Unimbɔti cee, ní ki nyí yii u-Baa Unimbɔti dū tikɔkɔwoooo ki ŋá u-ŋaan. 4U nì u-boonnooliibi bíi jīǹee ní Yeesu yíkì tijin pu, ní ki pēetì u-bɔkutifɔkɔl ní ki dū ŋŋaabu ŋubɔ ki gbìn̄ u-caŋ, 5ní ki jōō nnyim ki ŋá kisampeeyin, ní ki kíĺ ki bíi fíntí u-boonnooliibi taaŋi, ní ki cáá ŋŋaabu ŋun u gbìn̄ u-caŋee ki cáa pítí bi-taaŋi. 6U fíntì ki bāań Siimɔn Peetrooyee ní Siimɔn bí yii: «Ti-Dindaan, sii a-ba di làá fíntí man taaŋaaa?» 7Ní Yeesu kíí-u yii: «Tin m bíi ŋáań nee, aa gbìl̀ taapu kɔŋkɔnnee, ama boonee a làá dāá gbìl̄.» 8Ní Peetroo bí yii: «M yíì kpataaa, a kpá kí fíntí m-taaŋi.» Ní Yeesu kíí-u yii: «A yaa kaa yāntì m fíntì-si, mimmee, aa sá m-yɔu.» 9Ní Siimɔn Peetroo kíí-u yii: «An yaa sá míǹ, ti-Dindaan, taa fíntí m-taaŋi ŋmaniŋma, fíntí kí kpáaǹ m-ŋalii nì m-yil!» 10Ní Yeesu kíí-u yii: «Un yaa fùl̄ee kaa ti fùul̀, see ataa ŋmaniŋma ní u fíntí, kun puee waa ti cáá tijɔkɔndi. Míǹ ní ni mun bí circir, ama an kaa sá ni-kɔkɔ.» 11Di sá yii Yeesu nìn nyí un làá dū-u kí tīī u-nannanliibee, míǹ pu ní u bí yii: «An kaa sá ni-kɔkɔ di bí circir.»
12Yeesu fíntì bi-taaŋi ki dóòyee, ní ki fātìi dū u-bɔkutilee ki pēeǹ, ní ki fātìi kāl̀, ní ki bālifì-bi yii: «Tin m ŋá-ni nee, ni gbìl̄ taapuɔɔɔ? 13Ni yíì-mi yii Ukpil nì ni-Dindaan, ní ni máaǹ kí yíiń-mi míǹ, kun puee míǹ ní m lafun sá. 14Míǹ puee, man udakal nì ni-Dindaan yaa fíntì ni-taaŋee, ni mun máaǹ kí nīn fíntí tɔb taaŋi. 15M ŋá míǹ ki dàkā-ni ni mun ń nīn ŋáań míǹ ki tìì tɔb ní. 16Ibaamɔn, ibaamɔn ní m sòoǹ nì ni, utɔntɔnli kaa jítiǹ u-kpiliu, míǹ ní un bi túee kaa jítiǹ un túnní-uee#13.16 Dū B. 12-16 kí ŋmàntī nì Luuki 22.24-27.. 17Kɔŋkɔnnee ni béè, ni yaa ŋáań míǹ, ni làá gbìl̄ mmɔn. 18«An kaa sá ni-kɔkɔ pu ní m sòoǹ, kun puee m nyí bin m lútèe. Tin bí nee ń ŋá kii Unimbɔti gbɔŋku poon nín lī puee, yii: <Un jīǹ m-jintee fātìi bíi jáà nì mi#13.18 Ilan 41.10..> 19M tùkù-ni tin bí nee ki yōontí kɔŋkɔnnee kí wàatī ní an bàń, án nín làá ŋá pu tì yaa láa bāańee ní fōō kí kíí yii <man di sá un m sée>. 20Ibaamɔn, ibaamɔn ní m sòoǹ nì ni, un yaa fōō un man túnnée, fōō ma mun dee. Un yaa fōō mamee, fōō un túnní-mee mun dee.»
Yeesu sòon̄ yii Juudasi làá nyā u-boon
(Kpèè Maat 26.20-25, Maar 14.17-21, Luuki 22.21-23)
21Yeesu lī míǹ ki dóòyee, ní an gbēē u-pɔbil, ní u bí yii: «Ibaamɔn, ibaamɔn ní m sòoǹ nì ni, ni-kansikin ubɔ di làá dū-mi kí tīī m-nannanliibi.» 22Ní u-boonnooliibi fātìi bíi kpèé tɔb, kaa kpáàa béè un pu ní u bíi sòoǹee. 23Un Yeesu nìn néeń u-boonnooliibi kansikinee kā ki nákáǹ-u. 24Ní Siimɔn Peetroo ŋá-u kudaaŋŋu yii ú bàlifì-u kí kpèè un pu ní u sòon̄ee. 25Ní u sútì ki mɔ̄tìi nákáǹ Yeesu ní ki bālifì-u yii: «Ukpil, an sá ŋma ní?» 26Ní Yeesu kíí-u yii: «M làá sēē kpɔnɔ tikunni. Un m yaa dūu tīīyee, úǹ ní an sá.» Niinee ní Yeesu dū kpɔnɔ ki sēē tikunni ki fíiǹ ki tīī Juudasi, Siimɔn Isikaariyɔti jipɔɔn. 27Juudasi fōō kpɔnɔee, ní Sitaan kɔ́ u-ni. Ní Yeesu bí-u yii: «Tin a cáá ki làá ŋée, á ŋá-tì malaa!» 28Bin nìn kā ki jīǹee, báà ubɔ kaa béè kun pu ní u lī-u mimmee. 29Biba nìn dàkafī yii Yeesu là ú cùú dā tin tin bi làá cáá jī jiŋaalee, àá u là ú tīī biwɔfib tiba ní. Di sá yii Juudasi di nìn ŋúb́ bi-nimbiliŋ. 30Juudasi fōō kpɔnɔee, ní ki nyáń malaa. Kunyeeu nìn mɔ́.
Marapɔɔn
31Juudasi nyáńee, ní Yeesu bí yii: «Kɔŋkɔnnee man Kinibiki fōō m-nyooti dee, Unimbɔti ń ká tinyool man ni. 32Unimbɔti yaa ká u-nyooti man nee, míǹ ní ma mun làá ká m-nyooti Unimbɔtin an kaa làá yúntí. 33M-biyaamu, ŋyunti fiii di kíǹ ḿ gíti kàl̄ ni-cee. Míǹ boonee ni làá dāá nyàab̀-mi. Kii m nín nìn tùkū Juuda yab puee, naa làá ŋmā kí cù laakin m cée. Kɔŋkɔnnee, m tùkū ni mun dee. 34M tīī-ni marapɔɔn ubɔ: nín̄ néeḿmaan tɔb. Kii man nín néeń nimbi puee, ni mun ń nīn néeḿmaan tɔb míǹ. 35Ni yaa néeń tɔbee, niin di làá dàkà báà ŋma yii ni lafun sá m-boonnooliibi.»
Yeesu sòon̄ yii Peetroo làá néé yii waa nyí-u
(Kpèè Maat 26.31-35, Maar 14.27-31, Luuki 22.31-34)
36Ní Siimɔn Peetroo bālifì-u yii: «Ti-Dindaan, la ní a cá?» Ní Yeesu kíí-u yii: «Aa ŋūǹ kí nóó-mi laakin m cée kɔŋkɔnnee, ama boonee, a dāa nōotí-mi.» 37Ní Peetroo bí-u yii: «Ti-Dindaan, ba pu ní maa ŋūǹ kí nóó-si kɔŋkɔnnee? Báà an yaa sá ŋkúm, m làá dū m-maŋfal kí tīī a-pu.» 38Ní Yeesu kíí-u yii: «A làá lafun dū a-maŋfal kí tīī man puɔɔɔ? Ibaamɔn, ibaamɔn ní m sòoǹ nì si, kí wàatī ukooja ń bāakèe, a làá néé yii saa nyí-mi diba dibee mita.»
Đang chọn:
Jean 13: BASSARDC
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
BIBLE EN N'TCHAM (Bassar) © Alliance Biblique du Togo, 2013.
