МатӀай 4
4
Кьурумда темягь авун
(Марк 1:12-13; ЛукӀа 4:1-13)
1 Руьгьди Иса, иблисди рекьяй акъуддатӀа чирун патал, кьурумдиз тухвана. 2ЯхцӀур юкъузни яхцӀур йифиз сив хвейидалай кьулухъ Исадиз гишин хьана. 3Иса рекьяй акъудиз кӀанзавай иблис Адав агатна.
– Вун Аллагьдин Хва яз хьайила, и къванер фаз элкъуьрдай эмир це, – лагьана ада.
4Амма Исади жаваб гана:
– Каламда кхьенва: «Инсандал алай чан тек са фалди туш. Инсанди Реббидин сивяй акъатзавай гьар са гафуналди уьмуьр тухузвайди я!»#Киххьей Къанун 8:3.
5-6Ахпа Ам иблисди пак шегьердиз тухвана, ана Ам Аллагьдин КӀвалин виридалайни кьакьан чкадал хкажна:
– Вун Аллагьдин Хва яз хьайила, агъуз хкадра, – лагьана ада. – Каламда кхьенва:
«Аллагьди Вичин малаикриз Вун хуьх лугьуз тапшуругъ гуда.
Абуру Вун Ви кӀвач къванцихъни галукьар тавуна
гъилерал кьуна тухуда» #
Забур 90:11-12. .
7– Каламда мадни кхьенва, – жаваб гана Исади, – «Виридан Ребби тир Аллагь синагъ ийимир»#Киххьей Къанун 6:16..
8Иблисди Иса мад са кьакьан дагъдал тухвана. Ада Исадиз дуьньядин вири пачагьлугъар чпин зурбавиле къалурна.
9– МетӀерал акъвазна заз икрам авуртӀа, ибур вири за Ваз гуда, – лагьана иблисди.
10Гьа чӀавуз Исади лагьана:
– Алат Залай, иблис, Каламда кхьенва: «Реббидиз, ви Аллагьдиз, икрама, са Гьадаз къуллугъни ая»#Киххьей Къанун 6:13..
11Гьанлай иблисди Ам секиндиз туна. Малаикри атана Исадиз къуллугъ ийиз хьана.
Иса Галилейда кӀвалах тухуз эгечӀун
(Марк 1:14-15; ЛукӀа 4:14-15)
12Исадиз Ягья къазаматда тунвайдакай хабар хьайила, Ам Галилейдиз фена. 13Назаретдай акъатна, Ам Забулунанни Нифталидин чилер хьайи чкада вирин къерехда авай Кефернагьум шегьерда акъвазна. 14Гьа икӀ, Яшай пайгъамбарди лагьай ихьтин гафар кьилиз акъатна: 15«Вирел фидай рекье Ярдандин атӀа пата авай чил! Эй, Забулунан чил, эй, Нифталидин чил! Эй чувудар туширбур авай Галилей! 16МичӀивилик ацукьнавай халкьдиз чӀехи нур акуна, уьлкведа ажалдин хъендик ацукьнавайбурузни нурди экв гана»#Яшай 9:1-2..
17Гьа чӀавалай Исади вязер ийиз хьана:
– Ша Аллагьдин рекьел элячӀ, Цаварин Пачагьлугъдин вахт атана мукьва хьанва.
Инсанар кьадай гъетягъар
(Марк 1:16-20; ЛукӀа 5:1-11; Ягь. 1:35-42)
18Садра Галилейдин вирин къерехдай фидайла, Исадиз гъетягъар тир кьве стха – Петру лугьузвай Симунни адан стха Эндирей акуна. Абуру вириз чил вегьизвай. 19Исади абуруз лагьана:
– Зи гуьгъуьнаваз ша. За квекай инсанар кьадай гъетягъар ийида.
20Чпин чилерни туна, абур гьасятда Адан гуьгъуьнаваз фена.
21Са кьадар мад фейила, Исадиз маса кьве стха – Зебедеян хва Якьубни адан стха Ягья акуна. Абуру, чпин буба Зебедеяхъ галаз луьткведа ацукьна, чилер туькӀуьр хъийизвай. Гьабурузни Исади Вичихъ галаз ша лагьана. 22Чпин бубани луьткве туна, Якьубни Ягья гьасятда Адан гуьгъуьна аваз фена.
Исади гзаф инсанар сагъар хъувун
(Марк 1:39; 3:7-12; ЛукӀа 4:44; 6:17-19)
23Иса вири Галилей тирвал къекъвезвай, Ада Цаварин Пачагьлугъдин вахт атуникай Шад Хабар гузвай. Ада синагугра чирвилер гузвай ва гьар жуьре азарарни начагъвилер квайбур сагъар хъийизвай. 24Суьрия тирвал Адакай ван-сес чкӀана; Адан патав гьар жуьредин азарар квайбур, жинерар квайбур, чӀур жедайбур, фалужди янавайбур ва масабур гъизвай. Ада вири сагъар хъийиз хьана. 25Адан гуьгъуьна Галилейдайни ЦӀуд-Шегьердай, Ярусалимдайни Ягьудатдай ва Ярдан вацӀ галай патайни халкь гьатна.
Đang chọn:
МатӀай 4: ЛезПК
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Институт перевода Библии, 2010, 2018, 2023