МатӀай 3
3
Ягья пайгъамбардин чирвал
(Марк 1:1-8; ЛукӀа 3:1-18; Ягь. 1:19-28)
1Гьа йикъара Ягьудатдин кьурумда инсанриз Ягья пайгъамбар пайда хьана. 2Ада икӀ лугьузвай:
– Ша Аллагьдин рекьел элячӀ, Цаварин Пачагьлугъдин чӀав атана мукьва хьанва.
3 Яшай пайгъамбарди лагьай гафарни Ягьядикай я: «Кьурумда гьарайзавайдан ван чкӀида: „Реббидиз рехъ гьазура, Ам къведай рехъ дуьзра“»#Яшай 40:3..
4Ягьядал деведин сун пекер алай, адан юкьвани тумаждин чӀул авай. Ада незвайди цицӀерни чӀуру чӀижерин вирт тир.
5Гьа чӀавуз адан патав Ярусалимдайни вири Ягьудатдай ва Ярдан вацӀун къерехра авай чкайрай инсанар къвезвай. 6Абуру чпин гунагьар хиве кьазвай, Ягьядин кап алаз Ярдан вацӀа цик акахьун къачузвай. 7Вичин патав цик акахьун къачун патал къвезвай гзаф фарисеярни сакъаяр акурла, Ягьяди абуруз лагьана:
– Эй гъуьлягъдин къеняй акъатайбур! Аллагьди хъиляй ацӀана квез гудай жазадикай квевай катиз жеда лагьай фикир куь кьилера ни туна? 8Къуй куь хъсан крарин майвайри куьн Аллагьдин рекьел атанвайди къалуррай. 9«Чи буба Ибрагьим я» лугьуз ацукьмир. За квез лугьузва хьи, Аллагьдивай и къванерни Ибрагьиман веледриз элкъуьриз жеда. 10ЯкӀвни датӀана тарарин пунарив гьазур я: хъсан майваяр тегъидай гьар са тар атӀана цӀуз гадарда.
11Квез Аллагьдин рекьел къвез кӀан хьайила, за квев цик акахьун къачуз тада. Амма залай кьулухъ къведайди залайни гзаф къудрат авайди жеда. Зун Адан кӀвачин къапар гваз къекъуьнизни лайих туш. Ада квев Пак Руьгьдик ва цӀук акахьун къачуз тада. 12Адан йирф Вичин гъиле ава, Ада Вичин рат михьда, гатай къуьл Вичин бегьер хуьдай чкадиз кӀватӀда, нагъварни хкахь тийидай цӀал куда.
Иса цик акахьун къачун
(Марк 1:9-11; ЛукӀа 3:21-22; Ягь. 1:32-34)
13Гьа чӀавуз Иса Галилейдай Ярдан вацӀал Ягья пайгъамбардин патав цик акахьун къачун патал атана. 14Ягья Ам акъвазариз алахъна.
– Зав Вуна цик акахьун къачуз туна кӀандай чкадал Вун цик акахьун къачуз зи патав вучиз атанва? – лагьана ада.
15– Исятда гьакӀ хьурай, – жаваб гана Исади. – Исятда чна Аллагьдиз кӀанзавайди кьилиз акъудайтӀа дуьз жеда.
Гьа икӀ, Ягьяди Адав цик акахьун къачуз туна. 16Иса, цик акахьун къачуна, цяй экъечӀдайла, цавар ахъа хьана. Ягьядиз Исадал лифрен шикилда аваз Аллагьдин Руьгь эвичӀайвал ва Адал амукьайвал акуна. 17Цаварай рахадай ван атана:
– Ам Зи рикӀ алай Хва я, Зи шадвал Гьадалди я.
Đang chọn:
МатӀай 3: ЛезПК
Tô màu
Chia sẻ
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© Институт перевода Библии, 2010, 2018, 2023