Mateo 24
24
Jesús tsi' wʌn alʌ bajche' mi caj i jejmel Templo
(Mc 13.1-2; Lc 21.5-6)
1Che' bʌ tsa' loq'ui Jesús ti Templo tsa' caji ti majlel, tsa' tiliyob xcʌnt'añob i cha'añ, cha'añ mi' pʌsbeñob che' bajche' yilal jiñi Templo. 2Jesús tsi' su'beyob:
—¿Woli ba la' q'uel pejtelel iliyi? Isujm mic su'beñetla, ma'añic mi caj i cʌytʌl mi jump'ejlic xajlel ti' pam yam bʌ xajlel mach bʌ añic mi caj i chojquel ju'bel,#24.2 Jerusalén tsa' jisʌnti che' ti ja'bil lujunc'al i chʌnc'al (70) che' tilemix Cristo ti' tojlel jiñi yumʌl bʌ ti Roma i c'aba' Tito Lc 19.44. —che'en.
I yejtal tac che' maxto c'otemic i yorajlel i jilibal
(Mc 13.3-23; Lc 21.7-24)
3Che' buchul Jesús ti' pam jiñi Wits ba'añ ca'bʌl Olivo te',#Mt 21.1 tsa' tiliyob jiñi xcʌnt'añob i pejcañob ti' bajñelil, tsi' yʌlʌyob:
—Su'beñon lojon, ¿baqui ora mi' caj ti ujtel pejtelel jiñi? ¿Chuqui i yejtal mi caj c pʌsbentel lojon che' lʌc'ʌl i yorajlel ma' cha' tilel yic'ot che' ti' jilibal pañimil?
4Jesús tsi' jac'beyob:
—Chʌcʌ q'uele la' bʌ cha'añ ma'añic mi la' lotintel. 5Come ca'bʌl talob tij c'aba', mi caj i yʌlob: Joñoñʌch jiñi Cristo; ca'bʌl mi caj i lotintelob. 6Mi caj la' wu'bin añ ca'bʌl guerra yic'ot ca'bʌl t'añ cha'añ tal guerra; mach mi la' bʌc'ñan, come wersa mi' caj i yujtel pejtelel jiñi; pero maxto jiñic i jilibal. 7Come jump'ejl tejclum mi caj i techob guerra ti' contra año' ti yam bʌ tejclum, juntiquil yumʌl mi caj i tech guerra ti' contra jiñi yam bʌ yumʌl; tal ca'bʌl chʌmel, ca'bʌl wi'ñal yic'ot i yujquel lum ti ca'bʌl lum tac.#Is 19.2; Ap 6.3-8,12-17 8Ti pejtelel iliyi jiñʌch i cajibal jaxto wocol.
9Che' jiñi mi caj i yʌq'uetla ti tic'lʌntel, mi caj i tsʌnsañetla, mi caj la' ts'a'lentel ti pejtelel lum cha'añ ti' caj j c'aba'.#Mt 10.17-18,22; Jn 16.2 10Ti jim bʌ ora mi caj i tejchel tilebixel bʌ i pusic'al ca'bʌlob. Mi caj i yʌc'ob i pi'ʌlob ti' c'ʌb i contra, mi caj i ts'a'leñob i bʌ. 11Mi caj i tejchel ca'bʌl lot bʌ x'alt'añob, mi caj i lotin ca'bʌlob. 12Cha'añ ti' caj p'ojlemix ca'bʌl jontolil, mi caj i jilel i c'uxbiya ca'bʌlob. 13Pero jiñi chʌn xuc'ul bʌ mi yajñel c'ʌlʌl ti' jilibal, mi caj i coltʌntel.#Mt 10.22; Ap 2.10,26 14Mi' caj ti sujbel jiñi wen t'añ cha'añ i yumʌntel Dios ti pejtelel pañimil, cha'añ mi' cʌjñel ti' tojlel pejtelel wiñicob x'ixicob, che' jiñi mux i tilel i yorajlel i jilibal.#Mt 28.19; Rm 1.5,8; 10.18; Col 1.23; 1 Ts 1.8
15Jiñi cha'añ che' mi la' q'uel wa'alix ti ch'ujul bʌ ajñibʌl jiñi c'ax bi'bi' jax bʌ mu' bʌ i jisan ca'bʌl chuqui tac añ,#24.15 Jiñi c'ax bi'bi' jax bʌ mu' bʌ i jisan ca'bʌl chuqui tac añ: Jiñʌch t'añ tilem bʌ ti' juñ Daniel (Dn 9.27; 11.31; 12.11). Ili versículo 15 woli i taj ti t'añ che' bajche' mi caj i jisʌntel Jerusalén yic'ot che' bajche' jiñi i soldadojob romanojob mi caj i bi'b-esañob jiñi Templo, che' ti ja'bil 70 che' tilemix Cristo (Lc 21.20). che' bajche' tsi' yʌlʌ jiñi x'alt'añ Daniel —jiñi mu' bʌ q'uel ili juñ, la' i ch'ʌmben isujm, 16jiñi cha'añ jiñi año' bʌ ti Judea la' puts'icob majlel ti wits tac. 17Jiñi am bʌ ti' jol i yotot mach ju'bic cha'añ mi' loc'san i chu'bʌañ ti' yotot. 18Jiñi am bʌ ti cholel, mach mi' chʌn sujtel cha'añ mi' ch'ʌm i pislel. 19Ti jim bʌ ora ¡o'bolob jax i bʌ jiñi x'ixicob cʌntʌbilo' bʌ i yalobil, yic'ot jiñi woli bʌ i cosañob i yalobil ti jiñi q'uiñ! 20Cha'lenla oración che' jiñi, cha'añ mach ti' yorajlelic tsʌñal mi la' puts'el, mi jiñic che' ti' q'uiñilel c'aj-o.#24.20 Ya' ti Palestina che' ti yorajlel tsʌñal yic'ot che' ti yorajlel ja'lel wen wocol mi' cha'leñob xʌmbal. Che' ti' q'uiñilel c'aj-o tic'bilob cha'añ mi' cha'leñob ñajt bʌ xʌmbal, cojach mi' mejlelob ti xʌmbal jump'ejl km (Ex 16.29-30; Hch 1.12; Mt 24.15-20); mi' pʌsbeñonla che' bajche' tsi' cha'leyob guerra jiñi romanojob ti' contra jiñi judíojob ti Palestina che' ti ja'bil 66-70 che' tilemix Cristo. 21Come tal ca'bʌl wocol, mach bʌ añic baqui ujtem c'ʌlʌl ti' cajibal pañimil c'ʌlʌl wʌle, mi talic ti wi'il bʌ ora. 22Machic tsi' wʌn ña'ta i com-esan i yorajlel wocol, ma'añic majqui mi' coltʌntel; pero cha'añ ti' caj jiñi yajcʌbilo' bʌ, mi caj i com-esʌntel i yorajlel wocol.
23Jiñi cha'añ, mi añ majqui mi' su'beñetla: “Q'uelela, awilan, wʌ'an Cristo” “o ya'añ Cristo ya'i”, mi che'en, mach mi la' ñopben i t'añ. 24Come mi caj i tejchel xlot bʌ Cristo, yic'ot xlot bʌ x'alt'añob, mi caj i pʌsob ñuc tac bʌ i yejtal i p'ʌtʌlel, yic'ot bʌbʌq'uen tac bʌ, cha'añ mi' lotiñob jiñi yajcʌbilo' bʌ, mi tsa' mejli. 25Awilan, tsa'ix c wʌn su'beyetla. 26Jiñi cha'añ, mi tsa' caji i su'beñetla: “Q'uelela ya'añ Cristo ti tiquiñal lum”, mach mi la' loq'uel majlel la' q'uel; o “q'uelela ya'añ Cristo ti' mal otot”, mach mi la' ñopbeñob i t'añ. 27Come che' bajche' i c'ʌc'al chajc ti' pasibal q'uiñ c'ʌlʌl ti' bʌjlibal q'uiñ, che'ʌch mi' caj i tsictiyel i Yalobil Wiñic che' mi' tilel. 28Baqui jach añ chʌmeñ bʌ bʌc'talʌl, ya'i mi' tempañob i bʌ xta'jol.#24.28 Q'uele Lc 17.37. Isujmlel ili versículo jiñʌch cha'añ mi' yʌq'ueñonla lac ch'ʌmben isujm cha'añ che' ba' ora mi caj i tilel Cristo wen tsiquil mi caj laj q'uel i yejtal tac i p'ʌtʌlel, che' bajche' mi tempañob i bʌ ca'bʌl xta'jol che' añ juntiquil chʌmeñ bʌ ti jochol bʌ lum (Job 39.30).
Che' mi' tilel i Yalobil Wiñic
(Mc 13.24-37; Lc 17.26-30,34-36; 21.25-33)
29Ti jiñi jach bʌ ora che' mi' ñumel ili wocol, mi caj i yiq'uesʌntel jiñi q'uiñ, jiñi uw ma'añic mi caj i yʌc' i c'ʌc'al, jiñi ec' tac mi' caj i yajlel ju'bel ti panchan, jiñi p'ʌtʌl tac bʌ ti panchan mi caj i wersa ñijcʌntel.#24.29 Jiñʌch cha'añ mi lac ch'ʌmben isujm cha'añ i meloñel Dios wen bʌbʌq'uen mi cajel (Is 13.9-10; 34.4; Jer 4.23-26; Ez 32.7; Jl 2.10-11; 2.31; 3.4; 3.15; Am 8.9; Sof 1.15; Ap 6.12-13; 8.12). 30Ti jim bʌ ora i Yalobil Wiñic mi caj i pʌs i yejtal i p'ʌtʌlel ti panchan; pejtelel wiñicob x'ixicob ti pañimil mi' cajelob ti uq'uel, mi caj i q'uelob i Yalobil Wiñic che' mi' tilel ti tocal ti panchan ti' p'ʌtʌlel yic'ot ti' ñuclel.#Dn 7.13; Ap 1.7 31Mi caj i choc tilel i yángelob yic'ot c'am bʌ i t'añ trompeta, mi caj i tempan jiñi yajcʌbilo' bʌ i cha'añ ti chʌnwejlel pañimil, ti junwejl panchan c'ʌlʌl ti yam bʌ junwejl.#Is 27.13; Mt 13.41-42,49-50; 1 Cor 15.52; 1 Ts 4.16
32Ñopola jiñi lajiya ti jiñi higuera te': Che' yaxto i c'ʌb, che' woli' ti pasel ch'oc to bʌ i yopol, la' wujil lʌc'ʌlix i yorajlel ticwal. 33Che' ja'el jatetla, che' mi la' q'uel pejtelel jiñi, ña'tanla lʌc'ʌlix añ ti ti' otot. 34Isujm mic su'beñetla, mi' caj i yujtel ti pejtelel iliyi che' cuxulob to jiñi wiñicob x'ixicob año' bʌ wʌle. 35Jiñi panchan yic'ot pañimil mi' caj i jilel, pero jiñi c t'añ mach jilic.
36Ma'añic majqui yujil baqui bʌ q'uiñ baqui bʌ ora mi caj i yujtel jiñi, mi jiñic ángelob ti panchan, [mi jiñic i Yalobil,]#24.36 Ti yan tac bʌ Biblia ma'añic mi lac taj ili t'añ: mi jiñic i Yalobil. jiñi jach c Tat yujil. 37Che' bajche' tsa' ujti ti yorajlel Noé, che' lajal mi caj i tilel i Yalobil Wiñic. 38Che' maxto añic tsa' tili but'ja', tsi' cha'leyob we'el, tsi' cha'leyob uch'el, tsi' cha'leyob ñujpuñijel, tsi' sijiyob i yalobil, jinto ti jiñi q'uiñ che' bʌ tsa' ochi Noé ti barco. 39Ma'añic tsi' ña'tayob mi añ chuqui mi' caj ti ujtel jinto tsa' tili jiñi but'ja' tsa' bʌ i laj jisayob. Che'ʌch mi' caj i yujtel ja'el che' mi' tilel i Yalobil Wiñic. 40Che' jiñi añ cha'tiquil wiñicob ti cholel; juntiquil mi' caj i pʌjyel majlel, jiñi yam bʌ mi' caj i cʌytʌl. 41Cha'tiquil x'ixicob woliyob ti juch'bal; juntiquil mi' caj i pʌjyel majlel, jiñi yam bʌ mi' caj i cʌytʌl.
42Yom yʌxʌl la' woj che' jiñi, come mach la' wujilic baqui ora mi' caj i tilel la' Yum. 43Ña'tanla iliyi, tsa'ic i ña'ta i yum otot baqui ora mi' tilel xujch', che' jiñi tsi' chʌcʌ q'uele i yotot, cha'añ ma'añic mi yochel xujch'. 44Jiñi cha'añ, yom chajpʌbiletla ja'el; come tal i Yalobil Wiñic ti' yorajlel che' mach yʌxʌlic la' woj.#Lc 12.39-40; 1 Ts 5.2; 2 P 3.10; Ap 3.3; 16.15
Jiñi xuc'ul bʌ x'e'tel
(Lc 12.41-48)
45¿Majqui jiñi xuc'ul bʌ x'e'tel am bʌ ca'bʌl i ña'tʌbal, tsa' bʌ aq'uenti ti' wenta i ye'tel i yum cha'añ mi' yʌq'ueñob i bʌl i ñʌc' jiñi año' bʌ ti' yotot che' ti' yorajlel? 46Tijicña jiñi x'e'tel uts'at bʌ woli' mel i ye'tel che' mi' c'otel i taj i yum. 47Isujm mic su'beñetla, mi caj i yʌq'ueñ ñuc bʌ i ye'tel ti pejtelel i chu'bʌañ. 48Mi tsi' yʌlʌ ti' pusic'al jiñi jontol bʌ x'e'tel: “Jal to tal c yum”; 49mi tsa' caji i jats' i pi'ʌlob ti e'tel, mi tsi' cha'le we'el uch'el yic'ot xyʌc'ʌjelob, 50tal ti julel i yum jiñi x'e'tel che' ma'añic i pijtaya, che' bʌ mach yʌxʌlic i yoj. 51Tsʌts mi caj i yʌq'ueñ i toj i mul. Mi caj i yʌc' ba'añ jiñi cha'chajpob jax bʌ i pusic'al, ya'i mi' cajelob ti uq'uel yic'ot quech'ecña bʌ i bʌquel i yej.#Lv 17.10,14; 20.18; Ez 25.7
Đang chọn:
Mateo 24: NTCH
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Biblia de Estudio en Ch´ol de Tumbalá, Chiapas, México © Sociedad Bíblica de México A.C.
