BBƐ 8
8
1Sóol ŋeé lúmítíné ɔwɔɔ́nɔ awɔ́ bɔ́ ŋɔ yɔ́ɔ́nɔ Itiene.
Sóol ŋe tékese hiɔ́bɔ hí belumitinine
Hú buátɛ́ buɔ́sɛ́ eébú, mutekesene a muáŋá ŋeé túmé a hiɔ́bɔ hí belumitinine hí Yelúsalɛm. Yaátɛ́ asana belumitinine bekime ŋa bɔ́ sáásíáka ne i iisí ci Yuté na cɛ Samalí ; hú baacɔ bá ɛndɔ́ma bá ŋa bɔ́ lɔ́bɔ́ eé Yelúsalɛm. 2Bɔ́mɔtɛ́ baacɔ e bé ŋe bú bíínjíé o olumitinine ŋe bú nyie Itiene, bó wuúci lɛlaka buéŋí. 3Mbá Sóol, wuúci u ŋa cɔ́bá ne buúse o otekese hiɔ́bɔ hí belumitinine ; u húle óofokine eé meébe, u hémúkúnyi ne beénjú na banɔ́mɔcɔ́ a makɛ́nda, u beébe hákɛ́na eé ciíbe cɛ ɛcaná.
Fílib ŋe húlinyi baacɔ Ambányɛ yɛ́ Ɛsɔ́ma a Samalí
4Aáná belumitinine a bá ŋa bɔ́ sáásíáka ŋaá bá bé húlé ebú húlikinyi baacɔ Ambányɛ yɛ́ Ɛsɔ́ma bɛhaála bɛhaála. 5Fílib ŋaá cɔ́bá aá cɛ́mɔtɛ́ bálɛ́ka cɛ Samalí,#8.5 Cɛ́mɔtɛ́ Ciɔɔ́ŋɛ́ cɛ́ buáyá áŋa na « a bálɛ́ka a ciáŋá cɛ Samalí… » u hulikinyi baacɔ bá hɔ́á anyía Yésus áŋa Mesíi. 6Baacɔ bá nyɛkɔca ŋaá bá na ɔtɛ́má ɔ́mɔtɛ́ ; bá ŋa bɔ́ tákákɛ́na eetú ɔ ɔlɔ́kɔ́ma bɛsana ebí Fílib ŋaá bá weé beébe bíkétíkínyi a asana ayɛ́ bá ŋa bɔ́ lɔ́kɔ́máka, bɔ́ lɛ́caka bikéki bí tubílícínyínyí abɛ́ u ŋaá bá waá kɛ́laka. 7Aá taaká, *bɛɛbɛ́ bí bililé ŋaá bá bɛ́á hámɔ́kɔ́na a baacɔ beéŋí a bá ŋa bɔ́ bá ne biíbi, bɛ́ aánjáláka ; na bɛsákála biéŋí na baacɔ e bé ŋe bú síndólo beéŋí ŋa bɔ́ aáŋɔ́núáká. 8Aáná baacɔ bá bálɛ́ka ŋe bú bílénéké buéŋí. 9Ɔɔcɔ a wɔmɔtɛ́ aá báka aáhá a bálɛ́ka eécí ; nyíáyɛ́ nyiínyi ɛ́cɛ Símon ; u ŋaá bá waá kɛ́láka maŋála. U kékísíki baacɔ bá Samalí na mááyɛ́ maŋála, u bíkétíki anyía wáŋa taaká cɛ ɔɔcɔ. 10Híáná baacɔ bekime ŋaá bá bébú wuúci kékéke buéŋí, o otúme tunɔ́sɛ́nɔ́sɛ́ ɔ ɔkɔɔ́háma *baáŋá. Bá kɔ́ɔnaka báyɛ : « Ɔɔcɔ ooci áŋa makɛ́nda má Bandɔ́mɛsɛ́ amá bɔ́ ŋɔɔ́ lɔ́ŋɔ anyía “Makɛ́nda a maáŋá.” » 11Bá ŋa bɔ́ bá bébú wuúci kékéke aáná, anyía feeké u ŋaá bá weé beébe kékísíki na mááyɛ́ maŋála eémé. 12Mbá, ekúlú ayɛ́ baacɔ eébé ŋe bú lúmítíníne Ambányɛ yɛ́ Ɛsɔ́ma eyí Fílib ŋeé beébe hulíkínyi a asana ne yí *Butéŋí bɔ́ Bandɔ́mɛsɛ́ ne yí Yésus *Kilís, ne beénjú na banɔ́mɔcɔ́ ŋe bú bíótókíne. 13Símon bɛ́muátá ŋe lúmítíníne, yó bíótíne ; u látákɛ́na Fílib. U ŋeé kékéke buéŋí ne bikéki bí tubílícínyínyí ne bikémése bɛ́ bɛsana a bɛ́ ŋa bɛ́kɛ́láka.
14Ekúlú ayɛ́ baacɔ bá ɛndɔ́ma a bá ŋa bɔ́ lɔ́bɔ́ eé Yelúsalɛm ŋa bɔ́ lɔ́kɔ́má anyía baacɔ bá Samalí ma bɔ́ káha bɔmbányɛ Bɛsana bɛ́ Bandɔ́mɛsɛ́, bá ŋá tɔ́ma ne Bíel na Sáaŋ náábɔ́. 15Ayɛ́ bá ŋga bɔ́ hámá a Samalí, bá ŋa bɔ́ bɛ́cɔ́kɔ́lɔ́kɛ́ná Bandɔ́mɛsɛ́ o owiínjie belumitinine eébé *Efúúménénú yí Elilé. 16Yááŋa anyía Efúúménénú yí Elilé ŋaá bá yí ti ŋo yóófíne ta na ɔɔcɔ ɔmɔtɛ́ eé beébe. Bá ŋa bɔ́ bá bé me bú bíótókíne hú eé nyiínyi nyí Otéŋí a Waáŋá Yésus. 17Aáná ne Bíel na Sáaŋ ŋe bú beébe táláká aabá a bɛɛtɔ́. Bandɔ́mɛsɛ́ nyi beébe iínjie Efúúménénú yí Elilé eényí.
18Ɛ́makɛ́la Símon áa lɛ́ca anyía Bandɔ́mɛsɛ́ me yiínjie belumitinine Elilé ekúlú ayɛ́ baacɔ bá ɛndɔ́ma ŋe bú beébe táláká aabá a bɛɛtɔ́, u ŋé iínjíé ne Bíel na Sáaŋ mɔɔnyɛ́, 19mbá ɔsɛ : « Énu mi iínjíé tɔ́na makɛ́nda amá anyía ɔɔcɔ okime awɔ́ yámɛ tála aabá a aatɔ́ á bá ne Efúúménénú yí Elilé. » 20Mbá Bíel ɔsɛ : « Mɔ́ɔ́wɔ mɔɔnyɛ́ é nyíme na kuɔŋɔ́ bɛ́muátá áyá, anyía ɔ ŋɔɔ́ bɛ́táá anyía bɔ́ ŋɔ yɔ́ɔndɔ nyiínjie nyɛ́ Bandɔ́mɛsɛ́ na mɔɔnyɛ́. 21Ɔ tɛ ɔ́ bá ta na nuafa, te ne nyilimíné e buólí eebu, anyía úúwe ɔtɛ́má tɛ á bá ɔtálɛ́mánánɔ́ eé buúse bɔ́ Bandɔ́mɛsɛ́. 22Hɛŋɛ́na aabɛ́ yɛ́ nyɛbɛ́táá ayɛ́ ɔ ɔ́ŋa ne yiíyi, mbá a bɛ́cɔ́kɔ́lɔ́kɛ́na Bandɔ́mɛsɛ́ anyía, mbɔ́kɔ u ŋeé léne, wɔ́ɔ nyɛanɛ́nɛ́na asana eéyé ayɛ́ ɔ́ɔ bá ɛ́cɛ ɔ́ mɔɔ́ bɛ́táá ɔkɛla. 23Aáná yaáká yí eése áŋa onyíóyónó ɔɔ́wɔ ɔ ɔtɛ́má hú mbiɔ́kɛ ; ɔ ɔ́ŋa yɔɔ́lɛ́ yɛ́ bɔɔbɛ́. » 24Mbá Símon ɔsɛ náábɔ́ : « Banɔ́ bɛ́muátá, ánɔ mɛ bɛ́cɔ́kɔ́lɔ́kɛ́nɛ́na Otéŋí a Waáŋá anyía ta bɔkɔ a bɛsana abɛ́ nú ma nɔ́ kɔ́ɔnaka tɛ mɛ hámɛ́na. » 25Baacɔ bá ɛndɔ́ma eébé béfendí ŋa bɔ́ cɔ́bá ne buúse, bé ŋé bíkétíkínyi baacɔ bɛsana ebí bé ŋe bú ményi a asana yí Yésus. Bé ŋé beébe hulíkínyi Ambányɛ yɛ́ Ɛsɔ́ma. E elime eécí, bá ŋa bɔ́ hálɔ́mɔ́ná eé Yelúsalɛm, bé húle húlikinyi baacɔ bá mɔnɔŋɔ meéŋí ma Samalí Ambányɛ yɛ́ Ɛsɔ́ma.
Ne Fílib na munyiɔnɔ kɔ́mɛ́na mu Etiobí
26Elilé yɛ́ bɔsɔ́ma yí Otéŋí a Waáŋá ŋaá laána Fílib yɛ́sɛ : « Hatɔ́na, cɔbá a aháŋá yɛ́ bulɔɔ́lɔ o ohónyí awɔ́ ú ŋa hátɔna eé Yelúsalɛm, ú lɔ́ɔkɔ a Kasa.#8.26 Bálɛ́ka ífendí ŋaá bá ne nyiínyi eényí. Ihényí ífendí ŋaá bá cɛ́a hɔ́lákɛ́na a « Kasa ahátátá » : Ɔ́mɔtɛ́ ŋaá bá cɛ asálá cɛ asálá yɛ́ nuɔmɔ́ ; a wɔ́mɔtɛ́ hɔ́lákɛ́na i iisí acɛ́ baacɔ tɛ ɔ́mɔ bɔ́ bá bébú limekine hɔ́á. Yɛ́ ŋa nyɛmána yɛ́ ɔbá anyía o ohónyí otóocí Fílib ŋa hɔ́lɛna.Baacɔ tɛ ŋa háná abɔ́ hɔ́lɛna a waáta ohónyí. » 27Aáná Fílib ŋé tényí a hátɔ́na, yɔ́ cɔ́ba hɔ́á. O ohónyí, u ŋá lɛca ɔɔcɔ a wɔmɔtɛ́ eeyé eé buúse. U ŋaá bá ɔɔcɔ u Etiobí, wuúci weekí.#8.27 Buáyá bá ŋaá bá bá yáakáka banɔ́mɔcɔ́ bekime a bá ŋa bɔ́ bá bábɔ́ nyiɔkɛna betéŋí e beénjú. E bikúlú bɛ́ buáyá etéebí, nyiínyi nyí Etiobí ŋaá bá haála hé Nubi, iisí hɛ́nánɔ acɛ́ Sutáŋ áŋa. U ŋaá bá yaandándá yɛ́ munyiɔnɔ kɔ́mɛ́na. U tétényíki buŋaŋa bɔ́ Kandas, oónjú awɔ́ u ŋaá bá otéŋí u bunɔŋɔ bú Etiobí. Ɔɔcɔ oócí ŋaá fááya o okonyémi Bandɔ́mɛsɛ́ eé Yelúsalɛm. 28U ŋaá bá we yeélúéke e Etiobí, oliménénú a yááyɛ́ akálɛ́kɛ ɔ ɔmuaná ; u húle á fánaka nufule nú *muhémúnyi bɛsana *Ɛsayí. 29*Efúúménénú yí Elilé né Fílib yɛ́sɛ : « Bíkósíti, bɛ́bábɛ́na a akálɛ́kɛ e eyinyíé. » 30Aáná u ŋa cábɛ́tɛ́na, yɔ́ cúá akálɛ́kɛ eéyé ; u ŋá lɔ́kɔ́ma ɔɔcɔ u Etiobí oócí á fánáka nufule nú muhémúnyi bɛsana Ɛsayí. U ŋé wuúci batá ɔsɛ : « Ɔ ŋɔɔ́ lɔ́kɔ́ma bɔmbányɛ bɛsana abɛ́ ɔ ŋɔ́ɔ fana e ? » 31Mbá ɔɔcɔ ɔsɛ : « Anyána ya mɛ́ŋa wu ɔlɔ́kɔ́máka bɔmbányɛ bɛsana eebi mbɔ́kɔ ɔɔcɔ ti ŋe mí biíbi hembúlékíne e ? » U ŋɔ́ lɔ́ŋɛ́ta Fílib o okolímine aayá a maabána a akálɛ́kɛ ɔ ɔmuaná. 32Ekéti yí nufule ayɛ́ u ŋaá bá waá fánaka e nufule eénú ŋaá bá anyía :
« U ŋeé límíne háyɛ etúké ayɛ́ bá cɔ́bana ɔ ɔkɔsɛ́kɛta, yó lésíkínyi mbuumu háyɛ ɔɔ́nɔ́ u ɛtɔ́mbá awɔ́ bá ŋaá sɔ́mba bɛhɔcá, u ti bókíte.
33Bé ŋeé wuúci fénékíné, wuúci ta ɔbɔ́ŋɔ ɔɔcɔ wu o wuúci kamɛna. Báányɛ́ bé ké bú bíkétíki anyía wáŋa osíkénú ahátátá e ? Yááŋa anyía úúyé olíhe áŋa ɔmanánɔ́ ɔ ɔmɛsɛ́. »#Ɛsa 53.7-8
34Weekí oócí ɔsɛ : « Cɔ́kɔ́lɛ, ɔ́ɔ mɛ laána : Bɛsana eebi ebí muhémúnyi bɛsana ŋe bíkéti ŋa lɛ́ca aányɛ́ e ? Wuúci bɛ́muátá ayɛ́ʼ ɔɔcɔ u etémbí e ? » 35Aáná Fílib ŋaá bɛ́kámá ɔɔcɔ oócí, yó wuúci hulikinyi Ambányɛ yɛ́ Ɛsɔ́ma yí Yésus. U ŋeé túmíne e ekéti yí nufule ayɛ́ ɔɔcɔ oócí ŋaa fánáka. 36Ekúlú ayɛ́ bá ŋa bɔ́ bá bábɔ́ kándaka o ohónyí, bá ŋa bɔ́ lɛ́cá nuúci ; mbá weekí ɔsɛ : « Menyífé eeme, aátɛ́ yááŋa yé okóti anyía o ti o mi ootíne e ? » 37[Mbá Fílib ɔsɛ : « Mbɔ́kɔ o ŋoó lumitinine ne úúwe ɔtɛ́má okime, ya mɛ́ŋa wu ɔ kuɔŋɔ́ óotine. » Mbá ɔsɛ : « I ŋe mí lumitinine anyía Yésus áŋa Ɔɔ́nɔ́ u Bandɔ́mɛsɛ́. »]
38Weekí ŋá laána mukendi akálɛ́kɛ ɔsɛ : « Tálɛ́mɛ́na » ; mu ŋá tálɛ́mɛ́na. Ne Fílib ne weekí ŋa bɔ́ sɔ́ɔ́náká, bé ŋé oofíne eé nuúci, Fílib nyi wuúci ootine eényí. 39Ɛ́makɛ́la bábɔ́ háma eé nuúci, Elilé yí Otéŋí a Waáŋá nyɛhɔlana ɔhɔlana Fílib eényí. Weekí ta ɔ́ háná wuúci lɛca. Ta híáná, ɔɔcɔ u Etiobí oócí ŋa cɔ́ba ne buúse na ɔkanda, u húlé bílénéke. 40Fílib ŋe síké é bítéme wa yáaŋa a bunɔŋɔ bɔ́ Asɔt;#8.40 Nyiínyi nyɛ́ yaandándá yɛ́ bálɛ́ka a yɛ́mɔtɛ́ yɛ́ bálɛ́ka bí Filisiti cɛ buáyá. u ŋa hátɔ́na hɔ́á, yɔ́ cɔ́ba a Sɛsalɛ́ɛ, u húlé húlikinyi baacɔ Ambányɛ yɛ́ Ɛsɔ́ma ɔ mɔnɔŋɔ mekime amá u ŋaá bá waá hɔ́laka o ohónyí.
Đang chọn:
BBƐ 8: lem
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2008, Wycliffe Bible Translators, Inc. All rights reserved.
