Mákò 8

Yèésù sɛ̃̀ ɔnɔkɛ̃̀ɛ̃ ɛgbàá ɛgbàá ɔ̀nà méèdzì (4.000) ńdzídzɛ

(Màtéwò 15:32-39)

1Ó ɖi nɔ́dzɔ́-kã̀ ró, tsí ɔ̀nyà ŋa tsɛ́ kì, tsí káà kpàɖé ńɖi-Yèésù. Ńbɛ̀ɛ́, dzídzɛ kò wà fú ŋa, tsí ká dzɛ. Tsí Yèésù kpe ɔmatsɛ́‐ɛ̀ ŋa, tsí fɔ̀ fú ŋa ní: 2Inɔ́-ɔ̀nyà ŋa#á wà nyɔ́ òŋu, iŋɛ́ yèé tse#ɛ́, títí ńǹdzɛ́ɛta ní à wà bá òŋu si#ɛ́, tsí dzídzɛ kò wà fú ŋa ró, tsí ká dzɛ. 3Ó ɖi, bí òŋu wí fú ŋa ní ká sɛ̃̀ bɔ lɔ bɛ́ɛ̀ nébi#ɛ́, ara nákó káà kú ŋa, tsí à nákó káà kí nɔ́ɔ̀nà. Tsí ɔ̀nyà kpíkpɔ̀ náàŋírĩ-ŋa gbo ti ńǹɖì dzídzɛ̃̀.

4Tsí ɔmatsɛ́‐ɛ̀ ŋa wà wí fúu ní: Kíbí ńbíbɛ́ kí taánù#ɛ́, ńbisí à nákó nyáa rí dzídzɛ fú ŋa, tsí ká dzɛ, tsí yó? 5Tsí ó wà bèrè ŋá ní: Kpɔ̃́nɔ́ mɛ́ɛló wà fú ŋa?

Tsí à ní: Kpɔ̃́nɔ́ méedze.

6Ńbɛ̀ɛ́, ó wí fú ɔ̀nyà ŋa#á ní: Ká dzokó ńlɛ̀ lɔ. Tsí ó kɛ́ kpɔ̃́nɔ́ méedze#ɛ́, tsí ɖɔ́kpɛ́ fú Ɔ̀ɖáyé, tsí ó tsɛ́ ŋa, tsí wà ń bɔwɔ́-ɔmatsɛ́‐ɛ̀ ŋa ní ká ń kpɛ̃́ fú èrò#ɛ́. 7Ɛdzã wíríwírí kã̀ŋa gbo wà fú ŋa. Tsí ó ɖɔ́kpɛ́ fú Ɔ̀ɖáyé fú ɛdzã ŋa#á gbo, tsí kɛ́ ŋa bɔwɔ́-ɔmatsɛ́‐ɛ̀ ŋa ní ká ń kpɛ̃́ fú ŋa. 8Tsí à dzɛ títí yó. Tsí àbùbɔ̀ yèé kílɛ̀ ŋa#á, ɔmatsɛ́‐ɛ̀ ŋa se ŋá si nágbã̀, tsí ó kɔ̃́ agbã̀ méedze. 9Ɔ̀nyà lɔ kíbí ɛgbàá ɛgbàá ɔ̀nà méèdzì (4.000) ní dzɛŋɛ́#ɛ́. Tsí kíbí à dzɛŋɛ́ tã́#á, Yèésù fɔ̀ fú ŋa ní ká lɔ ńǹkɛ̀ɛ́. 10Tsí òŋu ɔmatsɛ́‐ɛ̀ ŋa gbo káà wɔ̀ nɔ́kɔ̃̀-odzómi, tsí lɔ nɔ́wɔ́-Ɖàmànúta.

Ɔma-ɛgbɛ́-Fàrísì ŋa bere Yèésù ní kó tse iŋɛ́-àwùsì-kã̀ fú àŋa

(Màtéwò 16:1-4; Lúkà 12:54-56)

11Ńbɛ̀ɛ́, ɔma-ɛgbɛ́-Fàrísì† ŋa gbo wà bá ŋa. À wà wo ká sɔ ɔ̀kpákù fú Yèésù, tsí à wà tse àrã́dzìnyà báa, tsí wà bèrèé ní kó tse iŋɛ́-àwùsì-kã̀ fú àŋa, tsí kó ń nyà ɖíre ní Ɔ̀ɖáyé ní bɛ̀ɛ́ wá#á.

12Kíbí Yèésù gbɔ́ afɔ̀ nyɛ̀ŋɛ̀#ɛ́, ó ká oŋù-ɛ̀ɖɔ̃̀ fúu, tsí ó mí kãlɛ̀. Tsí ó wà wí fú ŋa ní: Àŋa ɔma-ìsɛ̃̀ɛ̃́ ŋa, iŋɛ́-àwùsì gé ní à náa wà wò#ɛ́ɛ̀? Ó ɖi, òŋu wà wí òtítɔ́ fú ŋa ní fee, à kàkó tse iŋɛ́-àwùsì-kã̀ kpókpó fú ɔma-ìsɛ̃̀ɛ̃́ ŋa.

13Kíbí ó wí fú ŋa bɛ́ɛ̀ tã́#á, òŋu ɔmatsɛ́‐ɛ̀ ŋa ǹɖe ńɖi-ŋa, tsí sɛ̃̀ káà wɔ̀ nɔ́kɔ̃̀-odzómi#ɛ́ ró, tsí à lɔ náàtàkè-ɔ̀nɔ̀ɔ́.

Yèésù wà wíìnyɛ̀ ti nára-ɔ̀tsɛ̃̀-ɔma-ɛgbɛ́-Fàrísì ŋa òŋu ti Èróɖì

(Màtéwò 6:5-12)

14Ńbɛ̀ɛ́, ɔmatsɛ́‐ɛ̀ ŋa gbàgbé, tsí à kò banɛ́ kpɔ̃́nɔ́. Kpɔ̃́nɔ́ ɔ̀kã̀ntso gé ní wà fú ŋa ńnɔ́-ɔkɔ̃̀#ɛ́. 15Ńǹwèrè nyɛ̀ŋɛ̀#ɛ́, Yèésù wà wí fú ŋa ní: Ká wà tsɔ́ éwo-ara-ŋa rere nára-ɔ̀tsɛ̃̀-ɔma-ɛgbɛ́-Fàrísì† ŋa òŋu ti Èróɖì†.

16Kíbí Yèésù wí fú ŋa bɛ́ɛ̀#ɛ́, à kò gbɔ́ òkpì‐ɛ̀, tsí à kpé ara-ŋa dzídzìnyà ti nára-kíbí à kò banɛ́ kpɔ̃́nɔ́ gbà#á. 17Tsí Yèésù ma afɔ̀ yèé ɔmatsɛ́‐ɛ̀ ŋa wà fɔ̀#ɛ́, tsí ó wà bèrè ŋá ní: Kí tse tsí à wà dzinya ara-ŋa ní àŋa kò banɛ́ kpɔ̃́nɔ́ ná? Kò wà yé ŋa wòná niì? Tsí à kò wà gbɔ́ òkpì-iŋɛ́-kã̀ kpókpó wònáà? Ɛ̀ɖɔ̃̀ kã̀ ŋá héŋú. 18-19À nódzú, tsí à kò wà rírã. À nétí, tsí à kò wà gbɔ̃́ɔ̃̀rã̀. À gbàgbé níì? Kíbí òŋu tsɛ́ kpɔ̃́nɔ́ mɛ́ɛrú, tsí ń kpɛ̃́ fú ɔ̀nyà ɛgbɛ̀rú lé nɛ́gbàá ɛgbàá ɔ̀nà méèdzì (5.000), tsí à dzɛ#ɛ́ fee, àbùbɔ̀ yèé bɔ̀ ŋa#á, agbã̀ mɛ́ɛló ó kɔ̃́, tsí à kɛ́ lɔ?

Tsí à ní: Máàméèdzì.

20Tsí ó bèrè ŋá ró ní: Tsí kíbí òŋu tsɛ́ kpɔ̃́nɔ́ méedze gbo, tsí ń kpɛ̃́ fú ɔ̀nyà ɛgbàá ɛgbàá ɔ̀nà méèdzì (4.000), tsí à dzɛ#ɛ́ fee, àbùbɔ̀ yèé bɔ̀ ŋa#á, agbã̀ mɛ́ɛló à kɔ̃́, tsí à kɛ́ lɔ?

Tsí à ní: Méedze.

21Ńbɛ̀ɛ́, ó fɔ̀ ní: Kò wà yé ŋa wònáà?

Yèésù bɔ afɔ́dzú-kã̀ ńǹlú-Bètsàyìɖá

22Tsí à káà tó náàtàkè-ɔ̀nɔ̀ɔ́, tsí à wɔ̀ ńǹlú-Bètsàyìɖá. Ńbɛ̀ɛ́, à gbɛ̃́ afɔ́dzú-kã̀ wá fú Yèésù, tsí wà tsìkálɛ̀ fúu ní: Kó mɔ́wɔ́ lé ńǹtá‐ɛ̀, tsí kó bɔɔ́.

23Tsí Yèésù fa akpá‐ɛ̀, tsí gbɛ̃́ɛ̃ fùɖá ńnɔ́-ìlú#ɛ́. Tsí ó titɔ́ si nódzú fúu, tsí mɔ́wɔ́ lé ńǹtá‐ɛ̀, tsí wà bèrèé ní: Ó wà rí iŋɛ́-kã̀ báàyíì?

24Tsí afɔ́dzú#ɛ́ tsí odzú, tsí wà wí fúu ní: Òŋu wà rí ɔ̀nyà ŋa. Ó ɖi, à wà kíbí egi bɛ́, tsí à wà rɛ̃̀.

25Tsí Yèésù tɔ́ mɔ́wɔ́ bo odzú‐ɛ̀ ró. Kíbí afɔ́dzú#ɛ́ wà wòrã gãgã ró#ɛ́, odzú‐ɛ̀ tsí, tsí ó wà rí iŋɛ́ kpó mà níìkã̀ níìkã̀ ńǹkɛ̀ɛ́. 26Tsí Yèésù ní kó lɔ ńlé‐ɛ̀. Ó ɖi, kó máa sɛ̃̀ wɔ̀ ńǹlú#ɛ́ ró.

Òkúta fɔ ɛnɛ yèé Yèésù dzɛ́#ɛ́ nódzú-ɔ̀nyà kpó

(Màtéwò 16:13-20; Lúkà 9:18-21)

27Ńbɛ̀ɛ́, Yèésù òŋu ɔmatsɛ́‐ɛ̀ ŋa, à ǹɖe, tsí lɔ nɔ́wɔ́-ìlú-Kèsàré ti Fìlíkpò. Kíbí à wà nɔ́ɔ̀nà làkóò#ɛ́, ó wà bèrè ɔmatsɛ́‐ɛ̀ ŋa ní: Afɔ̀ mɛ̀ɛ́ ɔ̀nyà ŋa wà wí ti nára-òŋu ná?

28Tsí à wí fúu ní: Ɔ̀nyà kã̀ŋa ní ó dzɛ́ Yòhánà† Awɛ̀fúnɛ. Ɔ̀nyà kã̀ŋa gbo ní ó dzɛ́ Èlíyà†, agbáfɔ̀-Ɔ̀ɖáyé fɔ̀† yèé gbé wáa lɔ dzɔ̀ɔ́ dzɔ̀ɔ́#ɛ́. Tsí ɔ̀nyà kùbɔ̀ ŋa gbo wà fɔ̀ ró ní agbáfɔ̀-Ɔ̀ɖáyé fɔ̀ ti dzɔ̀ɔ́ dzɔ̀ɔ́ òmírɛ̃̀-kã̀ ní ó dzɛ́#ɛ́.

29Tsí ó sɛ̃̀ wà bèrè ŋá ró ní: Tsí nódzú tàŋa òŋu fe, nɛ̀ɛ́ òŋu dzɛ́?

Ńbɛ̀ɛ́, Òkúta tsí arũ, tsí dzɔ́ŋù fúu ní: Òŋu ní dzɛ́ Kírísítò Agbanɛlà yèé Ɔ̀ɖáyé tsã̀, tsí bɛ̀ wá#á.

30Tsí Yèésù fɔ̀, tsí le oŋù si ńǹtá‐ɛ̀ fú ŋa ní ɔ̀kã̀-ŋa-kã̀ kpókpó kó máa wíi fú ɔ̀nyà-kã̀ oo.

Yèésù ní òŋu nákó kú, tsí sɛ̃̀ dzí ti náàŋírĩ-òkú ŋa wá náyé

(Màtéwò 16:21-28; Lúkà 9:22)

31Ńbɛ̀ɛ́, Yèésù kpé ɛ̀kɔ́ tsítse fú ɔmatsɛ́‐ɛ̀ ŋa ní: Ó wà ní òŋu Ɛnɛ yèé ɔ̀nyà bí#ɛ́†, òŋu kó réré kpíkpɔ̀, tsí onùgbó-ìlú ŋa òŋu onùgbó-atsɛbɔ-Ɔ̀ɖáyé† ŋa má nára-akɔ́nɛ nɛ́kpa-Ɔ̀ɖáyé† ŋa ká kɔ afɔ̀-òŋu, tsí sɔ́ òŋu fú ikú, tsí ká kpa òŋu, tsí ɔdzɔ́ mɛ́ɛta náànyì-bɛ́ɛ̀, òŋu nákó sɛ̃̀ dzí ti náàŋírĩ-òkú ŋa wá náyé.

32Afɔ̀ yèé bɛ́#ɛ́, Yèésù wíi fú ŋa gãgã náàrìmáa kpewé bòó. Ńbɛ̀ɛ́, Òkúta kpèé si nákpálà-kã̀, tsí wà báa fɔ̀. 33Tsí Yèésù nyí, tsí wo ɔmatsɛ́‐ɛ̀ ŋa, tsí wà bá Òkúta fɔ̀ ní: Kó sɔ́ ǹɖe nódzú fú òŋu. Ètsù† olí-Ètsù! Ìsérè yèé wà fúu#ɛ́, kò tsi ìsérè ti Ɔ̀ɖáyé ni, ìsérè ti ɔ̀nyà ni.

34Tsí Yèésù kpe ɔmatsɛ́‐ɛ̀ ŋa òŋu èrò#ɛ́, tsí wà wí fú ŋa ní: Bí ɔ̀nyà-kã̀ wà wo kó tɛ̀ náànyì-òŋu, ɛnɛ nyɛ̀ŋɛ̀ kó máa nyíwo ara‐ɛ̀. Kó kɛ́ egi-ìɖáàgàlàdzà†‐ɛ̀ rù, tsí kó tɛ̀ náànyì-òŋu. 35Ó ɖi fee, ɛnɛ yèé wà wò ní òŋu kó gba ara-òŋu là#á, ɛnɛ nyɛ̀ŋɛ̀ nákó tsɛ̀rá. Tsí ɛnɛ yèé mú ikú‐ɛ̀ tà náàtsùgbé-òŋu nàmí náàtsùgbée kíbí ó wà dzíkɔ̀-òŋu#ɛ́, ɛnɛ nyɛ̀ŋɛ̀ nákó rí ɔlà. 36Ó ɖi, bí ɔ̀nyà-kã̀ ɖìgírí títí, tsí iŋɛ́-ayé gbaŋgba ŋa#á kpó dzɛ́ tɛ̀ɛ̀, tsí òŋu ká‐ɛ̀ mú éwo sã fe, èrè mɛ̀ɛ́ wà ńnɛ̀ fúu? 37Kí ɔ̀nyà nákó nyáa kɛ́, tsí ń kparɔ àyɛ̀‐ɛ̀? 38Ɔma-ìsɛ̃̀ɛ̃́ ŋa#á, à bɔ̀ si fú íbàɖí tsítse, tsí à kò wà tɛ̀ náànyì-Ɔ̀ɖáyé òŋu òtítɔ́. Ó ɖi, bí ɔ̀nyà-kã̀ wà, tsí iŋɛ́-òŋu òŋu afɔ̀-òŋu ŋa gbo wà tsanɔ́ fúu nódzú-ɔma-ìsɛ̃̀ɛ̃́ ŋa#á, òŋu, Ɛnɛ yèé ɔ̀nyà bí#ɛ́ gbo, nɔ́dzɔ́ yèé òŋu nákó ti nɔ́ɔ̀rɔ̃ wá#á, iŋɛ́-ɛnɛ nyɛ̀ŋɛ̀ nákó tsanɔ́ fú òŋu. Nɔ́dzɔ́ nyɛ̀ŋɛ̀#ɛ́, òŋu nákó wá òŋu adzítsɛ́-ɔ̀rɔ̃† ŋa, tsí iyì-Boba-òŋu nákó wà ńǹtá-òŋu si.

Đang chọn:

Mákò 8: ngl

Tô màu

Sao chép

So sánh

Chia sẻ