Mákò 7
7
Yèésù wà wíìnyɛ̀ ti nára-ɛ̀kɔ́-gbágbóǹgbàgbò ŋa
(Màtéwò 15:1-9)
1Ó ɖi nɔ́dzɔ́-kã̀, tsí ɔma-ɛgbɛ́-Fàrísì† kã̀ŋa òŋu akɔ́nɛ nɛ́kpa-Ɔ̀ɖáyé† kã̀ŋa, à ti ńYèrúsàlɛ́mì, tsí wáa kpàɖé ńɖi-Yèésù. 2Tsí à rí ní ɔmatsɛ́‐ɛ̀ kã̀ŋa wà dzɛŋɛ́, tsí à kò wɛ ɔwɔ́ kíbí ó wà nórò tiŋa gbà#á. Tsí à ní ɔwɔ́-ŋa kò má nódzú-Ɔ̀ɖáyé.
3Ìɖéǹɖè#ɛ́, ɔma-ɛgbɛ́-Fàrísì ŋa òŋu ɔma-Ìyúɖà†-àtíbɔ̀ ŋa, orò kpíkpɔ̀ wà fú ŋa, tsí à náa tse si ńǹtá‐ɛ̀, àtsùgbée ká má nódzú-Ɔ̀ɖáyé. Orò-gbágbóǹgbàgbò ŋa ni. À kà bòkó dzɛŋɛ́, tsí ká máa wɛ ɔwɔ́ nɛ́kpa nɛ́kpa, 4tsí bí à bɔ̀ ti nádzà wá, à kà dzɛŋɛ́ náàrìmáa mɔ́wɔ́ bɔ̀ nómi. À náa tse si ńǹtá-orò kpíkpɔ̀ òmírɛ̃̀ ŋa gbo ró, kíbí kɔ̃́ŋúkɔ̃́ŋú wíwɛ̀, kòlòbí òŋu ìkòkò-irɛ̃ wíwɛ̀ bɛ́.
5Ńbɛ̀ɛ́, ɔma-ɛgbɛ́-Fàrísì ŋa òŋu akɔ́nɛ nɛ́kpa-Ɔ̀ɖáyé ŋa yèé wá ńɖi-Yèésù#ɛ́ wà fɔ̀ fúu ní: Kí tse tsí ɔmatsɛ́‐ɛ̀ ŋa kò wà tse si ńǹtá-orò-gbágbóǹgbàgbò ŋa, tsí à náa wà dzɛŋɛ́ náàrìmáa wɔwɔ́ ná?
6Tsí ó wà dzɔ́ŋù fú ŋa ní: Afɔ̀-Yèsáyà† agbáfɔ̀-Ɔ̀ɖáyé fɔ̀†, ó dzàre ìɖéǹɖè kíbí ó gbɔ́ afɔ̀-Ɔ̀ɖáyé fɔ̀ ti nára-ŋɛ́, ɛ̀ŋɛ ɔ̀nyà-atsendzɔdzú ŋa#á. Ó kɔ si ńǹwé‐ɛ̀ ní:
“Ɔ̀nyà yèé ŋa nyí wà nyɛ òŋu Ɔ̀ɖáyé nákpo bɛ́ gé ni.
Ó ɖi, ìsérè-ŋa kò wà bá òŋu.
7À wà tse nyɛ̀ŋɛ̀ nákpo gé ní àŋa wà sɛ̃ òŋu ni.
Iŋɛ́ yèé tse#ɛ́, orò yèé ɔ̀nyà ɖá#á,
à náa múu kpe ɛkpa-Ɔ̀ɖáyé†,
tsí wà ń tsɛ̀kɔ́ fú ɔ̀nyà ŋa.”#7:7 Ìwé-Yèsáyà 29:13 (Ésaïe 29:13)
8Òtítɔ́ ní Yèsáyà fɔ̀#ɛ́. È náa kɔ ɛkpa-Ɔ̀ɖáyé dzɔ̀ɔ́, tsí è náa wà rɛ̃̀ si nɛ́kpa-ɔ̀nyà ŋa.
9Tsí ó wí fú ŋa ró ní: Ká rí kíbí à wà kɔ ɛkpa-Ɔ̀ɖáyé dzɔ̀ɔ́ tó gé, àtsùgbée ká tse si ńǹtá-orò tàŋa ká-àŋa#á. 10Fee, Mɔ̀ɔ́sè† fɔ̀ si ńǹwé‐ɛ̀ ní:
“Nɛ́ àrísá fú boba-ɛ̀ɛ òŋu ìnà-ɛ̀ɛ méèdzì.”
Tsí ó fɔ̀ gbo ró ní:
“Ɛnɛ yèé ré fú boba‐ɛ̀ nàmí ìná‐ɛ̀#ɛ́, ká kpaá nóòkú.”#7:10 Ìwé-Fúfùɖá 20:12, 21:17, Ìwé-Àkóro 5:16 (Exode 20:12, 21:17, Deutéronome 5:16)
11Ó ɖi àŋa òŋu, à náa tsɛ̀kɔ́ fú ɔ̀nyà ŋa ní: Bí ɔ̀nyà-kã̀ fɔ̀ fú boba‐ɛ̀ nàmí ìná‐ɛ̀ ní iŋɛ́ yèé òŋu má fúu#ɛ́, òŋu ń tsɔ̀yà fú Ɔ̀ɖáyé, ó sã̀. 12Tsí à náa gbà si ńǹtá‐ɛ̀ fú ɛnɛ nyɛ̀ŋɛ̀ ní kò kpã́dzú ní kó banɛ́ boba‐ɛ̀ nàmí ìná‐ɛ̀ ró. 13Bí à wà tse bɛ́ɛ̀#ɛ́, à wà kɛ́ orò-gbágbóǹgbàgbò ŋa, yèé à wà tsɛ̀kɔ́-ɛ̀ fú ɔ̀nyà ŋa#á, tsí wà ń nɔ afɔ̀-Ɔ̀ɖáyé ńnɛ̀ɛ́. Tsí à náa tse iŋɛ́ kpíkpɔ̀ ìrɔ́-òmírɛ̃̀ bɛ́ɛ̀ gìɖì ró.
Kí náa múnɛ gbɛ̃ɛ̃́rĩ́ nódzú-Ɔ̀ɖáyé?
(Màtéwò 15:10-20)
14Tsí Yèésù nyí, tsí kpe ɛnɛ yèé kpérí si ŋa#á, tsí ó wà wí fú ŋa ní: Àŋa kpó ká rɛ̃tígbè-òŋu rere, tsí ká gbɔ́ òkpì-afɔ̀ yèé bɛ́. 15Iŋɛ́ ɔ̀kã̀lɔ́ɔ̀kã̀ yèé ɔ̀nyà nákó nyáa ń bɔ̀ nárũ, tsí dzɛ#ɛ́, kà múnɛ gbɛ̃ɛ̃́rĩ́ nódzú-Ɔ̀ɖáyé. Iŋɛ́ yèé náa ti ńǹsérè-ɔ̀nyà#á ní náa gbɛ̃ɛ̃́rĩ́‐ɛ̀ nódzú-Ɔ̀ɖáyé#ɛ́. [ 16Ó ɖi, ɛnɛ yèé nɛ́ etí-ìgbɔ̃́ɔ̃̀rã̀#á, kó máa ń tsoɖi.]
17Kíbí ó wí afɔ̀ nyɛ̀ŋɛ̀ tã́#á, ó ǹɖe ńɖi-ŋa, tsí wɔlé lɔ. Tsí ɔmatsɛ́‐ɛ̀ ŋa wà bèrèé ní kó nyàkpì-òwe yèé ó kpa ńǹsɛ̃̀ɛ̃́ fú àŋa, tsí àŋa kó gbɔ́. 18Tsí ó ní: Àŋa gbo, ìrã̀ã́mà kò tó ŋa niì? À kò mà ní iŋɛ́ yèé náa lɔ nárũ-ɔ̀nyà#á, ɔ̀kã̀‐ɛ̀ kpókpó kàkó nyáa múu gbɛ̃ɛ̃́rĩ́ nódzú-Ɔ̀ɖáyéè? 19Iŋɛ́ yèé tse#ɛ́, iŋɛ́ yèé ɔ̀nyà náa dzɛ#ɛ́ kà lɔ ńǹsérè‐ɛ̀. Ńnɔ́‐ɛ̀ ní náa lɔ#ɛ́, tsí náa wáa lɔ káà yàá ɖà náàgbótsu.
Kíbí Yèésù wí fú ŋa bɛ́ɛ̀#ɛ́, ó wà nyà ɖíre fú ŋa ní dzídzɛ-kã̀ kpókpó kà múnɛ gbɛ̃ɛ̃́rĩ́ nódzú-Ɔ̀ɖáyé.
20Tsí ó sɛ̃̀ wí fú ŋa ró ní: Iŋɛ́ yèé náa ti ńǹsérè-nɛ#ɛ́, òŋu ní náa múnɛ gbɛ̃ɛ̃́rĩ́ nódzú-Ɔ̀ɖáyé#ɛ́. 21Iŋɛ́ yèé tse#ɛ́, ńnɔ́-ɔ̀nyà, ńǹsérè-ɔ̀nyà gìɖì ní ìsérè-íbàɖí ŋa náa ti#ɛ́, tsí à náa sɔ́nɛ ní ká tse àlòwá, ká tsolè gbo, ká kpanɛ nóòkú gbo, 22ká gbaya gbo, ká gbɔkɔ gbo, odzú-nɛ kó kí ńǹtá-iŋɛ́-nɛ gbo, ká yàábàɖí gbo, ká rúnɛ gbo, ká tse wérewère gbo, ká dzowú-nɛ gbo, ká kpe ɛ́kɔ-nɛ gbo, ká kɛ́ ara-nɛ gbo, ká dzɛ́ àɖàlɛ̀ gbo. 23Iŋɛ́-íbàɖí nyɛ̀ŋɛ̀ ŋa kpó#ɛ́, ńǹsérè-ɔ̀nyà ní à náa ti#ɛ́, tsí à náa múnɛ gbɛ̃ɛ̃́rĩ́ nódzú-Ɔ̀ɖáyé.
Ɔnɔbɛ̃̀ɛ̃-ìlú-àledzò-kã̀ gba Yèésù gbɔ́
(Màtéwò 15:21-28)
24Náànyì-bɛ́ɛ̀#ɛ́, Yèésù ǹɖe ńlɛ̀-ɔma-Ìyúɖà† ŋa, tsí lɔ nɔ́wɔ́-ìlú-Tíre. Tsí ó tó ńǹlú-kã̀, tsí káà gbé ńkpàtá-kã̀ bɛ̀. Kò wà wò ní ká mà ní òŋu wà bɛ̀, tsí kàkó sì nyáa mú ara‐ɛ̀ ɖúkù gbo. 25Ɔnɔbɛ̃̀ɛ̃-kã̀ wà ńǹlú#ɛ́ bɛ̀, tsí edzò†-kã̀ wà ɖɔ́kpɔ fú ɔma‐ɛ̀ ɔnɔbɛ̃̀ɛ̃. Gbòkã́#á, ó ti gbɔ́ ní Yèésù wà bɛ̀, tsí ó lɔ káà kálɛ̀ nábɛ́‐ɛ̀, 26tsí ó wà tsìkálɛ̀ fúu ní: Kó wáa lé edzò#ɛ́ sɛ̃̀ náànyì-ɔma-òŋu ɖé.
Ɔnɔbɛ̃̀ɛ̃#ɛ́, kò tsi ɔma-Ìyúɖà ŋa ni. Ó ti nérè-Fènísì ńlɛ̀-Sìrí.
27Ńbɛ̀ɛ́, Yèésù wà wíi fúu ní: Kó dzɔ̀ɔ́, tsí ɔma ŋa kó dzɛŋɛ́ tã́ná. Ó ɖi, kò sã̀ ní ká kɛ́ dzídzɛ yèé ɔma ŋa nákó dzɛ#ɛ́, tsí ń sɔ fú adzá ŋa.
28Tsí ɔnɔbɛ̃̀ɛ̃#ɛ́ dzɔ́ŋù fúu ní: Ɔ̀gá! Òtítɔ́ ni. Ó ɖi fee, adzá ŋa náa wà nábɛ́-kpɔ̃rɔ̃ si, tsí àbùbɔ̀ yèé náa bɔ́ taánù nɔ́wɔ́-ɔma ŋa#á, à náa kɛ́ ŋa dzɛ.
29Tsí Yèésù wà wí fúu ní: Kíbí ó wíìnyɛ̀ rere bɛ́ɛ̀#ɛ́, kó sɛ̃̀ lɔ ńlé‐ɛ̀. Ó ɖi, edzò#ɛ́ sɛ̃̀ náànyì-ɔma‐ɛ̀ ná.
30Ńbɛ̀ɛ́, ó sɛ̃̀ lɔ. Títí kó tó ńlé#ɛ́, ó rí ɔma‐ɛ̀, tsí ó sũ̀ si nání. Edzò#ɛ́ ti sɛ̃̀ náànyì‐ɛ̀.
Ɔ̀nyà-kã̀ dzɛ́ aɖetí, tsí dzɛ́ mùnù gbo, tsí Yèésù bɔɔ́
31Náànyì-bɛ́ɛ̀#ɛ́, Yèésù wáa ǹɖe nérè-Tíre. Ó gbà ńǹlú-Sìɖɔ̃́nì, tsí sɛ̃̀ wá nóɖò tsítsédzú tɛ̀ŋgɛ̀lɛ̀ɛ̀#ɛ́ ńlɛ̀-Gàlìlé. Ó lɔ nákpálà-oɖò#ɛ́ ńbí à náa kpè ní erè-Ìlú Maá#á. 32Kíbí ó tó nétíɖò#ɛ́, à kɛ́ aɖetí-kã̀ wá fúu. Ɛnɛ nyɛ̀ŋɛ̀ kà nyáa wíìnyɛ̀ rere gbo. Tsí à tsìkálɛ̀ fúu ní kó mɔ́wɔ́ lé ńǹtá‐ɛ̀, tsí kó bɔɔ́. 33Ńbɛ̀ɛ́, ó gbɛ̃́ɛ̃ ǹɖe náàŋírĩ-ɔ̀nyà ŋa, tsí à bɔ àŋa méèdzì. Tsí ó mú ɔmalɔ́wɔ́ bɔ̀ nétí‐ɛ̀ ŋa, tsí titɔ́, tsí ń kã iŋá‐ɛ̀, 34tsí kɛ́ odzú lɔ ńǹgbèrí, tsí mí kãlɛ̀, tsí ó wà wí ńǹlú-ŋa ní: Èfàtà. Òkpì‐ɛ̀ ní dzɛ́ ní: “Etí#ɛ́ kó tsí.”
35Gbòkã́#á, etí‐ɛ̀ tsí, tsí oŋù‐ɛ̀ gbo tsí, tsí ó kpé ìnyɛ̀ wíwí rere. 36Ɛnɛ yèé wà bɛ̀ ŋa kpó, tsí rí iŋɛ́ ŋa#á kpó#ɛ́, Yèésù kɔ̀ fú ŋa kpó ní: Ká máa wíi fú ɔ̀nyà-kã̀ kpókpó. Ó ɖi, kíbí ó wà kɔ̀ fú ŋa#á, àríkɛ̀ɛ́ gìɖì à wà kpɛ̀rɔ́‐ɛ̀ wérí lárè ńnɛ̀ɛ́. 37Ńbɛ̀ɛ́, ó tsàlá fú ɔ̀nyà kpó. Tsí à wà fɔ̀ ní: Náa tse iŋɛ́-ire gé ni. Náa tse tsí aɖetí ŋa náa gbɔ̃́ɔ̃̀rã̀, tsí mùnù ŋa gbo náa wíìnyɛ̀. Iŋɛ́-ire gé ní náa tse#ɛ́.
Đang chọn:
Mákò 7: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
