Yòhánà 21
21
Yèésù nya ara‐ɛ̀ ɖíre fú ɔmatsɛ́‐ɛ̀ méedze nétíɖò-Tìbèríyà
1Náànyì-bɛ́ɛ̀ ró#ɛ́, Yèésù tɔ́ nya ara‐ɛ̀ ɖíre fú ɔmatsɛ́‐ɛ̀ ŋa ró. Ó nya ara‐ɛ̀ ɖíre fú ŋa nétíɖò-Tìbèríyà. Bí ó nya ara‐ɛ̀ ɖíre fú ŋa gbà fáà? 2Náàsòkò nyɛ̀ŋɛ̀#ɛ́, Sìmɔ́nì Òkúta òŋu Tòmá yèé dzɛ́ èdzìrɛ́#ɛ́ má nára-Nàtànàyɛ́lì yèé ti ńǹlú-Kánà nérè-Gàlìlé#ɛ́ gbo, ɔma-Sèbèɖé méèdzì ŋa#á gbo, ɔmatsɛ́-Yèésù† méèdzì òmírɛ̃̀ kã̀ŋa gbo, à wà má náàdzɔ́ si. 3Tsí Sìmɔ́nì Òkúta wà wí fú ŋa ní: Òŋu làkóò káà mú ɛdzã.
Tsí ɛnɛ-àtíbɔ̀ ŋa gbo ní: Àŋa nákó lɔ báa.
Ńbɛ̀ɛ́, à ǹɖe, tsí wɔ̀ nɔ́kɔ̃̀-odzómi-kã̀, tsí lɔ. À gbé bɛ̀ nóoru#ɛ́ títí à kò mú iŋɛ́-kã̀ kpókpó. 4Kíbí ilɛ̀ má tã́#á, Yèésù wáa ɖóro nétíɖò#ɛ́ si, tsí ɔmatsɛ́‐ɛ̀ ŋa kò ríi mà. 5Tsí Yèésù wà bèrè ŋá ní: Ɔmɔ̀tsɔ́ ŋa, è kè rí ɛdzãà?
Tsí à ní: Òò, àŋa kò rí iŋɛ́-kã̀.
6Tsí ó wí fú ŋa ní: Ká ɖa ɔ̀ɖɔ̀ɔ́-ŋa si náàwóòtã́-ɔkɔ̃̀-odzómi#ɛ́. Ó ɖi, à nákó mú ɛdzã bɛ̀.
Ńbɛ̀ɛ́, à sɔɔ́ si bɛ̀ gé, tsí à kò nyáa fàá ró. Ɛdzã ní kɔ̃́ɔ̃ bɛ́ɛ̀#ɛ́. 7Ńbɛ̀ɛ́, ɔmatsɛ́-Yèésù†-kã̀, àrínódzú‐ɛ̀, wà wí fú Òkúta ní: Ɔlá-wa ni dza!
Kíbí Sìmɔ́nì Òkúta gbɔ́ ní Ɔlá-àŋa ni#ɛ́, ó fa ɖíɖì-àwù‐ɛ̀ so, iŋɛ́ yèé tse#ɛ́, kò wɔ ɔ̀kã̀ lárè bɛ́ɛ̀ ró, tsí ó fò si nómi#ɛ́, tsí lɔ ńɖɔ̀‐ɛ̀. 8Tsí ɔmatsɛ́-àtíbɔ̀ ŋa#á, à wà tu ɔkɔ̃̀-odzómi#ɛ́, tsí wà fa ɔ̀ɖɔ̀ɔ́#ɛ́ bàa títí wáa tó. Ńǹwèrè nyɛ̀ŋɛ̀#ɛ́, à kò dzɛ̃̀ òŋu àtàkè. Àtàkè#ɛ́ wà fú ŋa kíbí akpá ɔgɔ́ɔrú bɛ́ ni. 9Kíbí à tó náàtàkè, tsí à tì si ńlɛ̀#ɛ́, à rí iná-ɛnyɛ́-kã̀, tsí ɛdzã wà ńǹtá‐ɛ̀ si. Tsí kpɔ̃́nɔ́ kã̀ŋa gbo wà gbèé si.
10Tsí Yèésù wà wí fú ŋa ní: Ká mú ɛdzã kã̀ŋa náàŋírĩ-ɛdzã yèé à mú#ɛ́ wá.
11Ńbɛ̀ɛ́, Sìmɔ́nì Òkúta fò si nɔ́kɔ̃̀#ɛ́, tsí ɔ̀ɖɔ̀ɔ́ yèé ɛdzã kɔ̃́ si ɖíɖíɖí#ɛ́, ó fàá sɔ ńlɛ̀. Ɛdzã lákṹ lákṹ méedze ɖí nɔ́gɔ́ɔdzɔ (153) ní wà ńnɛ̀#ɛ́. Tsí kíbí ó dzɛ́ gìɖì ní ɛdzã#á kpɔ̀ tó bɛ́ɛ̀#ɛ́, ɔ̀ɖɔ̀ɔ́#ɛ́ kò ya. 12Tsí Yèésù wà wí fú ŋa ní: Ká wáa dzɛŋɛ́.
Ɔ̀nyà-kã̀ kpókpó náàŋírĩ-ɔmatsɛ́ ŋa#á kò ɖɔ́ɔ̀rɔ̀-ɛ̀ sɔ ní òŋu kó bèrèé ní nɛ̀ɛ́ ó dzɛ́. À ti mà ní Ɔlá-àŋa ni. 13Ńbɛ̀ɛ́, Yèésù lɔ káà kɛ́ kpɔ̃́nɔ́#ɛ́, tsí kpɛ̃́ɛ̃ fú ŋa, tsí kpɛ̃́ ɛdzã#á gbo fú ŋa.
14Ó ɖi oláànkɛ́ɛta‐ɛ̀ ní Yèésù wà nya ara‐ɛ̀ ɖíre fú ɔmatsɛ́‐ɛ̀ ŋa kíbí ó dzí ti náàŋírĩ-òkú ŋa wá náyé#ɛ́.
Yèésù fa Òkúta tamá-ara‐ɛ̀ ró
15Kíbí à dzɛŋɛ́ tã́#á, Yèésù kpe Sìmɔ́nì Òkúta, tsí wà bèrèé ní: Sìmɔ́nì, ɔma-Yòhánà†, ò nɛ́ àmúɖɔ̃̀ fú mi láre ɛnɛ-àtíbɔ̀ ŋaà?
Tsí Òkúta ní: Ɛ̃ɛ̃, Ɔlá-mi, ò mà ní ǹ nɛ́ àmúɖɔ̃̀ fɛ́ɛ nɔ̀!
Tsí Yèésù wí fúu ní: Kó ró àgùɖã̀-òŋu ŋa fú òŋu rere. 16Tsí ó tɔ́ kpèé nóláànkéèdzì‐ɛ̀ ró, tsí wà bèrèé ní: Sìmɔ́nì, ɔma-Yòhánà, ò nɛ́ àmúɖɔ̃̀ fú miì?
Tsí Òkúta ní: Ɛ̃ɛ̃, Ɔlá-mi, ò mà ní ǹ nɛ́ àmúɖɔ̃̀ fɛ́ɛ nɔ̀!
Tsí Yèésù wí fúu ní: Kó ró àgùɖã̀-òŋu ŋa fú òŋu rere.
17Tsí Yèésù tɔ́ sɛ̃̀ kpèé nóláànkɛ́ɛta ró, tsí wà bèrèé ní: Sìmɔ́nì, ɔma-Yòhánà, ò nɛ́ àmúɖɔ̃̀ fú miì?
Ńbɛ̀ɛ́, Òkúta kí kpòlóó, iŋɛ́ yèé tse#ɛ́, gbà mɛ́ɛta kpó ní Yèésù wà bèrèé ní ó nɛ́ àmúɖɔ̃̀ fú òŋu#ɛ́ɛ̀? Tsí ó wà wí fú Yèésù ní: Ɔlá-mi, ò ma iŋɛ́ ɔ̀kã̀lɔ́ɔ̀kã̀ kpó nɔ̀! Ò mà ní ǹ nɛ́ àmúɖɔ̃̀ fɛ́ɛ nɔ̀!
Tsí Yèésù wí fúu ní: Kó ró àgùɖã̀-òŋu ŋa fú òŋu rere. 18Ó ɖi, òŋu wà wí òtítɔ́ fúu ní fee, ńǹwèrè yèé ó wà nɔ́mɔ̀tsɔ́ si#ɛ́, òŋu ká‐ɛ̀ náa mú ɖíɖì‐ɛ̀ ɖì, tsí lɔ ńbí wùú#ɛ́. Ó ɖi, bí ó wáa gbó tã́, nákó kɛ́ akpá lɔ ńǹgbèrí, tsí olòmírɛ̃̀ nákó mú ɖíɖì‐ɛ̀ ɖì fúu, tsí fàá lɔ ńbí kò wà wo kó lɔ#ɛ́.
19Ó wí afɔ̀ yèé, tsí wà ń nya ìrɔ́-ikú yèé Òkúta bòkó wáa kú, tsí ń nyɛ Ɔ̀ɖáyé#ɛ́ ɖíre ni. Kíbí ó wí bɛ́ɛ̀ tã́#á, ó wí fú Òkúta ní: Kó tɛ̀ náànyì-òŋu.
20Kíbí à làkóò#ɛ́, Òkúta nyíwo ànyì, tsí ó rí ɔmatsɛ́-Yèésù†-kã̀, àrínódzú‐ɛ̀, ɛnɛ yèé mú arũ sɔ́má-Yèésù, tsí wà bèrèé ní: “Ɔlá-wa, nɛ̀ɛ́ dzɛ́ ɛnɛ yèé bòkó tàɛ́ ná#á?” 21Kíbí Òkúta ríi#ɛ́, ó wà bere Yèésù ní: Ɔlá-mi, ɛnɛ yèé òŋu fe, bí nákó wáa lɔ fú òŋu gbà fáà?
22Tsí Yèésù wà wí fúu ní: Bí òŋu wò ní kó wà náàyɛ̀ si títí òŋu kó sɛ̃̀ wá fee, yèésí tsɛdzɔ́‐ɛ̀? Tɛ̀ɛ̀ ní dzɛ́ kó tɛ̀ náànyì-òŋu#ɛ́.
23Àtsùgbé-afɔ̀ nyɛ̀ŋɛ̀#ɛ́, atɛ̀náànyì-Yèésù ŋa gbɔ́ɔ wérí kpó ní ɔmatsɛ́‐ɛ̀ nyɛ̀ŋɛ̀#ɛ́ kàkó kú láyé. Nóòtítɔ́#ɛ́, Yèésù kò fɔ̀ ní kàkó kú láyé. Ó ní: Bí òŋu wò ní kó wà náàyɛ̀ si títí òŋu kó sɛ̃̀ wá fee, yèésí tsɛdzɔ́‐ɛ̀?
24Ɔmatsɛ́ yèé à wà bá fɔ̀#ɛ́, òŋu ní kpɛ̀rɔ́-iŋɛ́ ŋa#á, tsí kɔɔ́ si ńǹwé gbo#ɛ́. Tsí àa mà ní afɔ̀‐ɛ̀ ŋa, òtítɔ́ ní náa dzɛ́#ɛ́. 25Yèésù tse iŋɛ́ kpíkpɔ̀ òmírɛ̃̀ láre yèé à kɔ si bí ŋa#á. Bí à ní ká kɔ ŋá kpó nɛ́kpa nɛ́kpa si ńǹwé, ìwé yèé à nákó kɔ ŋa#á, ńǹsérè tèmi, à nákó kɔ̃́ ayé#ɛ́ bɔ̀.
Đang chọn:
Yòhánà 21: ngl
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© (Active), Wycliffe Bible Translators, Inc. All rights reserved.
