یوهَنّا 21
21
ایسّا هپت مُریدئے دێما زاهرَ بیت
1اے چیزّان و رَند، تِبِریَهئے مَزَنگوَرمئے لَمبا#21:1 لَمب، بزان دامن، کِرّ.، پدا ایسّایا وتا مُریدانی دێما زاهر کرت. آییئے زاهر بئیگ اے ڈئولا اَت: 2شَمونپِتْرُس و توما که آییئے دومی نام دیدیموس اَت و نَتْناییل که چه جَلیلئے مێتگ کانایا اَت و زِبْدیئے چُکّ و دگه دو مُرید یکجاه اَتنت. 3شَمونپِتْرُسا گۆن آیان گوَشت: ”من ماهیگیریا رئوان.“ آیان گوَشت: ”ما هم کاێن گۆن.“ گڑا در آتکنت و بۆجیگا سوار بوتنت، بله آ شپا هچِّش نگپت.
4سَباه که بوت، ایسّا گوَرمئے لَمبا اۆشتاتگاَت، بله مُریدان پَجّاه نئیاورت. 5ایسّایا گۆن آیان گوَشت: ”چُکّان! شمارا ماهیگ گۆن نێست؟“ آیان پَسّئو دات: ”نه.“ 6گوَشتی: ”داما بۆجیگئے راستێن نێمگا دئور دئیێت، اۆدا ماهیگ درَ کئیت.“ آیان اَنچُش کرت و همینکدر ماهیگِش گپت که دامِش دێم په بۆجیگا کَشّت نکرت.
7گڑا هما مُرید که ایسّایا باز دۆست اَت، آییا گۆن پِتْرُسا گوَشت: ”اے هُداوند اِنت!“ شَمونپِتْرُس جاندر اَت. وهدے اے هبری اِشکت، وتی کباهی گوَرا کرت و آپا دئوری کرت. 8آ دگه مُرید بۆجیگا سوار، هُشکیئے نێمگا آتکنت و چه ماهیگا پُرّێن دامِش کَشّان کرت، چێا که چه هُشکیا سَد گاما#21:8 اَسلیگێن یونانی نبشتانکَ گوَشیت: ”دو سَد دست“. یکّ دستے نێم میتر اِنت. یکّ گامے یکّ میتر اِنت. دورتر نهاتنت.
9وهدے هُشکیا رستنت، چه بۆجیگا اێر آتکنت. رۆکێن اِشکرِش دیست و اِشکرانی سرا ماهیگ اێر اَت. نگن هم هستاَت. 10ایسّایا گۆن آیان گوَشت: ”چه همے ماهیگان کَمُّکے بیارێت که انّون شما گپتگاَنت.“ 11شَمونپِتْرُس بۆجیگا شت و دامی دێم په هُشکیا کَشّت. دام چه ماهیگا پُرّ اَت، یکّ سَد و پنجاه و سئے مزنێن ماهیگی مان اَت، بله ماهیگان دام ندِرتگاَت. 12ایسّایا گوَشت: ”بیاێت ناشتا کنێت!“ چه مُریدان یکّێا هم جُرَت نکرت که چه ایسّایا جُست بگیپت: ”تئو کئے ائے؟“ آیان زانت که اے هُداوند اِنت. 13گڑا ایسّا آتک، نگنی زرت و آیانا داتی، همے ڈئولا ماهیگی هم بهر کرتنت. 14چه وتی جاه جنَگا پد، اے سئیمی رَند اَت که ایسّا مُریدانی دێما زاهر بوت.
ایسّا و پِتْرُس
15ناشتها رند، ایسّایا گۆن شَمونپِتْرُسا گوَشت: ”او شَمون، یوهَنّائے چُکّ! اینچُک که اے منا دۆستَ دارنت، تئو منا گێشتر دۆستَ دارئے؟“ پِتْرُسا گوَشت: ”جی هئو، او هُداوند! تئو زانئے که من ترا دۆستَ داران.“ ایسّایا گوَشت: ”گڑا منی گوَرگان#21:15 گوَرَگ، بزان کسانُکێن اِسپێتپَس، گوَرک. بچارێن.“ 16دومی رَندا گوَشتی: ”او شَمون، یوهَنّائے چُکّ! بارێن، منا دۆستَ دارئے؟“ پِتْرُسا گوَشت: ”جی هئو، او هُداوند! تئو زانئے که تئو منا دۆست ائے.“ ایسّایا گوَشت: ”گڑا منی پَسانی دلگۆشا بدار.“ 17سئیمی برا گوَشتی: ”او شَمون، یوهَنّائے چُکّ! بارێن، منا دۆستَ دارئے؟“ ایسّایا که سئیمی برا جُست کرت که منا دۆستَ دارئے، پِتْرُس گمیگ بوت. گوَشتی: ”او هُداوند! تئو هر چیزَّ زانئے، تئو زانئے که من ترا دۆستَ داران.“ ایسّایا گوَشت: ”گڑا منی پَسان بچارێن. 18ترا راستێنَ گوَشان، وهدے تئو وَرنا اَتئے، تئو سْرێن بستگاَت و هر جاه که لۆٹت، شتئے. بله وهدے پیرَ بئے، دستان پَچَ کنئے و دگرے تئیی سْرێنا بندیت و ترا اَنچێن جاهے بارت که اۆدا رئوگَ نلۆٹئے.“ 19گۆن اے هبران، ایسّایا پِتْرُسئے مَرکئے نێمگا اِشاره کرت، که پِتْرُس چۆنَ مریت و هُدائے شان و شئوکتا زاهرَ کنت. پدا گوَشتی: ”منی رَندگیریا بکن.“
20پِتْرُسا چپّ و چاگرد چارِت و دیستی که هما مُرید که ایسّایا باز دۆست اِنت چه پُشتا پێداک اِنت، هما که شامئے وهدا ایسّائے نزّیکّترا کِنزتگاَت و چه آییا جُستی کرتگاَت: ”او هُداوند! کئے ترا دْرۆهیت و دژمنانی دستا دنت؟“ 21وهدے پِتْرُسئے چمّ په آ مُریدا کپتنت، چه ایسّایا جُستی کرت: ”او هُداوند! اِشیئے آسر و آکبت چے بیت؟“ 22ایسّایا گوَشت: ”اگن منی رَزا همے ببیت که اے تان منی آیگئے وهدا زندگ بمانیت، تئیی چِه کارے هرابَ بیت؟ تئو منی رَندگیریا بکن.“ 23گڑا مُریدانی نیاما#21:23 اَسلیگێن یونانی نبشتانکَ گوَشیت: ”براتانی نیاما“. اے هبر شِنگ بوت که آ مُرید هچبرَ نمریت. بله ایسّایا نگوَشتگاَت که آ نمریت، تهنا گوَشتگاَتی: ”اگن منی رَزا همے ببیت که اے تان منی آیگئے وهدا زندگ بمانیت، تئیی چِه کارے هرابَ بیت؟“ 24اے هما مُرید اِنت که اے چیزّی نبشته کرتگاَنت و اِشانی راستی و پکّاییئے شاهدیا دنت. ما زانێن که اِشیئے شاهدی راست اِنت.
گُڈّی هبر
25البت، ایسّایا دگه بازێن کارے کرت. اگن یکّ یکّا نبیسگ بوتێننت، منی هئیالا سجّهێن دنیایا په آ کتابان جاگه نبوتگاَت.
Đang chọn:
یوهَنّا 21: HPKB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2016-22 Wycliffe Bible Translators, Inc.
