پێدایش 15
15
گۆن اِبراما هُدائے اَهد و پئیمان
1چه اے چیزّان و رند، هُداوندئے هبر الهام و شُبێنێئے تها په اِبراما آتک: ”او اِبرام! متُرس، من تئیی اِسپر آن. تئیی اِنام سکّ مزن اِنت.“ 2بله اِبراما گوَشت: ”او هُداوندێن هُدا! تئو منا چے دئیئے؟ منا وَه چُکّ نێست و منی لۆگئے وارس دَمِشکی اێلیزِر اِنت.“ 3پدا گوَشتی: ”تئو منا چُکّ و پُشپَدے نداتگ و باندا رۆچ منی لۆگئے هِزمتکارے منی وارسَ بیت.“ 4بله هُداوندئے هبر اِبراما سر بوت که اے هِزمتکار تئیی وارسَ نبیت، تئیی جندا مَردێنچُکّے بیت و هما تئیی وارسَ بیت. 5هُداوندا اِبرام ڈنّا بُرت و گوَشت: ”آسمانا بچار و اِستاران هساب کن، اگن هسابِش کرتَ کنئے. تئیی نَسل و پَدرێچ اِشانی پئیما بازَ بیت.“ 6اِبراما هُداوندئے سرا باور کرت و هُداوندا اِبرامئے اے باور، په آییا پاکی و پَلگاریے هساب کرت.
7نون هُداوندا گۆن آییا گوَشت: ”من هما هُداوند آن که ترا چه کَلدانیانی شهر اورا دَرُن کرت و آورت که اے سرڈگارا ترا بدئیان و تئو اِشیئے واهند ببئے.“ 8بله اِبراما گوَشت: ”او هُداوندێن هُدا! من چۆن بزانان که اِشیئے واهندَ بان؟“ 9گڑا هُداوندا گوَشت: ”په من سئے سالیگێن مادگێن گۆکے، سئے سالیگێن بُزے، سئے سالیگێن گوَرانڈے، شانتلے و کَسانێن کپۆتے بیار.“ 10اِبراما اے سجّهێن په هُداوندا آورت و دو کپّا کرتنت و هر تَل، دومی تَلئے دێما اێر کرت، بله مُرگی کپّ نکرتنت. 11ڈونڈوارێن مُرگ که اے جۆنانی سرا نِشتنت، اِبراما گلّێنتنت.
12وهدے رۆچ اێر نِندَگا اَت، اِبرام گرانێن وابێا گِپت و بَزێن و تُرسناکێن تهاریێا آییئے سرا مان شانت. 13گڑا هُداوندا گوَشت: ”دلجم بئے و بزان که تئیی نَسل و پَدرێچ اَنچێن سرڈگارێا دَرامَدێئے پئیما جَهمنندَ بیت که آ مُلک آیانی نهاِنت. تئیی اۆبادَگ اۆدا گُلامَ بنت و تان چار سد سالا زُلم و زۆراکیئے آماچَ بنت. 14بله من، آ کئوما سِزا دئیان که تئیی نَسلا گُلامَ کنت. پدا تئیی پَدرێچ گۆن مزنێن مال و مَڈّیێا چه اۆدا درَ کئیت. 15بله تئو وت په اێمنی وتی بُنپیرُکانی کِرّا رئوئے و شَرّێن مزنێن اُمرێا رند کَبر کنگَ بئے. 16تئیی پَدرێچ، چارمی نَسلا اِدا پرَ ترّیت چێا که اَموریانی بَدکاری اَنگت پوره و سَرجم نبوتگ.“
17رۆچ که اێر نِشت و تهاریا مان شانت، آسْدانے که دوتّ دئیان اَت گۆن رۆکێن مَشَلێا زاهر بوت و چه تَلانی نیاما گوَست. 18آ رۆچا هُداوندا گۆن اِبراما اَهد و پئیمانے کرت و گوَشتی: ”چه منی نێمگا اے سرڈگار چه مِسرئے شێپا بگر تان پَراتئے مزنێن کئورا تئیی نَسل و پَدرێچئیگ اِنت، 19بزان کَنی و کَنیزّی و کَدمونی و 20هیتّی و پِریزّی و رِپاهی و 21اَموری و کَنهانی و گِرگاشی و یَبوسی مهلوکئے سرزمین.“
Đang chọn:
پێدایش 15: HPKB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2016-22 Wycliffe Bible Translators, Inc.