دَرگوَز 2
2
موسّائے پێدائِش
1لاوی کَبیلهئے مردے شت و لاوی جنکّے سانگی کرت. 2جنێن لاپپُرّ بوت و مردێنچُکّے آورتی. جنێنا دیست که چُکّ شَررَنگے، تان سئے ماها چێری دات. 3وهدے آییا چُکّ چه اِد و گێشتر چێر دات نکرت، په آییا چه کَلَم و کاشا گوَپتگێن سَپْتے#2:3 سَپْت، بزان سَبَد، مزنێن چَلّی، ساچی. زرتی، سَپْتی گیر و ڈامبر#2:3 گیر و ڈامبَر سیاهێن و لِچناکێن آپێنکے. جَت، چُکّی سَپْتا کرت و نیلّئے کئورئے لَمبا کاشانی تها اێری کرت. 4چُکّئے گُهار کَمّے دور اۆشتات و چارگا لگّت که بارێن چُکّ چۆنَ بیت.
5پِرئونئے جنکّ جانئے شۆدگا نیلّئے کئورا آتک. مۆلد نیلّئے کئورئے کرّا گَردگا لگّتنت. پِرئونئے جنکّا کاشانی نیاما سَپْت دیست و وتی مۆلدے راهی دات که سَپْتا بیار. آییا آورت. 6پِرئونئے جنکّا سَپْت پَچ کرت و نُنُّک دیست. نُنُّک گرێوگا اَت. پِرئونئے جنکّا آییئے سرا بزّگ بوت. گوَشتی: ”اے چه اِبرانیانی چُکّان اِنت.“ 7گڑا نُنُّکئے گهارا چه پِرئونئے جنکّا جُست کرت: ”برئوان و اِبرانی جنێنے تئوار بکنان که نُنّکا په تئو شیر بمێچێنیت؟“ 8پِرئونئے جنکّا گوَشت: ”برئو.“ جنکّ شت و نُنّکئے ماتی تئوار کرت. 9پِرئونئے جنکّا گۆن آییا گوَشت: ”اے نُنّکا گۆن وت بر و په من مێچێن. من تئیی مُزّا دئیان.“ جنێنا نُنّک زرت و مێچێنت.
10چُکّ که رُست و کمّے مستر بوت، ماتا پِرئونئے جنکّئے کرّا آورت. پِرئونئے جنکّا چُکّ زرت و وتی چُکّ کرت. آییئے نامی موسّا#2:10 موسّائے لبز بلکێن چه ”در کنگئے“ لبزا جۆڑ بوتگ. کرت، گوَشتی: ”اے من چه آپا کَشِّتگ.“
موسّائے تَچگ
11وهدے موسّا رُست و مزن بوت، یکّ رۆچے وتی مردمانی کرّا شت و آیانی بیگاری و گرانێن کاری دیستنت. موسّایا مِسریے دیست که اِبرانیێا، بزان چه موسّائے جندئے مردمان یکّێا جنَگا اَت. 12موسّایا وتی چپّ و چاگرد چارت و دیستی که کَسّ نێست. گڑا مِسریای کُشت و رێکانی تها کَلّ کرت. 13دومی رۆچا پدا ڈَنّا شت و دیستی که دو اِبرانی مِڑَگا اِنت. گۆن مئیاریگێن مردما گوَشتی: ”چێا وتی هَمکئوما جنَگا ائے؟“ 14آییا پَسّئو دات: ”کئیا ترا مئے سرا هاکم و دادرَس کرتگ؟ زانا تئو لۆٹئے منا هم بکُشئے اَنچۆ که مِسریاِت کُشت؟“ موسّایا تُرست و دلا گوَشتی: ”پَکّایا هبر پاشْک بوتگ.“
15پِرئون اے هبرا سهیگ بوت و موسّائے کُشگئے اِرادهی کرت. بله موسّا چه پِرئونئے کِرّا تتک و میدیانئے مُلکا شت و چاتێئے کرّا نِشت. 16میدیانئے دینی پێشوایا هپت جنێنچُکّ هستاَت. اے جنکّ آتک و آپئے کَشّگ و تَگارئے#2:16 تَگار، بزان مزنێن جُهلێن دَرپ، هیران، لَگن. پُرّ کنگا لگّتنت که پتئے رمگا آپ بدئینت. 17بله لهتێن شپانک آتک و جنکِّش گلّێنتنت#2:17 گلّێنَگ، بزان تاچێنَگ، دَر کنگ، دور راه دئیَگ.. موسّا جنکّانی کُمَکّا پاد آتک و آیانی رمگی آپ دات.
18جنکّ که وتی پت رئوێلئے#2:18 رئوێلئے دومی نام یَترون بوتگ، بچار 3:1. کرّا آتکنت، پتا جُست کرتنت: ”مرۆچی چێا چۆ زوتّ آتکگێت؟“ 19آیان گوَشت: ”مرۆچی مِسریێا مارا چه شپانکانی دستا رَکّێنت. آپی هم کَشِّت و رمگی آپ دات.“ 20پتا گۆن وتی جنکّان گوَشت: ”گڑا کُجا اِنت؟ شما آ مرد چێا نئیاورتگ گۆن؟ تئواری کنێت، بِلّی کئیت و نانَ وارت.“
21موسّا مردئے کرّا جَهمنند بئیگا رازیگ بوت و مَردا وتی جنکّ سَپورَه گۆن موسّایا سور دات. 22سَپورَها مردێنچکّے آورت و موسّایا آییئے نام گئیرشام#2:22 گئیرشامئے مانا اِنت: ”آ، اۆدا دَرامدے“. کرت، گوَشتی: ”من دَرمُلکا دَرامدے آن.“
23ماه و سال گوَستنت و همے نیاما مِسرئے بادشاه مُرت. اِسراییلی چه وتی گُلامیا نالَگ و پِریاتا اَتنت. آیانی اے نالَگ و پِریات بُرزاد شت و هُدایا سر بوتنت. 24هُدایا آیانی نالَگ اِشکتنت و وتی هما اَهد و پئیمانئے ترانَگا کپت که گۆن اِبراهێم و اِساک و آکوبا بَستگاَتی. 25هُدایا اِسراییلی دیستنت و آیانی سرا بَزّگی بوت.
Đang chọn:
دَرگوَز 2: HPKB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
© 2016-22 Wycliffe Bible Translators, Inc.
