Ñwaè' Maêk 15
15
1À ka' ba à mʉ ŋgàptʉ', běe bgòrgòr efa mʉ̀ ŋgǎa taŋshi taŋshì, ba bleeběe à to', ba ŋgǎa ryɛ'ni mncir, ba bɛr ŋgǎa kansùr wɛɛwɛ a seesì àmbò a be gèe nè Jisòs. A ka' sèesi wɛɛ, a kur ye, a du àgho a fa nè Pailɛ̀t. 2Pailɛ̀t à bipshì nè ye enɛ̂, “A wɛ̀ ŋkʉʉ Jus a?” Jisòs à beesì enɛ̂, “À làa yo cùu.” 3Běe bgòrgòr efa mʉ̀ ŋgǎa taŋshi taŋshì a toshì ye à ku' buu gòr. 4Pailɛ̀t à ker bipshi nè ye enɛ̂, “À tʉr yuu làa ka' a? Ǎ yu' ku' buu ce a ce làa àmbò wɛ̀ na laŋ?” 5Jisòs à ker laa yi yu yuu ka'. Pailɛ̀t à bɛɛŋgèr sê.
6À m ce ba à ŋkà' ca, Pailɛ̀t fʉr ŋwɛ̀ shaŋ mò'sir efa shaŋ. E m ce fʉr ba ŋwɛ̀ ce bèe a kòŋ. 7À m ba à nfè' anà ŋwɛ̀ mò' à ba mbe shaŋ. A m too ye enɛ Bàrabàs. E m ba mbe shaŋ a bèe mo' ce a wowèe a m yʉshi bèe à nfè' wowèe a m tà' bùr gopmɛ̀n. 8Ku' bèe a vʉ̂, a yɛ Pailɛ̀t a laa nè ye enɛ e fʉr ŋwɛ̀ shaŋ mò' embe shaŋ àmbò e ke gèe à nfè' ŋkà' ca nà. 9E bipshì nè wowèe enɛ̂, “Wěe kòŋ enɛ m fʉr ŋkʉʉ Jus fa nè wèe a?” 10E m bipshi wa'a njobè' e m rìŋ enɛ běe bgòrgòr efa mʉ̀ ŋgǎa taŋshi taŋshì a m ce ko'-ndoŋ nè Jisòs a ka' koo ye a vʉ àgho a fa nè ye. 11Běe bgòrgòr ca a cepshì bèe enɛ a laa tɛ Pailɛ̀t fʉr ba Bàrabàs fa nè wowèe. 12Pailɛ̀t à ker bipshi nè wowèe enɛ̂, “Banɛ m gee mɛ kɛ nè ŋwɛ̀ ce wěe too enɛ ŋkʉʉ Jus na?” 13Wowèe a waa enɛ̂, “Taa ye mbe kìntaa.” 14Pailɛ̀t à bipshì nè wowèe enɛ̂, “M taa ye mbe kìntaa njokɛ? Yuu bebep ce ŋwɛ̀ ca à gèe seesê, yu ba kɛ?” Wowèe a ku ce waani, a ce làa enɛ̂, “Taa lɛ ye mbe kìntaa.” 15Pailɛ̀t à m kòŋ à rgèe tɛ nyor boŋ kʉr bèe anà. E fʉr Bàrabàs embe shaŋ a fa nè wowèe, a laa enɛ a lip Jisòs. A ka' lìp ye nè byɛɛnsò wɛɛ, a fa ye tɛ a bo dù taa mbe kìntaa.
16Bsoogɛ̀ mo' a m lòr Jisòs a niŋ àgho mbe dì' mnsa' embe nto' ce govanò à m ce cu mbo, a kɛ' bsoogɛ̀ wɛɛwɛ mbo. 17Bèe a ka' vʉ̀, a lor cɛ̌' beer a fa ye à nyòr, a gee rtaa kʉʉ nè bsòpsì a sop ye mbe tù, 18a kɛ' a ce cà'ni ye, a ce làa enɛ̂, “Nyàr, ŋkwe Jûs.” 19A ka' làa wa'a, a lip ye nè ŋke' mbe tù, a ce ye nè mce, a gʉ'shi a ce bo'shi enɛ a ce cà'ni ye. 20Wowèe a ka' vʉ̀shi ye mìsi, a co' yap cɛ̌' beer cà, a lor bcɛ̀' vi, a kʉsi ye à nyòr, a lor ye a du àgho à rtaa mbe kìntaa.
21Wowèe a ka' bà' à nduunjì a yɛ Saimʉ̀n ce à rla' Sàirên, àmbò e ce kʉti efa mŋkʉ̀. À m ba tàr yì Àlɛ̀ksandà ba Rufòs. Wowèe a koo ye à ŋger enɛ e koo kìntaa ese Jisòs byɛ'. 22A wowèe a du nè Jisòs fàdì' ce a m ce too enɛ Golgotà. Mbùu efa rlii ca yu enɛ̂, “Dǐ' kèkèp tu.” 23A ka' bà', a lor mrù' a fiŋshi nè mɛ̂r, a fa nè Jisòs enɛ e no, e kanì. 24Wowèe a taa ye mbe kìntaa, a lor vi bcɛ̀' a ma' kaŋ àgho, tɛ a bo yɛ àmbò a be gàp.
25A m taa Jisòs mbe kìntaa à nyʉ̀ bʉ̀'ʉ à ŋgàptʉ'. 26A m saŋ mbùu ce a m taa ye mbe kìntaa. A m saŋ enɛ̂, “Ŋkʉʉ Jûs.” 27A m taa byɛ̀ɛ a baa mbe bkìntaa foŋ. Mò' à ba à yi bo mà', mò' à bo ŋkòp. 28[A ka' gèe wa'a, blǎa Nyʉ̀ ce a saŋ enɛ̂, “A m bè' ye à mʉ ŋgǎa bʉ'shi mncir” nà vi ghɛɛtè njo.]
29Bèe ce a m ce càa yap càa a m ce kòr btu, a ce sù' ye nè mcɛp, a ce làa enɛ̂, “Àhâ! Wɛ̀ ce àde' à sa'sì Ndap Nyʉ̀ bà'ri à mnǒŋ btaar, 30jà' là yo tu suu embe kìntaa.” 31Běe bgòrgòr efa mʉ̀ ŋgǎa taŋshi taŋshì, ba ŋgǎa ryɛ'ni mncir a ce vʉ̀shi ye foŋ, a ce làa a wǎp mʉ enɛ̂, “E m jà' bèe mo' a moo à rjà' yi tu làr. 32Sèe yɛ ka àmbò Krâis, ŋkʉʉ à to' Isrɛ̀l be sùu embe kìntaa sè'ni na tɛ sèe bo byemi nè ye.” Bèe a mmbaa ce a m taa a Jisòs wèe mbe bkìntaa nà, a cɛp ye foŋ.
33Nyʉ̀ à ka' kùu ŋgòŋ, tʉ̀' à sii, kɛ' à nyʉ̀ ncòp-baa du ba' à nyʉ̀ taar. 34À ka' ba à nyʉ̀ taar anà, Jisòs à waa enɛ̂, “Ɛ̀lôi, Ɛ̀lôi, Lama Sàbàtanì”, ce e yu enɛ̂, “Yà Nyʉ̀, yà Nyʉ̀, wɛ̀ lèse mɛ̀ njokɛ?” 35Bèe mo' ce a m tɛɛte àfo a ka' yu', a laa enɛ̂, “Yu' nè, e ce kɛ' Àlajà.” 36Ŋwɛ̀ mò' à caŋ a du a fʉʉ kʉ̀sha njep mʉ̀ njɛ̀ɛ mrù' mo' ce mi m ce baŋshi, a fapte à ŋke', a fa nè Jisòs enɛ e bo nyoŋ. E ka' fa, a laa enɛ̂, “Sèe yɛ ka enɛ wà' Àlajà be vʉ̀ sùusi ye embe kìntaa na lɛ.” 37Jisòs à waa tatap à nfè' anà, a kwe.
38Cɛ̀' ce a m teni dì' mo' embe Ndàp Nyʉ̀ àgho yi m sàti, kɛ' embe tù du a ba' njep mbùu.
39Ŋwɛ̀ ce e m ba tu nè bsoogɛ̀ rjèe ce e m tɛɛ a ce kè'ni Jisòs, à ka' yɛ àmbò e kwe, e laa enɛ̂, “Ŋwɛ̀ ca à m ba Muu Nyʉ̀ ghup.”
40Bbyèŋge mo' a m ba àfo foŋ, a tɛɛ à njìsàp a ce fyɛ'. Mɛ̀ɛri à rla' Makdalà, ba Mɛ̀ɛri ce à m ba ma yì Jɛms ce ŋkɛ' ba Josès, a m ba à mʉ̀ bbyèŋge ca a Sàlomè wèe. 41Wowèe a m ce kar àmbùu Jisòs a ce jà' ye à nfè' e m ba à ŋgǒŋ Galèlê. Ku' bbyèŋge mo' foŋ ce a m vʉ̀ a Jisòs wěe à rla' Jɛ̀rusalɛ̀m a m ba àfo.
42-43À ka' ba njobè' bèe a m ce tami nyor enɛ tʉ̀' be raa tɛ a cu mmbomntaa Nyʉ̀, Josɛ̀f ce à rla' Àrimàtiyà à du à mbùuŋkùr anà, a du a yɛ Pailɛ̀t. Josɛ̀f ca à m ba mò' efa mʉ̀ ŋgǎa kansùr ce bèe a m ce yu'ni nè ye sê. E m ce kè' nfè' ce Nyʉ̀ be vʉ̀ sa' àmbò ŋkʉʉ. E kur ntee a du a yɛ Pailɛ̀t, a laa enɛ e fa gʉ̌ʉ ŋwɛ̀ nè ye tɛ e tuŋ. 44Pailɛ̀t à ka' yu' enɛ Jisòs à ba kwe wɛɛ, a tarni sê. A kɛ' ŋwɛ̀ ce e m ba tu nè bsoogɛ̀ rjèe cà. E ka' vʉ̀, e bipshì nè ye enɛ Jisòs à ba kwe wɛɛ lɛ. 45E ka' suŋ ye enɛ Jisòs à ba kwe wɛɛ, e laa nè Josɛ̀f enɛ e du lor gʉ̌ʉ Jisòs. 46Josɛ̀f à du a yuu cɛ̌' bòŋboŋ, a suusi gʉ̌ʉ ŋwɛ̀ embe kìntaa, a kur nè cɛ̀' anà a lɛ njep rshè ce a m sò' nje ryɛɛ. A ka' lɛ̀ a biŋsi ma lùr a cete ncùu rshè àgho. 47Mɛ̀ɛri e à rla' Makdalà ba Mɛ̀ɛri ma yì Josès a m ba àfo, a yɛ mbe dì' ce a tuŋ Jisòs.
Đang chọn:
Ñwaè' Maêk 15: LNT
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
