Ñwaè' Matïìyoè 8

1Jisòs à ka' sùu embe rtùu, ku' bèe a du a yě mbùu. 2Ka' cu, ŋwɛ̀ msàasì à vʉ a gʉ'shi njep yě tìi, a laa enɛ̂, “Tatâ, wɛ̀ ka' ce kòŋ, à gee m ke'sè, ba nrara.” 3Jisòs à naa bo a joo ye àgho, a laa enɛ̂, “M ce kòŋ wa'a, kè'se, ba nrara.” Ŋwɛ̀ anà à ku ke'se à nfè' anà, a ba nrara. 4Jisòs à ciisì nè ye enɛ̂, “Yɛ̂, fa suŋ ŋwɛ̀ ka'. Dù duŋshi yò nyor nè ŋwɛ̀ taŋshi taŋshì embe Ndàp Nyʉ̀, gee taŋshì ce Musìs à m làa enɛ ŋwɛ̀ yaŋ msàasì gee tɛ bèe a bo rìŋ enɛ ŋwɛ̀ anà à kè'se nà.”

5Jisòs à ka' niŋ à rla' Kàpanùm, ŋwɛ̀ ce e m ba tu nè bsoogɛ̀ rjèe à vʉ̂, a yɛ ye a bu' mmbo nè ye, 6a laa enɛ̂, “Tatâ, yà ŋwɛ̀ rfà' nòŋ à là', yì ŋgʉ̀' nyor mò' à kwe, e ce yu' ryaŋ sê.” 7Jisòs à laa nè ye enɛ̂, “M be vʉ̀ gèe tɛ e ke'se.” 8Ŋwɛ̌ ŋgòr ca à laa nè ye enɛ̂, “Tatâ, mɛ̀ ghɛɛte à ŋwɛ̀ ce àde' à niŋ mbe mɛ̌ ndàp ka'. Kù laa ba mbʉ̀ nlàa mò'sir tɛ yà ŋwɛ̀ rfà' ke'se. 9Mɛ mɛ̀ yu ŋwɛ̀ ce m ce fà' njeptii bèe ce yap nta' yi càa ya. M tʉr bsoogɛ̀ ce a yu njep mɛ̌ tìi foŋ. M ka' laa nè mò' enɛ̂, ‘Dù’, banɛ e be dù. M ka' laa nè mò' enɛ̂, ‘Vʉ̀’, banɛ e be vʉ̀. M ka' laa nè yà ŋwɛ̀ rfà' enɛ̂, ‘Gèe ca’, banɛ e be gèe yi.” 10Jisòs à ka' yu' blàa ca, a bɛɛŋger sê, a laa nè bèe ce a m ce dù a yě mbùu nà enɛ̂, “M ce suŋ wèe nè mini-ŋwɛ̀ enɛ mɛ̀ be yɛ ŋwɛ̀ mò' ce e tʉr njɛ̀ɛ rbyemì ca ka', ka' à to' Isrɛ̀l. 11M ce suŋ wèe mɛnɛ bèe magòr a be kèe vʉ̀ ekù mbùuntii ba embà mbùuntii cute a Abràhâm, ba Aisìk, ba Jakòp wèe à ŋkà', mbe nto' Nyʉ̀. 12À ka' ba yi àmbò boo ŋkʉʉ, a be kèe fʉr wowèe embo, mà' à dì' ce ku ba ba tʉ̀'nji, ce bèe a ce warse ce kʉr msòŋ àfo.” 13Jisòs à laa nè ŋwɛ̀ ŋgòr anà enɛ̂, “Dù, yi be kù ba àmbò wɛ̀ byemi enɛ yi be ba nà.” Yì ŋwɛ̀ rfà' à m ku ke'se à nfè' anà.

14Jisòs à ka' dù mbe ndàp mbe Pità, a yɛ àmbò malu yì Pità nòŋ, tu yi ce luu ye. 15Jisòs à joo bo ese ye, tu anà yi tetì, e natì mbekì, a fɛr buu nè ye. 16À ka' ba à mbùuŋkùr, bèe a vʉ nè bèe magòr ce byʉ' mnyʉ̌mkà' vi m ba njep wowèe. Jisòs à lâa, byʉ' bbebep anà vi fʉʉ enjep wowèe, a ker gee bèe wɛɛwɛ ce a m ce yaŋ a ke'sè. 17Ca yi m ba wa'a, tɛ yuu ce Àsayà ŋwɛ̀ ncep ntuu Nyʉ̀ à m làa yi bo ghɛɛte njo. E m làa enɛ̂, “E m koo visèe bsɛ̀, a ker byɛ' visèe byaŋ.”

18Jisòs à ka' yɛ enɛ ku' bèe a sìr ye, e laa nè ŋgǎa yɛ'ni yì buu enɛ a wowèe a tuu nèŋguu rò. 19Ŋwɛ̀ ryɛ'ni mncir mò' à vʉ̂, a laa nè ye enɛ̂, “Ŋwɛ̀ ryɛ'nì, wɛ̀ ka' ce dù ba fɛ, banɛ m be kù ba fa wɛ̌ mbùu.” 20Jisòs à laa nè ye enɛ̂, “Bsìi vi tʉr bto, bsiŋ vi tʉr mndap, Muu Ŋwɛ̀ à ke' tʉr dì' ce àde' e lɛ yi tu ka'.” 21Ŋwɛ̀ mò' ce e m ba ŋwɛ̀ yɛ'ni yì buu foŋ, à laa nè ye enɛ̂, “Tatâ, mà'shi tɛ m du tuŋ yà ta wɛɛ.” 22Jisòs à laa nè ye enɛ̂, “Vʉ̀ fa mɛ̌ mbùu, ma'shi tɛ bgʉ̌ʉ bèe a tuŋ wâp bgʉ̌ʉ bèe.”

23E ka' làa wa' wɛɛ, a niŋ mbe keŋ, ŋgǎa yɛ'ni yì buu a du a yě mbùu mbo. 24Ka' cu, ma fu' mo' yi kɛ' a ce càa à rdip anà, mdip mi ce ko' mbekì, a ce niŋ mbe mʉ̀ keŋ, Jisòs à ce buumi yi yu. 25Ŋgǎa yɛ'ni yì buu a dû, a yɛɛ ye, a laa nè ye enɛ̂, “Tatâ, jà' wèr, sèe à kwe.” 26E laa nè wowèe enɛ̂, “Wèe ce wɛp ba kɛ wa'a? Le rbyemì li yu mʉcàr sê.” E ka' làa wa'a, a nati mbekì, a waa fu' ba rdip, ŋgòŋ yi tɛɛ nyaŋ. 27Wowèe a bɛɛŋgèr sê, a laa enɛ̂, “Njɛ̀ɛ ŋwɛ̀ ca yu ba njɛ̀ɛ ŋwɛ̌ kɛ, ce enɛ fu' yi yu'ni nè ye, rdip li yu'nì nè ye foŋ?”

28Jisòs à ka' tuu nèŋguu rò, ba sè'ni ba à ŋgòŋ bèe Gɛ̀rasà, a yɛ bèe a mmbaa ce byʉ' mnyʉ̌mkà' vi m ba njep wowèe, àmbò a ce vʉ̀ efa dì' ce a m ce tuŋ bèe. Wowèe a m ce fa ŋgɛ' se àmbò mŋgàa-baa wa', ŋwɛ̀ à ker ce bàp njep nduunjì ce yi m càa à dì' anà ka'. 29Wowèe a waa, a laa enɛ̂, “Muu Nyʉ̀, yuu ce sèe tʉr a kɛ? Wɛ̀ vʉ̀ àfa à rfa wèr ŋgɛ' tɛ nfè' ka' kèe ghɛɛ a?” 30Kʉr ŋkǔnyàm mo' gòr sê, yi m ba àfo a ce yeŋger, a ba à njìsàp ka'. 31Byʉ' mnyʉ̌mkà' anà vi bu' mmbo nè Jisòs, a laa enɛ̂, “Wɛ̀ ka' ce fʉr wèr, à laa tɛ wèr du niŋ njep kʉr ŋkǔnyàm ca.” 32E laa nè vi enɛ̂, “Dù nè.” Byʉ' anà vi fʉʉ a du a niŋ njep ŋkǔnyàm anà, kʉr ŋkǔnyàm anà wɛɛwɛ yi kɛɛtì a caŋ a du mbà baa, a gweŋger njep rò, a no mdip a kweŋger. 33Bèe ce a m ce cìŋ ŋkǔnyàm ca a caŋsè, a du à là', a suŋ buu ca wɛɛwɛ, a ker suŋ yuu ce yi m koni nè bèe ce byʉ' mnyʉ̌mkà' vi m ba njep wowèe nà. 34A ka' suŋ, bèe wɛɛwɛ à rla' anà a fʉʉ, a du à ryɛ Jisòs, a ka' yɛ ye, a bu' mmbo nè ye enɛ e lo efa yap ŋgòŋ.

Đang chọn:

Ñwaè' Matïìyoè 8: LNT

Tô màu

Chia sẻ

So sánh

Sao chép