Ñwaè' Matïìyoè 28
28
1Mmbomntaa Nyʉ̀ mi ka' càa wɛɛ, ce tʉ̀' be raa tɛ ba nòŋ entombì embe mʉ̀ ŋgàa nà, à ku bii à mʉ ŋgàptʉ' sê, Mɛ̀ɛri ce à rla' Makdalà, ba Mɛ̀ɛri mò' cà, a du à rfyɛ' rshè. 2Ka' cu, ŋgòŋ yi ci'tì tatap sê, ncìndap Tata Nyʉ̀ à suu embe bùu, a biŋsi lùr embe ncùu rshè, a cu mbendù mo. 3E m ce bàpŋger àmbò sa'mbèŋ wa'a, vi bcɛ̀' vi ce fʉp àmbò mmbà' wa'a. 4Bèe ce a m ce kè'ni rshè a wɛp, a kaŋ sê, a ba àmbò bgʉ̌ʉ bèe wa'a. 5Ncìndap Nyʉ̀ à laa nè bbyèŋge anà enɛ̂, “Wèe fa wɛp ka'. M rìŋ mɛnɛ wèe ce ròo ba Jisòs ce a mʉ taa mbe kìntaa nà. 6E yu mbena ka'. E fʉʉ efa rkwe àmbò e m làa nà. Vʉ̀ nè yɛ mbe dì' ce yi gʉ̀ʉ yi mʉ nôŋ. 7Wèe du cɛrcɛr du suŋ ŋgǎa yɛ'ni yì buu enɛ e fʉʉ efa rkwe. E ce dù lɛ à ŋgǒŋ Galèle entombì nè wowèe. Wowèe a be bà' àfo tɛ a yɛ lɛ ye. A yuu ce mɛ̀ suŋ wèe.” 8Wowèe a nàtǐ à ncǔu nshè cɛrcɛr sê, nè bwɛp-ŋwɛ̀ ker ba nè rlu'shì-ŋwɛ̀, a caŋ a du à rsuŋ ŋgǎa yɛ'ni yì buu. 9Ka' cu, Jisòs à tartè a wowèe, a laa nè wowèe enɛ̂, “Mɛ̀ cà'ni wèe.” Wowèe a du a gwe njep yě tìi, a gʉ'shi nè ye. 10Jisòs à laa nè wowèe enɛ̂, “Wèe fa wɛp ka'. Dù nè suŋ bfʉr wa enɛ wowèe a du à ŋgǒŋ Galèlê. Wowèe a be bà' àfo, yɛ mɛ̀.”
11Wowèe a ka' ce dù, bèe mo' efa mʉ̀ bèe ce a m ce kè'ni rshè a du à mʉ̀ rla', a suŋ běe bgòrgòr efa mʉ̀ ŋgǎa taŋshi taŋshì yuu ce yi koni. 12Wowèe a ka' yu', a yɛ bleebèe a wowèe a cutè a fa ntaŋ, a lor ku' mbàa a fa nè bsoogɛ̀ cà, 13a laa nè wowèe enɛ̂, “Wěe dù, wèe laa weenɛ ŋgǎa yɛ'ni yì buu a vʉ̀ nètʉ' a yɛɛ gʉ̌ʉ ŋwɛ̀, wèe à ce lɛ buumi. 14Govanò à ka' yu' nsuŋ ca, wèr yɛ ye nashi nè ye, fà dì' wèe niŋ à ŋgɛ' ka'.” 15Wowèe a koo mbàa, a gee àmbò a m làa nè wowèe. Jus a ku bii ce suŋ nsuŋ ca à njɛ̌ɛ wa'a caar ba' ntìni na.
16Ŋgǎa yɛ'ni yì buu ce ncòp-mò'sir-à-rrʉ̀ʉ, a du à ŋgǒŋ Galèlê, a du a ko' mbe rtùu ce Jisòs à m làa enɛ wowèe a ko' mbo nà. 17Wowèe a ka' yɛ ye, a gʉ'shi nè ye, bèe mo' a tarnì yap tarni. 18Jisòs à vʉ̂, a laa nè wowèe enɛ̂, “A fa ŋger embe bùu ba enjep nshè wɛɛwɛ nè mɛ̀. 19Dù nè du gee tɛ běe à bto' wɛɛwɛ a ba ŋgǎa yɛ'ni yà buu. Bàptir nè wowèe à rlii Tàr, ba Muu, ba Yʉ' Rara, 20yɛ'ni wowèe tɛ a gee buu wɛɛwɛ ce mɛ̀ làa nè wèe. Rìŋ nè enɛ m be ba wèe sèe à nfè' wɛɛwɛ caar dù bà' à nfè' ce ŋgòŋ yi be mì.”
Đang chọn:
Ñwaè' Matïìyoè 28: LNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
