Ñwaè' Matïìyoè 14
14
1À m ba à nfè' anà, Hɛròd ce e m ce sa' à ŋgǒŋ Galèle à yu' nsuŋ Jisòs, 2a laa nè bèe ce a m ce fà' nè ye enɛ̂, “Ŋwɛ̀ anà yu Jǒn ŋwɛ̀ bàptir bèe. E fʉʉ efa rkwe. A mbùu ce e tʉr ŋger à rgèe njɛ̀ɛ buu bghagha' ca.” 3Hɛròd à m koo Jǒn, a kur, a fa mbe shaŋ. Hɛròd à m fa ye mbe shaŋ àtu Hɛ̀rodìyà ce e m ba ŋgwa nfʉr yì ce Felêp. 4Jǒn à m ba nè laa nè Hɛròd enɛ̂, “Ncir yi byemi enɛ à fap ŋgwa nfʉrò, beesi à yò ka'.” 5Ka' e m ce kòŋ à ryʉ Jǒn wa'a, geewa'a njì yi bûu, njobè' bèe anà a m byemi enɛ Jǒn yu ŋwɛ̀ ncep ntuu Nyʉ̀. 6E m gèe ŋkà' à rkuushi nòŋ ce a m bi ye, muu Hɛ̀rodìyà à bii bii à bsii bèe ce a m vʉ̀ ŋkà', nyor à boŋ ye sê, 7e ye lè', a ka' enɛ e be fa ye yuu ce e ka' laa enɛ e fa ye. 8E du a yɛ yì mâ, yì ma à suŋ ye yuu ce e gêe. E vʉ̂, a laa enɛ̂, “Fa tu Jǒn njep kaŋ sè'ni na.” 9Mlù mi koo ŋkʉʉ sê, à ka' ba njobè' e m ye lè' à bsii bèe ce a m vʉ̀ ŋkà' ca, e laa enɛ a fa yuu ce e làa enɛ a fa nè ye nà. 10E m tuu bsoogɛ̀ mbe shaŋ, wowèe a du a tee tu ese Jǒn, 11a vʉ àgho njep kaŋ a fa nè muu anà, e du àgho, a fa nè yì mâ. 12Ŋgǎa yɛ'ni buu Jǒn a ka' yu' wa'a, a dû, a lor gʉ̀ʉ a tuŋ, a du a suŋ Jisòs.
13Jisòs à ka' kù yu' yuu ce yi koni, a lǒ fàdì' ce e m ba, a niŋ mbe keŋ, a du fà dì' mo' ce ŋwɛ̀ mò' à m ker ba àfo caa efa ye ka'. Bèe a ka' yu', a fʉʉse efa mla' wɛɛwɛ, a jɛr nè mkùu, a du a yě mbùu. 14Jisòs à ka' dù fʉʉ nje wǎa rò, a yɛ ku' bèe, a koosimnse nè wowèe, a gee bèe efa wǎp mʉ ce a m ce yaŋ, a ke'sè. 15Nyʉ̀ à ka' coo, ŋgǎa yɛ'ni yì buu a du a yɛ ye, a laa nè ye enɛ̂, “Sèe yu ànjìsàp efa mla', nyʉ̀ à ce coo. Làa tɛ bèe ca a duse à mlà' tɛ a bo dù yuu byee, ye.” 16Jisòs à laa enɛ̂, “Mbùu mò' yu àgho nè wowèe à rdù ka'. Fa nè wowèe yuu tɛ a ye.” 17Wowèe a beesì enɛ̂, “Yuu ce wèr tʉr ku ba brɛ̌d tâ, ba nca baa.” 18E laa enɛ̂, “Vʉ̀ nè àgho fa nè mɛ̀.” 19E laa nè bèe enɛ a cute à mjɛɛ, a lor brɛ̌d ta ba nca baa cà, a ke' mbe bùu, a yoŋshi Nyʉ̀, a bɛ'shi, a fa nè ŋgǎa yɛ'ni yì buu, ŋgǎa yɛ'ni yì buu a gapshì nè bèe anà. 20Wowèe wɛɛwɛ a ye a yu'. Ŋgǎa yɛ'ni yì buu a baashì bbɛbɛ' ce vi m bɛti, vi ruu à mŋkàa ncòp-baa-à-rrʉ̀ʉ. 21Mmbaŋrù wɛɛwɛ ce a m ye, a m ba àmbò bèe ncʉ̀kì tâ, ka' lor bbyèŋge ba bghàrbèe.
22E m làa nè ŋgǎa yɛ'ni yì buu enɛ wowèe a niŋ mbe keŋ, tuu nèŋguu rò entombì, tɛ e laasi bèe anà. 23E ka' làasi wowèe, a ko' mbe rtùu mimŋgi' à rgèe rloo. À ka' ba à mbùuŋkùr e ku bii mbo mimŋgi'. 24À m ba à nfè' anà keŋ à dù nè yi yu ànjìsàp sê, mdip mi ce ko' mbekì ce sùu, a ce tʉʉ nyor nje keŋ njobè' fu' yi m ce càa magòr. 25À ka' ba à mʉ ŋgàptʉ', e du a wǎp mbùu, a ce jɛ̀r mbendù rdip. 26Ŋgǎa yɛ'ni yì buu a ka' yɛ àmbò e ce jɛ̀r mbendù rdip, wowèe a wɛp sê, a laa enɛ̂, “Yu nyir”, a ka' làa wa'a, a waa njobè' wowèe a m ce wɛp. 27Jisòs à ku làa nè wowèe à nfè' anà enɛ̂, “Kur nè ntee, a mɛ̀. Wèe fa wɛp ka'.” 28Pità à laa nè ye enɛ̂, “Tatâ, ka' ba wɛ̀, à laa tɛ m jɛr mbendù rdip vʉ̀ yɛ wɛ̀.” 29E laa nè ye enɛ̂, “Vʉ̀.” Pità à fʉʉ embe keŋ a jɛr mbendù rdip a ce dù à ryɛ Jisòs. 30E ka' yɛ àmbò fu' yi ce càa nè ŋger-ŋwɛ̀, a wɛp, a kɛ' a ce sùu njep mʉ̀ rò, a waa a laa enɛ̂, “Tatâ, jà' mɛ̀.” 31Jisòs à ku fa bo a koo ye àgho, a laa nè ye enɛ̂, “À yu ŋwɛ̀ ce lo rbyemi li yu mʉcàr. Wɛ̀ ba ce tarni njokɛ?” 32Wowèe a ka' niŋ mbe keŋ, fu' yi tetì. 33Bèe ce a m ba yap mbe keŋ nà, a gʉ'shì nè ye, a laa enɛ̂. “À yu Muu Nyʉ̀ ghup.”
34Wowèe a ka' tuu nèŋguu rò wɛɛ, a cʉʉ keŋ àwǎa rò, a ba sè'ni ba à ŋgǒŋ Gɛ̀nɛsarɛ̀t. 35Běe àfo a ka' yɛ ye a rîŋ, a cep ntuu nè bèe ce a m ba à mla' wɛɛwɛ à ŋgòŋ anà. Wowèe a vʉ nè bèe wɛɛwɛ ce a m ce yaŋ, 36a bu' mmbo nè ye enɛ e ma'shi tɛ wowèe a ku jòo ba yi cǔu cɛ̀'. Ŋgǎa byaŋ wɛɛwɛ ce a m jòo ye, a m kè'se.
Đang chọn:
Ñwaè' Matïìyoè 14: LNT
Tô màu
Chia sẻ
So sánh
Sao chép
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Limbum New Testament © Bible Society of Cameroon, 2003.
