Ñwaè' Luêk 8

1Mʉ nfè' à ka' tuuse, Jisòs à jɛr à mla' mŋgòrŋgòr ba à mla' mŋkɛ'ŋkɛ', a ce fè'shi Nsuŋ Mbòŋmboŋ àmbò kʉʉ Nyʉ̀. Yì bèe ce ncòp baa-à-rrʉ̀ʉ a m dù a ye. 2Bbyèŋge mo' ce e m gèe wowèe a luŋ efa byʉ' bbebep, ba byaŋ, a m dù foŋ a wowèe. Mò' efa wowèe à m ba Mɛ̀ɛri ce a m ce too enɛ Màkdàlên, ce byʉ' bbebep vi m fʉʉ enjep ye vi sàamba nà, 3mò' à ba Jòanà ce e m ba ŋgwa Kusà ce e m ba tu rfà' embe ndàp Hɛròd. Sùsanà à ba mò' foŋ, ker ba bbyèŋge mo' àŋgoo. Bbyèŋge ca a m jà' Jisòs wèe nè yap mbàa ba yàp buu ce a m tʉr.

4Bèe a m ce vʉ̌ à bbu' mla' jɛɛ jɛ̀ɛ jɛɛ à ryɛ Jisòs. A ka' vʉ̀ kaari à ma kʉr, Jisòs à ma' ŋgàa enɛ̂, 5“Ŋwɛ̀ mò' à m ce dù à rbyè yì buu, a ka' ce byè, ŋgʉ̀ buu mò' à gweŋgèr àwǎa nduunjì, bèe a ka' càa a nyɛŋshi nè mkùu, bsiŋ vi vʉ a ye. 6Ŋgʉ̀ buu mò' à gweŋgèr ba mbendù ryɛɛ, a ka' fʉʉ, a yopri, njobè' nshe anà à m ba ncòŋ se ka'. 7Ŋgʉ̀ buu mò' à gweŋgèr à mʉ̀ msini, a ka' kù' à mʉ̀ mo, msini mi kur. 8Ŋgʉ̀ buu mò' à gweŋgèr yi ba mbe nshe yǐ mbòŋmboŋ, a fʉʉ, a ku' bòŋboŋ, mbʉ̀ yuu wɛɛwɛ ce a m byè à gèe mò' rjèe.” Jisòs à ka' làa buu ca mìsi, a waa enɛ̂, “Ŋwɛ̀ ce e ka' tʉr btù', ŋgàŋ yu'.”

9Ŋgǎa yɛ'ni yì buu a bipshì nè ye enɛ ŋgàa ca yu ba enɛ kɛ lɛ? 10E laa enɛ̂, “Buu ce àde' bèe a riŋ àmbò kʉʉ Nyʉ̀ ka' nà, Nyʉ̀ à gèe wèe à rîŋ. À ka' ba yi àmbò bèe mo', a ce suŋ wowèe buu ca ba à mŋgàa tɛ wowèe a ce kè' ce yɛ ka', a ce yu'shi, ce yu' ka'.”

11“Ŋgàa ca yu enɛ, ŋgʉ̀ buu yu nlǎa Nyʉ̀. 12Ŋgʉ̀ buu ce e m gwèŋger àwǎa nduunjì nà tɛɛ yi ba àtu bèe ce a yu' blǎa Nyʉ̀, Satàn ku fʉr blàa anà enjep wǎp mntee, fà dì' wowèe a bo byemi, lùŋ ka'. 13Ŋgʉ̀ buu ce e m gwèŋger mbendù ryɛɛ nà tɛɛ àtu bèe ce a yu' blǎa Nyʉ̀, yu' rbòŋ àgho sê, geewa'a, blàa anà vi ke' taa mŋgàŋ njep wowèe ka'. Wowèe à lò ku byemi ba à mʉ nfè' mò', e ba à nfè' ce rmòoshì li vʉ̀ nè wowèe, wowèe a ku kʉti njìnjì. 14Ŋgʉ̀ buu ce e m gwèŋger à mʉ̀ msini nà tɛɛ àtu bèe ce a yu' blǎa Nyʉ̀ ku byemi, a ce cu, mlù ce à buu enjep ŋgòŋ na, ba broŋ buu, ba buu ce bèe a ke yu' rbòŋ àgho, vi kur blàa anà, vi ke' yʉ mbàŋ ce yi tèe ka'. 15Ŋgʉ̀ buu ce e m gwèŋger yi ba mbe nshe yǐ mbòŋmboŋ nà tɛɛ àtu bèe ce a yu' blǎa Nyʉ̀, lɛ njep ntee bòŋboŋ sê, nè mini-ŋwɛ̀, ku', tɛɛ tatap, gee ŋgʉ̀.

16“Àde' ŋwɛ̀ cʉ' lâm, ker lor ghee kʉpshi àgho kɛ̀ tɛr mbà kàasi ka'. Ŋwɛ̀ à ka' cʉ' lâm, banɛ ŋgàŋ be tɛr ba mbe tɛbùr, tɛ bèe ce a ce niŋ mbe ndàp a bo yɛ rraa. 17Yi yu foŋ enɛ yuu mo' yi yu ce a sʉ̀ti ce yi be kè buu efa ryɛɛti àwaŋ ka'. Yuu mo' yi yu ce a tɛ'shi ce a be kè buu efa rrìŋ tɛ yi yɛɛti àwaŋ ka'. 18Banɛ wèe lor nfè' à njɛ̀ɛ njì ce wèe ce yu' buu. Ŋwɛ̀ ce e ka' tʉr yuu banɛ a be fa ye buu mò'. Ŋwɛ̀ ce e ka' tɛ tʉr yuu ka', banɛ a be koo ka' mʉ yì ce e ce kwà'shi enɛ e tʉr nà ese ye.”

19Ma yì Jisòs ker ba bfʉr vi a m vʉ̀ à ryɛ ye, nduunjì yi ke' ba nè wowèe à ryɛ ye ka' njobè' bèe a m ba gòr sê. 20Ŋwɛ̀ mò' à laa nè Jisòs enɛ̂, “Yò ma ba bfʉr wo a tɛɛ njepmbè a ce kòŋ à ryɛ wɛ̀.” 21E beesì enɛ̂, “Yà ma ba bfʉr wa yu bèe ce a ce yu' blǎa Nyʉ̀, a ce gèe buu ce Nyʉ̀ ce làa.”

22À m ba nyʉ̀ mò' Jisòs à niŋ mbe keŋ a ŋgǎa yɛ'ni yì buu, a laa nè wowèe enɛ̂, “Sèe tuu tʉ̀ ca du nèŋguŋ.” E ka' làa wa'a, a wowèe a kɛ' a ce tuu. 23A ka' ce tuu, e buumì. Ka' cu, fu' mo' yi vʉ nè ŋger-ŋwɛ̀ sê, mdip mi kɛ' a ce niŋ mbe keŋ, yi ba bebep nè wowèe. 24Ŋgǎa yɛ'ni yì buu a du a yɛɛ ye, a laa enɛ̂, “Masà, Masà, sèe à kwe.” E lɛ' efa mmirlò, a waa fu' ba rdip, fu' anà yi tetì, rdip li tɛɛ nyaŋ, ŋgòŋ yi ba sè'ni nè rfʉtè-ŋwɛ̀. 25E laa nè wowèe enɛ̂, “Le rbyemì li yu ba fɛ?” Wowèe a wɛp a ker bɛɛŋger foŋ sê, a ce làa fa wǎp mʉ enɛ̂, “Ŋwɛ̀ ca yu nda sê? E waa fu', yi yu'nì nè ye, rdip li yu'nì nè ye foŋ.”

26Wowèe a m tuu, a ba' à ŋgǒŋ bèe Gɛ̀rasà. Wɛ̀ ka' tɛɛ à ŋgòŋ anà, ŋgǒŋ Galèle yi kʉtì nèŋguu rò. 27Jisòs à ka' ce fʉʉ embe keŋ, a yɛ ŋwɛ̀ mǒ' à rla' anà ce byʉ' mnyʉ̌mkà' vi m ba njep ye. E m kar mbùuriŋ kɛ̌' à nfè' njìsàp sê, a ce cu mbe ndàp ka'. E m ce cu yi ba fàdì' ce a m ce tuŋ bèe. 28E ka' yɛ Jisòs, a waa, a gwe njep yě tìi, a ce war enɛ̂, “Jisòs, Muu Nyʉ̀ embe bùu, yuu ce sò tʉr a kɛ? M ce loo nè wɛ̀ enɛ à fa fa mɛ̀ ŋgɛ' ka'.” 29E m làa wa'a njobè' Jisòs à m làa nè yʉ' bebep cà enɛ yi fʉʉ enjep ye. Yʉ' anà yi m ce lǒ koo ye àmbò mrù' wa'a nfè' àŋgoo sê. A m ce lǒ kur ye nè bshaŋ à mkoo ker ba à mkùu ce kè'ni ye. Yi gèe wa'a, e ceeshì bshaŋ anà, nyʉ̀rkà' lor ye du àgho à ntee rìŋ. 30Jisòs à bipshì nè ye enɛ̂, “Lo rlii a nda?” E beesì enɛ̂, “La rlii a Mncʉ̀kì.” E m làa wa'a njobè' byʉ' mnyʉ̌mkà' vi m niŋ njep ye àŋgoo. 31Byʉ' anà vi m bu' mmbo nè Jisòs enɛ e fa làa enɛ wowèe a fʉʉ du njep bè'tè ŋgɛ' ka'. 32Kʉr ŋkǔnyàm mo' gòr se yi m ba àfo a ce yeŋger mbe rtùu. Byʉ' mnyʉ̌mkà' ca vi bu' mmbo nè Jisòs enɛ e ma'shi tɛ a niŋ ba njep ŋkǔnyàm anà. Jisòs à ma'shì. 33Byʉ' anà vi ka' fʉʉ enjep ŋwɛ̀ anà, a niŋ njep kʉr ŋkǔnyàm cà, yi kɛɛtì a caŋ a du mbà baa, a gweŋger njep tʉ̀, a no mdip, a kweŋger. 34Bèe ce a m ce cìŋ ŋkǔnyàm ca a ka' yɛ yuu ce yi m koni, a caŋ a dû, a suŋ yuu ce yi m koni na à là', a ker suŋ nè bèe ce a m ba à mŋkʉ̀. 35Bèe a fʉʉ a du à ryɛ yuu ce yi m koni. Wowèe a du a yɛ Jisòs, a ker yɛ ŋwɛ̀ ce byʉ' mnyʉ̌mkà' vi m fʉʉ enjep ye nà àmbò e cu njeptii Jisòs nè bcɛ̀' à nyòr, vi bfee vi banì kʉti mbo. Wowèe a wɛp sê. 36Bèe ce a m ba àfo a yɛ yuu ce yi m koni, a suŋ bèe ce a m vʉ̀ nà àmbò a m gèe ŋwɛ̀ anà à lûŋ. 37Bèe wɛɛwɛ à ŋgǒŋ Gɛ̀rasà a m làa enɛ Jisòs dû, njobè' wowèe a m ce wɛp magòr sê. Yi ka' ba wa'a, e niŋ mbe keŋ tɛ e bo kʉti. 38Ŋwɛ̀ ce byʉ' mnyʉ̌mkà' vi m fʉʉ enjep ye nà à bu' mmbo nè Jisòs enɛ a ye a dû. Jisòs à kanì, a laa nè ye enɛ̂, 39“Kʉti fa wɛ̌ là' du suŋ bèe yuu ce Nyʉ̀ à gèe nè wɛ̀.” Ŋwɛ̀ anà à du a jɛr à rla' anà wɛɛwɛ a ce suŋ bèe yuu ce Jisòs à gèe nè ye.

40Jisòs à ka' kʉti, kʉr bèe a konì ye, njobè' wowèe wɛɛwɛ a m cu a ce kè' ye. 41Ka' cu, ŋwɛ̀ mò' ce a m ce too enɛ Jairòs à vʉ̂. E m ba ŋwɛ̌ ŋgòr embe ndàp rloo. E m vʉ̀ a gwe njeptii Jisòs a bu' mmbo nè ye enɛ e vʉ mbe yě ndàp, 42njobè' e m tʉr muunje mò'sir cà'cà', e ce yaŋ, a ba yǐ ŋkwe. Muu anà à m ba àmbò bfè' ncòp-baa-à-rrʉ̀ʉ wa'a. Jisòs à ka' nàti ce dù, bèe a fatè ye mbetar.

43Njeŋwɛ̀ mò' à m ba àfo ce e m cu mbe kùu à bfè' ncòp-baa-à-rrʉ̀ʉ, ŋwɛ̀ mcɛ̀p mò' à ke' ba ce àde' e m ba kupshi ye e ke'se ka'. 44E m vʉ̀ njì embe njì Jisòs, a joo cǔu cɛ̀' ese ye, a ku ke'se mbe dì'. 45Jisòs à bipshi enɛ̂, “À jòo nda mɛ̀?” Bèe wɛɛwɛ a kanì enɛ a jòo ye ka'. Pità à laa enɛ̂, “Masà, yu ba bèe ce a yu gòr a ce nyòrni a ka' ce cìrshi wɛ̀ mbetar.” 46Jisòs à laa enɛ̂, “Ŋwɛ̀ mò' à jòo mɛ̀, njobè' mɛ̀ yu' àmbò ŋger yi fʉʉ mɛ̀ enje nyòr.” 47Njeŋwɛ̀ anà à ka' yɛ enɛ e yɛɛti àwaŋ, e kɛ' a ce kàŋ, a vʉ a gwe njeptii Jisòs. E m suŋ mbùu ce e m jòo ye a ker suŋ àmbò e m ku ke'se à nfè' ce e m jòo ye anà à bsii bèe wɛɛwɛ. 48Jisòs à laa nè ye enɛ̂, “Muu wà, lo rbyemì li gèe wɛ̀ ke'sè. Dù yo yu nè rfʉtè-ŋwɛ̀.”

49Jisòs à ka' kù bii làa, ŋwɛ̀ mò' embe ndàp ŋwɛ̌ ŋgòr embe ndàp rloo à vʉ̂, a laa enɛ̂, “Muu wò à kwe. Fa kèr fa ŋwɛ̀ ryɛ'nì ŋgɛ' ka'.” 50Jisòs à ka' yu', a laa nè Jairòs enɛ̂, “Fa wɛp ka', kù byemi byemi, muu wò be lùŋ.” 51Jisòs à dû, a ka' bà', a ma'shi enɛ ŋwɛ̀ mò' niŋ mbe ndàp a ye caa efa Pità ba Jǒn ba Jɛ̂ms, ker ba tar muu ba ma muu ka'. 52Bèe wɛɛwɛ a m ce warse a ce koosimnse. E laa nè wowèe enɛ̂, “Fa war nè ka'. Muu ca à kwe kwe ka', e ce buumi buumi.” 53Wowèe a vʉshì ye, njobè' wowèe a m rìŋ enɛ muu anà à kwe. 54Geewa'a, e koo ye à bò, a laa enɛ̂, “Nàti mbekì, muu.” 55E kʉti ntèe, a nati mbekì njà' mò'sir. Jisòs à laa enɛ a fa muu anà yuu tɛ e ye. 56Yì ma ba yì ta a bɛɛŋgèr sê. Jisòs à laa enɛ wowèe a fa suŋ ŋwɛ̀ mò' yuu ce yi koni anà ka'.

Đang chọn:

Ñwaè' Luêk 8: LNT

Tô màu

Sao chép

So sánh

Chia sẻ