Ñwaè' Luêk 5

1À m ba nyʉ̀ mò' Jisòs à tɛɛ àwǎa ma tʉ̌ Gɛ̀nɛsarɛ̀t, kʉr bèe a sir ye a kaari a tarte tɛ a bo yu' blǎa Nyʉ̀. 2E m yɛ bkeŋ bbaa àwǎa tʉ̀ anà. Ŋgǎa ŋkoo nca a m tɛr bkeŋ anà a du à rsù'si map mraa. 3E niŋ mbe mò' ce à m ba yì Saimʉ̀n, a laa nè ye enɛ e doo du àgho nje mʉ̀ rò mʉcàr. E cu mbo a ce yɛ'ni ku' bèe ce a m tɛɛ nje wǎa tʉ̀ nà. 4E ka' yɛ'ni mìsi, a laa nè Saimʉ̀n enɛ̂, “Dòo nè keŋ du àgho mbe dì' ce yi coomi, ma' me mraa njep rò, koo nca.” 5Saimʉ̀n à beesì enɛ̂, “Masà, wèr à fà' nètʉ' tatap sê, caar tʉ̀' à raa, a ke' koo yuu ka'. Geewa'a, àmbò wɛ̀ làa na, banɛ m be mà' mraa njep rò.” 6Wowèe a ka' mà', nca yi niŋ njo ku' gòr sê, mraa mi kɛ' a ce ceeŋger. 7Wowèe a lap ŋgǎa ŋkoo nca mo' ce a m ba mbe keŋ mò' nà enɛ wowèe a vʉ ja' wowèe. Wowèe a vʉ a ja' wowèe, a wowèe a koo nca yi ruu à bkeŋ bbaa anà jiŋ, keŋ à ce sɛni niŋ njep mʉ̀ rò. 8Saimʉn Pità à ka' yɛ yuu ce yi m ba na, a gwe njeptii Jisòs, a laa enɛ̂, “Tatâ, nàti efa mɛ̌ geŋ. M yu ŋwɛ̌ ŋgèe buu bbebep.” 9Saimʉ̀n ker ba bèe ce a wowèe a m ce koo nca nà, a bɛɛŋgèr sê, à ryɛ ku' njɛ̀ɛ nca ce wowèe a m koo. 10Jɛms ba Jǒn ce a m ba boo Sɛbɛ̀dî, ce a Saimʉ̀n wèe a m ce koo nca, a m bɛ̀ɛŋger foŋ sê. Jisòs à laa nè Saimʉ̀n enɛ̂, “Fa wɛp ka', kɛ̌' sè'ni na, à be ce koo ba bèe.” 11E ka' làa wa'a, wowèe a doo bkeŋ a du àgho à wǎa rò, a ma'shi buu wɛɛwɛ a du a yě mbùu.

12À m ba à nfè' mò' Jisòs à ba à rla' mo', mbaŋrùŋwɛ̀ mò' à ba àfo ce msàasì mi m koo ye à nyor wɛɛwɛ. E ka' yɛ Jisòs a gwe njep nshè nè bsii, a bu' mmbo nè ye a laa enɛ̂, “Tatâ, wɛ̀ ka' kôŋ, à gee m ke'sè, ba nrara.” 13Jisòs à naa bo a joo ye àgho, a laa enɛ̂, “M ce kòŋ wa'a, kè'se, ba nrara.” E ka' làa wa'a, msàasì mi ku lo yě à nyòr. 14Jisòs à ciisì nè ye enɛ̂, “Fa suŋ ŋwɛ̀ mò' ka'. Dù duŋshi yò nyor nè ŋwɛ̀ taŋshi taŋshì embe Ndàp Nyʉ̀ tɛ à bo gèe taŋshì ce Musìs à m làa enɛ ŋwɛ̀ gee tɛ e bo ba nrara, tɛ bèe a bo rìŋ enɛ ŋwɛ̀ anà à kè'se nà.” 15Ka' e m làa enɛ e fa suŋ ŋwɛ̀ ka' wa'a, nsuŋ à ker misi a du à bdì' wɛɛwɛ, bèe a ce vʉ̀ à bkʉr à bkʉr tɛ a bo yu' buu ce e m ce yɛ'ni, tɛ e bo gee wowèe a luŋ efa wap byaŋ. 16E m ce fʉʉ efa mʉ̀ bèe, ce dù à ntee rìŋ, ce gèe rloo.

17À ka' ba nyʉ̀ mò', Jisòs à ka' ce yɛ'ni bèe, bèe Farìsi ba ŋgǎa ryɛ'ni mncir ce a m vʉ̌ à bu' mla' à ŋgǒŋ Galèlê, ba à ŋgǒŋ Jùdiyà wɛɛwɛ ker ba à rla' Jɛ̀rusalɛ̀m a cutè àfo. Tata Nyʉ̀ à m fa Jisòs ŋger à rgèe tɛ ŋgǎa byaŋ a ke'se. 18Bèe mo' a byɛ' ŋwɛ̀ mò' mbe kèŋ ce yì ŋgʉ̀' nyor mò' à m kwe, a gheter à rniŋ nè ye mbe ndàp, lɛ̀ njeptii Jisòs. 19Bèe a m ruu magòr, nduunjì yi ke' ba nè wowèe à rniŋ nè ŋwɛ̀ ca mbo ka'. Yi ka' ba wa'a, wowèe a ko' nè ye mbe tu ndap, a co'ni dì' mo' embo, a suusi ye mbe kèŋ cà mbe mʉ̀ bèe embe ndàp, a lɛ njeptii Jisòs. 20Jisòs à ka' yɛ lap rbyemì, a laa nè ŋwɛ̀ yaŋ anà enɛ̂, “Ŋkarà, mɛ̀ fòosi wɛ̀ efa yò buu bbebep.” 21Ŋgǎa ryɛ'ni mncir ba bèe Farìsi a kɛ' a ce làa enjep ntee enɛ̂, “Ŋwɛ̀ ce e ce bepsi rlii Nyʉ̀ na a nda? Ŋwɛ̀ ce àde' e foosì ŋwɛ̀ efa buu bbebep caa efa Nyʉ̀ yu nda?” 22Jisòs à ku riŋ yuu ce wowèe a m ce kwà'shi, a laa nè wowèe enɛ̂, “Wèe ce kwà'shi njɛ̀ɛ buu ca wa'a njokɛ? 23Yuu ce yi yu àtɛ̀r yu ba yǐ fɛ? Yu ba à rlàa enɛ̂, ‘Mɛ̀ fòosi wɛ̀ efa yò buu bbebep’ kɛ̀ à rlàa enɛ̂, ‘Lò mbekì, jɛ̂r’? 24Banɛ à rgèe tɛ wèe bo rìŋ weenɛ Muu Ŋwɛ̀ tʉr ŋger njep ŋgòŋ na à rfòosi bèe efa yàp buu bbebep.” E laa nè ŋwɛ̀ yaŋ ca enɛ̂, “M ce làa nè wɛ̀ enɛ à nati mbekì, lor yo kèŋ du à là'.” 25Nfè' à m tuuse ka', e natì mbekì à bsii bèe wɛɛwɛ, a lor yi kèŋ a ce yòŋshi Nyʉ̀ a ce dù fa yě là'. 26Wowèe a bɛɛŋgèr sê, a yoŋshi Nyʉ̀, a ce wɛp sê, a ce làa enɛ̂, “Wèr à yɛ buu bghagha' ntìni.”

27Ca yi ka' mì wɛɛ, Jisòs à fʉʉ, a ka' ce dù a yɛ àmbò ŋwɛ̀ ŋkùu mbǎa bàrà' mò' ce a m ce too ye enɛ Lɛvì cu mbe yi dǐ' rfà'. Jisòs à laa nè ye enɛ̂, “Vʉ̀ fa mɛ̌ mbùu.” 28Lɛvì à natì, a ma'shi yì buu wɛɛwɛ, a du a yě mbùu.

29Lɛvì à m gèe ma ŋkà' nè ye mbe yě ndàp. Ku' ŋgǎa ŋkùu mbǎa bàrà' ker ba bèe mo' a m ba mbo foŋ a cute a sir tɛbùr a wowèe a ce yeŋger. 30Bèe Farìsi ba bèe mo' efa wǎp mʉ ce a m ba ŋgǎa ryɛ'ni mncir a rʉ'ŋgèr, a laa nè ŋgǎa yɛ'ni buu Jisòs enɛ̂, “Wèe ce yeŋger a ce noŋger wèe ŋgǎa ŋkùu mbǎa bàrà' wèe ker ba ŋgǎa ŋgèe buu bbebep njokɛ?” 31Jisòs à beesì nè wowèe enɛ̂, “Bèe ce a ke ròo ŋwɛ̀ mcɛ̀p e ke ba ŋgǎa byaŋ, ke' ba běe btatap ka'. 32Mɛ̀ vʉ̀ à rkɛ' běe byɛɛnì ka'. Mɛ̀ vʉ̀ à rkɛ' ba ŋgǎa ŋgèe buu bbebep tɛ wowèe a bo kupse, mà' yàp buu bbebep anà.”

33Bèe a m làa nè Jisòs enɛ̂, “Ŋgǎa yɛ'ni buu Jǒn ba ŋgǎa yɛ'ni buu bèe Farìsi, a ke jì mdip, ce gèe rloo à nfè' wɛɛwɛ, geewa'a ŋgǎa yɛ'ni yò buu a ce yeŋger yap ker ce no buu.” 34Jisòs à beesì enɛ̂, “Wèe ce kwà'shi weenɛ àde' wèe ma'shì bèe ce a vʉ̀ ŋkǎ' bgùu nè njè ce nduu-gùu ku ba àfo a? 35Geewa'a, nfè' mò' be ba ce a be koo nduu ese wowèe tɛ wowèe a ji mdip à nfè' anà.”

36Jisòs à m mà' ŋgàa ca nè wowèe foŋ enɛ̂, “Àde' ŋwɛ̀ saa cɛ̌' fi la' mbendù cɛ̌' rʉ̀ʉ tarshi ka'. E ka' gee wa'a, banɛ a sàa cɛ̀' fi anà à cicì. Wɛ̀ ka' tar yi mbendù yǐ rʉ̀ʉ, yi ghɛɛte ka'. 37Àde' ŋwɛ̀ lor mrǔ' mfi lɛ njep mŋgùp mrù' vǐ brʉ̀ʉ ka'. E ka' gee wa'a banɛ mrǔ' mfi anà mi be lò koo, to'shi mŋgùp mrù' anà, tɛ mrù' mi kʉte à nshè, tɛ mŋgùp mrù' anà vi bʉ à cicì. 38Yi ke ba enɛ a lɛ mrǔ' mfi ba njep mŋgùp mrù' vǐ bfi tɛ mi bo kʉ̀te ka', tɛ mŋgùp mrù' vi to'ŋger ka'. 39Yi yu foŋ enɛ ŋwɛ̀ à ka' no mrù' ce mi koo, e ker koŋ à rno msɛ̌ŋ mrù' ka' njobè' e ka' no banɛ e be làa enɛ̂, ‘Mrù' ce mi koo mi yu àndèe nè msɛ̌ŋ mrù'.’ ”

Đang chọn:

Ñwaè' Luêk 5: LNT

Tô màu

Sao chép

So sánh

Chia sẻ