ܒܪܝܬܐ 2
2
1ܘܦܝܼܫ ܠܗܘܿܢ ܬܘܼܡܸܡܹܐ ܫܡܲܝܵܐ ܘܐܲܪܥܵܐ، ܘܟܠ ܕܐܝܼܬ ܒܓܵܘܲܝܗܝ.
2ܘܬܘܼܡܸܡ ܠܹܗ ܐܲܠܵܗܵܐ ܒܝܵܘܡܵܐ ܕܫܲܒ݂ܥܵܐ ܦܘܼܠܚܵܢܹܗ ܕܥܒ݂ܝܼܕ ܠܹܗ، ܘܢܝܼܚ ܠܹܗ ܒܝܵܘܡܵܐ ܕܫܲܒ݂ܥܵܐ ܡ̣ܢ ܟܠܹܗ ܦܘܼܠܚܵܢܹܗ ܕܥܒ݂ܝܼܕ ܠܹܗ. 3ܘܒܘܼܪܸܟ݂ ܠܹܗ ܐܲܠܵܗܵܐ ܠܝܵܘܡܵܐ ܕܫܲܒ݂ܥܵܐ ܘܩܘܼܕܸܫ ܠܹܗ، ܣܵܒܵܒ ܒܝܼܹܗ ܢܝܼܚ ܠܹܗ ܐܲܠܵܗܵܐ ܡ̣ܢ ܟܠܹܗ ܦܘܼܠܚܵܢܹܗ ܕܒܪܹܐ ܠܹܗ ܠܸܥܒ݂ܵܕܵܐ.
ܓܲܢܬܵܐ ܕܥܕܸܢ
4ܐܲܢܹܐ ܝܢܵܐ ܬܵܘܠܕܵܬܹ̈ܐ ܕܫܡܲܝܵܐ ܘܕܐܲܪܥܵܐ ܟܲܕ ܦܝܼܫ ܠܗܘܿܢ ܒܸܪܝܹܐ، ܒܝܵܘܡܵܐ ܕܥܒ݂ܝܼܕ ܠܹܗ ܡܵܪܝܵܐ ܐܲܠܵܗܵܐ ܐܲܪܥܵܐ ܘܫܡܲܝܵܐ، 5ܟܠ ܛܲܪܵܫܵܐ ܕܕܸܫܬܵܐ ܗܹܫ ܠܹܐ ܝܗ݇ܘܵܐ ܡܘܼܒܝܸܢܵܐ ܒܐܲܪܥܵܐ، ܘܟܠ ܢܨܝܼܒ݂ܬܵܐ ܕܕܸܫܬܵܐ ܗܹܫ ܠܹܐ ܝܗ݇ܘܵܐ ܡܘܼܓ̰ܝܸܢܵܐ، ܣܵܒܵܒ ܠܹܐ ܝܗ݇ܘܵܐ ܡܘܼܥܪܝܼܵܐ ܡܸܛܪܵܐ ܡܵܪܝܵܐ ܐܲܠܵܗܵܐ ܥܲܠ ܐܲܪܥܵܐ، ܘܐ݇ܢܵܫܵܐ ܠܲܝܬ ܗ݇ܘܵܐ ܕܦܵܠܹܚ ܗ݇ܘܵܐ ܠܐܲܪܥܵܐ. 6ܐܝܼܢܵܐ ܡܲܒܘܼܥܵܐ ܢܒ݂ܝܼܥ ܠܹܗ ܡ̣ܢ ܐܲܪܥܵܐ، ܘܡܘܼܫܬܹܐ ܠܹܗ ܠܟܠܵܗ̇ ܦܵܬܵܐ ܕܐܲܪܥܵܐ. 7ܘܓܒ݂ܝܼܠ ܠܹܗ ܡܵܪܝܵܐ ܐܲܠܵܗܵܐ ܠܐܵܕܵܡ ܥܲܦܪܵܐ ܡ̣ܢ ܐܲܪܥܵܐ،#2:7 ܥܸܒ݂ܪܵܐܝܼܬ ܒܡܲܥܢܵܝܵܐ ܕܐ݇ܢܵܫܵܐ. ܘܩܵܠܵܐ ܕܚܲܒܪܵܐ ܕ”ܐܵܕܵܡ“ ܒܸܕܡܵܝܵܐ ܝܠܹܗ ܠܩܵܠܵܐ ܕܚܲܒܪܵܐ ܕ”ܐܲܪܥܵܐ“ ܒܠܸܫܵܢܵܐ ܥܸܒ݂ܪܵܝܵܐ. ܘܢܦܝܼܚ ܠܹܗ ܒܦܘܼܩܵܩܘܼ̈ܗܝ ܢܫܲܡܬܵܐ ܕܚܲܝܹ̈ܐ، ܘܗܘܹܐ ܠܹܗ ܐܵܕܵܡ ܠܓܵܢܵܐ ܚܵܝܬܵܐ.
8ܘܢܨܝܼܒ݂ ܠܹܗ ܡܵܪܝܵܐ ܐܲܠܵܗܵܐ ܓܲܢܬܵܐ ܒܥܕܸܢ ܡ̣ܢ ܡܲܕܢܚܵܐ، ܘܡܘܼܬܸܒ݂ ܠܹܗ ܬܵܡܵܐ ܠܐܵܕܵܡ ܕܓܒ݂ܝܼܠ ܠܹܗ. 9ܘܡܘܼܓ̰ܝܸܢܹܗ ܡܵܪܝܵܐ ܐܲܠܵܗܵܐ ܡ̣ܢ ܐܲܪܥܵܐ ܟܠ ܐܝܼܠܵܢܵܐ ܫܘܼܗܘܸܬܵܐ ܠܚܙܵܝܬܵܐ، ܘܨܦܵܝܝܼ ܠܡܹܐܟ݂ܘܼܠܬܵܐ، ܘܐܝܼܠܵܢܵܐ ܕܚܲܝܹ̈ܐ ܒܒܹܝܬ݇ ܦܲܠܓܵܐ ܕܓܲܢܬܵܐ، ܘܐܝܼܠܵܢܵܐ ܕܝ݇ܕܲܥܬܵܐ ܕܛܵܒ݂ܬܵܐ ܘܒܝܼܫܬܵܐ.
10ܢܲܗܪܵܐ ܒܸܓ̰ܪܵܝܵܐ ܝܗ݇ܘܵܐ ܡ̣ܢ ܥܕܸܢ ܠܡܲܫܬܘܼܝܹܐ ܠܓܲܢܬܵܐ، ܘܡ̣ܢ ܬܵܡܵܐ ܦܪܝܼܫ ܠܹܗ ܘܗܘܹܐ ܠܹܗ ܠܐܲܪܒܥܵܐ ܦܲܥܘܵܢܹ̈ܐ. 11ܫܸܡܵܐ ܕܚܲܕ ܦܝܼܫܘܿܢ ܝܼܠܹܗ، ܗ̇ܘ ܕܒܸܚܕܵܪܵܐ ܝܠܹܗ ܠܚܵܕܸܪ̈ܘܵܢܹܐ ܕܟܠܵܗ̇ ܐܲܪܥܵܐ ܕܚܘܝܼܠܵܐ، ܕܬܵܡܵܐ ܐܝܼܬ ܕܲܗܒ݂ܵܐ. 12ܘܕܲܗܒ݂ܵܐ ܕܗ̇ܝ ܐܲܪܥܵܐ ܨܸܦܝܵܐ ܝܠܹܗ؛ ܬܵܡܵܐ ܐܝܼܬ ܒܹܪܘܼܠܚܵܐ ܘܟܹܐܦܵܐ ܕܫܘܼܗܲܡ. 13ܘܫܸܡܵܐ ܕܢܲܗܪܵܐ ܕܬܪܹܝ ܓܝܼܚܘܿܢ ܝܼܠܹܗ، ܗ̇ܘ ܕܒܸܚܕܵܪܵܐ ܝܠܹܗ ܠܚܵܕܸܪ̈ܘܵܢܹܐ ܕܟܠܵܗ̇ ܐܲܪܥܵܐ ܕܟܘܼܫ. 14ܘܫܸܡܵܐ ܕܢܲܗܪܵܐ ܕܬܠܵܬܵܐ ܕܸܩܠܲܬ ܝܼܠܹܗ، ܗ̇ܘ ܕܒܹܐܙܵܠܵܐ ܝܠܹܗ ܠܵܡܲܕܢܚܵܐ ܕܐܵܬܘܿܪ. ܘܢܲܗܪܵܐ ܕܐܲܪܒܥܵܐ ܦܪܵܬ ܝܼܠܹܗ.
ܐܝܼܠܵܢܵܐ ܕܝ݇ܕܲܥܬܵܐ ܕܛܵܒ݂ܬܵܐ ܘܒܝܼܫܬܵܐ
15ܘܫܩܝܼܠ ܠܹܗ ܡܵܪܝܵܐ ܐܲܠܵܗܵܐ ܠܐܵܕܵܡ، ܘܡܘܼܬܸܒ݂ ܠܹܗ ܒܓܲܢܬܵܐ ܕܥܕܸܢ ܠܸܦܠܵܚܘܼܗ̇ ܘܠܸܢܛܵܪܘܼܗ̇. 16ܘܦܩܝܼܕ ܠܹܗ ܡܵܪܝܵܐ ܐܲܠܵܗܵܐ ܠܐܵܕܵܡ، ܒܹܐܡܵܪܵܐ، ”ܡ̣ܢ ܟܠ ܐܝܼܠܵܢܵܐ ܕܓܲܢܬܵܐ ܡܵܨܹܝܬ ܐܵܟ݂ܠܹܬ، 17ܐܝܼܢܵܐ ܡ̣ܢ ܐܝܼܠܵܢܵܐ ܕܝ݇ܕܲܥܬܵܐ ܕܛܵܒ݂ܬܵܐ ܘܒܝܼܫܬܵܐ ܠܵܐ ܐܵܟ݂ܠܹܬ، ܣܵܒܵܒ ܒܝܵܘܡܵܐ ܕܐܵܟ݂ܠܹܬ ܡܸܢܹܗ ܡܝܵܬܵܐ ܒܸܬ ܡܵܝܬܹܬ.“
ܒܪܵܝܬܵܐ ܕܒܲܟ݂ܬܵܐ
18ܘܐ݇ܡܝܼܪܹܗ ܡܵܪܝܵܐ ܐܲܠܵܗܵܐ، ”ܠܹܐ ܝܠܵܗ̇ ܨܦܵܝܝܼ ܕܗܵܘܹܐ ܐܵܕܵܡ ܒܢܲܦ̮ܫܹܗ. ܒܸܬ ܥܵܒ݂ܕܹܢ ܩܵܬܹܗ ܗܲܝܸܪܵܢܵܐ ܐܲܝܟ݂ ܕܝܼܹܗ.“ 19ܘܓܒ݂ܝܼܠ ܠܹܗ ܡܵܪܝܵܐ ܐܲܠܵܗܵܐ ܡ̣ܢ ܐܲܪܥܵܐ ܟܠ ܚܲܝܘܬܵܐ ܕܕܸܫܬܵܐ، ܘܟܠ ܦܵܪܲܚܬܵܐ ܕܫܡܲܝܵܐ، ܘܡܘܼܐܬܹܐ ܠܹܗ ܠܟܸܣ ܐܵܕܵܡ، ܕܚܵܙܹܐ ܗ݇ܘܵܐ ܡܘܿܕܝܼ ܒܸܬ ܩܵܪܹܐ ܗ݇ܘܵܐ ܠܵܗ̇، ܘܟܠ ܫܸܡܵܐ ܕܩܵܪܹܐ ܗ݇ܘܵܐ ܐܵܕܵܡ ܠܗ̇ܝ ܓܵܢܵܐ ܚܵܝܬܵܐ، ܗ̇ܘ ܝܼܗ݇ܘܵܐ ܫܸܡܘܼܗ̇. 20ܘܡܘܼܬܸܒ݂ ܠܹܗ ܐܵܕܵܡ ܫܸܡܵܢܹ̈ܐ ܠܟܠ ܒܥܝܼܪܵܐ، ܘܠܟܠ ܦܵܪܲܚܬܵܐ ܕܫܡܲܝܵܐ، ܘܠܟܠ ܚܲܝܘܬܵܐ ܕܕܸܫܬܵܐ، ܐܝܼܢܵܐ ܠܐܵܕܵܡ ܠܵܐ ܡܫ݇ܟ̰ܝܼܚ ܠܹܗ ܗܲܝܸܪܵܢܵܐ ܐܲܝܟ݂ ܕܝܼܹܗ. 21ܗ̇ܝܓܵܗ ܕܪܹܐ ܠܹܗ ܡܵܪܝܵܐ ܐܲܠܵܗܵܐ ܫܸܢܬܵܐ ܝܲܩܘܼܪܬܵܐ ܥܲܠ ܐܵܕܵܡ ܘܛܠܝܼܥ ܠܹܗ، ܘܫܩܝܼܠ ܠܹܗ ܚܕܵܐ ܡ̣ܢ ܐܸܠܥܘܼ̈ܗܝ، ܘܡܘܼܬܸܒ݂ ܠܹܗ ܒܸܣܪܵܐ ܡ̣ܢ ܓܹܒܘܼܗ̇. 22ܘܬܘܼܪܸܨ ܠܹܗ ܡܵܪܝܵܐ ܐܲܠܵܗܵܐ ܒܲܟ݂ܬܵܐ ܡ̣ܢ ܐܸܠܥܵܐ ܕܫܩܝܼܠ ܠܹܗ ܡ̣ܢ ܐܵܕܵܡ، ܘܡܘܼܐܬܝܵܐ ܠܹܗ ܠܟܸܣ ܐܵܕܵܡ. 23ܘܐ݇ܡܝܼܪܹܗ ܐܵܕܵܡ،
”ܐܵܗܵܐ ܐܵܕܝܼܵܐ ܓܲܪܡܵܐ ܝܠܵܗ̇ ܡ̣ܢ ܓܲܪܡܝܼ،
ܘܒܸܣܪܵܐ ܡ̣ܢ ܒܸܣܪܝܼ.
ܒܘܼܬ ܐܵܗܵܐ ܒܸܬ ܦܵܝܫܵܐ ܩܪܝܼܬܵܐ ܒܲܟ݂ܬܵܐ،#2:23 ܚܲܒܪܵܐ ܕ”ܒܲܟ݂ܬܵܐ“ ܒܸܕܡܵܝܵܐ ܝܠܹܗ ܠܚܲܒܪܵܐ ܢܸܩܒܬܵܢܵܝܵܐ ܕ”ܓܲܒ݂ܪܵܐ“ ܒܠܸܫܵܢܵܐ ܥܸܒ݂ܪܵܝܵܐ.
ܣܵܒܵܒ ܡ̣ܢ ܐ݇ܢܵܫܵܐ ܦܝܼܫ ܠܵܗ̇ ܫܩܝܼܠܬܵܐ.“
24ܒܘܼܬ ܐܵܗܵܐ، ܒܸܬ ܫܵܒܹܩ ܐ݇ܢܵܫܵܐ ܠܒܵܒܘܼܗܝ ܘܠܝܸܡܹܗ ܘܒܸܬ ܬܵܒܹܥ ܠܒܲܟ݂ܬܹܗ، ܘܒܸܬ ܗܵܘܝܼ ܚܲܕ ܦܲܓ݂ܪܵܐ.
25ܬܸܪܘܲܝܗܝ ܫܘܼܠܚܵܝܹ̈ܐ ܝܗ݇ܘܵܘ، ܐܵܕܵܡ ܘܒܲܟ݂ܬܹܗ، ܘܠܹܐ ܝܗ݇ܘܵܘ ܒܸܢܟ݂ܵܦܵܐ.
Đang chọn:
ܒܪܝܬܐ 2: ABTAB
Tô màu
Sao chép
So sánh
Chia sẻ
Bạn muốn lưu những tô màu trên tất cả các thiết bị của mình? Đăng ký hoặc đăng nhập
Aramaic Bible Translation Assyrian Bible © 2025 Aramaic Bible Translation
