Những câu Kinh Thánh phổ biến từ JESAYA 58

Chia sẻ

Aku tetap negu-negu kam dingen mesuri kam alu si mehuli. Kubahan kam tetap megegeh ras mejuah-juah. Kam desken peken si la kurang lau, desken sumbul lau si la pernah kerah.

Enda kap puasa si ngena ateKu: Osarilah rante pengiket janah agui baban kinilabujuren, janah bebaskenlah kalak si idehkenndu. Raskenlah panganndu ras kalak si kelihen, janah berelah kalak musil si la lit rumahna kesilang i bas rumahndu. Berelah uis man kalak si la lit uisna, janah ola itulakndu kade-kadendu si mindo penampat.

Adi bage perbahanenndu, ersinalsal me lias ateKu i babondu bali ras matawari erpagi-pagi, janah luka-lukandu lampas malem. Aku tetap rembak ras kam lako ngkelini kam, janah sinalsal kemulianKu tetap ngarak-ngarak kam.

Adi ertoto kam, Kudengkehken pertotonndu, janah adi erlebuh kam, minter Kualoi. Olanai idedehndu kalak, olanai kam megombang, janah olanai belaskenndu kata si la tahu kerna kalak

adi iberendu nakan man kalak si kelihen, janah isampatindu kalak si lit i bas kesusahen, adi bage kegelapen si lit sekelewetndu salih jadi terang seri ras ciger wari.

Kai si nai enggo runtuh, ipajekken bangsandu ka mulihi i babo palas si nuria. Terberita me kam pagi jadi si mpekena mulihi benteng-benteng e, dingen ngumban rumah si enggo runtuh.”

Nina TUHAN, “Adi ipebadiakenndu wari Sabat janah adi i bas wari e la kam ndarami kepentingenndu jine; adi iergaindu waringKu si Badia e, janah ihamatindu alu la erdalan ndauh, la erdahin, tah pe ncakapken si sia-sia, adi bage idatndu me keriahen i bas kam ersembah man bangKu. Kubahan maka kam ihamati i belang-belang doni enda janah senang akapndu nggeluh i bas negeri si nai Kubereken man nini-ninindu, Jakup.” Bagenda me nina TUHAN.

Puasandu e mahanca kam erjengil saja ngenca, rubat dingen ninjui kalak. Akapndu kin arah puasa si bage banci ipaksandu Aku megiken pertotonndu? Asum kam erpuasa isuhsahindu bandu; mungkuk bahanndu takalndu bali ras bulung bero, jenari ikimbangkenndu uis guni ras abu inganndu medem. E kin ikatakenndu puasa? Akapndu kin ngena ateKu perbahanen si bage?