Números 4
4
Leví ayllukunapa imam ruwanankumanta
1Moisestawan Aarontam Tayta Dios nirqa:
2Leví ayllunkunamantam Coatpa mirayninkunata ayllunkuman chaynataq ñawpaq taytankupa mirayninkuman hina yupankichik. 3Kimsa chunka watayuqmanta pichqa chunka watayuqkamam yupankichik. Paykunam kanqaku asuykamuwanaykichik carpapi servikuqkuna. 4Coatpa mirayninkunaqa, asuykamuwanaykichik carpapim imapas ñoqallapaqña sapaqchasqa kaqkunata nanachikunqaku.
5Israelpa mirayninkuna huklawman astakuptinkum, Aaronwan churinkuna carpa rakinaq velota hurqonqaku, hinaspam Arcata chaywan tapanqaku. 6Chay velopa hawantam fino qalaswan tapanqaku, chaypa hawanmanñataqmi morado telawan tapanqaku, hinaspam varillakunata ustuchispa apanqaku.
7Ñoqapa qayllaypi kaq mesapa hawanmanpas morado telatam mastanqaku, chaypa hawanmanñataqmi platokunata, cucharakunata, tazonkunata hinaspa vino tallinapaq aysakukunata churanqaku. Chay mesapa hawanpitaqmi tantatapas mana tipiyta ñoqapa qayllaypi churankichik. 8Tukuy chaykunapa hawanmanñataqmi guindo telata mastanqaku, hinaspam fino qalaskunawan tapanqaku. Varillankunatam ustuchinqaku mesata apanankupaq.
9Chaymantam candelabrota, mecheronkunata, mecha limpianankunata, platochankunata chaynataq aceitepaq llapa serviciokunatapas morado telawan tapanqaku. 10Fino qalaskunapim lliwta qepicharunqaku hinaspam chakanaman churaspa apanqaku. 11Qorimanta altarpa hawanmanpas morado telatam mastanqaku, chaypa hawantañataqmi fino qalaskunawan tapanqaku, hinaspam chay altarta apanankupaq varillankunata ustuchinqaku.
12Santuariopi llapa serviciokunatapas morado pañopi mayturuspam fino qalaskunapi kipuruspa chakanaman churaspa apanqaku. 13Altartapas wirayuq uchpanta limpiaruspankum grosella telawan tapanqaku. 14Hinaspam chay altarpa hawanman llapa servicionkunata churanqaku otaq palankunata, trinchenkunata, kallanankunata hinaspa tazonninkunata. Hawanmanñataqmi fino qalaskunawan tapanqaku hinaspa varillankunata ustuchispa chay altarta apanqaku.
15Santuariopi llapa serviciokunata huklawman apanankupaq Aaronwan churinkuna tapayta tukuruptinkum, Coatpa mirayninkuna yaykuspanku apanqaku. Ñoqapaq sapaqchasqa kaqkunatam ichaqa ama llapchanqakuchu, chaynapi ama wañurunankupaq. Chaynaqa, ñoqaman asuykuwanaykichik carpapi kaq tukuy ima kaqkunatam Coatpa mirayninkuna apanqaku. 16Sacerdote Aaronpa churin Eleazarmi cuentallikunqa candelabro ratachinapaq aceitemanta, miski asnaq inciensomanta, sapa punchaw ofrecewanaykichik kawsay ofrendakunamanta, ñoqapaq sapaqchaspa tallinapaq kaq aceitemanta. Nanachikunqataqmi asuykamuwananku carpatapas chaynataq tukuy ima servicionkunatapas, nispa.
17Moisestawan Aarontam Tayta Dios kaynata nirqa:
18Leví ayllumanta kaq Coatpa mirayninkunataqa amam qollurachinkichikchu. 19Santuariopa imankunatapas llapcharuspanku mana wañunankupaqmi kaynata ruwankichik: Aaronmi churinkunapiwan santuarioman yaykuspa paykunaman willanqaku imam ruwanankuta chaynataq imakunam apanankutapas. 20Chaynapim Coatpa mirayninkunaqa santuarioman yaykuspapas chaypi kaqkunataqa mana qawayllapas qawanqakuchu mana wañurunankupaq nispa.
21Chaymantam Moisesta Tayta Dios nirqa:
22Gersonpa mirayninkunatapas tayta-mamanpa ayllunman hina yupay, 23kimsa chunka watayuqmanta pichqa chunka watayuqkama, chay yupasqayki kaqkunam asuykamuwanaykichik carpapi servikunqaku.
24Gersonpa mirayninkunapa ruwanankuna hinaspa apanankunam kaykuna. 25Paykunam apanqaku: Santuariopa cortinankunata, asuykuwanaykichik carpata, carpapa qatankunata, fino qalasmanta qatakunata, carpapa punkunpi telata, 26patiopa cortinankunata, patiopa punkunpi telakunata. Chaykunam kachkan carpapa muyuriqninpi chaynataq altarpa muyuriqninpi. Hina paykunataqmi tukuy chaykunapa waskankunatapas apanqaku chaynataq ruwanankupaq tukuy ima serviciokunatapas. Chaynaqa, Gersonpa mirayninkunam tukuy chaykunata ruwanqaku. 27Aaronwan churinkunam Gersonpa mirayninkunata kamachinqaku imakunam ruwanankuta chaynataq imakunam apanankutapas. Paykunam tukuy chaykunata apaspanku nanachikunqaku. 28Asuykamuwanaykichik carpapim Gersonpa mirayninkuna chaykunata ruwanqaku, Aaronpa churin sacerdote Itamarñataqmi paykunata kamachinqa.
29Meraripa mirayninkunatapas ayllunman hinam yupanki. 30Kimsa chunka watayuqmanta pichqa chunka watayuqkamam yupanki. Yupasqayki kaqkunam asuykuwanaykichik carpapi servikunqaku. 31Paykunam asuykuwanaykichik carpapa marconkunata, varillankunata, pilarninkunata, pilarpa toqoyuq tiyanankunata, 32patiopa muyuriqninpi pilarkunata tiyanantintakama, estacankunata, waskankunata hinaspa servichikunapaq tukuy ima kaqkunatapas apanqaku. Sapakamamanmi imakunam apanankutapas ninki. 33Asuykamuwanaykichik carpapim Meraripa mirayninkuna chaykunata ruwanqaku, Aaronpa churin sacerdote Itamarñataqmi paykunata kamachinqa, nispa.
34Moiseswan Aaronmi Israelpa mirayninkunapi kamachikuqkunapiwan Coatpa mirayninkunata ayllunkuman hina yuparqaku. 35Kimsa chunka watayuqmanta pichqa chunka watayuqkamam, Diosman asuykuna carpapi servikunankupaq yupasqa karqaku. 36Ayllunman hina yuparuptinkum, iskay waranqa qanchis pachak pichqa chunka qarikuna karqaku. 37Paykunam karqaku Coatpa mirayninkuna, Diosman asuykuna carpapi servikuqkuna. Paykunatam Moisesman Tayta Diospa kamachisqanman hina Moiseswan Aarón yuparqaku.
38Gersonpa mirayninkunatapas ayllunkuman hinam yuparqaku. 39Kimsa chunka watayuqmanta pichqa chunka watayuqkamam Diosman asuykuna carpapi servikunankupaq yupasqa karqaku. 40Iskay waranqa soqta pachak kimsa chunka qarikunam karqaku. 41Paykunam ayllunkuman hina Gersonpa mirayninkuna karqaku Diosman asuykuna carpapi servikuqkuna. Paykunatam Tayta Diospa kamachisqanman hina Moiseswan Aarón yuparqaku.
42Meraripa mirayninkunatapas ayllunkuman hinam yuparqaku. 43Kimsa chunka watayuqmanta pichqa chunka watayuqkamam Diosman asuykuna carpapi servikunankupaq yupasqa karqaku. 44Yuparuptinkum kimsa waranqa iskay pachaknin qarikuna karqaku. 45Chaynam karqa Meraripa mirayninkuna ayllunkuman hina yuparuptinku. Paykunatam Moisesman Tayta Dios kamachisqanman hina, Moiseswan Aarón yuparqaku.
46Moiseswan Aaronmi Israelpa mirayninkunapi kamachikuqkunapiwan Leví aylluta yuparqaku. Ayllunkuman hinam sapakamata yuparqaku. 47Kimsa chunka watayuqmanta pichqa chunka watayuqkamam yuparqaku, yuparqakuqa Diosman asuykuna carpapi servikunankupaq kaqkunatam. 48Leví ayllumanta kaqkunata yuparuptinkum pusaq waranqa pichqa pachak pusaq chunka qarikuna karqaku. 49Moisesman Tayta Diospa nisqanman hinam yuparqaku, hinaspam sapakamaman imam ruwanankuta chaynataq imam apanankutapas kamachirqaku. Chaynataqa ruwarqaku Moisesman Tayta Diospa kamachisqanman hinam.
ที่ได้เลือกล่าสุด:
Números 4: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012