Números 25
25
Baal-peor idolota yupaychasqankumanta
1Israelpa mirayninkunam Sitim lawpi samaruspanku, Moabita warmikunawan huchallikuyta qallaykurqaku. 2Chay warmikunam diosninkuman ofrecesqanku mikuykunata chay runakunaman mikuchirqakum, chaymi mikuruspanku Moab runakunapa idolonkunataña yupaycharqaku. 3Chaynapim Israel runakunaqa Baal-peor idolotaña qatirqaku, chayraykum Tayta Dios paykunapa contranpi llumpayta piñakururqa. 4Hinaspam Moisesta nirqa:
Llapa kamachiqninkunata huñuruspa lliw runapa qawasqanta ñoqa Tayta Diospa qayllaypi punchaw pacha warkurariy, chaynapim Israel runakunapa contranpi piñakuyniy taninqa, nispa.
5Chaymi Israel runakunapa juezninkunata Moisés kamachirqa:
Baal-peor idolota yupaychaq aylluykichikkunata sapakama wañuchiychik, nispa.
6Diosman asuykuna carpapa punkunpi Moiseswan Israelpa mirayninkuna waqachkaptinkum, huk israelita runa lliwpa qawasqanta madianita warmita carpanman pusaykurqa. 7Chayta rikuspanmi Aaronpa willkan otaq Eleazarpa churin sacerdote Finees, huñunakuymanta hatarispan lanzata aparikuspa 8chay warmi pusaykuq runapa carpanman yaykuruspan iskayninkuta wiksanpatakama lanzawan tuksirurqa. Chayñam Israelpa mirayninkuna wañuchiq peste onqoy tanirurqa. 9Chaykamaqa iskay chunka tawayuq waranqa runakunañam wañururqaku.
10Chaymi Moisesta Tayta Dios nirqa:
11Aaronpa willkan otaq Eleazarpa churin sacerdote Fineesmi Israel runakunapa contranpi piñakuyniyta tanirachin, payqa ñoqa hina piñakuspam chay runata wañurachirqa. Chayraykum Israel miraykunapa contranpi llumpayta piñakuchkaspaypas paykunataqa mana puchukarachirqanichu. 12Chaynaqa, paywan hawkayay pacto ruwasqayta willay. 13Ñoqapi sonqoyuq kasqanraykum paywanpas chaynataq mirayninkunawanpas pactota ruwasaq, chaynapi sacerdoteykunaña wiñaypaq kanankupaq. Chaynataqa ruwani Israel miraykunapa huchankunata pampachaykachiwasqanraykum, nispa.
14Madián warmiwan kuska wañuruq runaqa karqa Salupa churin Zimrim, Zimriqa karqa Simeón ayllupi kamachikuqmi. 15Chay Madián warmiñataqmi karqa Zurpa churin Cozbi. Zurqa karqa Madián runakunapa huknin kamachiqninmi.
16Moisestam Tayta Dios nirqa:
17Madián runakunata atacaspa wañuchiychik. 18Paykunaqa Baal-peor idolonkuwanmi engañasurqankichik, engañasurqankichiktaqmi Madianpi kamachikuqpa warmi churin Cozbiwanpas. Chay warmiqa paykunapa ayllunmi karqa. Baal-peor idolota yupaychasqaykichikmanta castigasqay punchawmi Cozbipas lanzawan wañuchisqa karqa, nispa.
ที่ได้เลือกล่าสุด:
Números 25: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012