Números 2
2
Israel runakunapa kamachiqninkunamanta
1Moisestawan Aarontam Tayta Dios kaynata nirqa:
2Israelpa mirayninkunaqa, asuykamuwanaykichik carpapa karu muyuriqninpim, sapakama maymi banderankupa kasqanpi chaynataq ayllunkupa señalninman hina samanqaku.
3Carpapa ñawpaqninpim otaq intipa qespimunan lawninpim, banderankuman hina Judá ayllu tropa-tropa samanqa. Judá ayllupa kamachiqninmi karqa Aminadabpa churin Naasón. 4Judapa tropankunamantam yupasqankuman hina qanchis chunka tawayuq waranqa soqta pachaknin qarikuna karqaku. 5Judá ayllupa alleq lawninpim Isacar ayllu samanqa. Isacar ayllupa capitanninmi karqa Zuarpa churin Natanael. 6Isacarpa tropankunamantam yupasqankuman hina pichqa chunka tawayuq waranqa tawa pachaknin qarikuna karqaku. 7Judá ayllupa ichoq lawninpim Zabulón ayllu samanqa. Zabulonpa mirayninkunapa capitanninmi karqa Helonpa churin Eliab. 8Paypa tropankunam yupasqankuman hina pichqa chunka qanchisniyuq waranqa tawa pachaknin qarikuna karqaku. 9Chaynaqa, Judapa campamentonmantam yupasqankuman hina pachak pusaq chunka soqtayuq waranqa tawa pachaknin qarikuna karqaku. Paykunam Israelpa ñawpaqninta rirqaku.
10Rubén ayllupa banderanmi, carpapa sur lawninpi otaq alleq lawninpi kanqa. Rubén ayllupa capitanninmi karqa Sedeurpa churin Elisur. 11Paypa tropankunam yupasqankuman hina tawa chunka soqtayuq waranqa pichqa pachaknin qarikuna karqaku. 12Rubén ayllupa alleq lawninpim Simeón ayllu samanqa. Simeonpa mirayninkunapa capitanninmi karqa Zurisadaipa churin Selumiel. 13Paypa tropankunam yupasqankuman hina pichqa chunka isqonniyuq waranqa kimsa pachaknin qarikuna karqaku. 14Rubén ayllupa ichoq lawninpim Gad ayllu samanqa. Gadpa mirayninkunapa capitanninmi karqa Deuelpa churin Eliasaf. 15Paypa tropankunam yupasqankuman hina tawa chunka pichqayuq waranqa soqta pachak pichqa chunka qarikuna karqaku. 16Chaynaqa, Rubenpa campamentomantam yupasqankuman hina, pachak pichqa chunka hukniyuq waranqa tawa pachak pichqa chunka qarikuna karqaku. Paykunam Judá ayllupa qepanta rinqaku.
17Paykunapa qepantañataqmi otaq chay tawa campamentopa chawpintañataqmi ñoqaman asuykamuwanaykichik carpata aparikuspa Leví ayllu rinqa. Samasqankuman hinam sapakama banderankuman hina rinqaku.
18Efraín ayllupa banderanmi, carpapa inti seqaykunan lawninpi otaq carpapa qepanpi samanqa. Efraín ayllukunapa capitanninmi karqa Amiudpa churin Elisama. 19Paypa tropankunam yupasqankuman hina tawa chunka waranqa pichqa pachaknin qarikuna karqaku. 20Efraín ayllupa alleq lawninpim Manasés ayllu samanqa. Manasés ayllupa capitanninmi karqa Pedasurpa churin Gamaliel. 21Paypa tropankunam yupasqankuman hina kimsa chunka iskayniyuq waranqa iskay pachaknin qarikuna karqaku. 22Efraín ayllupa ichoq lawninpim Benjamín ayllu samanqa. Benjamín ayllupa capitanninmi karqa Gedeonipa churin Abidán. 23Paypa tropankunam yupasqankuman hina kimsa chunka pichqayuq waranqa tawa pachaknin qarikuna karqaku. 24Chaynaqa, Efrainpa campamentonmantam yupasqankuman hina pachak pusaqniyuq waranqa pachaknin qarikuna karqaku. Paykunam Leví ayllupa qepanta rinqaku.
25Dan ayllupa banderanmi, carpapa norte lawninpi otaq ichoq lawninpi samanqa. Dan ayllupa capitanninmi karqa Amisadaipa churin Ahiezer. 26Paypa tropankunam yupasqankuman hina soqta chunka iskayniyuq waranqa qanchis pachaknin qarikuna karqaku. 27Dan ayllupa alleq lawninpim Aser ayllu samanqa. Aserpa capitanninmi karqa Ocranpa churin Pagiel. 28Paypa tropankunam yupasqankuman hina tawa chunka hukniyuq waranqa pichqa pachaknin qarikuna karqaku. 29Dan ayllupa ichoq lawninpim Neftalí ayllu samanqa. Neftalí ayllupa capitanninmi karqa Enanpa churin Ahira. 30Paypa tropankunam yupasqankuman hina pichqa chunka kimsayuq waranqa tawa pachaknin qarikuna karqaku. 31Chaynaqa, Danpa campamentonmantam yupasqankuman hina pachak pichqa chunka qanchisniyuq waranqa soqta pachaknin qarikuna karqaku. Paykunam chay kimsa campamentopa qepanta banderankuwan kuska rinqaku.
32Chaynaqa, ayllunkuman hina chaynataq campamentonkuman hina Israelpa mirayninkunata yuparuptinkum soqta pachak kimsayuq waranqa pichqa pachak pichqa chunka qarikuna karqaku. 33Leví ayllutam ichaqa, Moisesman Tayta Diospa kamachisqanman hina mana yuparqakuchu.
34Moisesman Tayta Diospa kamachisqanta hinam Israelpa mirayninkuna ruwarqaku. Paykunaqa sapakamam maymi banderankupa kasqanpi samarqaku hinaspa ayllunkuman hina rirqaku.
ที่ได้เลือกล่าสุด:
Números 2: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012