Números 11
11
Aychata qonanpaq Tayta Diospa prometekusqanmanta
1Huk punchawmi Israelpa mirayninkuna sasachakuykunapi kaspanku Tayta Diospa contranpi rimarqaku. Chaymi pay anchallataña piñakuruspan campamentopa muyuriqninta ninawan kañarurqa. 2Hinaptinmi runakuna qaparispanku Moisesta qayakurqaku, Moisesñataqmi Tayta Diosta mañakurqa. Chayñam chay nina tanirurqa. 3Tayta Diospa ninan paykuna ukupi ratarirusqanraykum chay sitiota “#11.3 Hebreo simipi Tabera ninanqa “lenwaspa ruparuq nina”, ninanmi.Tabera” nispa suticharqaku.
4Israelpa mirayninkunamanmi huklaw llaqtayuq runakuna hukllawakaramurqa. Paykunam wiksanku huntachiyllapi yuyaymanaqku. Chaymi Israelpa mirayninkunapas paykunata qatipakuspa kaynata nispa waqarqaku:
¡Maypiraq aycha mikuykunanchikpaq! 5¡Maypiraq Egipto nacionpi mana qollqellapaq mikusqanchik challwa, pepinokuna, sandillakuna, porokuna, cebollakuna chaynataq ajoskunapas! 6Kunanqa yarqaymantam wañuruchkanchikña, kay “maná” sutiyuq mikuyllatañam kaypiqa tarinchik, nispanku.
7“Maná” sutiyuq mikuyqa culantropa muhumanmi rikchakurqa, colorninñataqmi karqa resina hina qellu. 8#Ex 16.31.Runakunam lloqsispanku huñukamuqku, hinaspam maraypi otaq muchkapi kutaspanku mankapi yanuqku, otaqmi tortata ruwaqku; asnayninñataqmi karqa chayllaraq hurqosqa aceitepa asnaynin hina. 9#Ex 16.13-15.Campamentoman tuta sullamuptinmi “maná” sutiyuq mikuypas wichimuq.
10Moisesmi uyarirurqa Israelpa mirayninkuna carpankupa punkunpi waqasqankuta. Chaymi Tayta Dios anchallataña piñakurqa. Chay ruwasqankutaqa Moisespas mana allinpaqmi qawarqa. 11Hinaptinmi Tayta Diosta Moisés nirqa:
¿Imanasqataq kay serviqnikita ñakarichiwanki? ¿Imanasqataq mana yanapaykuwankichu? ¿Imanasqataq kay runaykikunata churkuykuwanki? 12¿Ñoqaqa paykunapa tayta mamanchu karqani ñuñuq wawata hina ñawpaq taytankuman prometesqayki allpaman marqayniypi apanaypaq? 13¿Maymantataq kay runakunaman qonaypaq aychata hurqomusaq? Waqastinmi ñoqaman hamunku: “Mikunaykupaq aychata qowayku”, nispanku. 14Sapallayqa manam kay runaykikuna pusaytaqa atiymanchu, ancha sasallañam. 15Sichum chaynata ñoqawan ruwaspaykiqa, ama hina kaspa wañurachiway. Hinaptinqa manañam chayna sasachakuykunapi kasaqñachu, nispa.
16Chaymi Moisesta Tayta Dios nirqa:
Israelpa mirayninkunamanta reqsisqayki qanchis chunka ancianokunata otaq paykunapi kamachikuqkunata huñumuway hinaspa asuykamuwanaykichik carpapa punkunman pusamuptiki qanwan kuska suyachunku. 17Uraykamuspaymi qanwan rimasaq, hinaspam qampi kaq espiritumanta paykunaman qosaq, chaynapi runakuna nanachikuypi yanapasunaykipaq. Chaynapim runakunamantaqa manaña qamllañachu nanachikunki. 18Llaqtata kamachiy paqarin chuyanchakunankupaq, chaynapi aychata mikunankupaq. Paykunatam uyarirqani: “Maypiraq aycha mikunanchikpaq”, nispa waqasqankuta. Uyarirqanitaqmi “Egipto nacionpiqa allinmi kakurqanchik”, nisqankutapas. Chaynaqa, ñoqam paykunaman mikunankupaq aychata qosaq. 19Paykunaqa manam huk punchawllachu, iskay punchawllachu, pichqa punchawllachu, chunka punchawllachu nitaq iskay chunka punchawllachu mikunqaku. 20Aswanqa killantinmi senqankutapas lloqsinankama hinaspa millakuspa aminankukama mikunqaku. Ñoqa Tayta Dios paykunawan kachkaptiymi qepanchawaspanku qayllaypi waqaspa nirqaku: “¿Imapaqraq Egipto nacionmanta lloqsimurqanchik?” nispanku.
21Hinaptinmi Tayta Diosta Moisés nirqa:
Ñoqawanqa soqta pachak waranqa soldadokunam kachkanku. Qamñataqmi ninki: “Aychatam killantin mikunaykichikpaq qosqaykichik”, nispa. 22¿Maypitaq nana-nanaq ovejakuna, vacakuna kachkan, chaynapi nakaspay llapallanman mikuchinapaq? Lamar qochapi challwakunapas manam paykunamanqa haypanmanchu, nispa.
23Chaymi Moisesta Tayta Dios nirqa:
¿Pisi atiyniyuqlla kasqaytachu piensanki? Kunanmi yachanki nisqaykuna cumplikusqanta otaq mana cumplikusqantapas, nispa.
Qanchis chunka ancianokunamanta
24Moisesmi lloqsiruspan Tayta Diospa nisqanta runakunaman nirqa, hinaspam qanchis chunka ancianokunata huñuruspan carpapa muyuriqninpi sayachirqa. 25Tayta Diosmi puyupi uraykamuspan Moiseswan rimarqa hinaspam paywan kaq espiritumanta qanchis chunka ancianokunaman qorqa, chaymi paykuna profetizayta qallaykurqaku, chaymanta qepamanqa manañam profetizarqakuñachu.
26Eldadwan Medadmi chay qanchis chunka ancianokunawan listasqa kachkaspanku campamentopi qeparurqaku, ichaqa paykunamanpas hina campamentopim espíritu huntaykurqa, hinaptinmi profetizarqaku. 27Chaymi huk warma kallpaspan Moisesman willaykamurqa:
Eldadwan Medadmi campamentopi profetizachkanku, nispa.
28Hinaptinmi joven kayninmanta serviqnin Nunpa churin Josueyñataq Moisesta nirqa:
Taytáy, chay runakunata upallachimuy, nispa.
29Chaymi Moisés nirqa:
¿Imamantataq envidiakunki? Amalaya llapallan runankunaman Espiritunta Tayta Dios qoykunman, chaynapi llapallankuña profetizanankupaq, nispa.
30Chaymantam Moisés, Israelpa ancianokunapiwan campamentoman kutirqaku.
Codornizkunata Tayta Dios rikurichimusqanmanta
31Tayta Diosmi lamar qocha lawmanta wayrachimuspa codornizkunata aparachimurqa, chay animalkunam campamentopa muyuriqnin pampapi tiyarurqaku, hinaspam mastarikururqaku campamentomanta yaqa huk punchaw puriykama yaqa huk metro raktayuqta. 32Hinaptinmi tukuylla punchaw hinaspa tukuylla tuta chay animalkunata huñurqaku, paqarinnintin punchawpas huñurqakuraqmi. Asllaña huñuyninkupim sapakama chunka montonta huñururqaku, hinaspam campamentopa muyuriqninpi chakichirqaku. 33Aychata manaraqpas Israelpa mirayninkuna malliykuchkaptinkum Tayta Diosqa paykunapa contranpi piñakuruspa achka-achka runata wañurachirqa. 34Chayraykum chay sitiota suticharqaku “#11.34 Hebreo simipi Kibrot-hataava ninanqa “mikuysapakunata pampasqanku” ninanmi.Kibrot-hataava” nispanku. Chaynataqa suticharqaku mikuysapallaña runakuna wañuruptin chaypi pampasqankuraykum.
35Kibrot-hataavamanta lloqsispankum Hazerot lawman chayarurqaku, hinaspam chaypi samarurqaku.
ที่ได้เลือกล่าสุด:
Números 11: RCHQ2
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chuya Qellqa Revisión @ Sociedad Bíblica Peruana, 2012