Malk 8
8
Zezu abungule meku me batu mikama meku menayi (4000)
(Mat 15.32-39)
1Vʉsa vavu, batu beyitsi bavele kukene. Ni bangu beke dze ne bila bye udza, Zezu abanga bebingi bedzi atanda ne bangu ati: 2«Me yene batu ba tsesi, ya pika masi mesatu me bangu bidzi konami ni bangu nde bila bye udza. 3Ti ma vʉtise bangu mesombo me bangu myoyi sanzile, bangu nde bomole singa ye ulanda ne peyi, batu boko tima ye bangu beyinga ne ulayi.» 4Bebingi bedzi bakakule nedzi ati: «Bebomele bila bye ukaba batu ba besi se buma ye ikanye yi, niwi?» 5Zezu asuŋwule ne bangu ati: «Beyi bedzi ne pembe kwe?» Bangu tanda wangu ati: «Pembe uŋtsami.» 6Zezu atanda ne uŋkuka ne usunda uŋtsitsi se senze. Wangu aboko pembe mene uŋtsami avʉtise Nzambi live. Atsɨtaka pembe akaba ne bebingi bedzi ne ukabaka batu besi. 7Bangu bedze ne va baana be beswi. Zezu avʉtise Nzambi live ne beswi, yedzi etanda ne bebingi bedzi ne ukabaka beswi se. 8Batu badza nda bangu bitondo. Bebingi batolongo membele uŋtsami me biliyi bye beswi bye vʉka. 9Batu bedza bila byabu bedze ni meku me batu mikama meku menayi (4000). Yumana ye Zezu evʉtise bangu. 10Ye Zezu ebita se mbungu bane bebingi bedzi, yedzi etse se ilongo dze Dalɨmanuta.
Batu be yimvu ye Falizi basuŋwule ndimvu ye likimiyinda
(Mat 16.1-4)
11Batu be yimvu ye Falizi baya, ye bangu bebanda ne uwowe ne Zezu. Bangu befumba ni dendise wangu unlamvu, ye bangu betanda wangu ati: «Pika dzamvu dzotu dze likimiyinda busu ve besu! Yayu besu beyiba ati, Nzambi ni we meluma we.» 12Zezu asundise uŋwebe uneni, yedzi etanda ati: «Ye batu belolo bifumba ndimvu niyi? Me tanda beyi, umbu amene, batu belolo nde tse yene mamvu me likimiyinda tine mbotu.» 13Ye Zezu eteme kone bangu, abita se mbungu atse ngulu ye dzanga.
Bebingi be Zezu nde yuka dzamvu tine dzotu
(Mat 16.5-12)
14Bebingi bedzi badzimbise ne uboko pembe, bangu bedze si ne lipembe lotu se mbungu. 15Zezu atanda ne bangu ati: «Pikayi kebe! Dzayi ne utsengu ne yila yi landise pembe, ye batu be yimvu ye Falizi ne Elodi.» 16Ye bebingi bedze ne uwowe tima ye bangu ne bangu bedze nde pembe. 17Zezu ayene bangu bewowe, yedzi esuŋwule ne bangu ati: «Ye beyi biwowe tima ye beyi ati, beyi nde pembe niyi? Beyi besande yuka? Beyi besande yebise yuka? Beyi baya nde utsengu? 18Beyi bedzi ne mɨsa, ni beyi nde yene? Beyi bedzi ne meluyi, ni beyi nde yuka? Ne beyi nde yivɨle? 19Ndili yami ekabaka pembe itanyi ne batu iku dze mikama meku metanyi(5000), beyi betolongo membele me biliyi bye vʉka ni kwe?» Bangu bakalule ati: «Membele iku ne mole.» 20Zezu avele tanda ne bangu ati: «Ne yami ekabaka pembe uŋtsami ne batu iku dze mikama meku menayi(4000), beyi betolongo membele me biliyi bye vʉka ni kwe?» Bangu bakalule ati: «Membele uŋtsami.» 21Ye Zezu etanda ne bangu ati: «Nzii velolo beyi besande yuka?»
Zezu asaka muutu we mɨsa pii we Betsayida
22Zezu bane bebingi bedzi badzanga Betsayida, batu baya ne muutu we nde mɨsa, ye bangu bebondoko Zezu ne ubetime ne muutu mene. 23Zezu akwata muutu mene ne boko atse nedzi ikuvu dze mbuka. Asingite wangu meteyi kule mɨsa, asatse meboko kule yedzi. Zezu asuŋwule wangu ati: «We yene yila?» 24Muutu mene we mɨsa pii adzuvile mɨsa atanda nedzi ati: «Me yene batu, me yene bangu nda mili, ni bangu belanda.» 25Zezu avele satse meboko kule mɨsa me muutu mene, yedzi ebanda ne uyene. Wangu alunga ayene byesi kwalala, dzakene byedze ulayi. 26Zezu atanda nedzi ati: «Vʉtse sombo yowe, ni we nde tse se mbuka.»
Pyeli atanda ati Zezu ni Kɨlisɨti
(Mat 16.13-20; Luk 9.18-21)
27Zezu atse bane bebingi bedzi kwele ye membuka me bakaka ne Sezalee ye Filipi. Se peyi, wangu asuŋwule ne bebingi bedzi ati: «Ni me batu bitanda kule yami ni meza?» 28Bebingi bedzi bakalule nedzi ati: «Batu boko betanda ati we ni Zambatisi, boko ati we ni Eli, ne boko ati we ni Muutu we Nzambi moko.» 29Zezu asuŋwule ne bangu ati: «Ni beyi, ati, me niza?» Pyeli akalule nedzi ati: «We ni Kɨlisɨti.» 30Ye Zezu ewowe ne bangu ne pɨlaka ati: «Beyi nde tanda ne muutu tine motu vavu.»
Zezu atanda lɨku ledzi ne nda wangu itse nyuse se lɨku
(Mat 16.21-28; Luk 9.22-27)
31Yumana, Zezu abanda ne ulakɨse bebingi bedzi ati: «Uve we yikwene Muutu ayene membaba meyitsi. Bibutu, bekuŋwu be bekabi be bisemi bye Nzambi ne belakɨsi be bitsɨla betse lewe wangu. Bangu betse buuma wangu. Masi mesatu mesuta, yedzi itse nyuse tima ye bewaa.» 32Wangu etanda bangu mamvu mamu si kwalala. Ye Pyeli ebapa wangu kwele, abanda ne ukamve nedzi. 33Ni Zezu ayikwene, awaya bebingi bedzi akamve ne pyeli ati: «Tseke ulayi nami Sata! We nde metsimini nda me Nzambi, ni metsimini mowe medzi ni nda me batu.»
34Ye Zezu ebanga uŋkuka ne bebingi bedzi yedzi etanda ne bangu ati: «Ti muutu afumba binga me, wangu nde vele tsimene nyulu yedzi mene. Uve wangu mene abapa yedzi koko ye beliningise abinga me. 35Yayu, muutu we itse fumba lungise libɨku ledzi atse fiya langu, ni muutu we itse fiya libɨku ledzi utsɨna nami ne ne misisili mive atse lungise libɨku ledzi. 36Ti muutu abomo mitamvu myesi mye se senze, ni wangu ti afiya libɨku ledzi, usika ni uza? 37Yangu yila ye muutu ituka kaba ne usumba libɨku ledzi niyi? 38Yayu, muutu we idzi ne sonyi utsɨna nami ne mami iwowe busu ve batu belolo be nde bata bitsɨla bye Nzambi ne be nde kuuna Nzambi, we yikwene Muutu se atse yene sonyi nedzi, ndili yedzi itse ya se likʉma le Tata wedzi bane betuma be Nzambi be mipende.»
ที่ได้เลือกล่าสุด:
Malk 8: WUM
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
