Malk 7
7
Mamvu me bekoko bekala
(Mat 15.1-20)
1Batu be Falizi ne va belakɨsi be bitsɨla bayinga Zeluzalemi, ye bangu bekukene kone Zezu. 2Bangu bayene bebingi be Zezu boko bedza bila, nde swaka meboko nda bitsɨla bye Bezwifi bitanda. 3Yayu batu be Falizi ne Bezwifi besi, bedze ne ku ye uyebise swaka meboko ne ubanda dza bila, nda bekoko belakɨse bangu. 4Ndili ye bangu biyinga dzandu, bangu nde banda badza bila nde swaka meboko. Bangu bikuuna bitsɨla byoko bye kala bye bekoko bedzika ne bangu, nda biswaka bipele ne bikopi ne membiya me mingungu.
5Ye batu be Falizi ne belakɨsi be bitsɨla besuŋwule ne Zezu ati: «Ye bebingi bowe nde kuuna bitsɨla bye bekoko bekala niyi? Ni ye bangu bidza nde yebise swaka meboko niyi?» 6Zezu akalule ne bangu ati: «Beyi bedzi ne umpyeli! Ezayi edze ne mbingu yedzi ewowe kule beyi ne kumvu ye Nzambi. Ni batende ati:
“Batu ba, bekʉmise Nzambi si ne uŋdzumvu
ni unlima ŋwe bangu ŋwedzi ne ulayi ne Nzambi.
7Bangu bebondo me ne bisemi bye nde usika.
Mamvu me bangu bilakɨse ne ilila
medzi ni me bitsɨla bye batu.”»
8Zezu avele tanda ati: «Beyi bedzika bitsɨla bye Nzambi, ne ubinga me batu bilakɨse beyi.»
9Yedzi evele tanda ne bangu ati: «Ye beyi beyiba ni ulewe bitsɨla bye Nzambi, ne ubinga me batu bilakɨse beyi! 10Moyizi etanda ati: “Kuuna tata ne mama wowe.” Wangu avele tanda ati: “Ni muutu we isemene tata na mama wedzi, uve babuuma wangu.” 11Ni beyi, betanda ne batu ati we tuka tanda ne tata na ne mama wowe witi: “Yila yami biki kaba we, yangu ni ye Kolɨba avavu nati semi ye Nzambi.” 12Beyi besimba ni wangu ne ukaba tata ne mama wedzi yila. 13Ndili ye beyi bipika vavu, beyi betemise ni Iwowe dze Nzambi dzedze nde usika ne ulakɨse iwowe dze batu. Ye beyi bivele pika mamvu moko nda mamu.»
Mamvu midzika muutu ne limbindu
(Mat 15.10-20)
14Yumana Zezu avele banga uŋkuka atanda ne bangu ati: «Yukayi me, beyi besi yebisayi yuka dzi. 15Nde yila yi yinga ituna ne unyidzile se muutu, ye yangu yi kaba muutu limbindu, ni mamvu mipula se unlima ŋwe muutu ni mikaba limbindu.» 16Ti muutu adzi ne meluyi me uyuka wangu ayuka.
17Ndili ye Zezu eteme se uŋkuka ne unyidzile se ndaku, bebingi bedzi basuŋwule wangu me unlimvɨle ŋwaŋwu itanda. 18Zezu akakule ne bangu ati: «Ne beyi se nde utsengu? Ne beyi nde yuka? Ati, nde yila yi yinga ituna ne unyidzile se muutu, ye yangu yi kaba muutu limbindu. 19Ni bila nde nyidzile se unlima ŋwe muutu, ni bye nyidzile ni se moyi ŋwe muutu, yumana ye byangu bipula.» Zezu atanda vavu nati, betuka dza bila byesi. 20Zezu avele tanda ne bangu ati: «Mamvu mipula se unlima ŋwe muutu ni mikaba wangu limbindu. 21Ni metsimini mebi me yinga ni se unlima ŋwe muutu, ye mangu miluma wangu ne upika mamvu mebi nda ungondo, yiiba, ne ibuuma dze batu, 22ye bangu bikwa se mekali, bangu befumba si ubomo bye boko bidzi ne byangu, bangu bedzi ne umbivʉlu, bekʉta boko, bangu bepika mamvu me sonyi, bangu bedzi ne kʉna, bangu betukene batu, bangu bedzi ne izanga, bangu ni biwuka. 23Mamvu mebi mamu mesi me yinga ni se unlima ŋwe muutu ye mangu mikaba wangu limbindu.»
Ŋwatu widzi kaka Zwifi amekidze Zezu
(Mat 15.21-28)
24Yumana, Zezu ateme buma yayu, atse se ilongo dze Tili. Anyidzile se ndaku, wangu eke fumba ati batu beyiba ati wangu adzi wa, ni wangu eke tuka solime. 25Ni yedze ne ŋwatu motu, we ŋwana wedzi we ŋwatu edze ne umbiti se nyulu, ayuka batu bewowe ne Zezu, aya kwele yedzi, yedzi enaŋwe sɨna mekulu medzi. 26Ŋwatu wayu edze kaka Zwifi, bedziya wangu ni Fenisi se Sili. Wangu abondoko Zezu ne upanza umbiti ŋwedze se nyulu ye ŋwana wedzi we ŋwatu. 27Ni Zezu atanda nedzi ati: «Dzika baana bete bake banda dza bila bangu beyula. Nde uve ne uboko bila bye baana bete ne ukaba ne bemvandi.» 28Ye ŋwatu ekakule ne Zezu ati: «Kuŋwu, wedzi ne mbingu, ni mefusu me baana bete biyisa sɨna ne bemvandi bedza.» 29Ye Zezu etanda ati: «Utsɨna ne dzowe me wowe dzadzu, we tuka vʉtse sombo yowe, umbiti ŋwa pula se nyulu ye ŋwana wowe we ŋwatu.» 30Ndili ye ŋwatu evʉtse sombo yedzi, akobise ŋwana ŋwedzi we ŋwatu ayalime kule ilaka, umbiti ŋwedze ŋwa pula se nyulu yedzi.
Zezu asaka tsɨna ye nde wowe ye nde yuka
31Yumana, Zezu ateme ilongo dze Tili. Wangu asuta dze Sidoni. Aye vʉtse kwele ye dzanga dze Ngalilee ne ulinenge ilongo dze kumvu bingundu Iku. 32Batu baya ne Zezu muutu wedze nde yuka nde wowe uve, babondoko Zezu ati: «Satse meboko kule mulu ŋwedzi.» 33Zezu atse ne muutu mene ulayi ne uŋkuka, asomo milemvu se meluyi medzi, yedzi ebolise milemvu ne meteyi medzi mene abetise kule lilimi le tsɨna. 34Ye Zezu esikule mɨsa ikulu, asundise uŋwebi, yedzi etanda ne muutu mene ati: «Efata!» Avavu ne utanda ati: «We dzuve.» 35Palikɨse, ye meluyi me tsɨna me dzuve, ne lilimi la nyangwe muutu mene awowe uve. 36Zezu asimba batu ati: «Beyi nde tanda ne muutu tine motu.» Ni ndili yedzi edze ne usimba bangu, ni ye batu bedze ne uyebise tanda me Zezu epika. 37Batu bakima kata kima amene, ye bangu betanda ati: «Mesi medzi ipika medzi ni uve amene! Wangu adzʉvile meluyi me batu be nde yuka, awowise bitsɨna!»
ที่ได้เลือกล่าสุด:
Malk 7: WUM
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
