Romə 8
8
Ta zu gbəgboŋ Simbeɗ Ifraya
1Zə rum, mgbaŋ ni nə, dan ɓok cu wa sôwâ məni ɓa ɗaw kə Zezu Kris nə mi. 2Zə dan dlay Simbeɗ mə Kəleŋ məni wə ne nyî mə də hâ mba ne zə ɓa mba kə Zezu Kris nə siɗ nan mbə du dan dlay kwa mə bro' kə mara. 3Ifray gi kwa məni dan dlay Moyizə cu gak gi mi zə kpak tu sumra' gi dan dlay rum faŋ tətâ: Ifray ɓok dan wa kwa mə bro' məni wə du kpak tu sumra'a. Mum gi ndəna' kəri məni mum sin Vay um məni mbə kə kpak tu ra' nji kə kpak tu sumra' mə bro', kədan mum faŋ kwa po' fur zə kwa mə bro'o. 4Ifray gi ndəna' kədan kwa mə njeŋ məni dan dlay wə wa' nə mbə gi wə du mba, namba sôwâ məni cu ta ce' ndə kpak tu mba wə wa' nə mi, ama məni wə ta ce' ndə Simbeɗ mə Kəleŋ wə wa'a. 5Sôwâ məni wə ta ce' ndə məni kpak tu nday wə wa', kwa wa' rum wə suk gbəgboŋ wa dan ɗik vunduk nday, ama sôwâ məni wə ta ce' ndə məni Simbeɗ Ifray wə wa', kwa wa' rum wə suk gbəgboŋ wa dan ɗik vunduk ndaya: 6Sôwâ məni wə ar kwa wa' kpak tu nday nə suk gbəgboŋ wa dan ɗik vunduk nday, handay də mara. Ama sôwâ məni wə ar kwa wa' Simbeɗ Ifray nə suk gbəgboŋ wa dan ɗik vunduk nday, Ifray də ne nyî mə də hâ kə heɓ ne kə sum rumu. 7Sôwâ məni ar kpak tu nday suk gbəgboŋ wa dan ɗik vunduk nday, handay sum sî Ifraya. Handay cu ta zə dan dlay Ifray mi. Kəzin', handay cu gak mi! 8Sôwâ məni wə ta zə kpak tu nday, handay cu gak gi kwa məni wə kəɗam tu Ifray mi. 9Ama mə hi, hi cu ta ce' ndə məni kpak tu ri wə wa' nə mi, ama hi wə ta ce' ndə məni Simbeɗ mə Kəleŋ wə wa', zə Simbeɗ Ifray suk wə vunduk ri. Swə məni cu kə Simbeɗ Kris mi, bə rum cu mə Kris mi. 10Ama Kris la' suk wə vunduk ri si, tu ri mar zə kwa bro', ama Simbeɗ kə nyî wə vunduk ri, zə Ifray gi ni njeŋ kor rumu. 11Simbeɗ swə məni par Zezu mbə mar la' suk wə vunduk ri si, swə məni par Kris mbə mar nə də ne nyî kə tu ri məni wə mar zə Simbeɗ um məni suk wə vunduk ri#1Ko 3.16.
12Ndəna' ta', daw ba man, namba kə bal wa mba, ama bal rum cu zə namba ta ce' ndə məni kpak tu mba wə wa' nə mi. 13Zə hi la' wə ta ce' ndə məni kpak tu ri wə wa' nə si, hi də mara. Ama hi la' ci sin məni kpak tu ri wə gi nə kə Simbeɗ mə Kəleŋ si, hi də ke kə nyî mə də hâ. 14Sôwâ daŋ' məni wə ta zə Simbeɗ Ifray, handay daw Ifraya. 15Zə Simbeɗ məni Ifray ne ni, mum cu mi gi faŋ bek ɓay mi gi ne wəlok mi, zawa, mum mi gi faŋ daw Ifray, ɓay mba ne vari kədan namba faŋ ɗe Ifraya: «Aba, Bəba#Mak 14.36; Gal 4.6!» 16Simbeɗ Ifray kə tu rum wə in ne kə simbeɗ mba i namba daw Ifraya. 17Zə namba daw um, namba də ti bayɗa məni Ifray kawvun wa rum kə sôwâ umu. Ɓay namba də ti bayɗa Ifray wa nji ɗaw kə Kris. Zə namba la' wə ce boni kə rum si, namba də gay' kə rum wə du mbra' um ta'a.
Mbra' məni wə də mba
18Na kar i boni məni namba wə ce mgbaŋ ni nə cu gak kənji' kə mbra' məni Ifray wə də ta' mba ne kofo nə mi. 19Kwa daŋ' məni Ifray gi wə ji bəka məni Ifray wə də ta' ne kə daw umu: Kwa rum daŋ' wə ji bəka rum kə mê' ɓayrumu. 20Zə Ifray ɓok dan wa kwa daŋ' məni mum gi, ɓay handay faŋ kwa məni cu kə sin mi, kwa rum cu gi zə handay wə wa' ndəna' kə tu nday mi, ama kwa rum gi zə Ifray wə wa' ndəna'a. Ama kə ndi nə daŋ', handay wə ji dan rum kə reɗ vunduk, 21bəka məni Ifray də siɗ kwa daŋ' məni mum gi mbə du vun nê' məni wə nday ɗənok, ɓay handay də fe wa tu nday ce' ndə daw Ifraya. 22Namba we si: Mgbaŋ ni nə, kwa daŋ' məni Ifray gi wə ndəma' kə boni ce' ndə məni ma wə ce kəri məni ta wə vra'a. 23Ama kwa daŋ' məni Ifray gi cu ndəma' taw mi, namba sôwâ məni fe Simbeɗ mə Kəleŋ məni mum ne mba ce' ndə kwane cop wə du kwane um, namba wə ndəma' wə vunduk mba ta', kə ji ri məni Ifray wə də tumwa mba ɓay wə də mba gi faŋ daw umu#2Ko 5.2-4. 24Zə namba njay vunduk mba wa dan rum, namba fe siɗi. Sôwâ la' we kwa məni handay njay vunduk nday wa rum nə si, handay cu njay vunduk nday wa rum za' mi. Sa nə wə cin vunduk rum wa kwa məni mum we si nə su? 25Ama namba la' wə njay vunduk mba wa kwa məni namba cu we mi nə si, namba wə car ŋgəɗiŋ' kəri məni namba wə ji kwa rumu.
26Ndəna' ta', Simbeɗ mə Kəleŋ wə mbə kawɓa mba, namba sôwâ mə tətâ, zə namba cu we in dan kə Ifray kə vari rum mi. Ama Simbeɗ kə tu rum wə in dan kə Ifray zə mba kə ndəma' məni swə cu gak in kə vun mi. 27Ɓay Ifray məni wə we dan ɗik vunduk sumra', mum wə we kwa məni Simbeɗ mə Kəleŋ wə o, zə Simbeɗ wə o kwa zə sôwâ mə kəleŋ ce' ndə məni Ifray wə wa'a.
28Namba we si wə du kwa daŋ', Ifray wə gi sin mə ɓay zə sôwâ məni wə um ba, sôwâ məni mum ɗe nday ce' ndə məni vunduk rum wə wa'a. 29Zə sôwâ məni Ifray da' nday ɓa' si, mum ɗik wə vunduk rum ɓa' si kədan mum nday gi ra' nji kə Vay mə mbri wə du raw daw ba. 30Sôwâ məni Ifray ɗik dan wa nday wə vunduk rum ɓa' si, mum ɗe nday ta'a. Ɓay sôwâ məni mum ɗe nday, mum gi nday njeŋ kor rumu. Ɓay sôwâ məni mum gi nday njeŋ kor rum, mum ɓul mbra' um kə ndaya.
Bə Ifray mə mbri
31Dan rum la' ndəna' si, namba də in ma su? Ifray la' kəta' kə mba si, sa gak mba tak su? 32Mum cu ɗe i wa Vay um mi, zawa mum ar num ce' ndə kwa po' fur zə mba daŋ', gi ma mum cu də mba ne kwa məsin daŋ' kə Vay um mi su? 33Sa də tum sem sôwâ məni Ifray da' nday nə su? Bə rum cu mi, zə Ifray kə tu rum wə nday gi njeŋ kor rumu. 34La' ndəna' si, Sa də ɓok dan wa nday su? Bə rum cu mi, zə Zezu Kris nə swə məni mar, pâ daŋ' rum Ifray par num mbə mar, ɓay mum ta suk wə ɓa fun Ifray, ɓay mum wə o Ifray zə mba. 35Kwa mi gak ɓul mbok mba kə bə Kris nə su? Boni gak su? Dan ɗik su? Sôwâ məni wə keɓ zu mba su? Mê' su? Ca su? Cik su? Ko masəlam su? 36Ce' ndə məni Dan rum wây' wə du ɗerwa: Bəka daŋ', sôwâ wə keɓ kədan handay mba ci zə ru. Handay mba gi ce' ndə cime məni sôwâ kaw kədan handay də ri fol kə ndi#Nye 44.23. 37Ama wə du kwa rum daŋ', namba gay' gaŋsem kə swə məni bə mba. 38Zə na we si njeŋe: Ko mar, ko nyî, ko sum sin Ifray mə wafray, ko usiya məni gay' jwə kə gbəgboŋ mbok fray kə nya, ko kwa mə mgbaŋ ni nə, ko kwa məni wə də mbə, 39ko gbəgboŋ mə wafray, ko gbəgboŋ mə zə nya, ko kwa məsin daŋ' məni Ifray gi, kwa ɗaw du nday cu gak ɓul mbok mba kə bə məni Ifray ta' ne mba kə Bârî mba Zezu Kris nə kpe mi.
ที่ได้เลือกล่าสุด:
Romə 8: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
