Romə 5
5
Zezu gi mba njeŋ ɓay namba gay' heɓ kə Ifraya
1Ifray wə mba kar njeŋ kor rum zə namba ve Kris, zə rum mgbaŋ ni nə, namba gay' heɓ kə rum zə Bârî mba Zezu Kris. 2Zə namba ve Zezu, mum ne vari ne mba kədan namba ke wə du ɓay Ifray, ɓay mgbaŋ ni nə, namba gay' wə du ɓay rum ɓay namba wə tuk kəɗam zə namba wə ji, i namba wə də gay' wə du mbra' Ifraya. 3Cu ndəna' taw mi, ama namba wə tuk kəɗam wə du boni mba ta', zə namba we si boni rum wə gi swə reɗ vunduku. 4Kə reɗ vunduk, swə gak car ŋgəɗiŋ' kor kwa məni wə um ɓu, ɓay wə du car ŋgəɗiŋ', swə gak cin vunduk rum wa kwa məni wə də mba. 5Swə məni cin vunduk rum wa kwa məni wə də mbə, kwa rum cu kə zur i bə rum mi, zə Ifray cin bə um wə vunduk mba kə Simbeɗ um mə Kəleŋ məni mum ne mba.
6Kəri məni namba ke tətâ ɓo, Kris mar zə sum kwa bro', mum mar kəri məni Ifray para. 7Kəcik kədan swə fe mar zə swə mə njeŋe. Məsin swə gak kaw vunduk kədan mum mar zə swə mə ɓaya. 8Ama Ifray ta' i mum bə mba dle tu si: Kəri məni namba ke sum gi kwa mə bro' ɓo, Kris mbə mar zə mba. 9Ɓay mgbaŋ ni nə, Ifray gi mba njeŋ kor rum zə mar Zezu, ɓay pâ daŋ' rum, Zezu də mba siɗ kor bak Ifraya. 10Namba ke sum sî Ifray, ama mum gi mba faŋ bây um zə mar Vay um ɓay pâ daŋ' rum, mgbaŋ ni nə zə namba faŋ bây um, namba də siɗ zə nyî Vay umu. 11Cu ndəna' taw mi, ama namba wə tuk kəɗam kə Ifray zə Bârî mba Zezu Kris məni gi mba faŋ gay' heɓ kə Ifray mgbaŋ ni na.
Adam ɓay Kris
12Kwa mə bro' mbə wa nya zə swə ɗaw, Adam, ɓay mar mbə zə kwa mə bro' rumu. Ndəna' mar rum nde wa sôwâ daŋ', zə handay daŋ' gi kwa mə bro'o#Tzk 3.6. 13Cop, kəri məni Ifray cu ne dan dlay ne kə Moyizə məto', kwa mə bro' kəta' wə wa nya, ama zə dan dlay cu mbə məto', Ifray cu tle fur kwa mə bro' mi. 14Ama daka ri Adam hâ day ri Moyizə, mar suk gbəgboŋ wa sôwâ daŋ', ko wa sôwâ məni cu gi kwa mə bro' ce' ndə məni Adam gi kəri məni mum cu mun vun Ifray mi nə mi. Adam nə foto swə məni wə də mba.
15Ama handay cu vun nji mi, zə kwane məni Ifray ne uray nə cem kə kwa mə bro' məni Adam gi. Kəzin', sôwâ juk mar zə kwa bro' swə ɗaw, Adam. Ama ɓay Ifray nə ɓayrum pâ kwa mə bro' rum si, ɓay kwane məni Ifray ne uray ne kə sôwâ juk zə swə ɗaw, Zezu Kris, nə pâ kwa mə bro' rum si ta'a. 16Ɓay kwane Ifray nə gi sin cem kə kwa mə bro' məni swə ɗaw gi: Zə dan ɓok məni mbə zə kwa mə bro' swə ɗaw nə cin dan mə bro' wa sôwâ məni gi kwa mə bro' ama kwane məni Ifray ne uray kəki kwa mə bro', nə ra' dan mə bro' wa sôwâ məni gi kwa mə bro' juk ta rəka. 17Kəzin', mar mbə suk gbəgboŋ wa sôwâ daŋ' zə kwa mə bro' swə ɗawa. Ama zə swə ɗaw, Zezu Kris, namba fe kwa mə pâ daŋ' rumu. Sôwâ daŋ' məni wə fe ɓay Ifray mə mbri kə njeŋ um məni mum ne uray, handay də ke kə nyî mə də hâ zə Kris. 18Zə swə ɗaw, Adam, gi kwa mə bro', sôwâ daŋ' za' dan ɓok wa nday, ndəna' ta', zə swə ɗaw, Zezu Kris, gi sin mə njeŋ, Ifray ra' dan mə bro' wa sôwâ daŋ' ta rəka ɓay mum ne nyî mə də hâ ne ndaya. 19Zə swə ɗaw cu mun vun mi, sôwâ juk faŋ sum gi kwa mə bro'o. Ndəna' ta', zə swə ɗaw mun vun, Ifray gi sôwâ juk njeŋ kor rumu. 20Ifray ne dan dlay kədan kwa mə bro' dlər də kofo. Ama wə ri məni kwa mə bro' wə dlər də kofo, ɓay Ifray wə dlər də kofo ɓayrum pâ kwa mə bro' rum si. 21Zə ce' ndə məni kwa mə bro' suk gbəgboŋ wa sôwâ kə mar, ndəna' ta', ɓay Ifray suk gbəgboŋ wa sôwâ kə njeŋ kədan mum mba ne nyî mə də hâ zə Bârî mba Zezu Kris.
ที่ได้เลือกล่าสุด:
Romə 5: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
