Romə 4
4
Kwa məni Abraham gi nə wə ta' kwa mba ne
1Namba də in ma wa ba mbri mba Abraham su? Mum fe mi zə i mum sumra' su? 2Ifray la' gi Abraham njeŋ kor rum kəzə zə sin mə ɓay cem cem məni mum gi kuni si, Abraham gak mbra' tu rumu. Ama mum cu gak mbra' tu rum kor Ifray mi. 3Dan rum wây' wə du ɗerwa: «Abraham ve Ifray, ɓay Ifray kar num ce' ndə swə mə njeŋ kor rum zə mum ve dan umu#Tzk 15.6; Gal 3.6.» 4Swə məni wə gi sin, bə rum fe bal cik umu. Bə rum cu in bal cik rum ce' ndə kwafe mə uray mi, ama ce' ndə bal cik zə sin məni mum gi. 5Ama swə məni cu cin vunduk rum wa sin məni mum wə gi nə mi, ama bə rum cin vunduk rum wa Ifray məni wə kar swə mə bro' ce' ndə swə mə njeŋ, Ifray də kar bə rum ce' ndə swə mə njeŋ kor rum zə mum ve numu. 6David in ndəna' ta' kəri məni mum in dan wa kəɗam məni swə wə tuk, swə məni Ifray kar ce' ndə swə mə njeŋ kor rum dan sin umu:
7«Kəɗam zə sôwâ məni Ifray vrum sin mə bro' nday,
ɓay pik kwa mə bro' nday ta rəka!
8Kəɗam zə swə məni Bârî cu in kwa mə bro' um
wa rum mi.»
9Kəɗam rum wə wa sôwâ məni tagura taw su? Mum cu zə jeɓ ta' mi su? Namba ke in i «Ifray kar Abraham ce' ndə swə mə njeŋ kor rum zə mum ve dan umu.» 10Kwa rum gi kə ma su? Kəki məni Abraham tagura su? Ko kəri məni mum kə jeɓ ɓo su? Kwa rum cu gi kəki gura um mi, ama kəri məni mum jeɓe. 11Abraham tagura kəki rum seŋe. Gura nə ce' ndə lamba məni ta' i Ifray kar num ce' ndə swə mə njeŋ kor rum zə mum ve dan um kəri məni mum kə jeɓe. Ndəna', Abraham faŋ ba sôwâ daŋ' məni ve Ifraya. Ifray kar nday ce' ndə sôwâ mə njeŋ kor rum, ko kəri məni handay cu tagura mi#Tzk 17.10. 12Mum ba sôwâ məni tagura ta', cu zə gura nday taw mi, ama zə handay ve dan Ifray ce' ndə məni ba mba Abraham ve dan Ifray kəri məni mum ke jeɓe.
Sôwâ fe dan kawvun Ifray kəri məni handay ve Kris
13Ifray kawvun kə Abraham kə daw rawti rum i handay də ti nya ce' ndə bayɗa. Ifray cu kawvun kə rum zə mum ta zə dan dlay mi, ama zə Ifray kar num ce' ndə swə mə njeŋ kor rum zə mum ve dan umu#Tzk 17.4-6; 22.17-18; Gal 3.18. 14Ifray la' ne bayɗa kəzə ne kə sôwâ məni wə ta zə dan dlay taw si, dan məni handay ve nə uray ɓay dan məni Ifray kawvun wa rum kə nday cu kə sin mi. 15Zə dan dlay wə mbə kə bak Ifray, ama wə ri məni dan dlay cu han mi, sôwâ cu gak we kwa mə bro' nday mi. 16Ifray kawvun kə Abraham zə mum ve dan umu. Mum gi ndəna' kədan dan məni mum kawvun wa rum nə ke kwane Ifray mə uray, ɓay kədan dan məni mum kawvun wa rum nə ke kə sin zə daw rawti Abraham daŋ', cu zə sôwâ məni wə ta zə dan dlay taw mi, ama zə sôwâ məni wə ve Ifray ce' ndə məni Abraham ve dan rum ta'a. Abraham nə ba mba daŋ'ŋ#Gal 3.7. 17Ce' ndə məni Dan rum wây' wə du ɗerwa: Na gi nu faŋ bəba zə saŋ rawa. Mum faŋ ba mba kor Ifray zə mum ve dan Ifray məni wə ra' sôwâ mbə mar, ɓay wə gi kwa məni cu mi, faŋ kwa məni kəta'a. 18Ko kəri məni Abraham cu kə ri kədan mum cin vunduk rum wa dan Ifray mi, mum ve dan rum ɓay cin vunduk rum wa dan rumu. Zə rum, mum faŋ «bəba sôwâ rawa.» Ce' ndə məni Dan rum wây' wə du ɗerwa: Raw daw rawti ru də ke ndani na'a. 19Kəri rum, Abraham kə kim kisi. Ama kəri məni mum wə ɗik dan wa tu rum məni faŋ ce' ndə mar, ɓay wə ɗik dan wa Sara məti car lər, mum cu ar dan məni mun ve nə mi. 20Mum cu ar dan məni mum ve nə mi, ɓay mum cu way dan wa dan məni Ifray kawvun wa rum kə rum nə mi. Zawa dan məni mum ve nə ne gbəgboŋ ne num, ɓay mum gi mbra' ne kə Ifraya. 21Mum we kə tu rum njeŋ i Ifray gak gi kwa məni mum kawvun wa rumu. 22Zə rum, Ifray kar Abraham ce' ndə swə mə njeŋ kor rum zə mum ve dan umu. 23Ama dan məni wə ini: Ifray kar Abraham ce' ndə swə mə njeŋ kor rum, dan rum cu wây' wə zə Abraham taw mi, 24ama wə zə mba ta', namba sôwâ məni Ifray də mba kar ce' ndə sôwâ mə njeŋ kor rum zə namba ve swə məni par Bârî mba Zezu mbə mara. 25Ifray ar num mar zə kwa mə bro' mba ɓay mum faŋ par num mbə mar kədan mum mba gi njeŋ kor Ifraya#Esa 53.4-5.
ที่ได้เลือกล่าสุด:
Romə 4: KMN
เน้นข้อความ
แบ่งปัน
เปรียบเทียบ
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Le Nouveau Testament et Psaumes en Peve © Alliance Biblique du Tchad, 2014.
