Exodo 33
33
B'a lu'um yalo oj ya' ja Dyosi
1-6Ja Dyosi, ti yala yab' ja Moisesi:
—A'kan ja lu'um iti, elan sok ja kristyano jumasa it wa eluke jan b'a Egipto, ti la wajyex b'a lu'um it kaloj yabye ja Abrahami, ja Isaak sok ja Jacobi. Ja ke'n kaloj lek yabye ja lu'um jawi, ja'ni sb'a ja yuntikile'i. —Jel ti tik'an lek, jel ja jastik junuki. Oj jek a mok ja kanjel b'a oj sje'a wi, ja kristyano ma' tey tiwi, yuj ja mi wa sk'u'anone oj ch'ak jnutse' ele.
—Ala yab' ja israelenio jumasa, ja ke'n mi oj wajkon soke: Cho sle'aweto k'a ja smule'i, yujni mi sna'a jastal aye'a, moje waj ch'ay a na'jelex b'a b'ej, jel lek a'wik elt'an ja wa wujex sok ja wa likchikinexi. Tsa'an ti oj kil ke'n jas oj k'u'luka.
Yaj ni yala jastal it ja Moisesi, jel och ja sneb'jel yujile ja israelenio jumasa, yuj ja tsatsni komjiye yuj ja Dyosa. Man ya'ni ja jawi, mixani ma slapa yujile ujala, sok mini likchikinal.
Ja na'its k'u'lub'al sok k'u'utsi jun xta lajane
7Ja Moisesi, sk'u'lan jun yal na'its k'u'lub'al sok k'u'uts b'a spatik yuj ja tuk jumasa, ya sb'i'iluk na'its k'u'lub'al sok k'u'uts jun xta yab'al. Ta ay k'a ma wa sk'ana oj sk'umuk ja Dyosi, t'ilan oj eluk ja b'ay ja tuk jumasa, ti oj waj b'a na'its k'u'lub'al sok k'u'uts jun xta yab'ali. 8Yaj ni wax och ja Moises ja tiwi, ja tuk jumasa ti wa xch'ak kanuke tek'an b'a sti snaje sok ti'ni toj wa sk'elawe man wa xoch b'a yoj na'its k'u'lub'al sok k'u'uts ja Moisesi. 9-10Yaj ni ochta b'a yoj na'its k'u'lub'al sok k'u'utsi, juts'in wa xko' ja asoni wa smaka el ja b'a wax ajyi ocheli; yaj ni wa xyilawe'i, ti wa xch'ak ko'uke mek'an ja b'a wax ajyi ocheli, jaxa Moisesi, ja' wax lo'lani sok ja Dyosi.
11Ja Moises ja yajni wa sk'uman sb'aj sok ja Dyosi, yujni ti' nupnup sat aye'a, jach' jastal wa sk'uman sb'aj sok jun yamigo. Tsa'an kumxi ja Moisesi, jaxa Josueji, yuj ja ja'ni skoltanumi, mix el najat ja b'ay ja na'its k'u'lub'al sok k'u'uts jawi.
Ja Moisesi, sk'uman ja Dyosi
12Ja Moisesi, ti yala yab' ja Dyosi:
—We'n a wala kab' oj je'yi b'a oj wajuke ja kristyano jumasa iti, mi a wala kab' machunk'a oj ja jek jmoki. Cho a wala kab' jel waxa yajtanon sok jel jaman wa waltsil jmoki. 13Ta jach' k'a merani, ala kab' jasunk'a oj k'u'luk b'a oj b'ob' jyajtaya ja ke'n, sok jastal oj b'ob' a niwan k'ujolukon. Mok ch'ay a k'ujol ja kristyano jumasa iti, a b'aj we'na mi jb'ajuk ke'na.
14Ja Dyosi, ti yala'a:
—Ke'n oj wajkon a mok, oj ni ka jijlana, —xchi ja Dyosi.
15Ti cho yala ja Moisesi:
—Kechan ta mik'a oj ja mojtayotikon, ta jachuki mok wa elkotikon ja ili. 16Ta mik'a oj ja mojtayotikoni ¿Jastal oj na'tikon waxa koltanotikon b'a? kechani ja jachuki, oj b'ob' jna'tikon pilanotikon ja ke'ntikon yuj ja tuk jumasa swinkil ja lu'um iti.
17Ja Dyosi, ti yala'a:
—Lek ay, oj jmojtayex, yuj ja smeranil wax k'anawa'i, cho wani xka'wa niwan jk'ujola.
18Ja'yuj ja Moisesi, ti yala yab' ja Dyosi:
—Je'a a b'aj ki', —xchi.
19Jaxa Dyosi, ti yala'a.
—Ja ma wax k'ana ja ke'n jel lekon sok. Ja'yuj oj je'a wi' jastal jel tsamal wala lijpiyon, sok oj ka'a na' ja jb'i'ili. 20-21Kechan oj kala wab'i, mi oj b'ob' a k'elki ja jsati, yuj k'a chikan ma oj sk'elki ja sat ja ke'n oj ni chamuka. Ja'yuj ti la kan tek'an b'a sat ja ton it tey b'a jts'e'eli. 22Yaj ni la ekyon ja b'aya'i, ti oj ka ko'an lapan b'a skol ja ton jawi, oj mak ja wa sat sok ja jk'ab'i, man ek'yonta. 23Tsa'an oj ka eluk ja jk'ab'i, oj b'ob' a wilki ja jpatiki; ja jsati mi oj b'ob' a wile.
ที่ได้เลือกล่าสุด:
Exodo 33: YABD
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© Sociedad Bíblica de México 2021