MARKA 7
7
Thugousiah Thu A Dotna
(Mat 15.1-9)
1Huan Pharisaite leh laigelhmite lak a mi kuate hiam, Jerusalem a kipan akiang ah ahong kikhawm uhi. 2Huaite'n nungzui khenkhatte'n khut ninpi a tanghou anek uh amu ua, nin, chih tuh, sil lou, chihna ahi.
3Pharisaite leh Judate tengteng in upate thugousiah apom tinten ziak un akhut uh hoihtak a asil kei uleh ane ngei kei uhi. 4Dawr mun a kipan a apai un leng akisil phot kei uleh ane ngei kei uhi. Huan thugousiah dang tampi achin uh a-om, nou, bel, taubelte sil thute ah.
5Huchi in Pharisaite leh laigelhmite'n, “Bang achia upate thugousiah bang a na nungzuite om lou a, khut ninpi a tanghou ne ahi ua,” chi in adong uhi.
6Ama'n akiang uah, “Isai in nou milepchiahte thu a na genkhol dik hilhial ve,
‘Hiai mite'n amuk un ahon zahtak ua, alungtang un hon gamlat uh’ achi hi.
7‘Mihing thupiakte asinsak lel ziak un ahon biak uh athawn ahi,’ chih gelh bang in.
8“Pathian thupiakte nelhsiah in mihing thugousiah na len tinten ua ei ve,” achi hi.
9Akiang uah, “Na thugousiah uh na zuihtheihna ding ua Pathian thupiakte na deih louh uh zaw, lem na thei hial ve ua. 10Mosi in, ‘Na nu leh na pa zahtak in,’ ‘Kuapeuh anu hiam apa hiam gensia si mahmah hen,’ achi a; 11nou hichibang in na chi ua, mi'n, anu hiam, apa hiam kiang a, ‘Na hon phatuampihna ding Korban ahita,’ achih, (huai tuh Pathian kiang a piak, chihna ahi). 12Anu a ding hiam, apa a ding hiam in bangmah hihsak na phal nawn kei nak uh. 13Na thugousiah uh na piak sawnsawnna un Pathian thu bangmah lou na suah uhi; huai bang thil tampi na hih uh,” achi hi.
Mihing Hihninte
(Mat 15.1-9)
14Huan mipite asam nawn a, akiang uah, “Na vek un ka thu ngaikhia unla, theisiam un; 15mihing polam a kipan asung a lut amah hihnin thei bangmah a-om kei; mihing sung a kipan a hong pawt, huaite mihing hihnin ahi zaw hi. 16Kuapeuh zakna ding bil nei in, za hen!” achi hi.
17Mipite inn a alutsan nung in anungzuite'n gentehna thu amah adongchian uhi. 18Ama'n akiang uah, “Nou leng huchi tel a theihsiamna nei lou na hi uh maw? Bangpeuh polam a kipan a mihing sung a lut in amah ahihnin thei kei chih na thei kei ua hia? 19Alungtang sung a lut lou a, agilpi sung a alut zawk ziak in leh dailenna a pawtkhe mai ahih ziak in,” achi a. (Huai tuh an chiteng asiang, achihna ahi).
20“Mihing sung a pan hong pawt, huai ngeingei in mihing ahihnin nak ahi. 21Mihingte sunglam lungtang a kipan in, ngaihtuahna giloute ahong pawt nak hi; 22kingaihna, guktakna, tualthahna, angkawmna leh enna, gitlouhna, khemhatna, bevenna, hazatna gensiatna, kisaktheihna leh haihuainate ahi. 23Hiai thil giloute tengteng sunglam a kipan ahong pawt a, mihing ahihnin nak hi,” achi hi.
Zentel Numei Hihdamna
(Mat 15.21-28)
24Huan athou a, huai a kipan in Tura leh Sidon uk ah apaita hi. Inn ah alut a, kuamah theih adeih kei a; himahleh akisel thei tuan kei. 25Huchi in numei khat, atanu naupang chik dawi nin pai in, atanchin ana za a, akhebul ah abokkhup hi. 26Huai numei tuh Grik mi ahi a, Sirophoinisia gam a piang ahi. Ama'n atanu sung a kipan a dawi delhkhe ding in angen hi. 27Ama'n akiang ah, “Tate hong vah masa uhen aw; tate tanghou laksak a uite kiang a paih kilawm lou ahi,” achi hi.
28Numei in akiang ah, “Toupa, hih zaw ahi na a, himahleh dohkan nuai a uite'n leng tate tanghou nen ane zel sam ve uah oi,” chi in adawng hi.
29Ama'n, akiang ah, “Na thugen ziak in paita in; na tanu sung a kipan dawi apawtta hi,” achi hi.
30Huan a-inn ah apaita, atanu, dawi in apawtkhiaksan, lupna a lum ava muta hi.
Bilngong Pau Thei Lou Hihdamna
31Huan Tura gam a kipan apawt nawn a, Sidon khua tawn in Dekapolis gam paikan in Galili tuipi atungta hi. 32Mi khat nangong, pau leng pau kichian thei lou akiang ah hon tonpih ua, atung a khut koih ding in angen uhi. 33Ama'n mipi lak a kipan in amah kia in apituam a, akhutzungte in abilsung akhoih a, chil sia in alei akhoihsak hi. 34Van lam en in akhoisa huthut hi. Huan akiang ah, “Ephatha,” achi a; huai bel, “Kihongta in,” chihna ahi.
35Huchi in abilte hong kihong a, aleigakna leng ahong kiphel a, chiantak in apau theita hi. 36Akiang uah, kuamah hilh lou ding achi bikbek a; himahleh anak kham peuhleh, anak tangkoupihzaw sem uhi. 37“Ama'n bangkim hoihtak in ahih a; nangongte nangawn apausak zel,” achi ua, lamdang asa mahmah uhi.
ที่ได้เลือกล่าสุด:
MARKA 7: PAITBSI
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
